1 Corinthians 3 - Patamuna New Testament Revised

Katù Yapyoto Ton

¹ Utonpa yamùk, uselupa pùla iwechi màlà àpokonpe'nokon Akkwalù yesan pokonpe uselupa kasa, tùse kappon yeselu yau wema'nà kasa, mule yamùk lùkkwà Christ yau nai'nannùk kasa.

² Manak ke elepatantàu Iulà, sa'man kùyali ke pùla, masapùla yanùmù auya'nokon yeselùkeppùla ewechi kon pàk. Walà tùse yanùmù auya'nokon yeselùkeppùla lùppù messatàik.

³ Wolù ponalok kon kasa lùppù. Masapùla àkùlùmàluntok kon molopai àusàlàmatok kon wechi àkklottau'nokon pàk. Màlà uya ken na' sàlà wolù yawon kappon yamùk pe ewechi kon ànkuppai ewettok kon yawàlà yekama pen màlà?

⁴ Masapùla tewinannà uya, “Paul ya'lon Iulà,” te molopai tùulon uya, “Apollos ya'lon Iulà,” te. Kappon yeselu neken ku'nài nan kasa na' ewelaika kon pen màlà?

⁵ Ànùk ken uchi mùkkàlà Apollos? Molopai ànùk ken mùkkàlà Paul? Katù yapyoto ton neken nen mùkyamlo, ene'nàippù kon iwinàkàik ailon te kon pa. Itepulu nùtùlùssan mùkyamlo iponalà iwotokoyi.

⁶ Itenappà pàmàppù uya màlà, Apollos uya ikipùppù, tùse Katù mùkkàlà iwattatoppe iku'nàippù.

⁷ Ipànnài molopai iki'nài tawonnan mùkyamlo yà'là ton kulu pen. Tùse Katù neken, mùkkàlà yà'làlà yek wattatoppe iku'nài.

⁸ Tùpatalà'ne là ipànnài molopai iki'nài tawonnan wechi pen nai'nùk. Molopai tok ye'matok wechi màlà tok kaichalà tewin pàk tok wotokoyi lùppù pàkàlà.

⁹ Masapùla ina mùkyamlo Katù we'wotokoma tonpa yamùk, amyamlo nen uchi Katù tumà. Katù yùwùk nàlà amyamlo.

¹⁰ Wakù pe Katù wettok uya ulepappù lùppù ike yapulà pe, ittunài kasa tamùsen yapon tùkonekatai molopai tùulon nen uchi màlà pona namùyan. Tùse yamùnnan tàwà tùttuik nechii yà'là kasa yamù tùuya'nokon yau.

¹¹ Masapùla ànù'là uya tùulon tu'ma là yamùtok ipo nonkatok pùla iwechi màlà, mùkkàlà neken Jesus Christ itùkassak lùppù.

¹² Anù'là kappon sàlà yamùtok ipo po yamùtoppe tùuya kolù, chilùpa, epekkek ton tàk, yei, wanak wapùla kumya yapulànài wechi yau,

¹³ iwotokoyi lùppù yenpoika màlà i'nai yekkwa pe là iwechi. Masapùla Wei uya inepù màlà akkwa yak. Apok ke yenpoika màlà, molopai apok uya màlà ittu i'nai kasa là tewin pàk kappon wotokoyi lùppù wechi.

¹⁴ Walùppù ànù'là namùppù wechi iyatùppù pùla yau, e'mantok yepolo ya màlà.

¹⁵ Tùse ànù'là wotokoyi uyassak yau iwe'lachima malà, tùse iwepùikattà màlà apok winàpai tùwepesen kasa.

¹⁶ Mùttuyatàu uchi amyamlo nàlà wechi Katù yùwùppe, molopai Katù Yakkwalù wemapù ayau'nokon?

¹⁷ Màlàpàk ànù'là uya Katù yùwùk mattanùpù yau, Katù uya imattanùpù màlà. Masapùla Katù yùwùk màlà esukenan molopai amyamlo nàlà mùkyamlo itùwùk.

¹⁸ Eyiwalà'nokon kesennakatau. Anù'là àkklottau'nokon nai'nùk uchittu pukkeppe sàlà wolù yeselu nùkupù winà yau, tàwà “pakko pe” nenai pukkeppe tùwenatoppe.

¹⁹ Masapùla pukkeppe sàlà wolù nùttu màlà yà'làlà pen Katù yenu yau. Iwe'menukasak, “Katù mùkkàlà, pukkek yachinài ittu tùuya pe tukaik iwettok yau,” tawon kasa. {Job 5.13}

²⁰ Molopai tùulon tu'ma, “Itepulu Katù mùkkàlà pukkek usenumenkatok wechi yà'là pe pùla ittunài,” tawon. {Psa. 94.11}

²¹ Ànù'là uchi kùttapulàtak kappon yamùk nùkupù pàk. Masapùla tamù'nawolon màlà àponalok kon.

²² Paul wapùla Apollos wapùla Cephas, Peter tukaik tesassen wapùla sàlà wolù wapùla wema'nàtok wapùla weli'nàtok wapùla sàlà pe nai'nùk wapùla ewanawà nai'nùk, tamù'nawàlà sàlà yamùk màlà àponalok kon.

²³ Molopai Christ ponalok kon amyamlo, molopai Christ mùkkàlà Katù ponalok.