1 Corinthians 16 - Patamuna New Testament Revised

Tùtùsen Tùulon Kon Ailon Tawonnan Ponaloppe

¹ Masa uchi pùlayatta Katù ponalok kon kappon yamùk pùikattàtoppe tanùnsen pàk uselupai'che. Unekamappù Galatia pon sochi yamùk pàk ikuttàk kon.

² Wapiyalok wei Suntayaka yau, tamù'nawolon kon amyamlo uya màlà àpùlayatayi kon tonpa nonka enepoloppù kon yapai. Molopai mùmainanpatàik, pùlayatta pilipù tukaik uyàssak yau.

³ Molopai welepansak yau, ananùmùppù kon kàyik yamùk yemyak kaleta unmenukappù tùlù uya màlà molopai tok yeunoko uya Jerusalem pona lepantok auya'nokon pokonpe.

⁴ Wakù pe nàlà utà wechi yau, tok utàichi màlà uya'là.

Paul Wekkuttok Ikupù Pàk

⁵ Uyàpù màlà apyakù'nokon Macedonia yawà utà tùpo, masapùla utà sàlà Macedonia yawà.

⁶ Malalà uko'mamù eppaino apyau'nokon, wapùla iko pe iwettok yawàlà apyau'nokon wechi. Molopai upùikattà kon pa uye'ma tawàlà, i'nailàlà utàtok yau.

⁷ Utà pe neken nà asse'ne eyenpai'nokon pùla wessaik. Tachinpe lùiwa nen uko'mamù apyau'nokon pàk enpen wessaik, Itepulu Jesus yeselu pe iwechi yau.

⁸ Tùse Ephesus po wechi màlà Pentecost yattai uta'lettàntok ponalà.

⁹ Masapùla eke manatta utakkokasak man wotoko kuttoppe uya talà, tùse tukke uwakkà'nàinan man.

¹⁰ Timothy uyàssak apyakù'nokon yau, manùntàik ichenalippa tukaik àkklottakù'nokon, masapùla iwe'wotokoma màlà nai'nùk ukasa làma Itepulu Jesus ponaloppe.

¹¹ Mùnamatàik. Meunottàik ite'ma tawà wakù pe tùwanmùlà, iwennappotoppe upyak. Masapùla iwennappo pàk enpen wessaik tùulon kon tonpa wannà yamùk pokonpe.

¹² Apollos utàtoppe apyakù'nokon tekamappotai, molopai imeluntàpappù uya akakklanpa tok kon pe ya tùulon kon tonpa wannà yamùk pokonpe, tùse iità yeselùkek pùla man sàlà pe. Tùutàtok yattai yeposak tùuya yau iità màlà.

Tewin Itekkwalok Lùppù Mayin

¹³ Elanneppe ettàk kon, ailon tetok yau meluntà pe ettàk kon, katamatàu, tùusenalippaik pùla ettàk kon.

¹⁴ Tamù'nawolon ikuttàk kon uchi'nùnmantok yau.

¹⁵ Mùttuyataik Stephanas molopai itùwùk tawon kon wechi wapiyalok kon iwepùikattàsak kon pe Christ yau Achaia po. Molopai tok wettùsak màlà tùyiwalà'nokon Katù ponalok kon kappon yamùk ponaloppe tùwe'wotokomatok kon yak.

¹⁶ Apawanattàyatàu Iulà utonpa yamùk, pùsamlo yekkwa yo'no mettàik molopai ànù'là tùwe'wotokomasan tok pokonpe yo'no.

¹⁷ Utauchinpatai kulu Stephanas, Fortunatus molopai Achaicus tawonnan uyàpù pàk, apatappù kon yau tok uya upùikattàsak pàk.

¹⁸ Molopai tok uya uyauchinpasak man, ayauchinpappù kon tok uya kasa làma. Pùsamlo yekkwa kàyik yamùk mùkyamlo tapulàsan.

¹⁹ Katù ponalok kon kappon yamùk Asia yawolon kon “Wakù pe na' messatàu?” tetok tùuya'nokon yeunossan. Pùsamlo mùkyamlo Aquila molopai Priscilla molopai tùulon kon sochi towon kon tùwepilichan tok yùwùk tau nàlà wa nùkayan.

²⁰ Tamù'nawàlà talonkonnà tonpawannà yamùk “Wakù pe na' messatàu?” tetok tùuya'nokon yeunossan. Itepulu yesek yau uchi tùutauchinpaik messepotàik àtonpa kon pokonpe Katù ponalok kon nùkupù kasa.

²¹ Uyemyatù ke sàlà tùmenukayaik nùkayan Iula, Paul.

²² Ànù'là Itepulu pùnùnmanài pen tàwà pa'nù'nàtok ipo nechii. Maranatha. Àikà Itepulu!

²³ Tàwà wakù pe we'nàtok Itepulu Jesus winàpaino apyau'nokon nechii.

²⁴ À'nùnmatok kon uya teunossaik tamù'nawolon kon Christ Jesus yau nai'nannùk piyak. Amen.