Tito 3 - Nuevo Testamento Uwotjüja

Dio-rü esetätü jȩttü̧ wȩnȩ

¹ Kkorotürümä̧ ji'äwi, ru̧wa̧ weümä̧, ja̧'wa̧ta̧nü̧ ukuo isotü wettümä̧ ttukuota; ja̧'wa̧ta̧nü̧ juätü wettümä̧ ttukuotäkua'anü̧ 'kuäopünä̧tä̧ adiwäjuei jȩä̧kuä̧wä̧ isotü jü̧nä̧ ttü̧ja̧kua̧.

² Ya̧tȩrü̧'i̧nä̧ to'i ja̧'a̧ku̧ suronä̧mä̧ ttukuoku juiya, pättä'chäkuäu. O'katoi'ünä̧ku̧ eseku ttü̧jü̧'a̧nü̧ ja̧'a̧, ja̧'wa̧ta̧nü̧ kkorotürü eseku tti̧jȩpa̧ rȩrü̧jü̧nü̧ toäkuäwä.

³ Isopäi'ünä̧ ujutu'i̧nä̧ ä'kojimä̧, amükuädäwä̧mä̧ jui'inä̧tü̧jä̧ ja̧'wa̧ta̧nü̧ pä̧i̧kui̧nä̧tü̧jä̧; re'tewächinä'kotü kue'ächü kkä̧nü̧ tidepä weü ujuturu kkü'kekutä o'kajuiyünä̧ jȩpü̧ kka̧kui̧nä̧tü̧jä̧. Surojünä̧ kkä̧nü̧, kkorotü ttu̧ju̧nä̧ri̧yä̧u̧ kkü'kokotü pinä̧tü̧jä̧, ttüjü'koko̧u̧mä̧, kkorotüku pä'ä'chäkuäutä kka̧kui̧nä̧tü̧jä̧.

⁴ Ja̧'wa̧nü̧ ja̧'a̧nä̧ tü̧ä̧nä̧wa̧ Dio surojüttü tü̧ji̧pü̧nä̧ ppädäkuäwä i̧sa̧mä̧, ttü̧ja̧rü̧ rȩrü̧jü̧nü̧ toäkuäwä'i̧nä̧, eseäkuäwä'i̧nä̧ i̧jȩpi̧nü̧,

⁵ ja̧'wa̧ta̧nü̧ ujutumä̧ adiu jȩti̧yä̧ku̧mä̧ ppädoko̧u̧ pinä̧tü̧jä̧ ja̧'wa̧nü̧ ja̧jü̧jueimä̧ chutä rȩrü̧jü̧nü̧ toomȩttü̧tä̧ surojümä̧ tükü iku pä'äjita'anü̧ uwäbetü ja̧'wa̧ta̧nü̧ tujuru jü̧nä̧ iyinä̧u̧jä̧ Epíritu Sa̧tu̧nä̧.

⁶ Ja̧'wa̧ta̧nü̧ tu̧ru̧wa̧ Jesucrito surojüttü tü̧ji̧pü̧nä̧ ppä'ädinü̧mä̧ Epíritu Sa̧tu̧rü̧ iyinä̧u̧jä̧,

⁷ rü̧ȩnä̧ repeomȩttü̧, Dio-mä̧ ȩmi̧nä̧u̧jä̧ kkä̧kuä̧wä̧ i'ko tȩma̧ pä'ü iyinä̧u̧jä̧ tȩmä̧kuo̧tü̧jä̧ tta̧tä̧rä̧'i̧jü̧mä̧.

⁸ Pi̧yȩmä̧ isopäi'ünä̧tä̧ ja̧'a̧, juätürümä̧ ppa̧'a̧dä̧rü̧ ku̧wo̧juȩta̧ pä̧wä̧rü̧jä̧ku̧sä̧, Dio-rü esetätümä̧ adiwäjueitä jȩttä̧kua̧'a̧nü̧. Pi̧yȩmä̧ ttü̧ja̧ o'katoi'ünä̧rü̧ ppädü adiwäjuei ja̧'a̧.

⁹ Ja̧'wa̧nü̧ ja̧'a̧nä̧ ja̧'a̧tä̧ ttukuokunä̧mä̧ päkuä'chäkuäwä ja̧'wa̧ta̧nü̧ kuä̧ju̧kuä̧ tä̧do̧tü̧ mi̧nä̧ ttütü'kü ttukuokumä̧ ja̧'wa̧ta̧nü̧ Moisé weäwä wȩnȩ jäwänä̧mä̧. Ja̧u̧mä̧ yoriso ppädokü ja̧'wa̧ta̧nü̧ oipokü.

¹⁰ Ya̧tȩ Dio-rü esetinä̧tü̧rü̧ 'kȩ'ttȩkuä̧chü̧nä̧ jȩpü̧rü̧mä̧, ya'utenä̧ jikuäu o'ka'a, todärenä̧ jikuäwomȩnä̧ üarodüttümä̧ juorümä̧ rä'epü ikuirü.

¹¹ Isopäi'ünä̧ ja̧u̧ ttü̧ja̧sa̧mä̧ surojuo'ächinü̧ pä'ümä̧ wo̧jua̧jä̧, ja̧'wa̧nü̧ ja̧'a̧ttü̧ chutä a̧mü̧nä̧ pa̧ja̧tü̧ suronä̧ jȩä̧'i̧jü̧tä̧ i̧jȩpä̧ku̧.

Tito-rü weäwi'inü̧ wȩnȩ

¹² Artemas jü̧ttü̧'i̧nä̧, Tíquico jü̧ttü̧'i̧nä̧ uku ku̧ja̧'a̧ wedomȩnä̧mä̧, Nicópori-ra̧'a̧ kui'chi'ü'a̧nü̧ ja̧'a̧, juorü totäkuäwäkua'anü̧, isopäi'ünä̧ a̧'ȩnä̧mä̧ juȩnȩtä̧ 'kuädopa pä'ü amükuädüsä.

¹³ O'kajuiyünä̧ jȩ'ku̧'a̧nü̧ jü̧mä̧ abogado Zena-rü̧'i̧nä̧, Apororü'i̧nä̧ ppä'ädi, tti̧'cho̧mȩnä̧ rekuä rü̧jü̧ juiyäkua'anü̧, juätürü rekuä rü̧jü̧ iyü ppä'ädi.

¹⁴ Ja̧'wa̧ta̧nü̧ ujututtümä̧ adiu jȩä̧kuä̧wä̧'i̧nä̧ tawaruwä rekuä rü̧jä̧u̧ru̧ ppädäkuäwä'i̧nä̧ ttu̧wo̧jui̧'ü̧'a̧nü̧ ja̧'a̧, ja̧'wa̧nü̧tä̧ ttü̧jü̧nä̧mä̧ ppädäkuäwä isotü ttäkuotü.

Teäwi'inü̧ wȩnȩ

¹⁵ Ttüku kka̧kuä̧tü̧mä̧ o'katoi'ünä̧ te'äu wettäkujä̧. Cha̧'kua̧ chu̧wȩnä̧rü̧nä̧ chawaruwä chi̧jä̧wa̧tü̧rü̧mä̧ te'äu we'üsä. Ukutu o'katoi'ünä̧rü̧mä̧ Dio-tä ppä̧dä̧kua̧.