Tito 2 - Nuevo Testamento Uwotjüja

Jueü wȩnȩ ttu̧wo̧juȩtü̧

¹ Ja̧'wa̧nü̧ ja̧'a̧nä̧ Tito ukumä̧, isopäi'ünä̧ wȩnȩ päü'a̧kuä̧tä̧ ku̧wo̧juȩtü̧'a̧nü̧ ja̧'a̧;

² Ja̧'wa̧ta̧nü̧ büäkuächätürümä̧ ji'äwi tta̧'kua̧pu̧nü̧ ttü̧ja̧kua̧, ttü̧ja̧ ttukuotünä̧, ja̧'wa̧ta̧nü̧ adiwomȩnä̧ ttü̧ja̧kua̧; tta̧'kua̧ wȩnä̧rü̧, eseunu̧, usurä ttȩma̧wo̧mȩnä̧ ttujuruku tta̧mi̧ 'kittächi'äkua'anü̧.

³ Ja̧'wa̧ta̧nü̧ nä̧tü̧ büäkuächätü'i̧nä̧ ji'äwi ukuotünü̧ ttü̧ja̧kua̧ suräjuei wȩnȩ ttukuoku, ja̧'wa̧ta̧nü̧ tä̧ttä̧mä̧'chü̧. Adiwäjuei wo̧juȩkuä̧ isotü jü̧nä̧tä̧ ttü̧ja̧kua̧

⁴ ja̧'wa̧ta̧nü̧ nä̧tü̧ müäyotümä̧ ttirekuoku tti̧tti̧mü̧ku̧ eseu kkä̧kuä̧wä̧ juätüttü topü ttü̧ja̧kuä̧kua̧'a̧nü̧.

⁵ Ja̧'wa̧ta̧nü̧ ttu̧wo̧juȩta̧'a̧nü̧ ja̧'a̧ jȩttä̧kuȩmä̧ ä'kanä̧ adiu ttamükuäda pä'ü, ttawaruwärü'i̧nä̧, ttirekuorü'i̧nä̧ tta̧mü̧nä̧ pa̧ja̧tü̧'i̧nä̧ tta̧ttä̧rä̧kuä̧wä̧kua̧'a̧nü̧, ya̧tȩ'i̧nä̧ Dio i̧wȩnȩ to'i ja̧'a̧ku̧mä̧ ukuokuokü juiyäkua'anü̧.

⁶ Ja̧'wa̧ta̧nü̧ müäyotürü'i̧nä̧ wo̧juȩku̧nä̧ ttü̧ja̧kua̧ pä'ü ji'äwitü.

⁷ O'kajuiyünä̧, ukutä kua̧mü̧nä̧ pa̧ja̧tü̧ wȩnȩku̧ i̧jȩkui̧ adiwäjueimä̧ pa̧'a̧nü̧ jȩä̧kuä̧wä̧ pä'ü, wo̧juȩtü̧mä̧ adiutä jȩpü̧ kua̧'kua̧pü̧nü̧ kkä̧nü̧ i̧jȩkui̧.

⁸ Adiwomȩnä̧ kukuokuomȩnä̧, ya̧tȩ'i̧nä̧ to'ija̧'a̧ku̧mä̧ päokä̧kua̧. Ja̧'wa̧nü̧ kukuokuomȩnä̧ to'i ja̧'a̧ku̧ pä'ä'chäjimä̧ dä'ä ttu̧ä̧kua̧, ja̧'wa̧nü̧ jo̧mȩnä̧tä̧ ujuturumä̧ yoriso suronämä̧ pä'okü jä̧kua̧.

⁹ Umüwäyotürümä̧ ro̧'ȩpü̧ ji'äwi ttu̧ru̧wa̧ weü o'kajuiyünä̧ ukuotü; eseunu̧ ttädätä̧ro̧ka̧'a̧ ttaditäkua'anü̧.

¹⁰ Ttunä̧u̧kuä̧ro̧ka'a, ttu̧nä̧u̧kuä̧ra̧jueimä̧ jo̧mȩnü̧ ukuotü kkä̧nü̧, o'kajuiyünä̧ Tü̧ä̧nä̧wa̧ Dio surojüttü tü̧ji̧pü̧nä̧ ppä'ädü u̧wo̧juȩtü̧mä̧ juiyo adiwäjuei pä'ü tti̧jȩpä̧kua̧'a̧nü̧.

¹¹ Ja̧'wa̧ta̧nü̧ Dio-mä̧ rȩrü̧jü̧nü̧ toü tü'kümä̧ i̧jȩpi̧nü̧, ttü̧ja̧ o'katoi'ünä̧rü̧ surojüttü ttü̧ji̧pü̧nä̧ ppä'ädü.

¹² Ja̧'wa̧ta̧nü̧ Dio-mä̧ ro̧ȩkuä̧ ukuturu pätetü kku̧nä̧wä̧ttü̧ ku̧ji̧pä̧tu̧ku̧nä̧ ppädinä̧u̧jä̧, Dio ujuturu eseunu̧ toümä̧ wo̧juȩta̧'a̧ ujutu suronä̧ jȩtä̧i̧jü̧ kätädächa pä'ü. Pi̧jä̧ jäwä surojü kkü'kekunä̧ totü juiya pä'ü. Kkoro'i̧nä̧ wo̧juȩta̧'a̧, pi̧jä̧nä̧ tü̧jä̧i̧mä̧ Dio ä'ka jo̧mȩttü̧mä̧ adiu jȩpü̧ tü̧ja̧ pä'ü, ja̧'wa̧ta̧nü̧ o'kajuiyünä̧ jȩtü̧mä̧ adiu tamükuäda pä'ü.

¹³ Pa̧'a̧nü̧ tü̧ja̧ku̧'a̧nü̧ ja̧'a̧ o'katoi'ünä̧ tta̧tä̧rä̧'i̧jü̧ eseäkuäwä mo̧ro̧ rȩbȩwa̧'a̧nä̧; Tü̧ä̧nä̧wa̧ Dio'i̧nä̧, surojüttü tü̧ji̧pü̧nä̧ ppä'ädinü̧ Jesucrito'i̧nä̧ ppa̧wä̧cha̧'a̧nä̧mä̧.

¹⁴ Ja̧u̧ ji̧na̧'a̧ ujutunä̧ o'kajuiyünä̧ surojüttü rä'epü iku tükü ikua pä'ü wa'arera̧'a̧ iyäwinümä̧, ja̧'wa̧nü̧ jȩpü̧ chutä pojopü ȩmi̧nä̧u̧ päti'ünä̧ pärotinü̧, pojopü ȩmi̧nä̧u̧ adiunä̧ jȩä̧kuä̧wä̧ amükuädätü jü̧nä̧tä̧.

¹⁵ Pi̧yȩ ja̧'a̧ o'kajuiyünä̧ ukuo kkü̧nä̧ ku̧wo̧juȩtü̧mä̧, ttesewächi'ünä̧ ja̧'wa̧ta̧nü̧, tä̧bo̧tü̧nü̧ ya̧tȩ'i̧nä̧ üjü'kü juiyünä̧mä̧ toü juiyäkua'anü̧.