Tito 1 - Nuevo Testamento Uwotjüja

Teäwinü̧ wȩnȩ

¹ Pauru wȩyu̧tu̧ weinü̧, Dio u̧mü̧wä̧ya̧ ja̧'wa̧ta̧nü̧ Jesucrito u̧mü̧wä̧ya̧ apóto jü̧nä̧, chutä weinä̧ku̧ Dio pojopü ȩmi̧nä̧u̧ tta̧'kua̧ wȩnä̧rä̧kuä̧wä̧ tti̧rȩbȩwi̧ya̧rü̧ pä'ü ja̧'wa̧ta̧nü̧ isopäi'ünä̧ wȩnȩ ujutu tesetü jäwä ttu̧wo̧jui̧pi̧ya̧rü̧ pä'ü,

² Ja̧'wa̧nü̧tä̧ Dio yaparewokümä̧ tabokutä päi'ünä̧ kkä̧kuä̧wä̧ i'ko chi̧yä̧kua̧sä̧ päinü̧ ttȩma̧ pä'ümä̧ tta̧'ä̧rü̧ kka̧kuä̧tü̧jä̧.

³ Ja̧'wa̧ta̧nü̧ jitämä̧, täkü päinü̧ mo̧ro̧ ja̧'a̧ttü̧, i̧wȩnȩmä̧ ttu̧wo̧jui̧pü̧nä̧ weäwi'ina̧'a̧ jittäu tä̧ju̧kuo̧mȩnä̧ tü̧ä̧nä̧wa̧ Dio ra̧wä̧pi̧jü̧ttü̧ tü̧ji̧pü̧nä̧ ppädäkuäwä i̧sa̧ weäwänä̧.

⁴ Tito, Jesucrito-nä̧ kua̧'kua̧ ku̧wȩnä̧ra̧ pä'ü ppädädinä̧ku̧jä̧ ja̧'wa̧nü̧ ja̧'a̧ttü̧ isopäi'ünä̧ chi̧tti̧ jä̧'i̧nü̧'a̧nü̧ wa̧jä̧. Ttü'i̧nä̧ uku'i̧nä̧ Dio-rü ta̧'kua̧ tu̧wȩnä̧ro̧mȩttü̧ jua̧u̧ru̧mä̧ jä'epüsä Tä'o jo̧mȩttü̧ ja̧'wa̧ta̧nü̧ tu̧ru̧wa̧ Jesucrito ra̧wä̧pi̧jü̧ttü̧ tü̧ji̧pü̧nä̧ ppädäkuäwä i̧sa̧rü̧mä̧ eseäkuäwä'i̧nä̧ unichä̧rü̧ kkä̧kuä̧wä̧'i̧nä̧ ttiyäku pä'ü.

Tito Creta kkä'ko isä̧sa̧ttü̧ aditinü̧ wȩnȩ

⁵ Creta kkä'ko i̧sä̧sa̧nä̧ chu̧ju̧ni̧'i̧nü̧mä̧, adikuokü kka̧kui̧pi̧nü̧ kuadita pä'ü ja̧'wa̧ta̧nü̧ weinü̧'a̧kuä̧ ütawiyä pünä̧ Igresia-ttü tturuwotürü ku̧ju̧nä̧'cha̧ pä'ü chu̧ju̧ni̧'i̧nä̧ku̧jä̧.

⁶ Igresia-rü juȩ'ȩpä̧rü̧mä̧ ya̧tȩ yoriso suronä̧ jȩpä̧'i̧jü̧ pä'äwokü ja̧'a̧, irekuarü'i̧nä̧ yajuterütä kkü̧rü̧, ja̧'wa̧ta̧nü̧ i̧tti̧mü̧mä̧ Jesucrito-rü esetü ukuotü ttü̧ja̧kua̧ pä'ü wa̧ ja̧'a̧.

⁷ Dio-mä̧ we'inü̧ Pató-tü̧rü̧mä̧ o'katoi'ünä̧ ttaditäwä to̧ttä̧ra̧ pä'ü, o'kajuiyünä̧ adiwomȩnä̧ ttadita pä'ü; ja̧'wa̧nü̧ ja̧'a̧ttü̧ kkorotürü pä'ä'chokürü, ra̧wä̧ri̧pä̧ro̧kü̧rü̧, tä̧'ä̧mä̧'cho̧kü̧rü̧. Surojümä̧ jȩpo̧kü̧rü̧, tä̧'ä̧mä̧'cho̧kü̧rü̧, pä̧i̧ a̧wa̧ru̧wa̧ pokürü, iäre'i̧nä̧ yapare jȩpü̧ 'choipä'chokürü.

⁸ Ja̧'wa̧nü̧ ja̧jü̧jueimä̧ 'kuäopünä̧ ttü̧ja̧rü̧ ojusodenä̧ ttä'a päü do'ädü ja̧'a̧ ja̧'wa̧ta̧nü̧ jua̧u̧ ttü̧ja̧sa̧mä̧ adiu kkü̧, adiu ro̧'ȩkua̧, suronä̧ jȩpä̧'cho̧kü̧, surojü'i̧nä̧ jui̧'a̧, ja̧'wa̧ta̧nü̧ jua̧u̧mä̧ adiu ji̧'ä̧wä̧rü̧ pü̧ttä̧dä̧kuä̧wa̧ ja̧'a̧.

⁹ Isopäi'ünä̧ wȩnȩ ukuru u̧wo̧juȩti̧nü̧'a̧kuä̧ kkä̧wi̧, kkorotürü'i̧nä̧ ja̧u̧ adiwäjuei wȩnȩnä̧ ttesewächi'äkua'anü̧ ja̧'wa̧ta̧nü̧ to'ija̧'a̧ku̧ ukuokuätürü'i̧nä̧ ttesetipünä̧ ji'äwi.

Yapareu wo̧juȩkuä̧ isotü ttütü'kü wȩnȩ

¹⁰ Isopäi'ünä̧ rekuätü kka̧kuä̧tü̧ ukuotü jui'ü mikuäwokütä ukuokuätü ja̧'wa̧ta̧nü̧ isopäi'ünä̧ 'kua̧rü̧nä̧ jȩpä̧tü̧, juätümä̧ ji̧nä̧somä̧ circuncisión jȩpä̧tü̧ttü̧ ichätü ja̧'a̧.

¹¹ Juätürümä̧ ttu̧wo̧juȩta̧'a̧nä̧ ja̧'a̧tä̧mä̧ to'kuätukuä; juätümä̧ ttü̧ja̧rü̧mä̧ o'katoi'ünä̧rü̧ jerutu ikutä, ja̧'wa̧ta̧nü̧ pärätä ttȩma̧ pä'ütä jȩpä̧tü̧.

¹² Jitütä i̧sa̧ Greta kkä'ko i̧sä̧sa̧ttü̧ profeta pättäkumä̧ awaruwärü päinü̧: «Creta kkä'ko i̧sä̧sa̧ ttü̧ja̧mä̧ 'kuäopünä̧tä̧ yaparewätü, de'a isotü ttü̧ja̧kuȩi̧na̧'a̧nü̧ ttaditoka'anä̧ kuä̧nü̧tä̧ kka̧kuä̧tü̧ ja̧'wa̧ta̧nü̧ ütäwätü.»

¹³ Pi̧yȩ jiäwinü̧mä̧ isopäi'ünä̧tä̧ ji̧na̧'a̧; ja̧'wa̧nü̧ ja̧'a̧ttü̧ ja̧'wa̧nü̧ wotürümä̧ pä̧i̧ku̧nä̧ ra̧wä̧ri̧pü̧nä̧nü̧ ji'äwätukuitü, Jesucrito-rü pä'äjita'anü̧ adiu tta̧'kua̧ ttu̧wȩnä̧rä̧kua̧'a̧nü̧.

¹⁴ Ja̧'wa̧ta̧nü̧ ppä'ädätukuitü judío kkä'äbe'ü jittäu ttesetü juiyäkua'anü̧ ja̧'wa̧ta̧nü̧ yapare ttü̧ja̧ weäwä wȩnȩ jittäu ttä̧ju̧ku̧ juiyäkua'anü̧.

¹⁵ Isopäi'ünä̧ Jesucrito-rü ukuotätümä̧ o'kajuiyünä̧ adiwäjueitä jä̧u̧, ja̧'wa̧nü̧ ja̧'a̧nä̧ ukuotokotü tta̧'kua̧ wȩnä̧ro̧ko̧tü̧rü̧mä̧ adiwäjueimä̧ jo̧ka̧'a̧, ja̧'wa̧nü̧ ja̧'a̧ttü̧ tta̧mü̧kuädünä̧'i̧nä̧ surojütä amükuädätü.

¹⁶ Juätümä̧ Dio-rümä̧ wo̧juä̧tü̧mä̧ pä'ätü, ja̧'wa̧nü̧ ja̧'a̧nä̧ suronä̧ jȩtta̧'a̧ topü isopäi'ünä̧ jo̧ka̧'a̧ pä'ü wo̧juä̧tü̧jä̧; juätümä̧ kkü'kokotü, ja̧'wa̧ta̧nü̧ ttukuotokomȩttü̧ kkorojuei adiwäjueimä̧ jȩpo̧ko̧tü̧.