Santiago 4 - Nuevo Testamento Uwotjüja

Pi̧jä̧ jäwäku eseku kkä̧kuä̧wä̧ tü'kü

¹ ¿Tottü icha'ajä̧ttü̧ kurämä̧ ja̧'wa̧ta̧nü̧ rowäwäkuäwämä̧ ukututtümä̧kü̧? Ja̧'wa̧ta̧nü̧ surojü kkü'kekumä̧ jakuänä̧ 'kuäopünä̧ rowäu kka̧ku̧ ja̧'a̧.

² Ukutumä̧ kkorojuei ku̧ju̧nä̧ra̧ päkuätukukuomȩnä̧ jui'ü; kküjü'kü juiyünä̧ jä̧u̧ kuä'ü ikuätüjä̧, ja̧'wa̧nü̧ ku̧'o̧kui̧'ä̧tu̧ku̧ juiyünä̧ jä̧u̧mä̧ rowäwu kurätä kkä'äbe'ätüjä̧. Kuju'kätukumä̧ po̧kui̧po̧ko̧tü̧jä̧ jua'amä̧ Dio-rü jäkuepätukuokomȩttü̧.

³ Ja̧'wa̧ta̧nü̧ jäkuepätukumä̧ ȩmo̧ko̧tü̧jä̧, jua'amä̧ ukuturutä pä̧wä̧rü̧jo̧mȩnä̧tä̧ be'epäjipü kuikuätukua pä'ütä amükuädü jäkuepätukua'attü̧.

⁴ ¡Ukutu ttü̧ja̧ ukuotokotümä̧! ¿Yoriso jerupätüjä̧, pi̧jä̧nä̧ jäwä awaruwä juo'ächätümä̧ Dio aboiyotü ja̧'a̧ pä'ümä̧? Ya̧tȩ pi̧jä̧ jäwä a̧wa̧ru̧wa̧ juo'ekumä̧ Dio a̧bo̧i̧ya̧ jü̧nä̧tä̧ juoächü.

⁵ Ji̧yȩtȩ pätetü pä'a wȩyu̧kuä̧ wȩnȩmä̧: «Dio-mä̧ eseu repe'ünü̧ ä'kuoyäu Epíritu ujutunä̧ u̧ju̧ni̧nä̧ku̧ru̧mä̧.»

⁶ Ja̧'wa̧nü̧ ja̧'a̧nä̧ Dio-mä̧ rü̧ä̧nä̧ rȩrü̧jü̧nü̧ topü ppä̧dä̧u̧jä̧, ja̧'wa̧ta̧nü̧ wȩyu̧kuä̧ wȩnȩmä̧ pä'a: Dio-mä̧ ttukuo te'äwätürümä̧ kkü'kokü, ja̧'wa̧nü̧ ja̧'a̧nä̧ ttukuo te'äkuäwokotürütä eseunu̧ ppä'ädü.

⁷ Ja̧'wa̧nü̧ ja̧'a̧ttü̧ Dio-rütä ukuotätükui. Äwettärümä̧ yaokuätukui, ja̧'wa̧nü̧ jo̧mȩnä̧tä̧ äwettämä̧ ukututtü tüipächä̧kua̧.

⁸ Dio-rütä tü'küpächätukui, ja̧'wa̧nü̧ jo̧mȩnä̧tä̧ chutä'i̧nä̧ ütü'küwächäkuotüjä̧. Surojü jȩpä̧tü̧mä̧, ku̧mü̧tu̧ku̧ tükäu ikuätukui; ja̧'wa̧ta̧nü̧ todärenä̧ pä̧wä̧rü̧jä̧u̧mä̧ kua̧mi̧'iso'kituku tükäu ikuätukui.

⁹ Kua̧'kua̧ tta̧'ȩku̧ barawä̧u̧ ajuäkuäwätukui. Ya̧kuä̧wä̧tu̧ku̧mä̧ kui̧'chȩrȩja̧tu̧ku̧nä̧tä̧ pärowächa'a, ja̧'wa̧ta̧nü̧ kuesewätukumä̧ tta̧'kua̧ tta̧wȩkuä̧kuä̧wä̧nä̧tä̧ pärowächa'a.

¹⁰ Ku̧ä̧nä̧wa̧ ä'ka jo̧mȩ kuiwe'kiyunä̧ kkä̧mä̧dä̧tu̧kui̧, ja̧'wa̧nü̧ jo̧mȩnä̧tä̧ chutämä̧ esewäkuotüjä̧.

¹¹ Chawaruwä chü̧jä̧wa̧tü̧ kkorotünü̧rü̧mä̧, suronä̧mä̧ kukuokuätukuä. Ya̧tȩ a̧wa̧ru̧wa̧ ü̧jä̧wa̧rü̧ suronä̧ ukuokumä̧ ja̧'wa̧nü̧ jü̧juiyüttü'i̧nä̧ suronä̧ jȩpü̧ pä'ümä̧ weäwä wȩnȩ'i̧nä̧ surojü pä'ü ukuokuokü. Ja̧'wa̧nü̧ ja̧'a̧nä̧ weäwä wȩnȩ surojü pä'ümä̧ ttukuotajueimä̧ Juez pättäku jä̧'i̧nü̧'a̧nü̧tä̧ jȩpä̧kuä̧u̧jä̧.

¹² Ya̧tȩtä̧ Dio-tä ja̧'a̧ Juez'i̧nä̧ ja̧'a̧nä̧, weäwä wȩnȩ'i̧nä̧ iyinü̧mä̧ ja̧'wa̧ta̧nü̧ jua̧u̧mä̧ surojüttü tü̧ji̧pü̧nä̧ jȩa̧'a̧nä̧'i̧nä̧ ja̧'wa̧nü̧ jü̧juiyüttümä̧ ro̧'ȩpü̧; Jua̧u̧nu̧mä̧ ¿dikuättü̧ kua̧wa̧ru̧wa̧rü̧ suronä̧ päkuä'cha pä'ümä̧?

Yo̧ȩi̧ mo̧ro̧ jä̧kuȩmä̧ kuesewätukuä

¹³ Jitä pi̧yȩ ä̧ju̧kuä̧tu̧kui̧, ukutumä̧: «Jitä mo̧ro̧'i̧nä̧ ja̧'wa̧nü̧ jü̧ juiyüttümä̧ yo̧ȩi̧ mo̧ro̧'i̧nä̧ ütawiyära̧'a̧ ti̧'chä̧kuo̧tü̧jä̧, ja̧'wa̧ta̧nü̧ juȩnȩmä̧ ya'ute año jo̧mȩnä̧ kkorojuei iyä'chü pärätä ȩmü̧ tü̧ja̧kua̧ja̧ pä'ätüjä̧»

¹⁴ Kua̧'kua̧rü̧tu̧ku̧nä̧ yo̧ȩi̧ mo̧ro̧ 'kuäopäkuȩmä̧ yoriso jerupätüjä̧. Ukutumä̧ neblina pättüjuei räo'anä̧ yotäku toepoa'a jä̧'i̧ ja̧'a̧nü̧ wotüjä̧.

¹⁵ «Tü̧ä̧nä̧wa̧rü̧ pä̧wä̧rü̧jü̧ttü̧mä̧, tü̧ja̧kuä̧kuo̧tü̧jä̧ ja̧'wa̧ta̧nü̧ pi̧yȩ'i̧nä̧ jȩta̧'a̧nä̧, kkoro'i̧nä̧ jȩtä̧kuo̧tü̧jä̧» päkuätukua'anütä wotüjä̧.

¹⁶ Ja̧'wa̧nü̧ ja̧'a̧nä̧ ukutumä̧ kua̧mü̧nä̧tu̧ku̧ ukuo te'äutä yabonü̧ ukuokuätüjä̧; o'kajuiyünä̧ tta̧mü̧nä̧ ukuo teäkuäwämä̧ surojü ja̧'a̧.

¹⁷ Ja̧'wa̧nü̧ ja̧'a̧ttü̧ adiwäjuei jȩä̧kuä̧wä̧ u̧wo̧jua̧'a̧nä̧ jȩpo̧kü̧mä̧, surojütä jȩpü̧.