Santiago 3 - Nuevo Testamento Uwotjüja

Tti̧nȩ tü'kü

¹ Chawaruwä chü̧jä̧wa̧tü̧, ukututtü rekuätü wo̧juȩkuä̧ isotü jü̧nä̧mä̧ juokuätukuä, ja̧'wa̧ta̧nü̧ täkü wo̧juä̧tü̧jä̧ tu̧wo̧juȩtü̧nä̧tä̧ Dio-mä̧ kkorotüttü'i̧nä̧ abonä̧nü̧ ro̧ȩpä̧kuo̧tü̧jä̧ pä'ümä̧.

² O'katoi'ünä̧tä̧ surojümä̧ jȩpä̧tü̧jä̧; Jua̧u̧nu̧mä̧ ya̧tȩ ukuokunä̧ surojü päoka'a jü̧ttü̧mä̧, jua̧u̧mä̧ adiu kkü̧, ja̧'wa̧ta̧nü̧ jä̧ttä̧pä̧ya̧mä̧ o'kajuiyünä̧tä̧ juȩ'ȩpä̧rä̧kuä̧wa̧'a̧ wa̧.

³ Cabayu̧tu̧ ttukuotatü pä'ü ttänä̧ jiyüdäkuäwäkä 'ka̧tä̧dü̧ tü̧no̧mȩnä̧mä̧, jä̧ttä̧pä̧ya̧rü̧ juȩ'ȩpä̧rä̧tü̧jä̧.

⁴ Ja̧'wa̧ta̧nü̧ woi'kanä̧'i̧nä̧ ja̧'wa̧nü̧ jä'inü̧ta̧'a̧nü̧ ja̧'a̧: woi'kamä̧ rü̧ä̧'ka ja̧'a̧nä̧, kkä̧rü̧'koppa kkiopoppa'i̧nä̧ yoriso juruwoppa ja̧'a̧nä̧, woi'ka kuȩ'ȩpä̧rä̧tü̧mä̧ kuȩpä̧rä̧bi̧mä̧ ji̧'ki̧cha̧jäbitä̧ ja̧'a̧nä̧'i̧nä̧ tti̧'cha̧ pättomȩku̧ juȩ'ȩpä̧rü̧ o'ipätü.

⁵ Ja̧'wa̧nü̧ jä̧'i̧nü̧ta̧'a̧nü̧ ja̧'a̧ tti̧nȩ'i̧nä̧; jättäpäyotüttümä̧ ji̧'ki̧cha̧jü̧ ja̧'a̧nä̧ rü̧ä̧u̧ jäwä jȩa̧ pä'ü jü̧ja̧'a̧. ¡Okusa̧ri̧ ji̧'ki̧cha̧ja̧ri̧ttü̧ rȩdȩkuä̧cho̧mȩnä̧ mȩje'ka rü̧ä̧'ka'i̧nä̧ kuo'ü ikua'anü ja̧'a̧!

⁶ Ja̧'wa̧ta̧nü̧ tti̧nȩmä̧ okurä ja̧'a̧. Pi̧jä̧ttü̧ surojü jȩttü̧mä̧ ujutu jättäpäyotünä̧ kka̧'a̧ ttü̧ja̧ o'katoi'ünä̧rü̧ bochäwächümä̧. Okurä na̧wi̧po̧korämä̧ ji̧yȩtä̧tä̧ rȩdȩkua̧'a̧ kuo'ü kka̧'a̧ ja̧'wa̧nü̧ jo̧mȩnä̧ tta̧'kua̧rü̧mä̧ o'kajuiyünä̧ du'unä̧ barawa'a.

⁷ Ttü̧ja̧sa̧mä̧ o'kajuiyünä̧ isotü de'a kka̧kuä̧tü̧ pä̧i̧kuä̧tü̧rü̧'i̧nä̧, ppi̧yu̧rü̧'i̧nä̧, ä̧ka̧tü̧rü̧'i̧nä̧, ajenä̧ kka̧kuä̧tü̧rü̧'i̧nä̧, juȩpä̧ra̧ pä'ü weinä̧ku̧ ja̧'a̧nä̧ pi̧jä̧ jäwätä weäku;

⁸ Ja̧'wa̧nü̧ ja̧'a̧nä̧ ya̧tȩ'i̧nä̧ i̧nȩmä̧ juȩpä̧rä̧kuä̧u̧ juiyünä̧ ja̧'a̧. Surojümä̧ wetta'anä̧ ja̧'a̧tä̧ toäkuäwoka'attü ja̧'wa̧ta̧nü̧ ni̧yȩkuä̧ wa'aretä rü̧ȩnä̧ jo̧mȩnü̧ kka̧'a̧ttü̧.

⁹ Juänȩnä̧tä̧ tinȩnä̧, Tä'o Dio-rü esewätüjä̧ ja̧'wa̧ta̧nü̧ juä̧nȩnä̧tä̧ Dio chutä jü̧ta̧'a̧nü̧ wotü aditinä̧u̧ru̧'i̧nä̧ surojuo'epü ukuokuätüjä̧.

¹⁰ Tättütämä̧ eseu ppädäkuäwä'i̧nä̧, surojuo'epü ukuokuäkuä'i̧nä̧ räopa'a. Chawaruwä chü̧jä̧wa̧tü̧, ja̧'wa̧nü̧ ja̧ pä'ümä̧ jo̧ka̧'a̧.

¹¹ Aje i̧sä̧rä̧ttü̧tä̧mä̧ ajiya sa̧do̧ya'i̧nä̧, reoya'i̧nä̧ jü̧nä̧mä̧ werächokü.

¹² Ja̧'wa̧nü̧ jä̧'i̧nü̧ta̧'a̧nü̧ higo dau'i̧nä̧ aceituna pä'ü mikumä̧ wȩjo̧kü̧, ja̧'wa̧ta̧nü̧ vid daunä̧'i̧nä̧ Uwamä̧ wȩjo̧kü̧, chawaruwä chü̧jä̧wa̧tü̧ ja̧'wa̧ta̧nü̧ aje i̧sä̧rä̧ttü̧mä̧ sa̧do̧ya'i̧nä̧ reoya'i̧nä̧mä̧ werächokü.

Isopäi'ünä̧ wo̧juä̧wä̧ wȩnȩ.

¹³ Ukututtü ya̧tȩ wo̧juȩku̧nä̧ amükuädü ja̧'wa̧ta̧nü̧ wo̧jui̧pä̧rü̧ ü̧jü̧ttü̧mä̧, ukuo teäkuäwoka'a adiu jȩpü̧ kkä̧nü̧ i̧jȩpü̧'a̧nü̧ ja̧'a̧ u̧wo̧juö̧ wȩnȩ iyäwi'inü̧mä̧.

¹⁴ Ja̧'wa̧nü̧ ja̧'a̧nä̧ ttüjü'koka'a ä'kuoyäkuäwä ja̧'wa̧ta̧nü̧ rowäwäkuäwätä kua̧mi̧so'kitukunä̧ ku̧ju̧nä̧rä̧tu̧ku̧ttü̧mä̧ kuesewätukuä ja̧'wa̧ta̧nü̧ isopäi'ünä̧ wȩnȩku̧mä̧ yapareumä̧ jikuäwä'chätukuä.

¹⁵ Isopäi'ünä̧ pi̧yȩ wo̧juä̧wä̧ wȩnȩmä̧ Dio-ttümä̧ ichokü, ja̧u̧ ja̧jü̧jueimä̧ pi̧jä̧ ttü̧ja̧ ttu̧wo̧juö̧ttü̧tä̧, ttü̧ja̧sa̧ amükuädüttütä, ja̧'wa̧ta̧nü̧ chutä äwettättütä ichü ja̧'a̧.

¹⁶ Kkü'käwokütä, rowäwäkuäwätä kka̧kuo̧mȩmä̧ ja̧'wa̧ta̧nü̧ surojuoepü'i̧nä̧ o'kajuiyünä̧ surojü'i̧nä̧ kka̧kua̧'a̧.

¹⁷ Ja̧'wa̧nü̧ ja̧'a̧nä̧ wo̧juä̧wä̧ Dio-ttü ichü kku̧nä̧rä̧tü̧mä̧, surojümä̧ jȩpo̧ko̧tü̧; ja̧'wa̧nü̧ ja̧jü̧jueimä̧ rowäwäkuäwä juiyünä̧ kkä̧kuä̧wä̧tä̧ usätü, ukuotätü, ja̧'wa̧ta̧nü̧ kkorotürümä̧ rȩrü̧jü̧nü̧ topätü, usurä ttȩmä̧u̧ jitütäku usurä ȩmä̧wä̧tü̧, ja̧'wa̧ta̧nü̧ 'kuäopünä̧tä̧ ttü̧ja̧rü̧mä̧ o'katoi'ünä̧rü̧ yoräteunä̧ adiu jȩpä̧tü̧, juätü ja̧'a̧ isopäi'ünä̧ Dio-rü esetinä̧tü̧mä̧.

¹⁸ Ja̧'wa̧nü̧ ja̧'a̧ttü̧ ttü̧ja̧ku̧ wȩnȩ juiyünä̧ ttü̧ja̧kua̧ pä'ü usätürümä̧, Dio-mä̧ adiu jȩä̧kuä̧wä̧'i̧nä̧ rowäwäkuäwä juiyünä̧ kkä̧kuä̧wä̧'i̧nä̧ i̧yä̧kuä̧u̧.