Romanos 9 - Nuevo Testamento Uwotjüja

Dio-mä̧ Irae ttü̧ja̧rü̧ ȩmi̧nü̧

¹ Chuyaparewoka'a, Crito-nä̧ isopäi'ünä̧ pä'üsä. Ja̧'wa̧ta̧nü̧ Chamükuädümä̧ Epíritu Sa̧tu̧ juȩpä̧ra̧'a̧ttü̧ pä'üsä:

² rü̧ȩnä̧ cha̧'kua̧ tta̧'ȩku̧sä̧ ja̧'wa̧ta̧nü̧ cha̧mi̧ barawäkusä 'kuäopünä̧tä̧ chamükuädünä̧.

³ Isopäi'ünä̧ chidepättü chawaruwärümä̧ rü̧ȩnä̧ repeda'amä̧, wä̧i̧nä̧ suronä̧ pättäku chüttü'i̧nä̧, Crito-ttü 'kȩdi̧pä̧chü̧ttü̧'i̧nä̧ wä̧i̧nä̧ wa̧sä̧ rettü chawaruwärü ppädäda pä'ümä̧.

⁴ Juätümä̧ Irae i̧tti̧mü̧ isotü ttomȩttü̧ ja̧'wa̧ta̧nü̧ Dio i̧tti̧mü̧ jü̧nä̧ ȩmi̧nä̧u̧ tta'attü̧; Dio-mä̧ juätütäku kki̧nü̧, ujuru'i̧nä̧ i̧jȩpi̧nä̧u̧ ja̧'wa̧ta̧nü̧ juätütäku eseku, jȩttä̧kuȩ wȩnȩ'i̧nä̧ iyinä̧u̧. Isopäi'ünä̧ ttesewarü pä'ü wo̧juȩtü̧ kkä̧nü̧, i̧yä̧kuȩ'i̧nä̧ ukuokuinä̧u̧.

⁵ Ja̧'wa̧ta̧nü̧ juätü tü̧tä̧mü̧mi̧nä̧ttü̧tä̧; Crito-mä̧ ichinü̧ ukuojattümä̧, jua̧u̧mä̧ o'kajuiyünä̧tä̧ u̧wä̧mȩnä̧ wa̧, jua̧u̧tä̧ ja̧'a̧ «Dio, 'kuäopünä̧tä̧ eseäkuä̧wa̧mä̧.» Amȩ́.

⁶ Jua'amä̧ Dio i̧wȩnȩmä̧ jäyämä̧ jo̧ka̧'a̧ ji̧na̧'a̧nä̧ pä'üsä, rekuätü irae ttü̧ja̧ttü̧ rättopina̧'a̧nä̧, o'katoi'ünä̧mä̧ irae ttü̧ja̧ jü̧nä̧mä̧ wokotü.

⁷ Abraha̧ i̧tti̧mü̧ ji̧na̧'a̧nä̧'i̧nä̧, o'katoi'ünä̧tä̧mä̧ i̧tti̧mü̧ wokotü pinä̧tü̧ ja̧'wa̧nü̧ ja̧jü̧ jueimä̧: «Isaac i̧tti̧mü̧nä̧tä̧ kui̧tti̧mü̧ jä̧kua̧'a̧, päwi'inä̧ku̧.»

⁸ Jua'amä̧ pa̧'a̧nü̧ ja̧'a̧: O'katoi'ünä̧ ttidepättümä̧ tti̧tti̧mü̧ ja̧'a̧nä̧ Dio-mä̧ i̧tti̧mü̧mä̧kü̧ ja̧'a̧. Ja̧'wa̧nü̧ ja̧'a̧ttü̧ chutä päinü̧'a̧kuä̧ ichinä̧tü̧tä̧tä̧ ja̧'a̧ i̧tti̧mü̧ wotümä̧.

⁹ Jua̧u̧ chi̧yä̧kua̧sä̧ päinü̧mä̧ pa̧'a̧nü̧ ji̧na̧'a̧: «Pi̧yȩ pä̧nä̧ chi̧chä̧kua̧sä̧ ja̧'wa̧nü̧ jo̧mȩnä̧ Sara-mä̧ kki̧tti̧rü̧ kku̧ju̧nä̧rä̧kua̧ju̧.»

¹⁰ Suro pi̧yȩtä̧mä̧kü̧ ja̧'a̧. Rebeca'i̧nä̧ ya̧tȩ Isaac tä̧do̧mi̧nä̧ttü̧tä̧ o'kaju juo'inä̧ju̧, ya̧tȩrü̧mä̧,

¹¹ (Jua'amä̧ ji̧nä̧ uwäpächü juiyäi ji̧na̧'a̧, ji̧nä̧ adiu'i̧nä̧, surojü'i̧nä̧ jȩü̧ juiyäi, jua'amä̧ Dio amükuädü ȩmi̧nü̧'a̧kuä̧ ja̧ pä'ü ji̧na̧'a̧, jȩpü̧ ttü̧jü̧ttü̧mä̧ jo̧ka̧'a̧ Dio amükuädü woü'akuä ja̧ pä'ü ja̧'a̧).

¹² Ja̧'wa̧nü̧ ja̧'a̧ttü̧ Rebeca-rümä̧ päwina̧'a̧: «Ä̧kuo̧mȩnä̧ i̧sa̧mä̧, rüjinä̧ i̧sa̧rü̧ ukuotä̧kua̧, jü̧nä̧.»

¹³ Ja̧'wa̧ta̧nü̧ Wȩyu̧kui̧na̧'a̧: «Jaco-rütä chesewa'anä̧, Esaú-rumä̧ esewokü pinü̧sä̧,» jü̧nä̧.

Dio ukuo tü'kü

¹⁴ ¿Ja̧'wa̧nü̧ ji̧na̧'a̧mä̧ toku pätäkua'ajä̧ttü̧? ¿Dio-mä̧ suronä̧ jȩpi̧nü̧ pätäkua'a tä̧jí̧? ¡Ja̧'wa̧nü̧mä̧kü̧!

¹⁵ Dio-mä̧ Moisé-rü pä'inü̧: «Rȩrü̧jü̧ tochäkurumä̧, re chü̧jä̧kua̧sä̧ ja̧'wa̧ta̧nü̧ rettü ppädädäkurumä̧, ppä̧dä̧dä̧kua̧sä̧.»

¹⁶ Ja̧'wa̧nü̧ ja̧'a̧ttü̧, Dio ȩmä̧ku̧mä̧ üjü'kaja pä'ü'i̧nä̧, pä̧i̧ku̧nä̧ joaja pä'ü'i̧nä̧ jo̧ka̧'a̧, Dio rȩrü̧jü̧ toäkutä ja̧'a̧.

¹⁷ Isopäi'ünä̧ wȩyu̧kuä̧ wȩnȩmä̧ Faraó̧ ütü'kü pä'a: «Pi̧yȩtä̧ ja̧'a̧tȩ'ü̧ chäräbe'inä̧ku̧jä̧, ukunä̧ chujuru chi̧jȩpa̧ pä'ü, ttü chi̧mi̧ pi̧jä̧ o'kajuiyünä̧ jiäkuäwi'a pä'ü.»

¹⁸ Ja̧'wa̧nü̧ ja̧'a̧ttü̧, Dio-mä̧ rȩrü̧jü̧ toäkurumä̧, re kkü̧ ja̧'wa̧ta̧nü̧ a̧mi̧ poekunä̧ esetü juiyünä̧ jȩä̧ku̧ru̧'i̧nä̧, jȩpü̧.

¹⁹ Ja̧'wa̧nü̧ jo̧mȩnä̧ päkuätukuäkua̧sä̧: «Ja̧'wa̧nü̧ jü̧ttü̧mä̧, ¿Tta̧'a̧nü̧ pä'ü Dio-mä̧ ttü̧ja̧sa̧rü̧mä̧ ja̧'wa̧nü̧ jȩpü̧jä̧ttü̧ päü'anü̧jä̧ttü̧, üjü'komȩnä̧ jȩa̧'a̧nä̧ ya̧tȩ'i̧nä̧ tto'epümä̧ toa'amä̧?»

²⁰ Ja̧'wa̧nü̧ ja̧'a̧nä̧ uku ttü̧ja̧sa̧mä̧, ¿Dí kua'ajä̧ttü̧ Dio-rü päwä i̧sa̧ kua pä'ümä̧? ¿redä'kattü a̧di̧kuo̧'ta̧ i̧so̧'ta̧mä̧, yo̧'ta̧rü̧tä̧ aditinü̧rü̧mä̧: toku pä'ü ja̧'wa̧nü̧ kuaditinä̧ttü̧ttü̧ päü'anü̧ ja̧'a̧ tä̧jí̧?

²¹ ¿redä'kiyuttü uri o̧'ta̧ adikuä i̧sa̧mä̧, churutä pä̧wä̧rü̧jo̧mȩnä̧mä̧ aditokü tä̧jí̧, ja̧'wa̧nü̧ ja̧'a̧ttü̧ jiwatettütämä̧ aditü juiyü'anü̧ tä̧jí̧ i̧so̧'ta̧ ukuo kku̧nä̧rä̧tü̧ tta̧wo̧'ta̧'i̧nä̧ ja̧'wa̧ta̧nü̧ ukuo jui'ätü tta̧wo̧'ta̧'i̧nä̧, jü̧nä̧mä̧?

²² Ja̧'wa̧nü̧ jü̧ta̧'a̧nü̧ jȩpi̧nü̧ Dio-mä̧. Ro̧ȩkuä̧ tü'kü u̧wo̧juȩta̧ pä'inü̧, Chutä ujuru o'katoi'ünä̧ ttu̧wo̧jui̧pi̧ya̧rü̧ pä'ü. Ja̧'wa̧nü̧ ja̧'a̧ttü̧ rü̧ȩnä̧tä̧ a̧mi̧'ki'ächi'inü̧, jitü ro̧'ȩpü̧ si'epü ttiku'anü̧ wotürü'i̧nä̧.

²³ Jua̧u̧nu̧tä̧ mo̧ro̧ rü̧ȩnä̧ repeü'i̧nä̧ ja̧'wa̧ta̧nü̧ chutä ujuru'i̧nä̧ i̧jȩpi̧nü̧ ujuturu surojüttü tü̧ji̧pü̧nä̧ rä'epü ikuatü pä'ümä̧. Ä̧kuo̧mȩnä̧ttü̧tä̧ päi'ünä̧ ujuturu repe'inü̧ ja̧'wa̧nü̧ ja̧'a̧ttü̧ ȩmi̧nä̧u̧jä̧ chutäku tü̧ja̧kua̧ pä'ü.

²⁴ Ja̧'wa̧nü̧ ja̧'a̧ttü̧ woinä̧u̧jä̧ Dio-mä̧ suro, judío ttütämä̧kü̧ ja̧'wa̧ta̧nü̧ judío pokotürü'i̧nä̧, jü̧nä̧.

²⁵ Oseas kuyäru'tänä̧ pä'a: «Chumüwäyotü pokotü pinä̧tü̧rü̧, chumüwäyotü päi'ünä̧ wo̧chä̧kua̧sä̧; ja̧'wa̧ta̧nü̧ chesewo̧ko̧u̧ pinä̧tü̧rü̧, chesewä̧kua̧sä̧.

²⁶ Ja̧'wa̧ta̧nü̧ yȩnȩtä̧, chumüwäyotümä̧kü̧jä̧ pädinomȩttü̧, yorütä, Dio i̧tti̧mü̧jä̧ päwi'äkuä̧u̧jä̧, jua'amä̧ Dio a̧'kua̧rä̧kuä̧wä̧ i̧sa̧ ja̧'a̧ttü̧.»

²⁷ Ja̧'wa̧ta̧nü̧, Irae ttü̧ja̧ ttütü'kü, Isaía-mä̧ pä'inü̧: «Irae ttü̧ja̧ tti̧tti̧mü̧mä̧ rü̧ä̧dubora rȩba̧ jä̧'i̧nü̧'a̧nü̧ ttirekua'anä̧, juätüttümä̧ a̧'u̧kuo̧tü̧tä̧ jä̧kua̧'a̧ ra̧wä̧pi̧jü̧ttü̧mä̧ ttü̧ja̧kui̧'ä̧kuo̧tü̧.

²⁸ Isopäi'ünä̧ Tu̧ru̧wa̧ päinü̧mä̧, pi̧jä̧ ttü̧ja̧rü̧mä̧ jitätä ja̧'a̧ku̧ ro̧ȩpä̧kua̧.»

²⁹ Ä'kanä̧tä̧ päi'ünä̧ Isaía päinü̧ta'anü̧ ja̧ja̧'a̧: «Isopäi'ünä̧ Tu̧ru̧wa̧ o'kajuiyünä̧ ujuru kku̧nä̧rü̧ i̧tti̧mü̧rü̧ u̧ju̧ni̧'o̧ka̧'a̧ ji̧nü̧ttü̧mä̧, jitämä̧ Sodoma ji̧nü̧ta̧'a̧nü̧tä̧, Gomorra ji̧nü̧ta̧'a̧nü̧tä̧ juo'ächina̧ja̧tü̧jä̧.»

³⁰ ¿Jua̧u̧nu̧mä̧, pi̧yȩ tü'kümä̧ toku pätäkua'ajä̧ttü̧? Judío pokotü adiwä wȩnȩnä̧ 'cho̧ko̧tü̧ pinä̧tü̧ ja̧'a̧nä̧, adiwä wȩnȩ po̧kui̧pi̧nä̧tü̧, tta̧'kua̧ ttu̧wȩnä̧ra̧'a̧ttü̧;

³¹ Ja̧'wa̧nü̧ ja̧'a̧nä̧, Irae ttü̧ja̧mä̧, weäwä wȩnȩnä̧ ttusina̧'a̧nä̧, po̧kui̧po̧ko̧tü̧ pinä̧tü̧.

³² Jua'amä̧ ¿Tta̧'a̧nü̧ ji̧no̧mȩnä̧? Jua'amä̧ tta̧'kua̧ ttu̧wȩnä̧ro̧ka̧'a̧, weäwä wȩnȩnä̧tä̧ ukuo tettäwina̧'a̧ttü̧ ja̧'wa̧nü̧ jo̧mȩnä̧ Jesucrito-rümä̧ ido'kinä̧ 'kua̧rü̧nä̧ dü'ü ppe'okuächinä̧tü̧,

³³ Ja̧'wa̧nü̧ ja̧'a̧ttü̧ wȩyu̧kuä̧ wȩnȩmä̧ pä'a: Jerusarȩ́-nä̧ ido'ki kku̧nu̧sä̧ Juo'kinä̧ ppe'okuächü, rekuätü ma̧ttä̧chä̧'chä̧kuo̧tü̧. Ja̧'wa̧nü̧ ja̧'a̧nä̧ Dio-mä̧ churutä tta̧'kua̧ wȩnä̧rä̧tü̧rü̧mä̧, jaropi'okü jä̧kua̧.