Romanos 8 - Nuevo Testamento Uwotjüja

Dio i̧sa̧ Epíritumä̧ kkä̧kuä̧wä̧ iyü

¹ Ja̧'wa̧nü̧ ja̧'a̧ttü̧, jitämä̧ ttidepä pä̧wä̧rü̧ja̧'a̧ku̧ tti̧'cho̧ka̧'a̧ Crito Jesú-nä̧ kka̧kuä̧tü̧rü̧mä̧, Epíritu-ru pä̧wä̧rü̧jo̧mȩnä̧ kka̧kuä̧tü̧rü̧mä̧ ro̧ȩkuä̧mä̧ juiyäkua'a.

² Isopäi'ünä̧ Epíritu weäwä wȩnȩ, Crito Jesú-nä̧ tta̧'kua̧rü̧ iyümä̧, ukuotäkuäwokü weü wȩnȩttü̧'i̧nä̧, wa'arettü'i̧nä̧ rä'epü ikuinä̧ku̧sä̧.

³ Isopäi'ünä̧ weäwä wȩnȩnä̧mä̧ weyekuina̧'a̧, ttü̧ja̧ ta̧mi̧ 'kuättomȩttü̧ ja̧'wa̧nü̧ ji̧yä̧ku̧ Dio-mä̧, Chutä I̧tti̧rü̧ we'inü̧ ujutu jü̧ta̧'a̧nü̧ idepänä̧ kkü̧rü̧, ja̧'wa̧nü̧ ja̧'a̧ttü̧ jua̧u̧nä̧tä̧ kkä̧nü̧ ukuotäkuäwokü weä'ijümä̧ usurä ȩmä̧u̧nä̧ ro̧'ȩpü̧ üta pä'ü amükuädinü̧.

⁴ Weäwä wȩnȩ weä'ijümä̧ ujutunä̧ jo̧mȩnü̧ päi'a pä'ü, jȩpi̧nü̧; jua'amä̧, täkü tidepä pä̧wä̧rü̧ja̧'a̧ku̧ jȩpü̧ ttü̧ja̧ku̧ juiyünä̧, pärokua'aku Epíritu Sa̧tu̧rü̧ pä̧wä̧rü̧jo̧mȩnä̧ jȩpü̧ tü̧ja̧kui̧ya̧rü̧ pä'ü.

⁵ Isopäi'ünä̧ ttidepä pä̧wä̧rü̧jo̧mȩnä̧ kka̧kuä̧tü̧mä̧, ttidepä jäwätä amükuädätü; ja̧'wa̧nü̧ ja̧'a̧nä̧ Epíritu-ru pä̧wä̧rü̧jo̧mȩnä̧ kka̧kuä̧tü̧mä̧, Epíritu jäwätä amükuädätü.

⁶ Isopäi'ünä̧ ttidepä wea'anä̧ ttü̧jo̧mȩnä̧mä̧ wa'aretä ja̧'a̧ ja̧'wa̧nü̧ ja̧'a̧nä̧ Epíritu jäwänä̧ ttü̧ja̧kuo̧mȩnä̧mä̧ wȩnȩ juiyünä̧, a̧'kua̧rü̧ kkä̧kuä̧wä̧ ja̧'a̧.

⁷ Isopäi'ünä̧ ttidepä wea'anä̧ kkä̧kuä̧wä̧mä̧, Dio aboiyotü päi'ünä̧tä̧ päroächäkuäwä; jua'amä̧, Jua̧u̧ weäwä wȩnȩ kkü'kü jui'ü jȩtta̧ pättoka'attü̧.

⁸ Ja̧'wa̧nü̧ ja̧'a̧ttü̧ ttidepä pä̧wä̧rü̧ja̧'a̧ku̧ kka̧kuä̧tü̧mä̧, Dio eseunä̧mä̧ kka̧kuo̧ko̧tü̧.

⁹ Ja̧'wa̧nü̧ ja̧'a̧nä̧, täkü ukutumä̧ kuidepä wea'anä̧mä̧ kka̧kuo̧ko̧tü̧jä̧, Epíritu-tä wea'anä̧ kka̧kuä̧tü̧jä̧, ukutunä̧ Dio i̧sa̧ Epíritu ü̧ja̧'a̧ttü̧. Ja̧'wa̧nü̧ ja̧'a̧ttü̧ Crito i̧sa̧ Epíritu-ru to'ätümä̧, Crito-kumä̧ wokotü.

¹⁰ Jua'a yabo päi'ünä̧, Crito ukutunä̧ ü̧ja̧'a̧mä̧, kuidepätukumä̧ wa'ü ikuina̧'a̧ ukuotäkuäwokü jäwänä̧. Ja̧'wa̧nü̧ ja̧'a̧nä̧ Epíritumä̧ a̧'kua̧rü̧ kkü̧, Dio surojü jui̧'a̧ jü̧nä̧ ukuru aditü ikuina̧'a̧ttü̧.

¹¹ Isopäi'ünä̧ Jesú-ru wa'arettü tto'ädinü̧ Epíritu ukutunä̧ ü̧jo̧mȩnä̧mä̧, ukutu kuidepätuku wa'are jäwä'i̧nä̧ tto̧ä̧dä̧kua̧, chutä a̧'kua̧rü̧ i̧sa̧ Epíritu ukutunä̧ ü̧ja̧'a̧ttü̧.

¹² Ja̧'wa̧nü̧ ja̧'a̧ttü̧ chawaruwä chü̧jä̧wa̧tü̧, ujutumä̧ tidepä weünä̧mä̧ tü̧ja̧kua̧ pä'ümä̧ juiya'a;

¹³ Isopäi'ünä̧ kuidepä pä̧wä̧rü̧ja̧'a̧ku̧ ku̧ja̧kuä̧tu̧kuo̧mȩnä̧mä̧ wa'ü kuikuäkuotüjä̧. Ja̧'wa̧nü̧ ja̧'a̧nä̧ Epíritu Sa̧tu̧ ujurunä̧, jua̧u̧ kuidepä weü si'eku kuikuätukuttümä̧ kkä̧kuä̧wä̧ ku̧ju̧nä̧rä̧kuo̧tü̧jä̧.

¹⁴ O'katoi'ünä̧ Dio i̧sa̧ Epíritu oipa'anä̧ 'chä̧tü̧mä̧, Dio i̧tti̧mü̧ ja̧'a̧.

¹⁵ Isopäi'ünä̧ Dio ukuturu iyinä̧ku̧ Epíritumä̧ 'chu̧'ä̧ro̧kü̧ ja̧'wa̧ta̧nü̧ yekuekuätukunä̧'i̧nä̧ jȩpo̧kü̧. Ja̧'wa̧nü̧ ja̧jü̧jueimä̧, pärokua'aku Epíritumä̧ Dio i̧tti̧mü̧ juokuächätukunä̧ juoepinä̧u̧jä̧. Jua̧u̧nä̧tä̧tä̧ ajuäkuäwätüjä̧: ¡Abbá, Chä'o pä'ümä̧!

¹⁶ Jua̧u̧ Epíritu-tätä ja̧'a̧, ujutunä̧ kkü̧ Epíritu-ru ji'äumä̧, Dio i̧tti̧mü̧jä̧ pä'ü.

¹⁷ Ja̧'wa̧nü̧ i̧tti̧mü̧ ta'amä̧, iya päinü̧mä̧ tiäremä̧ tȩmä̧kuo̧tü̧jä̧ ja̧'wa̧ta̧nü̧ Crito üäremä̧ ujutu'i̧nä̧ tüäre ja̧'a̧, chutäku usurä tȩmä̧u̧ttü̧mä̧, chutäku uruwonä̧ iyäwi'äkuä̧u̧jä̧.

Dio i̧yä̧kuȩ tta̧'a̧rä̧tü̧jä̧

¹⁸ Ja̧'wa̧ta̧nü̧ jitä mo̧ro̧ ubara ttu'u usurä tȩmä̧u̧mä̧, Dio i̧yä̧kuȩku̧ pa̧ja̧tü̧ totüttümä̧, kkara'a abo kki̧'ü̧ ja̧'a̧, to̧tä̧kuȩmä̧ u̧wä̧mȩnä̧ jü̧ ja̧'a̧ttü̧.

¹⁹ Isopäi'ünä̧ Dio aditäwämä̧, a̧mi̧ 'ki'ächi'ü tta̧wä̧ra̧'a̧, Dio i̧tti̧mü̧ tti̧jȩkuä̧chi̧'ä̧kuȩ mo̧ro̧.

²⁰ Isopäi'ünä̧ Dio aditäwä ji̧nü̧mä̧ surojünä̧tä̧ ma̧ä̧mi̧na̧'a̧, ji̧yȩtä̧ pä̧wä̧rü̧ja̧'a̧ku̧mä̧kü̧, jua'amä̧ Dio-rü pä̧wä̧rü̧jo̧mȩnä̧tä̧; ja̧'wa̧nü̧ ja̧'a̧nä̧ pi̧jä̧ ttü̧ja̧rü̧mä̧ tta̧'ä̧rü̧ kkä̧kuä̧wä̧tä̧ kki̧'i̧na̧'a̧.

²¹ Isopäi'ünä̧ Dio aditäwä surojuoächinü̧'i̧nä̧ surojü 'chu̧ä̧rü̧ttü̧mä̧ rä'epü i̧kuä̧kua̧, Dio i̧tti̧mü̧ ttü̧ja̧ku̧ adiwä jueinä̧ päi'ünä̧.

²² Ja̧'wa̧ta̧nü̧ wo̧juä̧tü̧jä̧, Dio uwäbe'inü̧ o'kajuiyünä̧, yajute isaju kku̧ba̧du̧ba̧ barawäkua usurä kkȩmä̧wa̧'a̧ jä̧'i̧nü̧'a̧nü̧, jitäbü päi'ünä̧ usurä ȩmä̧wa̧'a̧ pä'ü.

²³ Suro, pi̧jä̧ jäwätämä̧ usurä ȩmä̧wo̧ka̧'a̧, ujutu Epíritu Sa̧tu̧rü̧ kku̧nä̧rä̧tü̧mä̧ usurä ȩmä̧wä̧tü̧jä̧, Dio i̧yä̧kuȩmä̧ tȩmä̧kuo̧tü̧ ta'anä̧. Jakuänä̧mä̧ amükuä̧rä̧tü̧jä̧ Dio i̧tti̧mü̧ päi'ünä̧ jo̧mȩnü̧ ȩmä̧kuȩ mo̧ro̧.

²⁴ Isopäi'ünä̧ ujutu surojüttü tü̧ji̧pä̧kuȩmä̧ tta̧'ä̧rü̧ kkä̧kuä̧wä̧tä̧ ja̧'a̧; ja̧'wa̧nü̧ ja̧'a̧nä̧ täkü totümä̧, ¿tta̧'a̧nü̧ pä'ü tta̧tä̧rü̧kua̧ttü̧?

²⁵ Ja̧'wa̧nü̧ ja̧'a̧nä̧, ji̧nä̧ totokü tta̧tä̧ro̧mȩnä̧mä̧, tta̧mi̧'ki'ächi'ü tta̧'a̧rä̧tü̧jä̧.

²⁶ Ja̧'wa̧nü̧ jü̧ta̧'a̧nü̧, Epíritumä̧ ta̧mi̧ 'kuäta'amä̧ ppä̧dä̧u̧jä̧; Dio-rü jätepomȩnä̧, ttukuokuäkuȩmä̧ tieruwa'a'i̧nä̧; Epíritumä̧ chutä jä'epü, rü̧ȩnä̧ ajuäunü̧.

²⁷ Ja̧'wa̧ta̧nü̧ tta̧mi̧'iso'ki jo̧mȩnü̧ toa'attü̧, Epíritu amükuädümä̧ wo̧juö̧ Dio-rü pä̧wä̧rü̧jo̧mȩnä̧ jä'epü i̧tti̧mü̧ jäwämä̧.

Dio-ttü 'kȩ'ȩpü̧ ikumä̧ juiya'a

²⁸ Ja̧'wa̧ta̧nü̧ wo̧juä̧tü̧jä̧, Dio-rü repe'ü esewätürümä̧ o'kajuiyünä̧tä̧ adiu ppä̧dä̧u̧ pä'ü, churutä pä̧wä̧rü̧jo̧mȩnä̧ woinä̧u̧ru̧mä̧.

²⁹ Isopäi'ünä̧ ä'kanä̧ u̧wo̧jui̧nä̧u̧ru̧mä̧, ä'kojitä jȩpü̧ u̧ju̧ni̧nä̧u̧ I̧tti̧ jü̧ta̧'a̧nü̧ juottächa pä'ü, jua̧u̧ru̧mä̧ juätümä̧ ttä'kanä̧ ttubüo jü̧nä̧tä̧ jä̧kua̧'a̧nü̧.

³⁰ Ja̧'wa̧nü̧ ä'kanä̧ jo̧mȩnü̧ jȩi̧nä̧u̧ru̧mä̧, juätürütä wopinü̧; juätü woinä̧u̧ru̧mä̧, adiwä isotütä päi'ünä̧ pärotü ikuinä̧u̧; ja̧'wa̧ta̧nü̧ adiwä isotütä päi'ünä̧ ü'ärotinä̧u̧ru̧mä̧ chutä üadiwä iyinä̧u̧.

³¹ Ja̧'wa̧nü̧ ja̧'a̧ttü̧ ¿pi̧yȩ tü'kümä̧ toku pätäkua'ajä̧ttü̧? Dio ujutuku ü̧ja̧'a̧mä̧, ¿Ditä jä̧ttü̧ ujuturu suronä̧ jȩpü̧mä̧?

³² Dio-mä̧, ja̧'wa̧nü̧ jo̧ka̧'a̧ Chutä I̧tti̧rü̧'i̧nä̧ repeoka'a ujutu o'katoi'ünä̧ jäwänä̧ wa'ü ikunä̧ iyina̧'a̧mä̧ ¿Toku pä'ü kkorojuei o'kajuiyünä̧, chutäku yo̧mȩtȩnä̧ i̧yo̧ko̧u̧ täkua'ajä̧ttü̧?

³³ ¿Ditä jä̧kua̧'a̧jä̧ttü̧ Dio pojopü ȩmi̧nä̧u̧ru̧, suronä̧ jȩpi̧nü̧jä̧ pä̧kua̧mä̧? Suronä̧ wotürü aditü ikumä̧, Dio-tätä ja̧'a̧mä̧.

³⁴ ¿Ditä jä̧kua̧'a̧jä̧ttü̧ ubara ttuttunä̧ ro̧ȩpä̧kua̧mä̧? Crito ya̧tȩtä̧ ja̧'a̧ 'korujuo'ächinü̧'ka̧, tto'ächinü̧mä̧ ja̧'wa̧ta̧nü̧ Dio u̧wo̧jua̧'a̧ku̧nä̧ pä̧nü̧, ujutu tütü'kü ppä'ädü jä'epümä̧ 'kuäopünä̧.

³⁵ ¿Ditä jä̧kua̧'a̧jä̧ttü̧ Crito eseu repeüttü ujuturu 'kȩ'ȩpü̧ i̧kuä̧kua̧mä̧? ¿Usurä ȩmä̧kuä̧wä̧, jȩtü̧ juiyünä̧ jü̧, kuä'ü ttikua pä'ü ttu̧sä̧rü̧, ppäi ttuäwä, tü̧'ka̧tä̧wä̧ti̧yu̧ juitü, ra̧wä̧pi̧jü̧, wa'are?

³⁶ Wȩyu̧kuä̧ wȩnȩmä̧ pä'ija'a: «Uku jäwänä̧, ujutumä̧ 'kuäopünä̧tä̧ wa'ü tikua pä'ü wotüjä̧; Oweja-tü̧rü̧ kuä'äu ikuäwomȩku̧ ttȩpa̧'a̧ jä̧'i̧nü̧'a̧nü̧ wotüjä̧.»

³⁷ Ja̧'wa̧nü̧ ja̧'a̧nä̧, pi̧yȩmä̧ o'kajuiyünä̧ 'kuäopa'anä̧, abo 'kuä'o'ätüjä̧ chu, Jesucrito ujuturu repe'inü̧nä̧tä̧.

³⁸ Ja̧'wa̧nü̧ ja̧'a̧ttü̧ wo̧jua̧sä̧, Dio repeüttümä̧, wa'are'i̧nä̧, a̧'kua̧rä̧kuä̧wä̧'i̧nä̧, á̧gȩrȩ'i̧nä̧, pi̧jä̧ttü̧ ttukuo'i̧nä̧, ukuo jäwä'i̧nä̧, jitä kka̧ku̧'i̧nä̧ ja̧'wa̧ta̧nü̧ rȩbȩä̧kuä̧wä̧kuȩ'i̧nä̧,

³⁹ mo̧ro̧jä̧ ujuru'i̧nä̧, täkua'a jäwä'i̧nä̧, kkoro Dio aditäwä'i̧nä̧. ¡Yorisotä juiya'a Dio ttürü, Crito Jesú Tu̧ru̧wa̧nä̧ repeüttü 'kȩ'ȩpü̧ ikumä̧!