Romanos 7 - Nuevo Testamento Uwotjüja

Jitämä̧ Crito-ku todepätüjä̧

¹ Chawaruwä chü̧jä̧wa̧tü̧, ukutumä̧ weäwä wȩnȩmä̧ wo̧juä̧tü̧jä̧, jua̧u̧ weäwä wȩnȩmä̧ mikuäwa'a, ji̧nä̧ tta̧'kua̧rä̧i̧tä̧ jȩpü̧ tü̧ja̧kuo̧mȩnä̧tä̧.

² Isopäi'ünä̧ weäwä wȩnȩnä̧mä̧ isajumä̧ kkü'käwinä̧ku̧ku̧mä̧ todepaju, ji̧nä̧ jua̧u̧ a̧'kua̧rä̧i̧tä̧; ja̧'wa̧nü̧ ja̧'a̧nä̧ kkirekuo 'korujuoächomȩnä̧mä̧, täkü todepokoju kkirekuottümä̧.

³ Ja̧'wa̧nü̧ ja̧'a̧ttü̧, ji̧nä̧ kkirekuo a̧'kua̧ra̧'a̧nä̧ kka̧ra̧ku̧ ppäjächi'omȩnä̧mä̧ adulterio pättünä̧ kkä̧ju̧; ja̧'wa̧nü̧ ja̧'a̧nä̧ kkirekuo 'korujuoächomȩnä̧mä̧, weäwä wȩnȩttü̧mä̧ 'chu̧ä̧ro̧ko̧kua̧, kka̧ra̧ irekua päji'a pä'ümä̧.

⁴ Ja̧'wa̧ta̧nü̧ ja̧'a̧ chawaruwä chü̧jä̧wa̧tü̧ ukutu'i̧nä̧, Crito-rü kuiyäwätukuomȩnä̧mä̧, jua̧u̧tä̧ku̧ 'korujuo'ächinä̧tü̧jä̧ weäwä wȩnȩttü̧mä̧, kka̧ra̧ wa'arettü tto'ädinü̧ isotü päkui'ätukua pä'ümä̧. Ja̧'wa̧nü̧ jo̧mȩnä̧ u̧wä̧ju̧mä̧ adiwäjuei Dio-rü ȩpü̧ tiyäkuotüjä̧.

⁵ Isopäi'ünä̧ tidepä wea'anä̧ tü̧ja̧kuo̧mȩnä̧mä̧, weäwä wȩnȩmä̧ tidepä kkü'kekunä̧, yaboku jetü̧nä̧tä̧ jȩi̧nü̧ ja̧'wa̧nü̧ jȩto̧mȩnä̧ wa'are u̧wä̧ju̧tä̧ jȩpi̧nä̧tü̧jä̧ ujutumä̧.

⁶ Ja̧'wa̧nü̧ ja̧'a̧nä̧, jitämä̧ weäwä wȩnȩmä̧ wȩo̧ko̧u̧jä̧, jua̧u̧ttü̧mä̧ wa'ü ikuinä̧tü̧jä̧, pärokuä jareünä̧ kkä̧kuä̧wä̧, Epíritu jäwänä̧ Dio-rü ukuotü tü̧ja̧kua̧ pä'ü.

Ukuotäkuäwoküku rowäwätüjä̧

⁷ ¿Ja̧'wa̧nü̧ ja̧'a̧mä̧, weäwä wȩnȩmä̧ tukuotü juiyünä̧ weü päta'a tä̧jí̧? ¡Ja̧'wa̧nü̧mä̧kü̧! Jua̧u̧ weäwä wȩnȩ juiyüttümä̧, ji̧yȩja̧mä̧ surojü pädümä̧ jerupajüsä; ja̧'wa̧ta̧nü̧ weäwä wȩnȩ: «Kkü'kekunä̧mä̧ to'kuä» päü juiyüttümä̧, kkü'kekunä̧ toäkuäwämä̧ surojü ja̧'a̧ tä̧jí̧ pä'okü pajüsä.

⁸ Ja̧'wa̧nü̧ ja̧'a̧nä̧, ukuotäkuäwokümä̧, ji̧yȩnä̧tä̧ weäwä wȩnȩnä̧ aditina̧'a̧ surojü pä̧wä̧rü̧jü̧nä̧ jȩcha̧ pä'ümä̧. Weäwä wȩnȩ juiyomȩmä̧, ukuotäkuäwokümä̧ ujuru juiya'a.

⁹ Ja̧'wa̧ta̧nü̧ ttümä̧ weäwä wȩnȩ juiyünä̧ kki̧nü̧sä̧; ja̧'wa̧nü̧ ja̧'a̧nä̧ weäwä wȩnȩ rȩbȩwo̧mȩnä̧mä̧, ukuotäkuäwokümä̧ a̧'kua̧ri̧'i̧na̧'a̧ ttünä̧.

¹⁰ Ja̧'wa̧nü̧ jo̧mȩnä̧ ttü cha̧'kua̧ra̧ pä'ü iyinü weäwä wȩnȩmä̧ wa'ü chikua pä'ütä ji̧na̧'a̧;

¹¹ Isopäi'ünä̧ ukuotäkuäwokümä̧, weäwä wȩnȩ ji̧yȩnä̧tä̧, yaparetü Dio-ttü 'kȩ'ȩpü̧ ikuinä̧ku̧sä̧.

¹² Ja̧'wa̧nü̧ ja̧'a̧ttü̧ weäwä wȩnȩmä̧, isopäi'ünä̧ surojü juiyütätä ja̧'a̧, adiwomȩnä̧ jü̧nä̧tä̧.

¹³ Ja̧'wa̧nü̧ ja̧'a̧nä̧, adiwä jueimä̧ wa'arera̧'a̧ ȩpi̧nü̧ pä'ümä̧ pä'oküsä. ¡Ja̧'wa̧nü̧mä̧kü̧! ja̧'wa̧nü̧ ja̧'a̧ttü̧, pi̧yȩ jȩpi̧nü̧mä̧ ukuotäkuäwokütä ji̧na̧'a̧, adiwä juei ukuotäkuäwä ji̧yȩnä̧tä̧ doächi'inü̧mä̧. Ja̧'wa̧nü̧ jo̧mȩnä̧ weäwä wȩnȩnä̧tä̧ o'katoi'ünä̧ ji̧yȩja̧mä̧ adiu ja̧'a̧, ji̧yȩja̧mä̧ surojü ja̧'a̧ pä'ü wo̧jui̧'i̧nä̧tü̧jä̧.

¹⁴ Isopäi'ünä̧ weäwä wȩnȩmä̧ Epíritu jäwä ja̧'a̧ pä'ümä̧ wo̧juä̧tü̧jä̧ ja̧'wa̧nü̧ ja̧'a̧nä̧ ttümä̧ pi̧jä̧ ttü̧ja̧sa̧sä̧, surojü ujuru wea'anä̧tä̧ kkä̧kuä̧wä̧ i̧sa̧sä̧.

¹⁵ Ja̧'wa̧nü̧ jo̧mȩttü̧ jȩchü̧mä̧ chu̧wo̧jui̧pü̧ juiyünä̧ wa̧sä̧; jȩcha̧ pädümä̧ jȩpo̧kü̧sä̧, chüjü'kokütä jȩchü̧nä̧ wa̧sä̧.

¹⁶ Ja̧'wa̧nü̧ jȩcha̧ pädokütä jȩcha̧'a̧ttü̧, weäwä wȩnȩmä̧ adiwä juei ja̧'a̧ pä'ü wo̧jua̧sä̧.

¹⁷ Ja̧'wa̧nü̧ jo̧mȩnä̧ surojü jȩpü̧mä̧ ttümä̧kü̧ ja̧'a̧, surojü ukuotäkuäwokü ttünä̧ kka̧ku̧tä̧ ja̧'a̧ suronä̧ jȩchü̧nä̧ jȩü̧mä̧.

¹⁸ Ja̧'wa̧ta̧nü̧ ttü chidepänä̧mä̧ adiumä̧ kko̧ka̧'a̧ pä'ü wo̧jua̧sä̧; ja̧'wa̧nü̧ ja̧'a̧ttü̧ jakuänä̧mä̧ jȩcha̧ päda'anä̧, wä̧mȩnä̧mä̧ jȩchü̧ juiyünä̧ wa̧sä̧.

¹⁹ Isopäi'ünä̧ adiu jȩcha̧ pädümä̧ jȩchü̧ juiyünä̧ ja̧'a̧nä̧, jȩcha̧ pädokü jä̧ji̧ surojütä jȩpü̧sä̧.

²⁰ Ja̧'wa̧nü̧ chüjü'kokü jȩcha̧'a̧mä̧, ttütä cha̧mü̧nä̧mä̧ jȩpo̧kü̧sä̧, pärokua'aku ttünä̧ kka̧ku̧ ukuotäkuäwokütä jȩa̧'a̧ jua'amä̧.

²¹ Ja̧'wa̧nü̧ ja̧'a̧ttü̧ adiumä̧ jȩcha̧ päda'anä̧, ttünä̧ kka̧'a̧ ttürü weü wȩnȩ, jua̧u̧mä̧ surojütä ja̧'a̧.

²² Ja̧'wa̧nü̧ ja̧'a̧ttü̧ cha̧mi̧ iso'ki jakuänä̧mä̧, Dio weü wȩnȩtä̧ cha̧'kua̧ adiunä̧ eseusä;

²³ Ja̧'wa̧nü̧ ja̧'a̧nä̧ ttünä̧ ji̧yȩtȩ kka̧'a̧, ttü chamükuädüku rowäkuäu: Jua̧u̧mä̧ surojü jȩpü̧ chü̧jü̧nä̧tä̧, weü ja̧'a̧ ttü chidepänä̧.

²⁴ ¡Juiyo suro juo'ächinü̧sä̧ tä̧jí̧, ttü we! ¿Ditä jä̧kua̧'a̧jä̧ttü̧, pi̧yȩ chidepä wa'are jäwättü, ttürü rä'epü i̧kuä̧kua̧mä̧?

²⁵ Dio-rütä rü̧ȩnä̧ eseusä, Tu̧ru̧wa̧ Jesucrito-nä̧. Ja̧'wa̧nü̧ ja̧'a̧ttü̧ cha̧mü̧nä̧ chamükuädünä̧mä̧, Dio weü wȩnȩtä̧ jȩpü̧sä̧ ja̧'wa̧nü̧ ja̧'a̧nä̧ chidepänä̧mä̧ surojü weütä jȩpü̧sä̧.