Romanos 5 - Nuevo Testamento Uwotjüja

Dio ujuturu I̧tti̧nä̧ esekuinü̧ wȩnȩ

¹ Ji̧yȩnä̧tä̧ ta̧'kua̧ tu̧wȩnä̧rü̧nä̧, surojü jui'ätü jü̧nä̧ jȩpü̧ ikuinä̧u̧jä̧, Dio-kumä̧ eseäkuäwä tu̧ju̧nä̧rü̧nä̧ Jesucrito-nä̧mä̧.

² Jua̧u̧ Jesucrito-nä̧tä̧, ta̧'kua̧ tu̧wȩnä̧ro̧mȩnä̧, re ü̧ji̧nü̧nä̧ dodepinä̧tü̧jä̧, jitä ta̧mi̧ 'ki'ächi'ü tü̧ja̧ku̧nä̧mä̧, ja̧'wa̧nü̧ jo̧mȩttü̧ eseäkuäwätüjä̧, ujutu'i̧nä̧ Dio ukuo jäwänä̧ päti'äkuotüjä̧ pä'ü, tta̧'ä̧rü̧ kkä̧nü̧.

³ Suro jua̧u̧tä̧mä̧kü̧, usurä tȩmä̧kuä̧wa̧'a̧'i̧nä̧ esewätüjä̧, jua̧u̧ usurä ȩmä̧wä̧kuä̧wä̧mä̧, tta̧'a̧rü̧ weye wotünä̧ ppädü pä'ü tu̧wo̧jua̧'a̧ttü̧;

⁴ Jua̧u̧ ta̧mi̧ 'kitächi'ümä̧, kka̧kuä̧mü̧ toüttü 'kuäto'ünä̧ ja̧'a̧, jua̧u̧ttü̧ 'kuäto'omȩnä̧mä̧, tta̧'a̧rü̧ tü̧ja̧ku̧nä̧ ja̧'a̧;

⁵ Jua̧u̧ tta̧'ä̧rü̧ kkä̧kuä̧wä̧mä̧ dä'ä ttuwepokü; isopäi'ünä̧ Dio eseu repeümä̧, Dio ta̧mi̧'iso'kinä̧ iyinü̧ ja̧'a̧ttü̧, Epíritu Sa̧tu̧nä̧, chutä iyinä̧ku̧nä̧.

⁶ Isopäi'ünä̧ Crito-mä̧, tujuru jui'ätü ta'anä̧, pätekuächü mo̧ro̧ 'koru juo'ächinü̧, suronä̧ jȩpä̧tü̧rü̧ ppä'ädümä̧.

⁷ Isopäi'ünä̧, ya̧tȩ adiwä i̧sa̧ jäwänä̧, ya̧tȩ 'korujuoächa pä'ümä̧ 'kuäoka'a; ja̧'wa̧nü̧ ja̧'a̧nä̧'i̧nä̧, ya̧tȩ adiwä jäwänä̧, 'koru juoächa pä'ü kkü̧ 'kua̧ra̧'a̧.

⁸ Ja̧'wa̧nü̧ ja̧'a̧nä̧, Dio-mä̧ rü̧ȩnä̧ ujuturu repeü i̧jȩpi̧nä̧u̧jä̧, surojü jȩpä̧tü̧ ta'anä̧, Crito-mä̧ ujutu jäwänä̧ 'korujuo'ächinü̧.

⁹ Jua'a yabonä̧, Jesucrito ukuojanä̧ adiwä isotü jü̧nä̧ jȩi̧nä̧u̧ ta'attü̧, jua̧u̧ Jesucrito-nä̧tä̧ ro̧ȩkuä̧kuȩttü̧mä̧ tü̧ja̧kui̧'ä̧kuo̧tü̧jä̧.

¹⁰ Isopäi'ünä̧ Dio-mä̧ aboiyotü ta'anä̧, i̧tti̧ wa'ü iku toe'ächinü̧ ji̧yȩnä̧tä̧ esekuinä̧u̧jä̧, juȩnȩ abonä̧nü̧ ja̧'a̧ esekuinü̧ o'ka'amä̧, jua̧u̧ a̧'kua̧ra̧'a̧ttü̧ surojüttümä̧ tü̧ji̧pä̧kuo̧tü̧jä̧.

¹¹ Suro pi̧yȩtä̧mä̧kü̧, Dio-rü'i̧nä̧ eseäkuäwätüjä̧ Tu̧ru̧wa̧ Jesucrito-nä̧, jua̧u̧ Crito-nä̧tä̧ eseku ikuinä̧u̧ ta'attü̧.

Adá̧'i̧nä̧, Jesucrito'i̧nä̧ ttütü'kü

¹² Ja̧'wa̧nü̧ ja̧'a̧ttü̧, pi̧jä̧ra̧'a̧mä̧ ttü̧ja̧sa̧ ya̧tȩnä̧tä̧ doächina̧'a̧ ukuotäkuäwokümä̧ ja̧'wa̧ta̧nü̧ jua̧u̧ ukuotäkuäwokünä̧ doächina̧'a̧ wa'aremä̧ ja̧'wa̧nü̧ jo̧mȩnä̧ wa'aremä̧ o'katoi'ünä̧rü̧ yoäwächina̧'a̧, jua'amä̧ o'katoi'ünä̧ ttukuotoka'a ji̧na̧'a̧ttü̧.

¹³ Weäwä wȩnȩ kkä̧kua̧'a̧ ä'kanä̧, täkü pi̧jä̧nä̧mä̧ ukuotäkuäwokümä̧ kki̧na̧'a̧; ja̧'wa̧nü̧ ja̧'a̧nä̧ weäwä wȩnȩ juiyomȩmä̧, ukuotäkuäwokümä̧ juiya'a 'kua̧rü̧nä̧tä̧ ja̧'a̧.

¹⁴ Ja̧'wa̧nü̧ ja̧'a̧nä̧, wa'aremä̧ Adá̧ ü̧ji̧no̧mȩttü̧ kkä̧mä̧dü̧ Moisé-bü weina̧'a̧, juätümä̧ ji̧yȩtȩ weäwänä̧mä̧ ttü̧ja̧kuo̧ka̧'a̧nä̧, Adá̧ ji̧nü̧'a̧nü̧mä̧, jua̧u̧ Adá̧-mä̧ i̧chä̧kua̧ pättinä̧ku̧ru̧ wȩnȩkuä̧chi̧na̧'a̧.

¹⁵ Ja̧'wa̧nü̧ ja̧'a̧nä̧, Adá̧ suronä̧ jȩi̧nü̧mä̧, Dio iyinü̧ku̧mä̧ otó abo ja̧'a̧ wȩnȩkuä̧chü̧ juiyünä̧tä̧. Jua'amä̧ ya̧tȩ suronä̧ jȩi̧na̧'a̧mä̧, rekuätü wa'ü ttikunä̧ ji̧na̧'a̧ttü̧; ja̧'wa̧nü̧ ja̧'a̧nä̧ Dio rettü mippoünä̧, Jesucrito, ya̧tȩnä̧tä̧ iyinü̧mä̧, abonä̧nü̧ rekuätürü ppädü adiwä juei ja̧'a̧.

¹⁶ Ja̧'wa̧ta̧nü̧ mippoünä̧ ppädinü̧mä̧, chu ya̧tȩ surojü jȩi̧nü̧'a̧nü̧mä̧ 'kuäopokü; jua̧u̧mä̧ isopäi'ünä̧tä̧ ya'utenä̧tä̧ surojü jȩi̧na̧'a̧mä̧ ro̧ȩkuä̧ra̧'a̧tä̧ ä̧tȩkuo̧tü̧ ji̧na̧'a̧; ja̧'wa̧nü̧ ja̧'a̧nä̧ rettü ppädinü̧mä̧ rekuätü suronä̧ jȩtto̧mȩnä̧, adiwä isotü pätti'a pä'ü rȩbȩwi̧na̧'a̧.

¹⁷ Ja̧'wa̧nü̧ ji̧na̧'a̧ttü̧mä̧, ya̧tȩ surojü jȩi̧na̧'a̧mä̧ wa'aretä weina̧'a̧, juȩnȩ abonä̧nü̧ wȩä̧kua̧, rettü mippoünä̧ iyinü̧, ya̧tȩ Jesucrito-nä̧tä̧ kkä̧kuä̧wä̧mä̧.

¹⁸ Ja̧'wa̧nü̧ ji̧na̧'a̧ttü̧, Adá̧ suronä̧ jȩi̧na̧'a̧mä̧ ro̧ȩkuä̧kuȩra̧'a̧tä̧ pätekuächina̧'a̧ o'katoi'ünä̧rü̧tä̧, ja̧'wa̧nü̧ ji̧nü̧ta'anü̧ päi'ina̧'a̧ o'katoi'ünä̧rü̧ Jesucrito aditü iku tta̧'kua̧rü̧ iyina̧'a̧mä̧.

¹⁹ Isopäi'ünä̧ ya̧tȩ ukuotoka'a ji̧na̧'a̧, o'katoi'ünä̧rü̧ surojü wotütä päi'inü̧ta'anü̧; ya̧tȩ ukuotinü̧nä̧mä̧, o'katoi'ünä̧tä̧ adiwä isotütä pä'i'inä̧tü̧.

²⁰ Isopäi'ünä̧ weäwä wȩnȩmä̧, surojütä yaboku rü̧ä̧chü̧nä̧ kkiopina̧'a̧; ja̧'wa̧nü̧ ji̧na̧'a̧nä̧, surojü kki̧no̧mȩmä̧, Dio re ü̧ji̧nü̧mä̧ abo 'kuäo'ünä̧ juiyo rü̧i̧na̧'a̧.

²¹ Ja̧'wa̧nü̧ surojümä̧ wa'arenä̧tä̧ weinüta'anü̧, mippoünä̧ iyinü̧mä̧ adiwä jueinä̧tä̧ pärotü ikuinä̧u̧jä̧ Tu̧ru̧wa̧ Jesucrito-nä̧tä̧, kkä̧kuä̧wä̧ i'ko iyinü̧nä̧.