Romanos 4 - Nuevo Testamento Uwotjüja

Abraha̧ a̧'kua̧ u̧wȩnä̧ri̧nü̧ wȩnȩ

¹ Ja̧'wa̧nü̧ ja̧'a̧mä̧ ¿Däjetä ȩmi̧nü̧ päta'ajä̧ttü̧ tä̧do̧ Abraha̧-mi̧nä̧mä̧?

² Isopäi'ünä̧, Abraha̧-mä̧, chutä adiu jȩi̧nü̧nä̧ adiwä i̧sa̧ jü̧nä̧ päi'inü̧ttü̧mä̧, chutä a̧mü̧nä̧ pa̧ja̧tü̧ ukuo teäkuäwa pä'ütä ji̧na̧'a̧, ja̧'wa̧nü̧ ja̧'a̧nä̧ Dio-rü esewa pä'ümä̧kü̧tä̧.

³ Ja̧'wa̧nü̧ ja̧'a̧ttü̧ wȩyu̧kuä̧ wȩnȩmä̧ pä'a: Abraha̧-mä̧ Dio-rü esetomȩnä̧mä̧, adiwä juei jȩä̧kuä̧wä̧ i̧sa̧ jü̧nä̧ toinä̧ku̧.

⁴ Adikuä i̧sa̧ iäre pärätämä̧, rettü ppädäkuäwä 'kua̧rü̧nä̧mä̧ pa̧ja̧kuo̧kü̧ ja̧'wa̧nü̧ ja̧jü̧ jueimä̧ tti̧mi̧ppotü jü̧nä̧tä̧ iyäwä ja̧'a̧.

⁵ Ja̧'wa̧nü̧ ja̧'a̧nä̧, ya̧tȩ aditoka'anä̧, chu su̧ro̧pa̧rü̧ aditü ikuru esetomȩnä̧mä̧, jua̧u̧ a̧'kua̧ u̧wȩnä̧rü̧nä̧ Dio-mä̧ adiwä i̧sa̧ jü̧nä̧tä̧ toäku.

⁶ Ja̧'wa̧ta̧nü̧ Dawi'i̧nä̧ ukuokuinü̧, ya̧tȩ kkorojueimä̧ aditoka'anä̧, eseäkuäwä rȩbȩwä̧ku̧ru̧ ja̧'wa̧nü̧ wa̧mä̧, churutä a̧'kua̧ u̧wȩnä̧ro̧mȩttü̧ Dio-mä̧ adiwä i̧sa̧ jü̧nä̧tä̧ pärotü ikuäku pä'ü.

⁷ Dawi-mä̧ pä'inü̧: ¡Juiyo eseäkuäwätü, jitü suronä̧mä̧ jȩttä̧'i̧ja̧'a̧nä̧, surojü jȩttä̧'i̧jü̧mä̧, Dio a̧tto̧pü̧ i̧kuä̧u̧mä̧!

⁸ ¡Eseäkuäwä kka̧'a̧, suronä̧mä̧ jȩä̧'i̧ja̧'a̧nä̧, jȩpo̧kü̧ jü̧nä̧tä̧ Tu̧ru̧wa̧ jȩpü̧ ikuäkurumä̧!

⁹ Ja̧'wa̧nü̧ ja̧'a̧ttü̧ ¿Pi̧yȩ eseäkuäwämä̧, suro circuncisión pättüjuei jȩpi̧nä̧tü̧rü̧tä̧ ja̧'wa̧ta̧nü̧ circuncisión pättü jȩpo̧ko̧tü̧ pi̧nä̧tü̧tä̧ ttȩmü̧ ja̧'a̧? Isopäi'ünä̧ Abraha̧-mä̧, Dio-rü a̧'kua̧ u̧wȩnä̧ro̧mȩttü̧ adiwä i̧sa̧ jü̧nä̧tä̧ toinä̧ku̧ pä'ätüjä̧.

¹⁰ Ja̧'wa̧nü̧ ja̧'a̧mä̧ ¿ti̧yȩnü̧ adiwä i̧sa̧ jü̧nä̧ jȩi̧nä̧ku̧jä̧ttü̧? ¿Circuncisión pättü juei jȩi̧nü̧ o'ka'a ji̧na̧'a̧, ji̧nä̧ jȩü̧ juiyäi ji̧na̧'a̧ tä̧jí̧? Isokü̧, circuncisión pättü juei jȩä̧kuä̧u̧ juiyäi ji̧na̧'a̧.

¹¹ Isopäi'ünä̧ Abraha̧-mä̧ circuncisión pättüjuei jȩtti̧nä̧ku̧, Dio-rü, churutä a̧'kua̧ u̧wȩnä̧rä̧jä̧ku̧, sello jä̧'i̧nü̧'a̧nü̧ ttu̧wo̧jua̧rü̧ pä'ütä. Ja̧'wa̧nü̧ jo̧mȩnä̧ Abraha̧-mä̧, pärowächinü̧ o'katoi'ünä̧ Dio-rü tta̧'kua̧ wȩnä̧rä̧tü̧mä̧ ttä'o jü̧nä̧tä̧, circuncisió̧-mä̧ jȩttä̧kuä̧wo̧ka̧'a̧nä̧. Ja̧'wa̧nü̧ ja̧'a̧ttü̧ Dio-mä̧ adiu jȩpä̧tü̧ jü̧nä̧tä̧ to̧ä̧u̧.

¹² Ja̧'wa̧ta̧nü̧ Abraha̧-mä̧ circuncisión jȩpä̧kuä̧wo̧tü̧'i̧nä̧ ttä'o ja̧'a̧nä̧, jua̧u̧ ji̧nü̧ta'anü̧ circuncisión jȩpä̧kuä̧wo̧ko̧tü̧ tta'anä̧ tta̧'kua̧ wȩnä̧rä̧tü̧mä̧ ttä'o ja̧'a̧.

Dio-rü tta̧'kua̧ wȩnä̧rä̧tü̧rü̧ iya päinü̧

¹³ Isopäi'ünä̧ Abraha̧-rü̧ i̧rȩjä̧, churutä'i̧nä̧ iyü kkä̧nü̧, i̧tti̧mü̧rü̧'i̧nä̧ Dio iya pä'ina̧'a̧mä̧, weäwä wȩnȩ ukuotomȩttü̧mä̧ jo̧ka̧'a̧ ji̧na̧'a̧. Jua'amä̧ Dio-rü, churutä a̧'kua̧ u̧wȩnä̧ro̧mȩttü̧ ji̧na̧'a̧; Dio adiwä i̧sa̧ jü̧nä̧ pärotü ikumä̧.

¹⁴ Isopäi'ünä̧ Dio iya päinü̧mä̧, weäwä wȩnȩ ukuotätürütä iya päinü̧ttü̧mä̧, tta̧'kua̧ wȩnä̧rä̧kuä̧wä̧mä̧ mikuäwokü ja̧jü̧ ja̧'wa̧ta̧nü̧ iya päinü̧'i̧nä̧ mikuäwokü ja̧jü̧ ja̧'a̧.

¹⁵ Weäwä wȩnȩ ukuotokotürü ro̧'ȩpü̧ Dio-mä̧; ja̧'wa̧nü̧ ja̧'a̧nä̧ weäwä wȩnȩ juiyomȩmä̧ tä̧bo̧tä̧kuä̧wä̧'i̧nä̧ juiya'a, jua'amä̧ weäwä wȩnȩttü̧ to'ija̧'a̧ku̧ jȩä̧kuä̧wä̧ juiya'attü̧.

¹⁶ Ja̧'wa̧nü̧ ja̧'a̧ttü̧, Abraha̧-rü̧'i̧nä̧, i̧tti̧mü̧rü̧'i̧nä̧ iya pä'inü̧ mikuäwächi'ünä̧ ja̧ pä'ümä̧, mippoünä̧ iyinü̧, a̧'kua̧ u̧wȩnä̧ro̧mȩttü̧tä̧. Ja̧'wa̧nü̧ ja̧'a̧mä̧, suro weäwä wȩnȩ ukuotätürütä iya pä'ümä̧kü̧ ja̧'a̧; Abraha̧ ji̧nü̧ta'anü̧ tta̧'kua̧ wȩnä̧rä̧tü̧rü̧mä̧ o'katoi'ünä̧rü̧ iya pä'ü ja̧'a̧. Ja̧'wa̧nü̧ jo̧mȩnä̧ Abraha̧-mä̧ o'katoi'ünä̧ ttä'o ja̧'a̧.

¹⁷ Wȩyu̧kuä̧ wȩnȩ päü'anü̧: «Pi̧jä̧ pa̧ja̧ku̧nä̧ ttä'o jü̧nä̧ juodepäkujä̧» Pa̧'a̧nü̧ wa̧ Abraha̧ esetinä̧ku̧ Dio-mä̧, wa'ü ikuätürü'i̧nä̧ tta̧'kua̧rü̧ iyü ja̧'wa̧ta̧nü̧ juiyomȩttü̧'i̧nä̧ uwäbe'äkuäwä i̧sa̧.

¹⁸ Tta̧'kua̧ wȩnä̧rü̧ tta̧wä̧rä̧kuä̧wä̧mä̧ täkü juiya'a, Abraha̧-mä̧ esetü tta̧'ä̧ri̧nü̧, ja̧'wa̧nü̧ jo̧mȩnä̧ «rekuätü ttä'o päi'ünä̧ pärowächinü̧» Dio päinü̧ta'anü̧: «Ja̧'wa̧nü̧ jo̧mȩnä̧ ttirekuäkuotü kui̧tti̧mü̧mä̧» jü̧nä̧.

¹⁹ Abraha̧ a̧'kua̧ wȩnä̧rü̧ tta̧wä̧rü̧mä̧ jiyüpächi'okü pinü̧, täkü cien años jo̧mȩnä̧ u̧ju̧nä̧ra̧'a̧nä̧, irekua Sara'i̧nä̧ täkü ttijuiyuwächü mo̧ro̧ ja̧'a̧nä̧, tti̧tti̧kua̧ pä'ümä̧ ttubüäkuächa'anä̧.

²⁰ Abraha̧-mä̧, Dio chi̧yä̧kua̧jä̧ päinü̧mä̧, üdüdüwoka'a esetü, yaboku ujuruku a̧'kua̧ wȩnä̧ri̧nü̧, ja̧'wa̧nü̧ jȩpü̧ Dio ü̧rü̧ä̧ esewinü̧.

²¹ Jo̧mȩnü̧tä̧ Abraha̧-mä̧ wo̧jui̧nü̧, Dio iya päinü̧mä̧ o'kajuiyünä̧ ujuru u̧ju̧nä̧ra̧'a̧ttü̧ i̧yä̧kua̧sä̧ pä'ü.

²² Ja̧'wa̧nü̧ jo̧mȩttü̧, a̧'kua̧ u̧wȩnä̧rü̧mä̧ adiwä i̧sa̧ jü̧nä̧ Dio-mä̧ ȩmi̧nä̧ku̧.

²³ Ȩmi̧nä̧ku̧ pä'ü wȩyu̧kuä̧ päümä̧, suro Abraha̧-rü̧tä̧mä̧ jo̧ka̧'a̧,

²⁴ ujutu tütü'kü'i̧nä̧ pä'a. Ujutu ta̧'kua̧ tu̧wȩnä̧ro̧mȩnä̧mä̧, Tu̧ru̧wa̧rü̧ Jesú wa'arettü ttoädinä̧ku̧ru̧.

²⁵ Jua̧u̧mä̧ wa'arera̧'a̧ iyinä̧ku̧ ujutu suronä̧ jȩtü̧ i̧mi̧täunä̧ ja̧'wa̧ta̧nü̧ jua̧u̧ ttoächomȩnä̧, adiwä isotü ttü̧ja̧ jü̧nä̧tä̧ ȩmi̧nä̧u̧jä̧.