Romanos 3 - Nuevo Testamento Uwotjüja

¹ Ja̧'wa̧nü̧ ja̧'a̧mä̧ ¿däjetä ppäda'ajä̧ttü̧ judío i̧sa̧ kuá pä'üdä̧jä̧ ja̧'wa̧ta̧nü̧ circuncisión pättü jȩpä̧kuä̧wa̧ kuá pä'üdä̧jä̧ jü̧nä̧mä̧?

² O'kajuiyünä̧tä̧ pa̧ja̧kuä̧chü̧nä̧. Ä̧kuo̧mȩnä̧mä̧, isopäi'ünä̧ Dio i̧wȩnȩmä̧, judío-rü iyäwi'ina̧'a̧.

³ Ja̧'wa̧nü̧ ji̧na̧'a̧nä̧, juätüttü yotukunä̧ Dio-rü ttukuotoka'a ji̧na̧'a̧mä̧, Dio ppäda päinü̧mä̧, ppädü juiyünä̧mä̧ jo̧ka̧'a̧, ji̧nä̧sokutä ppä̧dä̧kua̧.

⁴ ¡Ja̧'wa̧nü̧mä̧kü̧ ja̧'a̧! ttü̧ja̧mä̧ o'katoi'ünä̧ yapareäkuäwä isotü ja̧'a̧nä̧, Dio-mä̧ jueü wȩnȩ i̧sa̧ ja̧'a̧; wȩyu̧kuä̧ wȩnȩmä̧ pä'a: «Kukuoku ji̧yȩnä̧tä̧, ttü̧ja̧mä̧ jueü wȩnȩ kukuokua'a tottäkuotü, ja̧'wa̧nü̧ jo̧mȩnä̧ abo 'kuäkuo'äkua̧jä̧, suronä̧ pättü'i̧nä̧.»

⁵ (Ttü̧ja̧sa̧ jü̧nä̧tä̧ pädäu̧jä̧) Dio adiwomȩnä̧ jȩü̧mä̧ ujutu suronä̧ jȩti̧yä̧ku̧, a̧mi̧ surächi'äku ro̧ȩpo̧mȩnä̧ i̧jȩkuä̧cha̧'a̧. ¿Ja̧'wa̧nü̧ ro̧ȩpo̧mȩnä̧, Dio-mä̧ suronä̧ jȩpü̧ pätäkua'a tä̧jí̧?

⁶ ¡Ja̧'wa̧nü̧mä̧kü̧ ja̧'a̧!; Dio adiwomȩnä̧ jȩä̧kuä̧wä̧ i̧sa̧ jü̧ juiyüttümä̧, ¿Tta̧'a̧nü̧ ü'ojo'äkua'ajä̧ttü̧ adiu jȩpi̧nä̧tü̧rü̧'i̧nä̧, suronä̧ jȩpi̧nä̧tü̧rü̧'i̧nä̧, jü̧nä̧mä̧?

⁷ Ja̧'wa̧nü̧ ja̧'a̧nä̧, Dio jäwä jueü wȩnȩmä̧ ttü chuyapareu abo 'kuäoa'a, jua'amä̧ churutä tesewa pä'ü ja̧'a̧ttü̧ ¿Tta̧'a̧nü̧ pä'ü, ji̧nä̧ surojü jȩpü̧ 'kua̧rü̧nä̧ pojopü topäkuäwa̧sä̧ttü̧?

⁸ Ja̧'wa̧nü̧ jo̧mȩnä̧ ujuturu suronä̧ pä'ü amükuädü pä'ätü: Jua̧u̧nu̧mä̧ ¿tta̧'a̧nü̧ pä'ü surojümä̧ jȩto̧ka̧'a̧jä̧ttü̧, adiwä juei ichatü pä'ümä̧? ja̧'wa̧nü̧ amükuädätürümä̧ jitütä tta̧mü̧kuädü'akuä ro̧ȩkuä̧kua̧'a̧.

O'katoi'ünä̧ surojü jȩpi̧nä̧tü̧tä̧ ja̧'a̧

⁹ ¿Ja̧'wa̧nü̧ ja̧'a̧ttü̧, ujutu judío-mä̧ juätüttü'i̧nä̧ abonä̧nü̧ adiwä isotü jü̧nä̧ wotüjä̧ tä̧jí̧? ja̧'wa̧nü̧mä̧ wokotüjä̧, täkü ji'äwäjätüjä̧ judío'i̧nä̧, judío pokotü'i̧nä̧, o'katoi'ünä̧ surojü kkȩdä̧rä̧u̧jä̧ pä'ü.

¹⁰ Wȩyu̧kuä̧ wȩnȩmä̧ pä'a: Ya̧tȩ'i̧nä̧ adiwä juei jȩä̧kuä̧wä̧ i̧sa̧mä̧ toa'a;

¹¹ Wo̧juȩku̧nä̧ wo̧jui̧'ü̧'i̧nä̧ toa'a, ja̧'wa̧ta̧nü̧ Dio-rü usu'i̧nä̧ toa'a.

¹² O'katoi'ünä̧tä̧ 'kȩ'i̧pä̧chi̧nä̧tü̧; o'katoi'ünä̧tä̧ surojuo'ächinä̧tü̧; Ya̧tȩ'i̧nä̧ toa'a adiwä juei jȩpü̧mä̧, yorisotä, toa'a ya̧tȩ'i̧nä̧ adiwä i̧sa̧mä̧.

¹³ Tta̧kuä̧'ka̧ra̧na̧mä̧ wa'are reju bawekua'a jü̧nä̧ wotü; tti̧nȩnä̧mä̧ yapareutä ukuokuätü, tti̧nȩ dȩa̧'a̧mä̧ ä̧ka̧ u̧mä̧nȩwäjatä kku̧nä̧rä̧tü̧;

¹⁴ ttänä̧mä̧ surojünä̧ päwätä, kkü'käwokütä su̧'pȩnü̧ kku̧nä̧rä̧tü̧.

¹⁵ Ttü̧jä̧pi̧yä̧nä̧mä̧ jope'ätü ttü̧ja̧rü̧ kuä'äutä;

¹⁶ Tti̧'cho̧mȩpü̧nä̧mä̧ surojuoekuätä ja̧'wa̧ta̧nü̧ rekuä rü̧jü̧tä̧ kue'ädätü.

¹⁷ Eseu kkä̧kuä̧wä̧ mä̧nä̧mä̧ wo̧jui̧'o̧ko̧tü̧ pinä̧tü̧.

¹⁸ Dio-rü yekuäkuäwämä̧ topokotü.

¹⁹ Ja̧'wa̧nü̧ ja̧'a̧nä̧ o'kajuiyünä̧ weäwä wȩnȩ päümä̧, jua̧u̧nä̧tä̧ ukuotü kka̧kuä̧tü̧rü̧ pä'a; o'katoi'ünä̧tä̧ ttü'koruchi'a pä'ü ja̧'wa̧ta̧nü̧ pi̧jä̧ o'kajuiyünä̧ kka̧kuä̧tü̧mä̧, Dio pä'aku, ttümä̧ su̧ro̧pa̧sä̧ pättäwa pä'ü.

²⁰ Ja̧'wa̧nü̧ ja̧'a̧ttü̧ Dio ä'kattümä̧, ya̧tȩ'i̧nä̧ weäwä wȩnȩ ukuotü jȩa̧'a̧tä̧mä̧, adiwä jueikumä̧ juo'ächokü jä̧kua̧; jua̧u̧, weäwä wȩnȩmä̧ surojü jȩtü̧tä̧ ttu̧wo̧jui̧pü̧nä̧ ji̧na̧'a̧ttü̧.

²¹ Ja̧'wa̧nü̧ ji̧na̧'a̧nä̧ jitämä̧, weäwä wȩnȩ ttukuotoka'anä̧'i̧nä̧, Dio adiu jȩi̧nü̧ jiäwa'a, jua̧u̧mä̧ jiäwa'a weäwä wȩnȩnä̧'i̧nä̧, profeta-tü̧ tti̧wȩyu̧ti̧nü̧nä̧'i̧nä̧, jü̧nä̧;

²² O'katoi'ünä̧ Jesucrito-rü esetü tta̧'kua̧ wȩnä̧rä̧tü̧rü̧mä̧, Dio-mä̧ adiwä juei isotü jü̧nä̧ juo'epü. Judío'i̧nä̧, judío pokotürü'i̧nä̧ yoräteunä̧tä̧,

²³ jua'amä̧, o'katoi'ünä̧ surojü jȩtti̧na̧'a̧ttü̧, Dio ädiwättümä̧ otó wotüjä̧.

²⁴ Ja̧'wa̧nü̧ ja̧'a̧nä̧ Dio-mä̧, chutä re kkä̧nü̧ mippoünä̧tä̧ adiwä isotü jü̧nä̧ juoepinä̧u̧jä̧, Jesucrito usurä ȩmä̧u̧ i̧mi̧täwinü̧nä̧.

²⁵ Dio-mä̧, Crito-rü ukuoja erünä̧ jȩo̧mȩnä̧, eseku ikuäwä iya pä'ü iyinü̧. Jua̧u̧ eseku ikuäwämä̧ tta̧'kua̧ wȩnä̧rü̧tä̧ rȩbȩä̧kuä̧wä̧ ja̧'a̧. Ja̧'wa̧nü̧ jȩpü̧ Dio-mä̧, i̧jȩpi̧nä̧u̧jä̧ adiwä jueinä̧tä̧ pärotü ikumä̧, suronä̧ jȩtä̧'i̧jü̧, jȩpü̧ ikua'attü̧.

²⁶ Isopäi'ünä̧ jua̧u̧mä̧ a̧mi̧'ki'ächi'ü tta̧'ä̧rü̧. Jitä pi̧yȩ mo̧ro̧ i̧jȩpi̧nü̧ ujuturu adiwä isotü jü̧nä̧ juo'epinü̧; Chutämä̧ adiwä juei i̧sa̧ ja̧'a̧ttü̧, Jesucrito-rü esetätürümä̧ adiwä isotü päi'ünä̧ jȩpi̧nü̧.

²⁷ ¿Ja̧'wa̧nü̧ ja̧'a̧mä̧, Dio ä'kattü, ttü̧ja̧sa̧ ukuo te'äumä̧ tȩnȩ́ kki̧'a̧'a̧jä̧ttü̧? Kki̧'o̧ka̧'a̧tä̧ toe'a'a ¿Jua'amä̧ ti̧yȩ weäwä wȩnȩ pä'a? Jua̧u̧mä̧ weäwä wȩnȩ päü'a̧kuä̧ jȩtto̧mȩnä̧mä̧kü̧, jua̧u̧mä̧ tta̧'kua̧ wȩnä̧rü̧ ttesetomȩnä̧ ja̧'a̧.

²⁸ Ja̧'wa̧nü̧ ja̧'a̧ttü̧ ka̧ka̧ti̧pü̧ pä'ätüjä̧: ttü̧ja̧sa̧mä̧ adiwä i̧sa̧mä̧ pä'i'okü, weäwä wȩnȩ päü ukuotü jȩo̧mȩnä̧mä̧, ji̧nä̧somä̧ Crito-rü a̧'kua̧ wȩnä̧rü̧ esetomȩnä̧tä̧ Dio-mä̧ adiwä i̧sa̧ pä'i'ünä̧ jȩä̧ku̧.

²⁹ ¿Dio-mä̧, judío ttü̧ja̧tä̧tä̧ ttü̧ä̧nä̧wa̧ Dio tä̧jí̧? ¿Judío pokotü'i̧nä̧ ttü̧ä̧nä̧wa̧, Dio-mä̧kü̧ tä̧jí̧? A̧, judío pokotü'i̧nä̧ ttü̧ä̧nä̧wa̧ Dio ja̧'a̧.

³⁰ Isopäi'ünä̧ Dio-mä̧ ya̧tȩtä̧ ja̧'a̧ttü̧, o'katoi'ünä̧ circuncisión pättü juei jȩpi̧nä̧tü̧rü̧'i̧nä̧, circuncisión jȩpo̧ko̧tü̧rü̧'i̧nä̧ tta̧'kua̧ ttu̧wȩnä̧rü̧nä̧tä̧ adiwä juei isotü päi'ünä̧ ȩmi̧nä̧u̧jä̧.

³¹ Ja̧'wa̧nü̧ pätomȩnä̧mä̧ ¿weäwä wȩnȩmä̧ mikuäwokü pä'ü päta'a tä̧jí̧? ja̧'wa̧nü̧mä̧kü̧, yabokutä weäwä wȩnȩ kkiokuächunä̧ pä'ätüjä̧, Crito-rü ta̧'kua̧ tu̧wȩnä̧ro̧mȩnä̧mä̧.