Romanos 2 - Nuevo Testamento Uwotjüja

Dio jȩti̧nü̧'a̧kuä̧ pä̧kuȩ wȩnȩ

¹ Ukututtü ya̧tȩ, kka̧ra̧ suronä̧ jȩü̧ päkuomȩnä̧mä̧, kua̧mü̧nä̧ pa̧ja̧tü̧tä̧ pä'äujä̧. Jua'amä̧ uku'i̧nä̧ ja̧'wa̧nü̧tä̧ wa̧ kua'attü̧. Ja̧'wa̧nü̧ jo̧mȩttü̧ kka̧ra̧rü̧ päkua pä'ümä̧ jui̧'a̧jä̧.

² Ja̧'wa̧nü̧ ja̧'a̧nä̧ Dio-mä̧ ya̧tȩ suronä̧ jȩü̧ ro̧ȩpo̧mȩnä̧mä̧, adiwomȩnä̧ jueünä̧tä̧ ro̧'ȩpü̧ pä'ü wo̧juä̧tü̧jä̧.

³ Ja̧'wa̧nü̧ ja̧'a̧ttü̧ uku'i̧nä̧ ja̧'wa̧nü̧ suronä̧ jȩpü̧ kkä̧nü̧, kkorotü suronä̧ jȩtti̧yä̧ku̧ päkuttümä̧, Dio ro̧ȩpü̧ttü̧ kki̧'o̧kü̧ kuä̧kua̧jä̧.

⁴ Dio-mä̧ juiyo adiwä i̧sa̧ ja̧'a̧ttü̧, jurunä̧mä̧ ra̧wä̧ri̧po̧kü̧ ja̧'a̧ttü̧, a̧mi̧ 'ki'ächi'ü ukutu suronä̧ jȩ'kuä̧tu̧kua̧'a̧nä̧'i̧nä̧. Ja̧'wa̧nü̧ ja̧'a̧nä̧ suronä̧ jȩ'kuä̧tu̧ku̧mä̧ rü̧ȩnä̧mä̧ jo̧kü̧ 'kua̧ra̧'a̧ pä'ümä̧ kuamükuädätukuä. Jua'amä̧ Dio-mä̧ repe'ü jȩä̧u̧jä̧, suronä̧ jȩ'kuä̧tu̧ku̧ käkuädi'iyätukuarü pä'ü.

⁵ Ja̧'wa̧nü̧ ja̧'a̧nä̧, surojü käkuädi'ätukuoka'a, yaboku jarodi'ü jȩ'kuä̧tu̧ku̧ttü̧mä̧ Dio-mä̧ ukuturu ro̧ȩpä̧kuȩmä̧ yabonü̧ rü̧ä̧dä̧kua̧. Rüjí mo̧ro̧ päi'omȩnä̧ o'katoi'ünä̧rü̧ suronä̧ jȩtti̧nü̧ttü̧'i̧nä̧, adiu jȩtti̧nü̧ttü̧'i̧nä̧, jȩtti̧nü̧'a̧kuä̧ Dio-mä̧ pä'ü u̧ju̧nä̧kuä̧u̧,

⁶ Isopäi'ünä̧ Dio-mä̧ yotukunä̧ jȩtti̧nü̧'a̧kuä̧ i̧mi̧tä̧kua̧.

⁷ Tturuwo, wa'ü ikuäwokü, ukuo jäwä Dio iyatü pä'ü tta̧'ä̧rü̧nü̧ adiwä juei jȩpü̧ kki̧nä̧tü̧rü̧mä̧, Dio-mä̧ kkä̧kuä̧wä̧ i̧yä̧kuä̧u̧.

⁸ Ja̧'wa̧nü̧ ja̧'a̧nä̧ jarodi'ü, tturuwonä̧ ukuo te'äkuäu, jueü wȩnȩ ukuotü jui'ü, suronä̧ jȩä̧kuä̧wä̧tä̧ ukuotätürümä̧ Dio-mä̧ rü̧ȩnä̧ ra̧wä̧rü̧ ro̧ȩpä̧kuä̧u̧.

⁹ O'katoi'ünä̧ surojü jȩpä̧tü̧rü̧mä̧, usurä ȩmä̧kuä̧u̧, barawä̧u̧ a̧'u̧ ttuäwänä̧tä̧ ro̧ȩkuä̧kua̧'a̧, ä̧kuo̧mȩnä̧ judío'i̧nä̧ ja̧'wa̧ta̧nü̧ judío pokotürü'i̧nä̧, jü̧nä̧.

¹⁰ Ja̧'wa̧nü̧ ja̧'a̧nä̧ adiwä juei jȩpi̧nä̧tü̧rü̧mä̧, tturuwotä, ttukuotä, yo̧mȩtȩnä̧ eseu kkä̧kuä̧wä̧tä̧ i̧yä̧kuä̧u̧, ä̧kuo̧mȩnä̧mä̧ judío-rü'i̧nä̧ ja̧'wa̧ta̧nü̧ judío pokotürü'i̧nä̧, jü̧nä̧.

¹¹ Isopäi'ünä̧ Dio-mä̧ yoräteunä̧tä̧ ȩmü̧ ja̧'a̧ttü̧.

Moisé weinü̧ wȩnȩ

¹² Isopäi'ünä̧ Moisé weinü̧ wȩnȩ ttieruwa'anä̧ surojü jȩpä̧tü̧rü̧mä̧, weäwä wȩnȩ juiyünä̧tä̧ totte'ächäkuotü; ja̧'wa̧ta̧nü̧ o'katoi'ünä̧ Moisé weinü̧ wȩnȩ ttu̧wo̧jua̧'a̧nä̧ surojü jȩpä̧tü̧rü̧mä̧, jua̧u̧nä̧tä̧ ro̧ȩkuä̧kuo̧tü̧;

¹³ Isopäi'ünä̧ Dio-mä̧ ȩmü̧, adiwä juei jȩpä̧tü̧mä̧ Moisé weinü̧ wȩnȩ ä̧ju̧ku̧tä̧ ä̧ju̧kuä̧tü̧tä̧mä̧kü̧ ja̧'a̧, ji̧nä̧somä̧ weäwä wȩnȩ ukuotätürü.

¹⁴ Isopäi'ünä̧ judío pokotümä̧, Moisé weinü̧ wȩnȩmä̧ juitta'anä̧, ä̧tȩkuä̧nä̧tä̧ weäwä wȩnȩ weü jȩpä̧tü̧, jitünä̧tä̧ adiu'i̧nä̧, surojü'i̧nä̧ jȩpü̧ amükuädäkuäwä kka̧'a̧ttü̧,

¹⁵ Ja̧'wa̧nü̧ jȩtto̧mȩnä̧ tta̧mi̧'iso'kinä̧ wȩyu̧kuä̧, kkü̧ weäwä wȩnȩmä̧ i̧jȩkuä̧cha̧'a̧. Ja̧'wa̧nü̧ ja̧'a̧ tta̧mi̧'iso'kinä̧ tta̧mü̧kuädümä̧ jiäwä̧u̧, adiu jȩtta̧ja̧ pä'ü'i̧nä̧, suronä̧ jȩtta̧ja̧ pä'ü'i̧nä̧, jü̧nä̧.

¹⁶ Dio ro̧ȩpü̧ mo̧ro̧ rȩbȩä̧kuä̧wä̧kua̧'a̧, ttü̧ja̧ ttü̧dä̧pä̧rȩ, ttü jidäu Jesucrito i̧wȩnȩ jareü wȩnȩnä̧.

¹⁷ Ukumä̧ judío i̧sa̧sä̧ pä'äkuäu, Moisé weinü̧ wȩnȩnä̧ kua̧'kua̧ wȩnä̧rü̧ ukuo te'äujä̧ ku̧ä̧nä̧wa̧ Dio-rü.

¹⁸ Ja̧'wa̧ta̧nü̧ Dio-rü pä̧wä̧rü̧jü̧'i̧nä̧ wo̧juö̧ kkä̧nü̧, weäwä wȩnȩttü̧mä̧ wo̧jui̧pü̧jä̧ ji̧yȩja̧tä̧ ja̧'a̧ adiwä jueimä̧ pä'üjä̧.

¹⁹ Ja̧'wa̧ta̧nü̧ kua̧mü̧nä̧ wo̧juä̧u̧mä̧, ä̧to̧kä̧tü̧rü̧ oikuä i̧sa̧sä̧ pä'äkuäu kkä̧nü̧, yo̧ü̧nä̧ kka̧kuä̧tü̧rü̧'i̧nä̧ tȩya̧u̧ku̧ oikuä i̧sa̧sä̧ pä'äkuäujä̧.

²⁰ Jerupätürü'i̧nä̧ wo̧juȩkuä̧ i̧sa̧sä̧ pä'ü kkä̧nü̧, ppo̧'ä̧tü̧rü̧'i̧nä̧ wo̧juȩkuä̧ i̧sa̧sä̧ pä'äkuäujä̧, jua'amä̧ weäwä wȩnȩnä̧, ji̧yȩnä̧tä̧ wo̧juä̧wä̧'i̧nä̧, jueü wȩnȩ'i̧nä̧ kka̧'a̧ päkua'attü̧.

²¹ Ukú ja̧'wa̧nü̧ kkorotürü wo̧juȩkuä̧ i̧sa̧ kua'anä̧, ¿tta̧'a̧nü̧ pä'ü kua̧mü̧nä̧mä̧ ku̧wo̧juȩkuo̧ka̧'a̧jä̧ttü̧? Nä̧u̧kuä̧rä̧kuä̧wo̧kü̧ pä'ü jikuäwa'anä̧, ¿tta̧'a̧nü̧ pä'ü ku̧nä̧u̧kuä̧ra̧'a̧jä̧ttü̧?

²² Ttirekua pokajuku ä'ä'chäkuäwokü pä'ü jikuäwa'anä̧ ¿toku pä'ü jȩ'kua̧'a̧jä̧ttü̧? Ttü̧ä̧nä̧wa̧tü̧ jü̧nä̧ tätäwä o'kamä̧ kuju'koka'anä̧, ¿tta̧'a̧nü̧ pä'ü judío pokotü ttü̧ä̧nä̧wa̧rü̧ ttukuokuinode jakuä kka̧ku̧ mikuäumä̧ ku̧nä̧u̧kuä̧ra̧'a̧jä̧ttü̧?

²³ Weäwä wȩnȩ ukuo tekuäwa'anä̧, Dio-rümä̧ ukuotoküjä̧, weäwä wȩnȩ kukuotoka'attü̧.

²⁴ Ja̧'wa̧nü̧ jo̧mȩnä̧ wȩyu̧kuä̧ wȩnȩmä̧ pä'ija'a: «judío pokotümä̧, Dio-rü ya̧'a̧wä̧'chä̧tü̧ ukutu jäwänä̧.»

²⁵ Isopäi'ünä̧ circuncisión pättümä̧ mikuäwäkujä̧, weäwä wȩnȩ kukuotüttütä; ja̧'wa̧nü̧ ja̧'a̧nä̧ weäwä wȩnȩ kukuotokomȩnä̧mä̧ circuncisión jȩ'kuä̧kuä̧wi̧nü̧mä̧, jui̧'a̧ 'kua̧rü̧nä̧tä̧ wa̧jä̧.

²⁶ Ja̧'wa̧nü̧ ja̧'a̧ttü̧ circuncisión pättü jȩpä̧kuä̧wo̧kü̧ ja̧'a̧nä̧, weäwä wȩnȩ weü'anü̧ jȩpü̧ ü̧jo̧mȩnä̧mä̧, circuncisión pättü jȩpä̧kuä̧wa̧ 'kua̧rü̧nä̧ wa̧.

²⁷ Ja̧'wa̧ta̧nü̧ idepänä̧mä̧ circuncisión pättü jȩpä̧kuä̧wo̧kü̧ ja̧'a̧nä̧, weäwä wȩnȩ päü'anü̧ jȩpü̧mä̧, jua̧u̧ jä̧kua̧'a̧ ukuru suronä̧ jȩ'kuä̧'i̧ja̧'a̧ ro̧ȩpä̧kua̧mä̧, jua'amä̧ weäwä wȩnȩ'i̧nä̧ ku̧ju̧nä̧ra̧'a̧nä̧, circuncisión pättü'i̧nä̧ jȩpä̧kuä̧wa̧ kua'anä̧ kukuotokomȩttü̧.

²⁸ Isopäi'ünä̧ judío jü̧nä̧ kkä̧kuä̧wä̧mä̧ ttidepä wä̧mȩ jäwämä̧kü̧, ja̧'wa̧ta̧nü̧ circuncisión'i̧nä̧ ttidepä wä̧mȩnä̧ jäwämä̧kü̧.

²⁹ Isopäi'ünä̧tä̧ judío i̧sa̧mä̧ jakuänä̧ttü̧ wa̧ ja̧'a̧ ja̧'wa̧ta̧nü̧ circuncisión pättü wa̧mä̧, tta̧mi̧ iso'ki jäwä ja̧'a̧: Wȩyu̧kuä̧ jäwämä̧kü̧ ja̧'a̧, epíritu jäwä ja̧'a̧, eseäkuäwämä̧ ttü̧ja̧sa̧ttü̧mä̧ ichokü ja̧'a̧, ji̧nä̧somä̧ Dio-ttütä ichü ja̧'a̧.