Romanos 16 - Nuevo Testamento Uwotjüja

Awaruwärü teäwinü̧ wȩnȩ

¹ Ukuturu we'üsä tawaruwaju tüjäwaju Febe-rü; juäjumä̧ Cencrea ütawiyättü igresia-nä̧ diákunu̧ isaju waju ja̧'a̧.

² Tu̧ru̧wa̧ i̧mi̧nä̧ adiu ppä'ädätukuiju, Crito-rü esetätü jȩä̧kuä̧mä̧ ja̧'wa̧ta̧nü̧ juäjurumä̧ rekuä rü̧jü̧'i̧nä̧ ppä'ädätukuiju; juäjumä̧ rekuätürü ppä'ädä'ijäju ja̧'wa̧ta̧nü̧ ttürü'i̧nä̧ ppä'ädä'ijäju ja̧'a̧.

³ Priscirarü'i̧nä̧, Aquira-rü'i̧nä̧, te'äwiyätukuittü Crito weäwä chaditomȩnä̧ ppä'ädärä̧'i̧jä̧tü̧rü̧.

⁴ Ttü jäwänä̧ ra̧wä̧pi̧ja̧'a̧nä̧'i̧nä̧ tta̧'kua̧rü̧ iyäwinä̧tü̧rü̧ eseu kkä̧nü̧, judío pokotü igresia isotü o'katoi'ünä̧rü̧ eseusä.

⁵ Ja̧'wa̧ta̧nü̧ te'äwiyätukuittü kuojusodettü igresia isotürü. Te'äwiyätukuittü cha̧wa̧ru̧wa̧ repedäku Epéneto-rü, Acaya-ttü ä̧kuo̧mȩnä̧ Crito-rü esetinü̧rü̧.

⁶ Ja̧'wa̧ta̧nü̧ te'äwiyätukuittü María-rü, ukuturu ppä̧'ä̧dä̧rü̧ aditä'ijäjuru.

⁷ Te'äwiyätukuittü chukuojattü chawaruwärü Andrónico-rü'i̧nä̧, Junia-rü̧'i̧nä̧, juätümä̧ ttütäku kärenä̧ pȩji̧nä̧tü̧rü̧. Juätü apótore-mä̧ jo̧mȩnü̧ ttu̧wo̧juä̧u̧, ttü chesetäkua'a ä'kanä̧ Crito-rü esetinä̧tü̧.

⁸ Te'äwiyätukuittü Ampriato-rü'i̧nä̧, Crito-nä̧ rü̧ȩnä̧ repedäkuru.

⁹ Te'äwiyätukuittü Urbano-rü̧, Crito weinü̧nä̧ taditomȩnä̧ ppä'ädä̧rä̧'i̧jü̧rü̧ ja̧'wa̧ta̧nü̧ repedäku Estaqui-rü'i̧nä̧.

¹⁰ Te'äwiyätukuittü Apeles-rü, Crito jäwänä̧ jo̧mȩnü̧ juo'ächinü̧rü̧; ja̧'wa̧ta̧nü̧ Aritóbulo-rü'i̧nä̧, awaruwäku o'katoi'ünä̧rü̧.

¹¹ Ja̧'wa̧ta̧nü̧ chukuojattü cha̧wa̧ru̧wa̧ Herodión-rü̧'i̧nä̧ te'äwiyätukuittü. Ja̧'wa̧ta̧nü̧ Narciso awaruwärü te'äwiyätukuittü, täkü Tu̧ru̧wa̧ Crito-nä̧ wotürü.

¹² Trifena-rü̧'i̧nä̧, Trifosa-rü'i̧nä̧ tu̧ru̧wa̧ weäwä aditä'ijätürü te'äwiyätukuittü; tawaruwaju tüjäwaju Pésida-rü'i̧nä̧, Tu̧ru̧wa̧ aditäwä rü̧ä̧nä̧ aditä'ijürü'i̧nä̧, jü̧nä̧.

¹³ Ja̧'wa̧ta̧nü̧ Rufo-rü'i̧nä̧, Tu̧ru̧wa̧ ȩmi̧nä̧ku̧ru̧ te'äwiyätukuittü ja̧'wa̧ta̧nü̧ jua̧u̧ ja̧ju̧ru̧'i̧nä̧, ttü'i̧nä̧ cha̧ju̧ wajuru.

¹⁴ Ja̧'wa̧ta̧nü̧ te'äwiyätukuittü Asíncrito-rü'i̧nä̧, Frego̧te-rü'i̧nä̧, Herme-rü'i̧nä̧, Patroba-rü'i̧nä̧, Hema-rü'i̧nä̧ ja̧'wa̧ta̧nü̧ tawaruwä ti̧jä̧wa̧tü̧ juätütäku kka̧kuä̧tü̧rü̧'i̧nä̧, jü̧nä̧.

¹⁵ Ja̧'wa̧ta̧nü̧ te'äwiyätukuittü Firórogo-rü'i̧nä̧, Juria-rü'i̧nä̧, Nȩrȩu̧-rü̧'i̧nä̧ ja̧'wa̧ta̧nü̧ üjäwajurü'i̧nä̧, Orimpas-rü'i̧nä̧ ja̧'wa̧ta̧nü̧ o'katoi'ünä̧ tawaruwä ti̧jä̧wa̧tü̧ juätütäku kka̧kuä̧tü̧rü̧mä̧ o'katoi'ünä̧rü̧.

¹⁶ Te'äwiyätukuittü yotukunä̧rü̧, ttu̧mü̧ 'chu'ädäkuäu. O'katoi'ünä̧ Crito iäre igresia isotümä̧ tettäwä̧u̧jä̧.

¹⁷ Ja̧'wa̧ta̧nü̧ chawaruwä chü̧jä̧wa̧tü̧ ukuturu jä'epüsä, ttu̧'ȩpä̧rü̧nü̧ ku̧ja̧kuä̧tu̧kua̧ pä'ü ttü̧ja̧ ttiperekuächünä̧ jȩpä̧tü̧rü̧ ja̧'wa̧ta̧nü̧ kkä̧kuä̧wä̧ ku̧wo̧jui̧'i̧nä̧tu̧ku̧ to'ija̧'a̧ku̧ wo̧juȩtä̧tü̧rü̧. Juätüttümä̧ 'kȩkui̧pä̧chä̧tu̧kua̧ pädäu̧jä̧.

¹⁸ Juätümä̧ Tu̧ru̧wa̧ Jesucrito-rü ukuotümä̧ jȩpo̧ko̧tü̧, pärokua'aku tta̧mü̧nä̧ jäwätä usú, tti̧wȩnȩmä̧ adiu ukuokuätü, tteseunä̧ jȩpü̧ jerupätürü yaparewätü, ttesetünä̧.

¹⁹ Isopäi'ünä̧ o'katoi'ünä̧tä̧ wo̧juä̧tü̧ Dio-rü kukuotätukumä̧. Ja̧'wa̧nü̧ ja̧'a̧ttü̧ ukuturu eseusä, ku̧wo̧juä̧tu̧ku̧mä̧ adiutä jȩpä̧tu̧kui̧ pä'ü, surojümä̧ jȩ'kuä̧tu̧kuä̧ pä'ü.

²⁰ Ja̧'wa̧nü̧ jȩ'kuä̧tu̧kuo̧mȩnä̧ Dio eseäkuäwä iyümä̧, ku̧jä̧pi̧yä̧tu̧ku̧nä̧ kkȩdü̧ kuikuätukunä̧ jȩä̧kua̧ Satanás-rü̧. Tu̧ru̧wa̧ Jesucrito ukuturu ppädinünä̧ kka̧kuä̧tu̧kui̧.

²¹ Chuku chaditäku Timoteo'i̧nä̧ teäwä̧u̧jä̧, Ruciu'i̧nä̧, Jaso̧'i̧nä̧ ja̧'wa̧ta̧nü̧ chukuojattü cha̧wa̧ru̧wa̧ Sosípatro'i̧nä̧, jü̧nä̧.

²² Ttü Tecio'i̧nä̧, pi̧yȩ kuyäru wȩyu̧tä̧ji̧'ka̧, Chu̧ru̧wa̧ i̧mi̧nä̧ tedäwä̧u̧jä̧.

²³ Ja̧'wa̧ta̧nü̧ teäwä̧u̧jä̧ Gayo'i̧nä̧, ojusodenä̧ chü̧ji̧yä̧ku̧ ja̧'wa̧ta̧nü̧ Dio-rü esetätürümä̧ iweye ppä'ädü ja̧'a̧. Ja̧'wa̧ta̧nü̧ Erasto, ütawiyä ttü̧ja̧ ttiäre pärätä tta̧wä̧rä̧kuä̧wä̧ i̧sa̧'i̧nä̧ ja̧'wa̧ta̧nü̧ ti̧jä̧wa̧ Cuarto'i̧nä̧ teäwä̧u̧jä̧. [

²⁴ Tu̧ru̧wa̧ Jesucrito re ü̧jü̧mä̧ ukutu o'katoi'ünä̧ kka̧ pä'üsä. A̧mȩ.]

Dio-rü rüjí ukuokuinü̧

²⁵ ¡Dio-rü teseäkuäwätukua! jua̧u̧tä̧ ja̧'a̧ yaboku kui'chä̧tu̧ku̧nä̧ ppä'ädümä̧ jareü wȩnȩ jidäu ja̧'wa̧nü̧ pä'a ja̧'wa̧ta̧nü̧ Jesucrito'i̧nä̧ ja̧'wa̧nü̧tä̧ wo̧juȩti̧nü̧. Ja̧'wa̧nü̧tä̧ ja̧'a̧ Dio ttieruwuönä̧ amükuädinü̧mä̧, mo̧ täbokü pi̧jä̧ kkä̧kua̧'a̧ a'kojitä päi'ünä̧ wo̧jui̧'ä̧kuä̧wo̧kü̧ ji̧nü̧.

²⁶ Ja̧'wa̧nü̧ ji̧na̧'a̧nä̧, jitämä̧ i̧jȩkuä̧chi̧na̧'a̧ profeta winä̧tü̧ tti̧wȩyu̧ti̧nü̧nä̧'i̧nä̧, Dio 'kuäopünä̧tä̧ kkü̧ weinüta'anü̧, i̧jȩkuä̧chi̧nü̧ pi̧jä̧ ttü̧ja̧ o'katoi'ünä̧rü̧, tta̧'kua̧ wȩnä̧rä̧kuä̧wä̧ ttukuota pä'ü.

²⁷ Ja̧'wa̧nü̧ ji̧na̧'a̧mä̧ ¡Ya̧tȩtä̧ tü̧ä̧nä̧wa̧ Dio wo̧jua̧rü̧ eseäkuäwätä ja̧'a̧, Tu̧ru̧wa̧ Jesucrito-nä̧tä̧ mo̧ro̧ kki̧ä̧mü̧nä̧! A̧mȩ.