Romanos 12 - Nuevo Testamento Uwotjüja

Jareünä̧ kkä̧kuä̧wä̧ wȩnȩ

¹ Ja̧'wa̧nü̧ ja̧'a̧ttü̧, chawaruwä chü̧jä̧wa̧tü̧ ukuturu jä'epüsä Dio rȩrü̧jü̧ toinü̧nä̧tä̧, kua̧mü̧nä̧ pa̧ja̧tü̧ yotukunä̧mä̧ ku̧jä̧tu̧ku̧mä̧ ofrenda jü̧nä̧tä̧, surojü juiyünä̧tä̧, Dio eseunä̧tä̧, Chutä Dio-rü kuiyäwätukua pä'ü.

² Jitä pä̧nä̧, pi̧jä̧ ttü̧ja̧ tta̧mü̧kuäda'akumä̧ ku̧ja̧kuä̧tu̧kuä̧; ja̧'wa̧nü̧ ja̧jü̧jueimä̧, pärokua'aku ku̧wo̧jui̧'ä̧tu̧kua̧'a̧ku̧tä̧ pärowächätukui, jȩpü̧ ku̧jä̧tu̧ku̧'i̧nä̧ pärowächünä̧ Dio-rü pä̧wä̧rü̧jü̧, Dio eseu, jo̧mȩnü̧ adiwä juei ku̧wo̧juä̧tu̧kuä̧kua̧'a̧nü̧.

³ Dio re kkä̧nü̧ apóto jü̧nä̧ ü̧ji̧ni̧nä̧ku̧ pä'üsä, ukuturu'i̧nä̧ Dio mippoünä̧ iyinü̧ kka̧'a̧ttü̧, u̧wä̧mȩnä̧mä̧ kuamükuädäwätukuä. Yotukunä̧ jȩ'kuä̧tu̧kuä̧kuȩ Dio iyina̧'a̧ku̧tä̧, kua̧'kua̧ wȩnä̧rü̧ amükuädätukui.

⁴ Isopäi'ünä̧ ujutunä̧tä̧'i̧nä̧ yotukunä̧ kkatätä ta'anä̧ rü̧ȩnä̧ kka̧'a̧ ujutunä̧ miembros pättümä̧, jua̧u̧ ji̧yȩku̧nä̧ aditäwä pünä̧ kka̧'a̧,

⁵ Ja̧'wa̧nü̧ jü̧ta̧'a̧nü̧, rekuätü ta'anä̧ ujutu'i̧nä̧ Crito-nä̧mä̧ ji̧nä̧ya̧tȩtä̧ wotüjä̧ ja̧'wa̧ta̧nü̧ kkorotükumä̧ todepätüjä̧.

⁶ Yotukunä̧ jȩtä̧kuȩmä̧, chutä Dio-rü pä̧wä̧rü̧jo̧mȩnä̧ iyinü̧'a̧kuä̧ wotüjä̧. Dio i̧mi̧nä̧ jikuäwiyarü pä'ü iyinü̧ttü̧mä̧ ji'äwi, kua̧'kua̧ ku̧wȩnä̧ro̧mȩnä̧,

⁷ iyäwä iyinä̧ku̧mä̧, re juiyünä̧ iyi; ku̧wo̧juȩta̧ pä'ü iyinü̧ttü̧mä̧, wo̧juȩti̧;

⁸ kkorotürü ro̧kuȩpa̧ pä'ü, ro̧ȩkuä̧ iyinü̧ttü̧mä̧, ro̧'ȩpi̧. Iyü ppäda pä'ü iyinä̧ku̧mä̧, repekuoka'a ppä'ädi; kkorotürü oikuä iyinä̧ku̧mä̧, eseunu̧ o'ipi; rekuä rü̧jä̧u̧ru̧ ppädäkuäwä iyinä̧ku̧mä̧, eseunü̧tä̧ ppä'ädi.

Dio-rü esetü jȩpü̧ kkä̧kuä̧wä̧

⁹ Ä'koyättütä repekuäwätukuoka'a, adiu repe'äkuäwätukui. Surojümä̧ kkü'kü juiyünä̧ amükuädü, adiwä jueikutä tätukui.

¹⁰ Yotukunä̧mä̧ ttü̧jä̧wa̧tü̧rü̧ eseu repettü'anü̧, eseu repe'äkuäwätukui; yotukunä̧ ukuotäkuäu kkä̧nü̧.

¹¹ Kuaditätukua pä'ü jü̧mä̧, ü̧tä̧rü̧jo̧ka̧'a̧ aditätukui; eseunü̧tä̧ aditätukui, Tu̧ru̧wa̧ jäwämä̧.

¹² Tta̧'a̧rü̧ kkä̧kuä̧wä̧nä̧ kkä̧nü̧ eseäkuäwätukui; usurä ȩmä̧wä̧kuä̧wä̧ yekuekuätukuä; yaboku 'kuäopünä̧ Dio-rü ukuokutä tätukui.

¹³ Crito-rü esetätümä̧ rekuä rü̧jo̧mȩnä̧ ppä'ädäkuäu tätukui; do'ächü ttichomȩnä̧, kuojusodenä̧ ttä'a pä'ü we'ätukui.

¹⁴ Ukuturu suronä̧ jȩtta̧ pä'ü amükuädätürü, adiutä pä'ätukuitü. Suronä̧mä̧ päkuätukuätü.

¹⁵ Eseäkuäwätuku, esewätukui; ja̧'wa̧ta̧nü̧ ajuäkuäwätukumä̧, ajuäwätukui.

¹⁶ Ji̧nä̧ ji̧yȩtȩnä̧tä̧ amükuädü, rȩrü̧jü̧ topäkuäwätukui suronä̧ 'kuäopomȩnä̧. Ku̧ra̧wä̧rä̧tu̧kuo̧ka̧'a̧, esekuäkuäu kka̧kuä̧tu̧kui̧. Ttümä̧ wo̧jua̧sä̧ päkuä'chätukuoka'a.

¹⁷ Ya̧tȩ ukuru suronä̧ jȩo̧mȩnä̧, pärokua'aku mikuä suronä̧ jȩ'kuä̧rü̧; adiutä jȩ'kuä̧tu̧kua̧ usätukui kkorotü o'katoi'ünä̧ ttü̧ja̧ ttä'ka jo̧mȩttü̧mä̧.

¹⁸ Ukutu jȩ'kuä̧tu̧ku̧'a̧nü̧ jü̧mä̧, jȩpä̧tu̧kui̧, ttü̧ja̧ o'katoi'ünä̧ku̧ wȩnȩ juiyomȩnä̧.

¹⁹ Suronä̧ jȩtto̧mȩnä̧, ukututä kua̧mü̧nä̧ pa̧ja̧tü̧ kuimitäwi'ätukua päkuätukuä ja̧'wa̧nü̧ ja̧jü̧jueimä̧ Dio ro̧ȩpa̧tä̧ iyipätukui; isopäi'ünä̧ wȩyu̧kuä̧ wȩnȩmä̧ pä'a: «Ttü ja̧'a̧ mikuä jȩchä̧kua̧mä̧ ja̧'wa̧nü̧ ja̧'a̧ttü̧ ttü ja̧'a̧ chimi̧tä̧kua̧mä̧ pä'ü.»

²⁰ Ja̧'wa̧nü̧ ja̧'a̧ttü̧ kua̧bo̧i̧ya̧ ukua ppäirü̧jü̧ttü̧mä̧, ukua iyirü; ja̧'wa̧ta̧nü̧ awa a̧di̧ri̧jü̧ttü̧mä̧, awa iyirü; ja̧'wa̧nü̧ jȩ'kuo̧mȩnä̧ ü'änä̧mä̧ dä'ä ttu̧ä̧kua̧.

²¹ Surojü kkȩdü̧ ikua'anä̧mä̧ kuiyäwä, pärokua'aku adiu jȩpü̧tä̧ kkȩdü̧ ikui surojümä̧.