Romanos 11 - Nuevo Testamento Uwotjüja

Dio-mä̧ ȩmi̧nä̧ru̧mä̧ jaropi'okü

¹ Ja̧'wa̧nü̧ ji̧yä̧ku̧ pä'üsä: ¿Dio-mä̧ umüwäyotü pinä̧tü̧rü̧mä̧ do'opü ikuina̧'a̧ tä̧jí̧? ¡Isokü̧, ja̧'wa̧nü̧mä̧kü̧! Ttütä'i̧nä̧ Irae ttü̧ja̧sa̧sä̧, Abraha̧ isotü i̧sa̧, Benjamín isotü i̧sa̧.

² Ä̧kuo̧mȩnä̧tä̧ päi'ünä̧, Dio-mä̧ Irae ttü̧ja̧rü̧mä̧ pojopü ȩmi̧nä̧u̧ ji̧na̧'a̧; jitä'i̧nä̧ jäyämä̧ u̧ju̧ni̧'o̧ko̧u̧ ¿ukutumä̧ kuieruwätukua'a Elía-rü 'kuäopinü̧, wȩyu̧kuä̧ wȩnȩnä̧ pä'ijomȩmä̧? Dio-rü jäepinomȩ, Irae ttü̧ja̧rü̧ pä'ünü̧:

³ «Chu̧ru̧wa̧, ku̧wo̧juȩtä̧u̧ profeta-tü̧rü̧ kuä'äu iku, sacrificio jȩttä̧'i̧jo̧mȩ'i̧nä̧ si'epü ikuäjätü; ja̧'wa̧nü̧ ja̧'a̧nä̧ ttütä kkatätä chü̧ji̧pa̧'a̧, ttürü'i̧nä̧ kuä'ü ttikua pä'ü tta̧mü̧kuädäkusä.»

⁴ Ja̧'wa̧nü̧ päiyäku Dio-mä̧ ädätinä̧ku̧: «Ji̧nä̧ kkorotü siete mil jo̧mȩnä̧, kku̧nä̧rü̧sä̧ Baal-rü ttiwe'kiyunä̧ pä̧mä̧dü̧ esewokotürümä̧.»

⁵ Ja̧'wa̧nü̧ ji̧nü̧ta'anü̧, jitä pä̧nä̧'i̧nä̧, Dio a̧'u̧kuo̧tü̧rü̧ pojopü ȩmi̧nü̧ mippoünä̧.

⁶ Ja̧'wa̧nü̧ ja̧'a̧ttü̧ Dio mippoünä̧ ppädino̧mȩttü̧ ja̧'a̧, ttü̧ja̧ jȩtti̧nü̧ttü̧mä̧kü̧; ja̧'wa̧nü̧ jȩtti̧nü̧ttü̧ jü̧ttü̧mä̧ Dio mippoünä̧ ppädümä̧ juiyaja'a.

⁷ ¿Jua̧u̧nu̧mä̧ toku ji̧na̧'a̧jä̧ttü̧? Irae ttü̧ja̧mä̧ ttusinü̧mä̧ po̧kui̧po̧ko̧tü̧ pinä̧tü̧ ja̧'wa̧nü̧ ja̧'a̧nä̧ pojopü ȩmi̧nä̧u̧tä̧ ji̧na̧'a̧ po̧kui̧pi̧nä̧tü̧mä̧. Kkorotümä̧ tta̧mi̧ 'kittädäkuäwa'anä̧;

⁸ wȩyu̧kuä̧ wȩnȩmä̧ pä'a: «Dio-mä̧ Epíritu-ru tta̧mi̧ 'ki'ädürü iyinä̧u̧, tti'ärenä̧ totta'anä̧'i̧nä̧ tottü juiyünä̧; ttä̧ja̧nä̧ ttä̧ju̧kua̧'a̧nä̧'i̧nä̧ ttä̧ju̧ku̧ juiyünä̧, jitä mo̧ro̧bü päi'ünä̧.»

⁹ Ja̧'wa̧ta̧nü̧ Dawi'i̧nä̧ pä'inü̧: «Ttü'ä'käri jȩttü̧mä̧, jitütä ttä̧tȩkuä̧tä̧ jȩpä̧kuä̧wä̧tü̧ ja̧'wa̧ta̧nü̧ jitütä ttütäwächäsa̧tä̧, jua'a yabomä̧ jȩtti̧nü̧ ro̧ȩkuä̧tä̧ ichatü pä'ü.

¹⁰ Tti'äriyämä̧ ä̧to̧kä̧chü̧ tottokäkuotü; ja̧'wa̧ta̧nü̧ 'kuäopünä̧tä̧ usurä ȩmä̧u̧ 'tu̧wa̧yu̧nü̧ wottächäkuotü.»

Judío pokotü ra̧wä̧pi̧jü̧ttü̧ ttü̧ji̧pü̧ wȩnȩ

¹¹ Ja̧'wa̧ta̧nü̧ pä'üsä: ¿Irae ttü̧ja̧ ma̧ttä̧chü̧nä̧ ttoepina̧'a̧mä̧, jo̧mȩnü̧tä̧ ma̧'ä̧chi̧nä̧tü̧? ¡Ja̧'wa̧nü̧mä̧kü̧! ja̧'wa̧nü̧ ja̧'a̧nä̧, juätü ttukuotoka'a ji̧na̧'a̧mä̧ judío pokotürü surojüttü kki̧'i̧kuä̧ rȩbȩä̧kuä̧wi̧na̧'a̧, judío ttä'kuoyäwuönä̧.

¹² Ja̧'wa̧nü̧ judío ttukuotoka'a ji̧na̧'a̧ttü̧ pi̧jä̧ ttü̧ja̧mä̧ rü̧ȩnä̧ re ü̧jü̧ po̧kui̧pi̧nä̧tü̧ ¡jua'a yabonä̧, adiu ttü̧'o̧kui̧'ä̧kuo̧tü̧ judío o'katoi'ünä̧rü̧ Dio ȩmo̧mȩnä̧!

¹³ Ja̧'wa̧nü̧ ja̧'a̧nä̧ ukutu judío pokotürü pä'üsä: Ttü ukutu judío pokotürü Dio-mä̧ i̧wȩnȩ jidäwiyarü pä'ü weinä̧ku̧ cha'attü, jua̧u̧ juiyo eseusä.

¹⁴ Ja̧'wa̧nü̧ ja̧'a̧nä̧ jua'amä̧ chawaruwä ttä'kuoyäwächi'a pä'ü pä'üsä, ja̧'wa̧nü̧ jo̧mȩnä̧ Dio-mä̧ juätürü'i̧nä̧ ra̧wä̧pi̧jü̧ttü̧ ttü̧ji̧pü̧nä̧ ppädäkua'anü̧.

¹⁵ Ja̧'wa̧nü̧ judío-rü rä'epü ikuomȩnä̧mä̧ pi̧jä̧ ttü̧ja̧mä̧ esekuäkuäwinä̧tü̧ Dio-ku ¿ja̧'wa̧nü̧ ji̧na̧'a̧mä̧ däjetä ttȩmä̧kua̧'a̧jä̧ttü̧? ¡Däjé pättokü wa'ü ikuipü'kotü a̧'kua̧ri̧'ä̧kuä̧wä̧ ttȩmä̧kuo̧tü̧!

¹⁶ Isopäi'ünä̧ ä̧kuo̧mȩnä̧ jäwä pan Dio-rü pätetü iyäwä jo̧mȩnä̧mä̧, jua̧u̧ pan ttaditäjäwa isäwa'i̧nä̧ o'kajuiyünä̧tä̧ Dio-rü pätetü iyäwä adiu jü̧nä̧tä̧ ja̧'a̧; ja̧'wa̧ta̧nü̧ dau ujukäkä Dio-rü iyäwäkä ja̧'a̧mä̧, juäi ä̧na̧jui̧yä̧'i̧nä̧ o'kajuiyünä̧tä̧ Dio-rü iyäwä adiu ja̧'a̧.

¹⁷ Olivo dau wotü judío-mä̧, kuä̧na̧jui̧yä̧ jui̧rä̧chi̧'i̧nä̧u̧jä̧, juȩnȩ o'komȩmä̧ olivo müä'kiyu jäwätä u̧ju̧ni̧nä̧u̧jä̧, juätümä̧ ukutu ja̧'a̧. Ja̧'wa̧nü̧ jȩpü̧ kkada'ka ujukäkä päi'ünä̧ jȩpü̧ kkä̧kuä̧wä̧ olivo a̧'kua̧rü̧ iyinä̧u̧jä̧.

¹⁸ Ja̧'wa̧nü̧ ja̧'a̧nä̧ juätü judío-ttü'i̧nä̧ abonä̧nü̧ wotüjä̧ pä'ümä̧ kuesewätukuä. Amükuädätukui ukutumä̧ jua̧u̧ kkä̧kuä̧wä̧ kuȩmi̧nä̧tu̧ku̧mä̧, juätüttütä ȩmi̧nä̧tü̧jä̧, ukututtütämä̧ kuȩmä̧tu̧kuo̧kü̧ ji̧nü̧.

¹⁹ Kuamükuädätukuttümä̧ päkuätuku'anü̧ ja̧'a̧: Juätürümä̧ ya'okuinü̧, ttürü Dio i̧tti̧mü̧ku̧ ppä'ädü iku.

²⁰ ¡Iweye adiwa'a!; ttesetokomȩttü̧ yawokuinä̧u̧ ja̧'wa̧nü̧ ja̧'a̧nä̧ ukumä̧ kua̧'kua̧ ku̧wȩnä̧ro̧mȩttü̧ ji̧nä̧ todeunä̧ kkü̧jä̧. Ja̧'wa̧nü̧ ja̧'a̧ttü̧ ukuo tekuäwoka'a, ye'ekutä ukuoti.

²¹ Isopäi'ünä̧ Dio-mä̧ ji̧nä̧so ji̧yȩtä̧ ä̧na̧jui̧yä̧'i̧nä̧ ukuotoka'a 'kui'opü ikuina̧'a̧mä̧, juȩnȩ yabonä̧ ukurumä̧ ya'utekutä jȩpü̧ ikuäku.

²² Ja̧'wa̧nü̧ ja̧'a̧ttü̧, topi, Dio ya'utekutä pä̧i̧ku̧nä̧ päü'i̧nä̧; ja̧'wa̧nü̧ ja̧'a̧nä̧ adiu re ü̧jü̧'i̧nä̧ topi, ja̧'wa̧nü̧ jü̧ juiyüttümä̧ ukuru'i̧nä̧ do'opü ikuäwäkua'a.

²³ Ja̧'wa̧nü̧ ji̧na̧'a̧nä̧'i̧nä̧ judío-mä̧ ttüarodä'ijü kättädi'üttümä̧, pä'äji ji̧nü̧ta'anü̧ ütodetäkuä̧u̧, Dio-mä̧ ujuru kku̧nä̧rü̧ ja̧'a̧ttü̧, pä'äji ji̧nü̧ta'anü̧ jȩa̧ pä'ü'i̧nä̧ ja̧'a̧.

²⁴ O'kajuiyünä̧ amükuädü toäkuäwänä̧mä̧, adiwä jueimä̧ surojükumä̧ wiwatäkuäwokü. Isopäi'ünä̧ Dio-mä̧ ukutu umüwäyotü pokotü pinä̧tü̧rü̧'i̧nä̧ ȩmi̧na̧'a̧mä̧, juȩnȩ abonä̧nü̧ umüwäyotü judío pinä̧tü̧rü̧mä̧ ȩma̧ pä'ütä ja̧'a̧.

Irae ttü̧ja̧rü̧ ȩmä̧kuȩ wȩnȩ

²⁵ Chawaruwä chü̧jä̧wa̧tü̧ pi̧yȩ Dio ttieruwuönä̧ amükuädinü̧mä̧ kuieruwätukuamä̧ pä'oküsä, kua̧mü̧nä̧ pa̧ja̧tü̧ ukuotekuäwätuku juiyäkua'anü̧. Judío yotukunä̧mä̧ rü̧ȩnä̧ tta̧mi̧ 'ki'ächächinü̧'kotü Jesucrito-rü tteseta pä'okotü; ja̧'wa̧nü̧ ja̧'a̧nä̧ iweye ja̧'wa̧ta̧nü̧tä̧ ttäkuotü judío pokotü i̧tti̧mü̧ pätti'omȩbü päi'ünä̧;

²⁶ Juȩnȩ o'komȩnä̧ Irae ttü̧ja̧mä̧ ra̧wä̧pi̧jü̧ttü̧ ttü̧ji̧pä̧kuo̧tü̧, wȩyu̧kuä̧ wȩnȩ päüta'anü̧: «Sión-ttü̧ i̧chä̧kua̧ ra̧wä̧pi̧jü̧ttü̧ rä'epü ikuäwä i̧sa̧mä̧, Jaco suronä̧ jȩi̧nü̧ jȩpü̧ i̧kuä̧kua̧mä̧.

²⁷ Ja̧'wa̧nü̧ ja̧'a̧ttü̧ pi̧yȩ jä̧kua̧'a̧ juätuku chesekuä̧kuȩmä̧, Suronä̧ jȩttä̧'i̧jü̧ si'epü chikuomȩnä̧tä̧.»

²⁸ Ja̧'wa̧nü̧ ja̧'a̧ttü̧, jareü wȩnȩnä̧mä̧ ttaboiyotü wotü ukutu jäwänä̧; ja̧'wa̧nü̧ ja̧'a̧nä̧ 'kȩ'ȩpü̧ ȩmi̧nü̧ jäwänä̧mä̧, Dio-mä̧ rȩpȩä̧u̧ ttä̧do̧tü̧ mi̧nä̧ jäwänä̧.

²⁹ Isopäi'ünä̧ Dio rettü ppädinü̧'i̧nä̧ ja̧'wa̧ta̧nü̧ woinü̧'i̧nä̧ yorisotä siäwokü.

³⁰ Ja̧'wa̧ta̧nü̧ ukutu'i̧nä̧ täbokümä̧, Dio-rümä̧ ukuotokotü pinä̧tü̧jä̧ ja̧'wa̧nü̧ ja̧'a̧nä̧ jitämä̧ juätü ttukuotokomȩ ji̧no̧mȩttü̧, Dio-mä̧ rȩrü̧jü̧ toinä̧u̧jä̧.

³¹ Ja̧'wa̧nü̧ ukuturu Dio rȩrü̧jü̧nü̧ toinü̧ta'anü̧, juätürü'i̧nä̧ Dio-mä̧ rȩrü̧jü̧ to̧ä̧kua̧.

³² Isopäi'ünä̧ Dio-mä̧ o'katoi'ünä̧rü̧tä̧ ttukuotü juiyünä̧ jȩpi̧nü̧, o'katoi'ünä̧rü̧ yoräteunä̧ rȩrü̧jü̧nü̧ toa pä'ümä̧.

³³ ¡Isoo Dio-mä̧, juiyo uruwo'i̧nä̧, u̧wo̧juö̧'i̧nä̧ rü̧ȩnä̧tä̧ wa̧ tä̧jí̧! ¡Ya̧tȩ'i̧nä̧ toa'a jua̧u̧ jȩü̧'i̧nä̧, aditäwä'i̧nä̧ wo̧juö̧nä̧ ji'äumä̧!

³⁴ Ja̧'wa̧nü̧ ja̧'a̧ttü̧ ¿Ditäjä̧ttü̧ Tu̧ru̧wa̧ amükuädü wo̧jui̧'i̧nü̧mä̧? ja̧'wa̧ta̧nü̧ ¿Ditä ja̧'a̧jä̧ttü̧ jua̧u̧ Dio-rü ro̧'ȩpä̧rä̧'i̧jü̧mä̧? pä'a Wȩyu̧kuä̧ wȩnȩ.

³⁵ Ja̧'wa̧ta̧nü̧ ¿Ditä ja̧'a̧jä̧ttü̧ ä̧kuo̧mȩnä̧ jua̧u̧ru̧ iyinü̧mä̧, premio pättüjuei iyarü pä'ümä̧?

³⁶ Isopäi'ünä̧ Dio-ttü ichinü̧tä̧ ja̧'wa̧ta̧nü̧ Chutä aditäwätä ja̧'wa̧ta̧nü̧ Chutä üäre ja̧ pä'ü o'kajuiyünä̧ aditinü̧tä̧ ja̧'a̧mä̧. ¡Jua̧u̧ Dio-rütä tesewarü, pä'ütä ja̧'a̧, mo̧ro̧ kki̧ä̧mü̧nä̧! Amȩ́ (ja̧'wa̧nü̧tä̧ ja̧'a̧).