Romanos 10 - Nuevo Testamento Uwotjüja

Irae ttü̧ja̧rü̧ jareü wȩnȩ rȩbȩwi̧na̧'a̧

¹ Chawaruwä chü̧jä̧wa̧tü̧, cha̧mi̧'iso'ki o'kajuiyünä̧ pä̧wä̧rü̧jä̧ku̧ Dio-rü ukuokusä irae ttü̧ja̧ ra̧wä̧pi̧jü̧ttü̧ ttü̧ji̧pa̧ pä'ü.

² Wo̧jua̧sä̧ Dio-rü rü̧ȩnä̧ ukuo te'äwätü pä'ümä̧ ja̧'wa̧nü̧ ja̧'a̧nä̧ isopäi'ünä̧mä̧ jo̧mȩnü̧mä̧ ttu̧wo̧juo̧ka̧'a̧tä̧ wotü.

³ Wo̧jui̧'o̧ko̧tü̧ Dio-mä̧ su̧ro̧pa̧rü̧'i̧nä̧ adiwä i̧sa̧ päi'ünä̧ jȩpü̧ päümä̧. Ja̧'wa̧nü̧ ja̧'a̧ttü̧ kkoro jueitä jȩtta̧ pä'ü amükuädinä̧tü̧ Dio ȩma̧tü̧ pä'ümä̧. Isopäi'ünä̧ ja̧'wa̧nü̧ jȩpü̧ Dio ȩma̧ pä'ü amükuädina̧'a̧ku̧mä̧ ya'okuinä̧tü̧.

⁴ Isopäi'ünä̧ weäwä wȩnȩ ji̧nü̧mä̧ beipa'a Crito-nä̧tä̧, o'katoi'ünä̧ Churutä tta̧'kua̧ wȩnä̧rü̧ esetätürümä̧ adiwä isotütä päi'ünä̧ pärotü ikuatü pä'ü.

⁵ Isopäi'ünä̧ weäwä wȩnȩnä̧tä̧ adiwä isotü juotta pä'ü jȩä̧kuä̧wä̧mä̧, Moisé-mä̧ pa̧'a̧nü̧ wȩyu̧ti̧nü̧: «Ya̧tȩ pi̧yȩ ukuotü jȩpü̧mä̧, jua̧u̧nä̧tä̧ ü̧jä̧kua̧.»

⁶ Ja̧'wa̧nü̧ ja̧'a̧nä̧ Dio-rü tta̧'kua̧ wȩnä̧rü̧ adiwä jueiku pärowächäkuäwämä̧, pa̧'a̧nü̧ pä'a: «Kua̧mi̧'iso'kinä̧mä̧, kuamükuädä ¿dí jä̧kua̧'a̧jä̧ttü̧ mo̧ro̧jä̧ra̧'a̧ 'cha̧wä̧chä̧kua̧mä̧, pä'ümä̧?» —Jua̧u̧ pä'ümä̧, Crito-rü mȩyȩdü̧ iku päwä ja̧'a̧—;

⁷ Ja̧'wa̧nü̧ jü̧ juiyüttü'i̧nä̧ ¿dí jä̧kua̧'a̧jä̧ttü̧ wa'are rejura̧'a̧ i̧mȩyȩwä̧kua̧mä̧? —Jua̧u̧ pä'ümä̧, Crito-rü wa'inä̧tü̧ ttü̧'kä̧tȩttü̧ ttoächa pä'ütä päwä ja̧'a̧.

⁸ Ja̧'wa̧nü̧ ja̧'a̧mä̧ ¿Tta̧'a̧nü̧ päa'jä̧ttü̧? ukú kutü'kü, wȩyu̧kuä̧ wȩnȩmä̧: «ukutä kuänä̧ ja̧'wa̧ta̧nü̧ ukutä kua̧mi̧'iso'kinä̧ kka̧'a̧ chi̧wȩnȩmä̧», jü̧nä̧; pi̧yȩ ja̧'a̧ tta̧'kua̧ wȩnä̧rä̧kuä̧wä̧ wȩnȩ jitäumä̧.

⁹ Isopäi'ünä̧ Jesú-mä̧ Chu̧ru̧wa̧ ja̧'a̧, kuänä̧ päkuttümä̧ ja̧'wa̧ta̧nü̧ Dio-mä̧ wa'arettü'i̧nä̧ tto'ädinä̧kü̧ pä'ü kua̧mi̧'iso'kinä̧ kuesetüttümä̧, ra̧wä̧pi̧jü̧ttü̧mä̧ ku̧ji̧pä̧kua̧jä̧.

¹⁰ Ja̧'wa̧nü̧ ja̧'a̧ttü̧ tta̧mi̧so'kinä̧mä̧ adiwä isotü päi'ünä̧ Dio pärotü ikuatü pä'ü esetäkuäwä ja̧'a̧ ja̧'wa̧nü̧ ja̧'a̧nä̧ ttänämä̧ jiäkuäwä ja̧'a̧ ra̧wä̧pi̧jü̧ttü̧ ttü̧ji̧pa̧ pä'ü Jesucrito-nä̧.

¹¹ Wȩyu̧kuä̧ wȩnȩmä̧ pä'a: «O'katoi'ünä̧ jua̧u̧ru̧ esetätümä̧ dä'ä ttuttokäkuotü.»

¹² Isopäi'ünä̧ judío'i̧nä̧, judío pokotü'i̧nä̧ jü̧nä̧mä̧, i̧mi̧ku̧nä̧mä̧ wokotü; isopäi'ünä̧ Chutä o'katoi'ünä̧ Tu̧ru̧wa̧ ja̧'a̧ttü̧ o'katoi'ünä̧ jä'epätürümä̧ iyü ja̧'a̧.

¹³ Ja̧'wa̧nü̧ ja̧'a̧ttü̧ o'katoi'ünä̧ Tu̧ru̧wa̧ Dio-rü, Ttu̧ru̧wa̧ jü̧nä̧ jä'epätürümä̧, ra̧wä̧pi̧jü̧ttü̧ ttü̧ji̧pä̧kuo̧tü̧.

¹⁴ ¿Ja̧'wa̧nü̧ ja̧'a̧mä̧ toku jättepäkua'ajä̧ttü̧, ji̧nä̧ ttesetokokurumä̧? ¿Ja̧'wa̧ta̧nü̧ toku tesetäkua'ajä̧ttü̧, jua̧u̧ ütü'kü ttä̧ju̧kuo̧ko̧ku̧ru̧mä̧? ¿Ja̧'wa̧ta̧nü̧ toku ttä̧ju̧kuä̧kua̧'a̧jä̧ttü̧ ya̧tȩ ji'äu totta'anä̧mä̧?

¹⁵ ¿Ja̧'wa̧ta̧nü̧ toku jittäwäkua'a̧jä̧ttü̧, we'ätü toa'anä̧mä̧? wȩyu̧kuä̧ wȩnȩ pä'a: ¡Juiyo adiwa'a adiwä juei jareü wȩnȩ i'kächätürümä̧!

¹⁶ Ja̧'wa̧nü̧ ja̧'a̧nä̧, o'katoi'ünä̧mä̧ esetokotü pinä̧tü̧ jareü wȩnȩmä̧; Isaía-mä̧ pä'inü̧: Chu̧ru̧wa̧ ¿Ditäjä̧ttü̧ jitäu esetäkua̧mä̧?

¹⁷ Ja̧'wa̧nü̧ ja̧'a̧ttü̧, tta̧'kua̧ wȩnä̧rä̧kuä̧wä̧mä̧ icha'a, ttä̧ju̧kuo̧mȩnä̧ ja̧'wa̧ta̧nü̧ ä̧ju̧kuä̧tü̧jä̧ Dio i̧wȩnȩnä̧tä̧.

¹⁸ Ja̧'wa̧nü̧ ja̧'a̧nä̧ ttümä̧ pä'üsä: ¿Ä̧ju̧kuo̧ko̧tü̧ pinä̧tü̧? ¡Isokü̧, ä̧ju̧kui̧nä̧tü̧! wȩyu̧kuä̧ wȩnȩmä̧ pä'a: Tti̧wȩnȩmä̧ pi̧jä̧ o'kajuiyünä̧ rä̧mi̧pi̧na̧'a̧, ja̧'wa̧ta̧nü̧ ruwäkuiyä pa̧ja̧ku̧nä̧ rȩbȩwi̧na̧'a̧ ttukuokumä̧.

¹⁹ Ja̧'wa̧ta̧nü̧ pä'üsä: ¿Irae ttü̧ja̧mä̧, pi̧yȩmä̧ jerupinä̧tü̧ tä̧jí̧? Ä̧kuo̧mȩnä̧mä̧, Moisé-mä̧ pä'inü̧: «Ttümä̧ kuä'kuoyäwätukui'ünä̧ jȩchä̧kua̧sä̧ chumüwäyotü pokotü pinä̧tü̧ku̧; Kua̧mi̧ surächi'ünä̧ jȩchä̧kua̧sä̧ Ttürü wo̧juo̧ko̧tü̧ pinä̧tü̧rü̧.»

²⁰ Ja̧'wa̧ta̧nü̧ Isaía-mä̧ ya'utekutä pä'inü̧: «Ttümä̧, ttürü usokotü pinä̧tü̧ ttü̧'o̧kui̧'ä̧kua̧sä̧; ja̧'wa̧ta̧nü̧ chi̧jȩkuä̧kua̧sä̧, Ttürü jä'epä̧ro̧ko̧tü̧ pinä̧tü̧rü̧.»

²¹ Ja̧'wa̧nü̧ ja̧'a̧nä̧ Irae ttü̧ja̧ ttütü'kü, Isaía-mä̧ pä'inü̧: «Mo̧ro̧ ji̧nü̧'a̧kuä̧ chu̧mü̧mä̧ te'ädinü̧sä̧, ttü̧ja̧ tteseta pä'ü jui'ü jua̧u̧ru̧ ra̧wä̧rä̧tü̧rü̧.»