Romanos 1 - Nuevo Testamento Uwotjüja

Pauru teäwinü̧ wȩnȩ

¹ Ttü Pauru-mä̧, Jesucrito u̧mü̧wä̧ya̧ jü̧nä̧, apóto cha pä'ü, jareü wȩnȩ Dio jäwä ujuturu iyinü̧ jidäwiyarü pä'ü woinä̧ku̧sä̧.

² Jua̧u̧mä̧ ä'kojitä päi'ünä̧ umüwäyotü profeta-nä̧, wȩyu̧kuä̧ wȩnȩnä̧ Dio-mä̧ weäkua'a ukuokuinü̧.

³ Jua̧u̧ wȩä̧kua̧mä̧ I̧tti̧, Tu̧ru̧wa̧ Jesucrito ji̧na̧'a̧, ü̧tä̧mü̧ttü̧mä̧ Dawi isotü i̧sa̧ pinü̧,

⁴ Jua̧u̧mä̧ Dio ujurunä̧, Epíritu Surojü jui̧'a̧ a̧'kua̧ iweyenä̧, Dio I̧tti̧ jü̧nä̧ i̧jȩpi̧nä̧ku̧ wa'arettü ttoächomȩnä̧.

⁵ Ja̧'wa̧nü̧ ja̧'a̧ttü̧, jua̧u̧ Jesucrito-nä̧ re ü̧ja̧'a̧ttü̧ apótore päi'ünä̧ jȩi̧nä̧u̧jä̧; Jua̧u̧ru̧ esetü o'katoi'ünä̧ tta̧'kua̧ wȩnä̧rü̧ ttü̧ja̧ pä'ü.

⁶ Ukutu Roma-nä̧ kka̧kuä̧tü̧'i̧nä̧ ja̧'wa̧nü̧tä̧ wotüjä̧, Jesucrito ȩmi̧nä̧u̧ kuätükua'attü.

⁷ Ukutu Roma-nä̧ kka̧kuä̧tü̧ o'katoi'ünä̧, Dio surojü juiyünä̧ ku̧jä̧tu̧kua̧ pä'ü pojopü ȩmi̧nä̧u̧ru̧ pä'üsä: Jä'o Dio ja̧'wa̧ta̧nü̧ Tu̧ru̧wa̧ Jesucrito iyü adiwä juei wȩnȩ juiyü kkä̧tu̧kua̧ku̧ pä'üsä.

Pauru esewinü̧ wȩnȩ

⁸ Ä̧kuo̧mȩnä̧mä̧, Tu̧ru̧wa̧ Jesucrito-nä̧, Chä'o Dio-rü eseusä. Ukutu kuesetätuku wȩnȩ o'kajuiyünä̧ ütawiyä pünä̧ ukuowa'a ä̧ju̧ku̧.

⁹ Dio-tä ja̧'a̧ wo̧jua̧mä̧ cha̧'kua̧rü̧ eseunä̧ chadita'amä̧; Churutä Dio-rü chukuokuta'anü̧, 'kuäopünä̧ ukutu kutü'kütuku 'kuäopünä̧ chukuokua'amä̧.

¹⁰ 'Kuäopünä̧tä̧ jä'epüsä Dio-rümä̧, Churutä pä̧wä̧rü̧jo̧mȩnä̧ jü̧ttü̧mä̧, jua'a ukuturu do'ächü ichü adiunä̧tä̧ 'kuädopa pä'ü,

¹¹ Isopäi'ünä̧ ukuturu tochächa pä'üsä, Epíritu jäwä, iyinü̧ jidäwätukuaku pä'ü, yaboku 'kiyünä̧ ku̧jä̧kuä̧tu̧kuä̧kua̧'a̧nü̧;

¹² jua̧u̧ pädümä̧ ppä'ädäkuäu eseäkuäu tujuru tȩma̧ pä'üsä, ta̧'kua̧ tu̧wȩnä̧rü̧nä̧, ukutu'i̧nä̧ ttü'i̧nä̧ ji̧nä̧ ji̧yȩtȩ jäwä ja̧'a̧ttü̧.

¹³ Ja̧'wa̧nü̧ ja̧'a̧nä̧ chawaruwä chü̧jä̧wa̧tü̧ ku̧wo̧juä̧tu̧kua̧ pä'üsä, do'ächü chicha pä'ü jȩcha̧'a̧nä̧, do'ächü chichü juiyünä̧ weyekuä'ijüsä. Ji̧nä̧somä̧ kkorotü judío pokotürü jä̧'i̧jü̧ta̧'a̧nü̧ ukutunä̧'i̧nä̧ u̧wä̧ju̧ chu̧ju̧nä̧ra̧ pä'ü.

¹⁴ Grecia ttü̧ja̧rü̧'i̧nä̧ ja̧'wa̧ta̧nü̧ Grecia ttü̧ja̧ wokotürü'i̧nä̧ ja̧'wa̧ta̧nü̧ wo̧juä̧tü̧rü̧'i̧nä̧, jerupätürü'i̧nä̧ pi̧yȩmä̧ mi̧ppotüsä;

¹⁵ Ja̧'wa̧nü̧ ja̧'a̧ttü̧, ttütämä̧ jitätä ja̧'a̧ chicha pä̧wä̧rü̧jä̧ku̧sä̧ Roma-ra̧'a̧ ukuturu jareü wȩnȩ jidäwa pä'ü.

Jareü wȩnȩmä̧, Dio ujuru ja̧'a̧

¹⁶ Isopäi'ünä̧ jareü wȩnȩ ji'äumä̧ dä'ä ttu'oküsä, jua̧u̧mä̧ surojüttü kki̧'ä̧kuä̧wä̧ Dio ujuru ja̧'a̧ttü̧ esetätürümä̧, ä̧kuo̧mȩnä̧mä̧ judío-rü'i̧nä̧, judío pokotürü'i̧nä̧, jü̧nä̧.

¹⁷ Isopäi'ünä̧ jareü wȩnȩmä̧, Dio ujuturu adiwomȩnä̧ jȩü̧mä̧ i̧jȩkuä̧cha̧'a̧; tta̧'kua̧ ttu̧wȩnä̧ro̧mȩttü̧ kkä̧mä̧dü̧, yaboku tta̧'kua̧ ttu̧wȩnä̧rü̧nä̧, wȩyu̧kuä̧ wȩnȩmä̧ pa̧'a̧nü̧ pä'attü̧: «adiwä juei jȩpü̧ kkü̧mä̧ a̧'kua̧ wȩnä̧rü̧tä̧ ü̧jä̧kua̧.»

¹⁸ Ja̧'wa̧nü̧ ja̧'a̧nä̧ Dio üjü'kokümä̧ mo̧ro̧jä̧ra̧'a̧ttü̧ kkä̧mä̧dü̧ i̧jȩkuä̧cha̧'a̧ o'katoi'ünä̧ ttü̧ja̧ suronä̧ jȩpä̧tü̧rü̧, suronä̧ jȩpü̧ jueü wȩnȩ surojuo'epätürümä̧.

¹⁹ Dio-rü ttu̧wo̧jua̧ pä'ü rekuä rü̧jü̧mä̧, täkü juätürümä̧ i̧jȩkuä̧chi̧na̧'a̧, jua'amä̧ chutä Dio i̧jȩpi̧na̧'a̧ttü̧.

²⁰ Isopäi'ünä̧ Dio jäwä tottü juiyünä̧ ji̧nü̧mä̧, mo̧ro̧ kki̧ä̧mü̧nä̧ ujuru'i̧nä̧ ja̧'wa̧ta̧nü̧ chutä jäwä Tü̧ä̧nä̧wa̧ jü̧nä̧ jü̧'i̧nä̧ ttu̧wo̧jui̧pü̧nä̧ i̧jȩkuä̧cha̧'a̧ pi̧jä̧ aditino̧mȩttü̧ kkä̧mä̧dü̧, jerupätüjä̧ pätta pä'ümä̧ juiya'a.

²¹ Ja̧'wa̧nü̧ Dio-rümä̧ ttu̧wo̧jui̧na̧'a̧nä̧, Dio-rü ttü̧ä̧nä̧wa̧ jü̧nä̧ tteseäkuäwoka'a, ye adiwa'a pä'ü'i̧nä̧ pä'ü jui'ü, jitütä ttamu̧kuäda'akutä surojuottächa'attü, adiu tta̧mü̧kuädokomȩnä̧ tta̧mi̧so'ki yo̧ä̧chi̧nä̧u̧.

²² Adiu wo̧juä̧tü̧jä̧ pätta'anä̧, amükuädokotü 'kua̧rü̧nä̧ juo'ächinä̧tü̧;

²³ Ja̧'wa̧ta̧nü̧ Dio ukuo jäwä beipokümä̧ pärotü ikuinä̧tü̧, ttü̧ja̧ be'ipächätü tta̧'kua̧juä̧nä̧tä̧, ppi̧yu̧nä̧tä̧, de'iyü kue'ächätünä̧tä̧, ä̧ka̧tü̧nä̧tä̧, jü̧nä̧.

²⁴ Ja̧'wa̧nü̧ jȩtto̧mȩnä̧ Dio-mä̧ tta̧mi̧so'ki pä̧wä̧rü̧jü̧ surojünä̧ ttü̧jü̧nä̧tä̧ iyipinä̧u̧ ja̧'wa̧nü̧ jo̧mȩnä̧ dä'ärü̧jü̧nä̧ tta̧mü̧nä̧ pa̧ja̧tü̧ ttidepä ttiyäkuäunä̧tä̧.

²⁵ Dio jäwä Isopäi'ünä̧ wȩnȩmä̧ yapare wȩnȩnä̧ pärotü iku, Chutä aditinü̧rü̧mä̧ tteseäkuäwoka'anä̧, aditäwätä eseäkuäwinä̧tü̧, Jua̧u̧tä̧ ja̧'a̧nä̧ mo̧ro̧ kki̧ä̧mü̧nä̧ eseäkuäwa̧mä̧. Amȩ́

²⁶ Ja̧'wa̧nü̧ ja̧'a̧ttü̧ Dio-mä̧ dä'ärü̧jü̧ jäwänä̧ jȩpü̧ ttü̧jü̧nä̧ iyipinä̧u̧. Tti̧rȩkuo̧mü̧rü̧'i̧nä̧ pärowächinä̧tü̧ pi̧jä̧ttü̧ jȩä̧kuä̧wo̧kü̧nä̧, nä̧tü̧ku̧tä̧ jȩttä̧kuä̧u̧nä̧;

²⁷ ja̧'wa̧ta̧nü̧ u̧mä̧tü̧'i̧nä̧ ttirekua̧mü̧ku̧mä̧ jȩttä̧kuä̧wo̧ka̧'a̧, kkorotü u̧mä̧tu̧ku̧tä̧ jȩttä̧kuä̧u̧nä̧, dä'ärü̧jü̧ jȩpä̧'chä̧kuä̧u̧, ro̧ȩkuä̧nä̧tä̧ surojü jȩttü̧mä̧ usurä ttȩmä̧wa̧ pä'ü.

²⁸ Dio-rümä̧ ttu̧wo̧jua̧rü̧ pättokoku, surojü tta̧mü̧kuäda'aku jȩpü̧ ttü̧jü̧nä̧tä̧ iyipinä̧u̧, jȩä̧kuä̧wo̧kü̧nä̧ jȩpü̧ ttü̧jü̧nä̧tä̧.

²⁹ Ja̧'wa̧nü̧ jo̧mȩnä̧ surojü o'kajuiyütä jȩpä̧tü̧, tti̧rȩkua̧mü̧ pokotüku ä'ä'chäkuäwätä, surojuoächäkuäwätä, kkorojuei kkü'käwätä, surojü jȩä̧kuä̧wä̧tä̧; ttawaruwärü kkü'käwokütä, kuäwätä, rowäkuäwätä, yapare wȩnȩtä̧, ma̧ttä̧chü̧nä̧ tto̧ȩpä̧rä̧kuä̧wä̧tä̧.

³⁰ Suronä̧tä̧ wiräwätü, Dio'i̧nä̧ aboiyotütä wotü, ukuotokotü, pä̧i̧kuä̧tü̧, ukuo te'äkuäwätü, kkorotürü ttüjü'koka'a topätü, surojütä amükuädätü, ttä'otü̧rü̧'i̧nä̧ ukuotokotü,

³¹ wo̧jui̧'ü̧'i̧nä̧ wo̧jui̧'o̧ko̧tü̧, tta̧'kua̧ ttu̧wȩnä̧rü̧ juiyü'anü̧ wotü, re kkä̧kuä̧wä̧'i̧nä̧ jui'ätü.

³² Dio, ja̧'wa̧nü̧ jȩpä̧tü̧mä̧ wa'ü ttikuäkuotü päinü̧'i̧nä̧ wo̧juä̧tü̧, suro jitütämä̧ jȩpo̧ko̧tü̧, kkorotürü'i̧nä̧ jȩtti̧ya̧tü̧ pä'ü jȩpä̧tü̧.