San Mateo 8 - Nuevo Testamento Uwotjüja

Jesú-mä̧ repra na̧'ä̧chü̧rü̧ aditü ikuinü̧

¹ Jesú mü̧ä̧'kattü i̧mȩyȩwi̧'ä̧ji̧ o'ka'a, ttü̧ja̧ rekuätü chutäku 'chi̧nä̧tü̧.

² Ja̧'wa̧nü̧ i̧'cha̧'a̧ jakuänä̧ ya̧tȩ Repra mä̧richei na̧'ä̧chü̧, Jesú ä'ka jo̧mȩ iwe'kiyunä̧ kkä̧mä̧dü̧ pä'inü̧: —Chu̧ru̧wa̧, chumä̧richei aditü kuikua päkuttümä̧, aditü ikuittü.

³ Jesú-mä̧ u̧mü̧ mȩ'ü̧nü̧ pä'inü̧: —A̧, aditü chikuaku pä'üsä. ¡Jua̧u̧nu̧mä̧ adiwächi'i! Päomȩnä̧, yotäku Repra märicheimä̧ toepo'inä̧ku̧.

⁴ Ja̧'wa̧ta̧nü̧ Jesú-mä̧ päinä̧ku̧: —Topittü̧, ya̧tȩrü̧'i̧nä̧ jikuäwoka'a, sacerdote wa̧rü̧tä̧ i̧jȩkuä̧ji̧ Moisé weinüta'anü̧ kuiäre ofrenda iyükkä̧nü̧, sacerdote-tü̧ ttu̧wo̧juä̧kua̧'a̧nü̧.

Jesú aditü ikuinü̧ su̧ro̧do̧u̧ i̧sa̧ u̧mü̧wä̧ya̧rü̧

⁵ Jesú-mä̧, Cafarnaúm ütawiyänä̧ i̧'chi̧'a̧'a̧, ya̧tȩ Roma-ttü̧ su̧ro̧do̧u̧ ttu̧ru̧wa̧ ichi'ü ajuäkuäwuönü̧:

⁶ pä'inü̧, —Chu̧ru̧wa̧, isodenä̧ chu̧mü̧wä̧ya̧, parárisi-ttü rü̧ȩnä̧ na̧'ä̧chü̧ usurä ȩmä̧u̧ ü̧'i̧yä̧ku̧sä̧,

⁷ Päku, Jesú-mä̧ ädätinä̧ku̧: —Jua̧u̧nu̧mä̧ aditü iku chi̧'chä̧ku̧.

⁸ Ja̧'wa̧nü̧ pä'anä̧, su̧ro̧do̧u̧ ttu̧ru̧wa̧mä̧ ädätinü̧: —Chu̧ru̧wa̧, chojusodenä̧ dokuächü juiyü'anü̧ wa̧sä̧; suro kui̧wȩnȩnä̧tä̧ päkuttü'i̧nä̧ chu̧mü̧wä̧ya̧mä̧ ü̧'i̧pä̧kua̧.

⁹ Isopäi'ünä̧, ttütä'i̧nä̧ chumüwäyotürü kku̧nä̧rü̧sä̧, su̧ro̧do̧u̧ru̧mä̧. Juätüttü, ya̧tȩrü̧ jua'a täi, poku ichi pädomȩnä̧mä̧ jua̧'a̧nü̧tä̧ jȩpä̧tü̧.

¹⁰ Ja̧'wa̧nü̧ pä'a ä̧ju̧ku̧, Jesú-mä̧ rü̧ȩnä̧ amükuädünü̧ chutäku 'chä̧tü̧rü̧ pä'inü̧: —Isopäi'ünä̧ pädäu̧jä̧, Iraettümä̧ ya̧tȩrü̧'i̧nä̧ po̧kui̧po̧kü̧ pä'ijüsä, pa̧'a̧nü̧ rü̧ȩnä̧ a̧'kua̧ wȩnä̧rü̧rü̧mä̧.

¹¹ Ja̧'wa̧nü̧ ji̧yä̧ku̧ pädäu̧jä̧, rekuätü kkä̧wa̧ räopa'akuttü'i̧nä̧, kkä̧wa̧ ma̧ä̧cha̧'a̧ku̧ttü̧'i̧nä̧ ichü, Dio weomȩ Abraha̧-ku̧, Isaa-ku, Jacoku ttu̧kuȩ kuä̧nü̧ ttu̧'ȩjä̧mä̧kuo̧tü̧.

¹² Ja̧'wa̧nü̧ ja̧'a̧nä̧, uruwo weomȩ ttü̧'ä̧mä̧da̧ pä'ü ä̧tȩkuo̧tü̧mä̧, yo̧mȩku̧tä̧, do'opü ikuäwäkuotü. Jua'attümä̧, ttaku norü ttajuäwäkuäwäkuotü.

¹³ Jua̧u̧ o'ka'a Jesú-mä̧ su̧ro̧do̧u̧ ttu̧ru̧wa̧rü̧ pä'inü̧: —Täkü kuojusodera̧'a̧ täi, kuesetäji'a̧kuä̧ 'kuäopä̧kua̧jä̧. Päomȩnä̧ su̧ro̧do̧u̧ ttu̧ru̧wa̧ u̧mü̧wä̧ya̧mä̧, jua̧u̧nu̧tä̧ kkä̧mä̧dü̧ na̧wä̧chä̧ji̧mä̧ pi̧'i̧nü̧.

Simón ü̧sä̧da̧rü̧ Jesú aditü ikuinü̧

¹⁴ Peduru ojusodenä̧ ichi'omȩnä̧, Jesú-mä̧ jua̧u̧ ü̧sä̧da̧rü̧ cama-nä̧ du'unä̧ na̧'ä̧chü̧ kkü̧'a̧'a̧ topinü̧.

¹⁵ Ja̧'wa̧nü̧ ja̧'a̧ topü, Jesú-mä̧ kku̧mü̧nä̧ mȩo̧mȩnä̧ du'unä̧ na̧jä̧chä̧ji̧ttü̧mä̧ pi̧'i̧nä̧ju̧, pi̧'ä̧'kojumä̧ ä̧rä̧mi̧'ü̧ u̧kuȩ iyinä̧ju̧.

Na̧nȩpä̧tü̧rü̧ Jesú aditü ikuinü̧

¹⁶ Ni̧pä̧cho̧mȩnä̧, Jesú ü̧jo̧mȩku̧ epíritu-tu̧tu̧ suropätü ttü̧ja̧kuä̧u̧ru̧ tti'chächa'a aditü ikuinü̧; suro i̧wȩnȩnä̧tä̧ rä'epä'chü iku, o'katoi'ünä̧rü̧ na̧nȩpä̧tü̧rü̧ aditü ikuinü̧.

¹⁷ Pi̧yȩ 'kuäopinü̧mä̧ profeta Isaía pa̧'a̧nü̧ jiäwinü̧'a̧kuä̧ 'kuäopina̧'a̧: «Chutätä aditü iku, tu̧mä̧richeimä̧ kä'eku wȩnä̧u̧ ȩpi̧nü̧.»

Jesú-ku 'chä̧kuä̧wä̧ wȩnȩ

¹⁸ Ttü̧ja̧ rekuätü ttichäja'a topü, Jesú-mä̧ rü̧ä̧ dubora ji̧jä̧ku̧nä̧ ttijäarü pä'ü we'inü̧.

¹⁹ Ja̧'wa̧nü̧ ja̧'a̧, ya̧tȩ weäwä wȩnȩ wo̧juȩkuä̧ i̧sa̧ ichi'ü päinä̧ku̧: —Wo̧juȩkuä̧ i̧sa̧, ukutäku kui̧'cho̧mȩmä̧, kuȩdä̧chä̧kua̧sä̧.

²⁰ Päku, Jesú-mä̧ ädätinü̧: —A̧wa̧ri̧tü̧mä̧ ttäjuwiyä kku̧nä̧rä̧tü̧ ja̧'wa̧ta̧nü̧ ppi̧yu̧'i̧nä̧ ttä̧'ti̧yu̧ kku̧nä̧rä̧tü̧. Ja̧'wa̧nü̧ ja̧'a̧nä̧, ubo I̧tti̧mä̧ ä'ü ü̧jo̧mȩ'i̧nä̧ jui̧'a̧.

²¹ Ja̧'wa̧ta̧nü̧ kka̧ra̧, u̧wo̧juȩtä̧u̧ttü̧ ya̧tȩ päinä̧ku̧: —Chu̧ru̧wa̧ ä'kanä̧mä̧, chä'orü chü'turäja we'ittü.

²² Päku, Jesú-mä̧ ädätinä̧ku̧: —Wä̧i̧nä̧ wa'inä̧tü̧tä̧, ttuwaparemä̧ ttu'tura'anä̧ ja̧'a̧tä̧ topi, ukumä̧ cho'ka'anä̧tä̧ ichi.

Jesú kkä̧rü̧'koppa wirodinü̧

²³ Jesú-mä̧ woi'kanä̧ pä̧mä̧dü̧ i̧'cha̧'a̧, umüwäyotü'i̧nä̧ jua̧u̧tä̧ku̧ 'chi̧nä̧tü̧.

²⁴ Ja̧'wa̧nü̧ tti̧'cho̧mȩ kkä'kottü kkä̧rü̧'koppa tawipomȩnä̧, aje rü̧ȩnä̧ ppawina̧'a̧, woi'ka'i̧nä̧ wä'okuächä̧rü̧nä̧tä̧ päi'ünä̧. Ja̧'wa̧nü̧ ja̧'a̧nä̧, Jesú-mä̧ ä̧'ä̧rü̧ pi̧nü̧.

²⁵ Ja̧'wa̧nü̧ ji̧yä̧u̧ u̧wo̧juȩtä̧u̧mä̧ 'chä̧wi̧'ü̧, ü'orächi'ünä̧ pättinä̧ku̧: —¡Chu̧ru̧wa̧ to'e'ätüjä̧, ppä'äditü!

²⁶ Pättäku päinä̧u̧: —¿Tta̧'a̧nü̧ pä'ü yekuekuätukua'ajä̧ttü̧, ukutumä̧, Dio-rümä̧ kua̧'kua̧ wȩnä̧ro̧ko̧tü̧jä̧ tä̧jí̧? Pä'ü kkä̧nü̧, ä̧rä̧mi̧'ü̧ kkä̧rü̧'kopparü'i̧nä̧, rü̧ä̧ duborarü'i̧nä̧ ujuruku woi'omȩnä̧ o'kajuiyünä̧tä̧ wirochi'ina̧'a̧.

²⁷ Ja̧'wa̧nü̧ ji̧yä̧u̧, u̧wo̧juȩtä̧u̧mä̧ ukuokuäkuäwinä̧tü̧, —¿Pidemä̧, dí ja̧'a̧jä̧ttü̧, juiyo kkä̧rü̧'koppa'i̧nä̧, rü̧ä̧ dubora'i̧nä̧ ukuotäkumä̧?

Gadara rȩjȩ ttü̧ja̧sa̧rü̧ epíritu-tu̧ suropätü kka̧kui̧nä̧tü̧

²⁸ Ja̧'wa̧nü̧ jä̧ja̧'a̧, Jesú-mä̧ rü̧ä̧ dubora ji̧jä̧ku̧nä̧, Gadara rȩjȩnä̧ i̧rȩbȩwi̧'o̧mȩnä̧, epíritu-tu̧ suropätü ttü̧ja̧kuä̧u̧ ta̧ju̧ jo̧mȩnä̧ wa'are ikuäwä idoriyä 'kä̧tȩttü̧ rä'ekuipinä̧tü̧, rü̧ȩnä̧ pä̧i̧kuä̧tü̧, juä̧mä̧ mä̧nä̧nä̧mä̧ kkorotü'i̧nä̧ 'kuättopü juiyünä̧tä̧ jȩpä̧'i̧jä̧tü̧;

²⁹ Juätümä̧ pä̧i̧ku̧nä̧ wopinä̧tü̧: —¡Dio I̧tti̧mä̧ toku pä'ü jȩ'kua̧'a̧jä̧ttü̧, ujuturumä̧! ¿Ji̧nä̧ rüjí mo̧ro̧, ro̧ȩkuä̧kuȩ mo̧ro̧ päi'oka'anä̧ usurä tȩmä̧u̧nä̧ ro̧'ȩpü̧ kuichäja'a tä̧jí̧?

³⁰ Juorümä̧ a̧'u̧kua̧'a̧tä̧ otonä̧nü̧ rekuätü ku̧chi̧tü̧ ttu̧kuȩ kuä̧nü̧ kka̧kui̧nä̧tü̧,

³¹ Ja̧'wa̧nü̧ ja̧'a̧ epíritu-tu̧ suropätümä̧ Jesú-ru ajuäkuäunü̧ jä̧'ȩpä̧ri̧nä̧tü̧: —Pitü ttü̧ja̧ttü̧ rä'epü kuikuatü päkuttümä̧, jitü ku̧chi̧tü̧nä̧ dotächi'ünä̧ we'itü.

³² Jä̧ttȩpä̧rä̧ku̧ Jesú-mä̧, päinä̧u̧: —Tätukui. Päomȩnä̧, ttü̧ja̧ttü̧ rä'opächü ku̧chi̧tü̧nä̧ dodepipinä̧tü̧; ja̧'wa̧nü̧ päi'omȩnä̧ ku̧chi̧tü̧mä̧ yotäku rü̧ä̧ duborara̧'a̧ku̧ jopächü, idose dȩa̧'a̧ku̧ ma̧'o̧po̧'ä̧chü̧ o'katoi'ünä̧tä̧ a̧'ä̧kuä̧u̧ to'e'ächinä̧tü̧.

³³ Juätürü tta̧'ä̧rä̧jä̧tü̧mä̧, ütawiyära̧'a̧ dü'ekuächinä̧tü̧. Jua'attümä̧ 'chä̧wi̧'ü̧ epíritu-tu̧ suropätü ttü̧ja̧kuä̧u̧ru̧ 'kuäopäji'i̧nä̧, kuchitü̧rü̧ 'kuäopäji'i̧nä̧ o'kajuiyünä̧tä̧ ji'äwinä̧tü̧.

³⁴ Ja̧'wa̧nü̧ jittäwiyä̧u̧ ütawiyä ttü̧ja̧mä̧ o'katoi'ünä̧ Jesú-ru topü ichi'äjä'kotü, juorü tti̧rȩjä̧ttü̧mä̧ i̧wa̧ pä'ü we'ü ttikuinä̧ku̧.