San Mateo 4 - Nuevo Testamento Uwotjüja

Äwettä Jesú-ru kka̧kuä̧mȩ'ü̧ toinü̧ wȩnȩ

¹ Ja̧'wa̧nü̧ jä̧ji̧ o'ka'a Epíritu Sa̧tu̧mä̧, äwettä kka̧kuä̧mü̧ toarü pä'ü, Jesú-ru rȩba̧ dȩ'a̧ra̧'a̧ku̧ o'ipinü̧.

² Jua'attümä̧, ttü̧ja̧ ta̧ju̧ mo̧ro̧ jo̧mȩnä̧ ja̧'wa̧ta̧nü̧ ttü̧ja̧ ta̧ju̧ yodó jo̧mȩnä̧ u̧kuȩ ukuoka'a ü̧jä̧ja̧'a̧, ukua ppäirü̧jä̧chi̧'i̧nä̧ku̧.

³ Ja̧'wa̧nü̧ ja̧'a̧ Äwettämä̧ kka̧kuä̧mü̧ toa pä'ü, Jesú ü̧jo̧mȩku̧ ichi'ü päinä̧ku̧: —Isopäi'ünä̧ Dio I̧tti̧ kuttümä̧, pi̧yȩ inä̧du kuäkuäwä päi'ünä̧ pärowächünä̧, pä'i.

⁴ Päiyäku, Jesú-mä̧ ädätinä̧ku̧: —Wȩyu̧kuä̧mä̧ pä'ija'a: Ttü̧ja̧sa̧mä̧ u̧kuȩttü̧tä̧mä̧ a̧'kua̧ro̧kü̧ jä̧kua̧, o'kajuiyünä̧ Tü̧ä̧nä̧wa̧ Dio ättü räopüttü'i̧nä̧ a̧'kua̧rä̧kua̧.

⁵ Jua̧u̧nü̧ o'ka'a, Äwettämä̧, Jerusarȩ́ ütawiyära̧'a̧ku̧ o'ipächü, Dio-rü ukuokuäkuäwode ju'toju jo̧mȩku̧ ȩmi̧pü̧ kku̧nä̧ji̧'ka̧,

⁶ päinä̧ku̧: —Isopäi'ünä̧, Dio I̧tti̧ kuttümä̧ rȩjȩku̧ tü'ächi; wȩyu̧kuä̧ wȩnȩmä̧ pä'ija'a: «Dio-mä̧ umüwäyotü á̧gȩrȩ-rü wȩä̧kua̧ 'chuttädaku pä'ü, i̧nä̧wänä̧ ppekuokuächü juiyünä̧.»

⁷ Jesú-mä̧ ädätinä̧ku̧: —Ja̧'wa̧ta̧nü̧ wȩyu̧kuä̧ wȩnȩmä̧ pä'ija'a: «Ku̧ru̧wa̧ Dio-rümä̧ kka̧kuä̧mȩ'ü̧mä̧ to'kuä.»

⁸ Pä'äjita'anü̧ Äwettämä̧, mü̧ä̧'ka rü̧ȩnä̧ ju'toju jä'kara̧'a̧ o'ipäji̧'ka̧, pi̧jä̧ ruwäkuiyä uruwo'i̧nä̧, üadiwä'i̧nä̧ i̧jȩpü̧,

⁹ päinä̧ku̧: —Pi̧yȩ o'kajuiyünä̧ chi̧yä̧kua̧jä̧, ttürü kuiwe'kiyunä̧ ma̧'ä̧mu̧nü̧ kueseuttümä̧.

¹⁰ Päomȩnä̧, Jesú-mä̧ ädätinä̧ku̧: —Satanás täkü täi, wȩyu̧kuä̧ wȩnȩmä̧ pä'a: Ku̧ru̧wa̧ Dio-rütä kuiwe'kiyunä̧ mä̧'ä̧mü̧ esewirü ja̧'wa̧ta̧nü̧ Jua̧u̧ weütätä tukuota pä'ü ja̧'a̧.

¹¹ Ja̧'wa̧nü̧ päku, Jesú ü̧jo̧mȩttü̧ äwettämä̧ i̧wi̧'a̧'a̧nä̧, A̧gȩrȩ-tü̧mä̧ ichi'ü ppättädinä̧ku̧.

Jesú aditäwä kkä̧mä̧dü̧ aditinü̧

¹² Ju̧a̧-rü̧ kärenä̧ ttütäja'a ä̧ju̧kuä̧ji̧'ka̧, Jesú-mä̧ Galirea rȩjȩra̧'a̧ku̧ 'chi̧nü̧.

¹³ Nazare-nä̧ ü̧jä̧'i̧ja̧'a̧, juorü rä'opächü rü̧ä̧ dubora jäyora wȩjü̧ Cafarnaúm ütawiyänä̧ ü̧ja̧ pä'ü ichinü̧, Zaburó̧, Neftarí pä'ü miku rȩjȩnä̧.

¹⁴ Pi̧yȩmä̧ 'kuäopina̧'a̧, profeta Isaía ukuokuinü̧ jo̧mȩnü̧ päia'attü. Jua̧u̧mä̧ pa̧'a̧nü̧ päina̧'a̧ ji̧na̧'a̧:

¹⁵ Ä̧ju̧kuä̧tu̧kui̧ Zaburó̧ i̧rȩjä̧, rü̧ä̧ aje tü'kü kka̧kuä̧tü̧mä̧; Ä̧ju̧kuä̧tu̧kui̧ Neftarí i̧rȩjä̧ ttü̧ja̧mä̧, Jordán ajenä̧ kkä̧wa̧ ma̧ä̧cha̧'a̧ku̧nä̧ kka̧kuä̧tü̧mä̧, Ä̧ju̧kuä̧tu̧kui̧ Galirea rȩjȩnä̧ kka̧kuä̧tü̧mä̧, Judío pokotü tti̧rȩjä̧nä̧:

¹⁶ Ttü̧ja̧ yo̧ü̧nä̧ kka̧kui̧nä̧tü̧mä̧ rü̧ȩnä̧ tȩya̧u̧ tottäkuotü; ji̧yȩtȩ tȩya̧u̧, kkä̧dȩpä̧kua̧'a̧ wa'are isoppanä̧ kka̧kuä̧tü̧rü̧.

¹⁷ Juorütä kkä̧mä̧dü̧ Jesú-mä̧, ji'äwinü̧: «Dio-ku ppa̧'ä̧chä̧tu̧kui̧, täkü Ru̧wa̧ Dio weümä̧ tü'kü ja̧'a̧,» jü̧nä̧.

Pa̧ja̧kuä̧nü̧ wotü po̧i̧ ȩmä̧tü̧rü̧, Jesú-mä̧ wopinü̧

¹⁸ Ja̧'wa̧ta̧nü̧ Jesú-mä̧, Galirea rü̧ä̧ dubora jäyänä̧ i̧'cho̧mȩnä̧, po̧i̧ ȩmä̧wä̧ isotü ta̧ju̧ru̧ topinü̧: André'i̧nä̧, ubüo Simón ja̧'a̧nä̧, Peduru pä'ü ottinä̧ku̧'i̧nä̧ po̧i̧ wo̧ä̧wä̧sa̧ ikuäu kka̧kui̧nä̧tü̧.

¹⁹ Jesú juätürü pä'inü̧: —Ttüku ichätukui, ttü̧ja̧rü̧ ȩmä̧wä̧ isotü jü̧nä̧tä̧ juodepätukuaku.

²⁰ Ja̧'wa̧nü̧ pä̧u̧, yotäku tti̧ä̧rȩsa̧mä̧ kä'ädi'ü, chutäku 'chi̧nä̧tü̧.

²¹ Jua'a yabonä̧ i̧'chi̧'o̧mȩnä̧, Sa̧ti̧a̧ku̧'i̧nä̧, ü̧jä̧wa̧ Ju̧a̧'i̧nä̧ po̧i̧ wo̧ä̧wä̧sa̧ woi'kanä̧, ti̧'chä̧rü̧ ttü̧'ȩja̧'a̧ po̧kui̧pi̧nü̧, ttä'o Zebedeo-ku. Juätü ta̧ju̧ru̧ Jesú-mä̧ wopinü̧:

²² Ja̧'wa̧nü̧ wo̧ä̧u̧, yotäku 'chi̧nä̧tü̧, ttä'otä woi'kanä̧ ü̧ji̧pa̧'a̧nä̧.

Jesú rekuätürü wo̧juȩti̧nü̧

²³ Jesú-mä̧, Galirea rȩjȩ o'kajuiyünä̧, sinagogas odewiyä jü̧'a̧kuä̧ kue'ächü wo̧juȩti̧nü̧. Wo̧juȩtü̧mä̧ ji'äwinü̧ jareünä̧ Ru̧wa̧ Dio weü wȩnȩ, ji'äu kkä̧nü̧mä̧ na̧nȩttü̧ttü̧'i̧nä̧, ubara ttu'u usurä ttȩmä̧u̧'i̧nä̧ aditü ikuinü̧.

²⁴ Ja̧'wa̧nü̧ ja̧'a̧, Siria rȩjȩ o'kajuiyünä̧ Jesú-mä̧ ukuowi'omȩnä̧ o'katoi'ünä̧ kkorottü'i̧nä̧, kkorottü'i̧nä̧ na̧nȩpä̧tü̧rü̧ i'chächinä̧tü̧. Barau na̧nȩpä̧tü̧rü̧'i̧nä̧, epíritu-tu̧ suropätü ttü̧ja̧kuä̧u̧ru̧'i̧nä̧, epilépcia mä̧richei na̧nȩpä̧tü̧rü̧'i̧nä̧ ja̧'wa̧ta̧nü̧ parárisi mä̧richei na̧nȩpä̧tü̧rü̧'i̧nä̧, Jesú-mä̧ aditü ikuinä̧u̧.

²⁵ Ja̧'wa̧nü̧ jo̧mȩnä̧, Galirea ttü̧ja̧'i̧nä̧, Decápoli ttü̧ja̧'i̧nä̧, Jerusarȩ́ ttü̧ja̧'i̧nä̧, Judea rȩjȩ ttü̧ja̧'i̧nä̧ ja̧'wa̧ta̧nü̧ Jordán ji̧jä̧ku̧nä̧ ttü̧ja̧'i̧nä̧, rekuätü Jesú o'ka'anä̧ 'chi̧nä̧tü̧.