San Mateo 3 - Nuevo Testamento Uwotjüja

Bautizo jȩpä̧'i̧jü̧, Ju̧a̧ jiäwinü̧ wȩnȩ

¹ Ji̧yȩnü̧ mo̧ro̧, bautizo jȩä̧kuä̧wä̧ i̧sa̧ Ju̧a̧ pä'ü mi̧kua̧ rȩbi̧yu̧ dȩ'a̧ra̧'a̧ ji'äwä̧ya̧ ichinü̧.

² Jua̧u̧mä̧ ji̧ä̧wi̧nä̧u̧: «¡Suronä̧ jȩ'kuä̧'i̧jä̧tu̧ku̧ kä'ädi'ätukui, mo̧ro̧jä̧ra̧'a̧ttü̧ ruwo weäwämä̧ tü'küwächa'a!»

³ Pide Ju̧a̧ ütü'kü 'kuäopä̧kuȩ, profeta Isaía-mä̧, pa̧'a̧nü̧ ji'äwinü̧: «Rȩba̧ dȩ'a̧ra̧'a̧ttü̧, ya̧tȩ i̧wȩnȩ pä̧i̧ku̧nä̧ rȩmi̧pa̧'a̧: Tu̧ru̧wa̧ u̧mä̧nä̧ jo̧mȩnü̧ aditü kku̧nä̧tu̧kui̧, U̧mä̧nä̧ jue'epiyätukuirü.»

⁴ Ju̧a̧ ü̧'ka̧tä̧wä̧ta̧mä̧, camellu uwo'chettü adikuä̧ta̧ 'ka̧tä̧wi̧nü̧. Äkä isäyamä̧ i̧sa̧ i̧jȩta̧ttü̧ adikuäya ti̧'ä̧dä̧kuä̧wi̧nü̧. U̧kuȩmä̧ ji̧ri̧chu̧tu̧ru̧tä̧ kuinü̧ ja̧'wa̧ta̧nü̧ de'a mayatä awinü̧

⁵ Ja̧'wa̧nü̧ ja̧'a̧, Jerusarȩ́ ütawiyä ttü̧ja̧'i̧nä̧, Judea rȩjȩ ttü̧ja̧ o'katoi'ünä̧ ja̧'wa̧ta̧nü̧ Jordán aje tü'künä̧nü̧ kka̧kuä̧tü̧'i̧nä̧ Ju̧a̧ jiäwa'a ä̧ju̧ku̧ 'chi̧nä̧tü̧,

⁶ juätümä̧, suronä̧ jȩttä̧'i̧jü̧ ji'äu ttikua'anä̧, Ju̧a̧-mä̧, Jordán ajettü bautizo jȩi̧nä̧u̧.

⁷ Ja̧'wa̧nü̧ ja̧'a̧nä̧, rekuätü fariseo wotü'i̧nä̧, saduceo wotü'i̧nä̧, Ju̧a̧ bautizo jȩa̧'a̧ topü ttichäja'a, päinä̧u̧. «¡Ukutumä̧ ä̧ka̧tü̧ isotü wotüjä̧!» ¿Dí jiäwinä̧tu̧kuä̧ku̧ttü̧ usurä ttȩmä̧u̧nä̧ ro̧ȩpä̧kuȩttü̧ tü'ipächü ku̧ji̧pä̧tu̧kua̧ pä'ümä̧?

⁸ Isopäi'ünä̧, surojü käkuädi'ätukuttümä̧, tottünä̧ jȩpü̧ kka̧kuä̧tu̧kui̧,

⁹ Ja̧'wa̧ta̧nü̧ kua̧mü̧nä̧tu̧ku̧mä̧: Ujutumä̧ Abraha̧ i̧tti̧mü̧ isotüjä̧, pä'ümä̧ kuamükuädätukuä; isopäi'ünä̧ pädäu̧jä̧: Dio-mä̧ po'ki ido'kittü'i̧nä̧, Abraha̧ i̧tti̧mü̧rü̧mä̧ rä'epü u̧ju̧nu̧'a̧nü̧ ja̧'a̧.

¹⁰ Ja̧'wa̧ta̧nü̧ i̧da̧pä̧'kȩmä̧, dauwiyä ujukäkänä̧ jo̧mȩnü̧ to̧'ü̧ kku̧nä̧wa̧'a̧ kka̧'a̧, adiwäjuei u̧wä̧ju̧ wȩjo̧kü̧ oi dauwiyä kku̧'u̧ ttikua pä'ü. Ja̧'wa̧nü̧ jü̧ oimä̧ o'kajuiyünä̧tä̧ kku̧'u̧ iku okuränä̧ kku ikuäwä oi ja̧'a̧.

¹¹ Isopäi'ünä̧ ttümä̧, Dio-ku ppa̧kuä̧chä̧tu̧kua̧'a̧ kui̧jȩkuä̧tu̧kua̧ pä'ümä̧ ajiyanä̧tä̧ bautizo jȩpü̧sä̧; ja̧'wa̧nü̧ ja̧'a̧nä̧ ttü cho'komȩnä̧ ichümä̧ Epíritu Sa̧tu̧nä̧'i̧nä̧, okurä jäwänä̧'i̧nä̧ bautizo jȩä̧kua̧. Jua̧u̧mä̧ ttüttü'i̧nä̧ abonä̧nü̧ ujuru kku̧nä̧rü̧, jua̧u̧ ü̧jä̧pü̧ isäya chȩpü̧ juiyü'anü̧'i̧nä̧ wa̧sä̧.

¹² Trigo pojäwäkä u̧mü̧nä̧ 'chu̧'ä̧rü̧ kkü̧, surojä'kua do'opü iku, adiutätä ü'ojo'a pä'ü; u̧kuȩ trigo-mä̧ ka̧ka̧kuo̧ka̧nä̧ ka̧ka̧tü̧ u̧ju̧nä̧kua̧, ja̧'wa̧nü̧ ja̧'a̧nä̧ o'ko'kuamä̧ okurä na̧wi̧po̧karänä̧ kkuwü.

Ju̧a̧-mä̧, Jesú-ru bautizo jȩpi̧nü̧

¹³ Ja̧'wa̧nü̧ jä̧ji̧ o'ka'a Jesú-mä̧, Galirea rȩjȩttü̧ rä'opächäji̧'ka̧, Jordán ajera̧'a̧ku̧, Ju̧a̧ bautizo jȩa̧rü̧ pä'ü, ü̧jo̧mȩku̧ ichinü̧.

¹⁴ Ja̧'wa̧nü̧ ja̧'a̧nä̧ Ju̧a̧-mä̧, jarodünü̧ päinä̧ku̧: —Ukutäjä̧ ttürü bautizo jȩ'ku̧'a̧nü̧ wa̧mä̧, ttürümä̧ wekuäu juiyü'anü̧ wa̧jä̧,

¹⁵ Päomȩnä̧, Jesú-mä̧ ädätinä̧ku̧: —Jitätämä̧ wä̧i̧nä̧ja̧'a̧ Dio weinü̧tä̧ jȩta̧ pä'i. Päomȩnä̧, Ju̧a̧-mä̧ «ye pä'ü esetinä̧ku̧.»

¹⁶ Ja̧'wa̧nü̧ ja̧'a̧ Jesú-mä̧ bautizo jȩä̧ku̧ o̧'ka̧ ajettü u̧wä̧mi̧'i̧'o̧mȩnä̧; mo̧ro̧jä̧ bawekuächa'attü, Dio wȩ'ä̧wa̧ Epíritu Sa̧tu̧, unuku 'kua̧rü̧nä̧ churutä ü̧jä̧mä̧da̧ pä'ü i̧mȩyȩwi̧'a̧'a̧ topinü̧.

¹⁷ Ja̧'wa̧nü̧ päi'omȩnä̧, mo̧ro̧jä̧ra̧'a̧ttü̧ i̧wȩnȩ ji̧yȩtȩ rä̧mi̧pi̧na̧'a̧: «Pidemä̧ chi̧tti̧ rü̧ȩnä̧ rȩni̧'a̧, jua̧u̧ru̧ juiyo eseusä.»