San Mateo 28 - Nuevo Testamento Uwotjüja

Jesú ttoächinü̧ wȩnȩ

¹ Domiku̧ mo̧ro̧ juomȩnä̧, 'kuä'ächi'ü ttü̧'ȩjü̧ mo̧ro̧ 'kuäopäji o'ka'a, María Madarena'i̧nä̧ kkaraju María-ku wa'are ttütäjomȩ topü 'chi̧nä̧tü̧.

² Ttu̧ni̧chä̧ra̧'a̧nä̧ rȩjȩ ttü̧ȩpa̧'a̧ttü̧, Tu̧ru̧wa̧ wȩ'ä̧wa̧ á̧gȩ mo̧ro̧jä̧ra̧'a̧ttü̧ mȩyȩwi̧'ü̧ inä̧yu wa'are rütäwäju mü̧ȩkuäyu pporädü juäyutä wä̧mȩ pä̧mä̧di̧nü̧.

³ Á̧gȩ-mä̧ ku'upä ürowa'a 'kua̧rü̧nä̧ kkä̧dȩpi̧nü̧ ja̧'wa̧ta̧nü̧ ü̧'ka̧tä̧wä̧ta̧mä̧ diyawa'a isoppa jä̧'i̧nü̧'a̧nü̧ teina̧'a̧.

⁴ Su̧ro̧do̧u̧mä̧ jua̧u̧ topü ye'ü ttü̧ttä̧wa̧'a̧ttü̧, 'korujuo'ächätü jä̧'i̧nü̧'a̧nü̧ pä'i'inä̧tü̧.

⁵ Á̧gȩ-mä̧ nä̧tü̧rü̧ pä'inü̧: —Yekuekuätukuä. Wo̧jua̧sä̧ Jesú ü̧jo̧kä̧nü̧ kku̧nu̧ pȩ'o̧pü̧ ttu̧ju̧nä̧jä̧ku̧rü̧ usätüjä̧.

⁶ Pȩnȩmä̧ toa'a päinü̧ta'anü̧ tto'ächäji, ttütäjomȩ topächätukui.

⁷ Jitätä jurunä̧ tätukui, u̧wo̧juȩtä̧u̧rü jikuäwätukua wa'arettü ttoächäji wȩnȩ, ukututä kuä'katukunä̧ Galirea rȩjȩra̧'a̧ 'chü̧, jua'attü to'kuätukuarü, täkü jidäwä̧u̧jä̧.

Jesú nä̧tü̧rü̧ i̧jȩkui̧nü̧ wȩnȩ

⁸ Nä̧tü̧mä̧ wa'are rütäwomȩttü̧ jurunä̧ rä'opächü ye'ükkä̧nü̧, rü̧ȩnä̧ eseunu̧ u̧mü̧wä̧yotürü wȩnȩ ji'äu 'chä̧nü̧ jopinä̧tü̧.

⁹ Ja̧'wa̧nü̧ jotta'a Jesú-mä̧ nä̧tü̧ ttä'ka jo̧mȩ rä'o'ü, Dio-tä tta̧wä̧rä̧tu̧kuä̧ku̧ päinä̧u̧. Juätü nä̧tü̧mä̧ Jesú-ru tü'künä̧nü̧ pä'i'ü ü̧jä̧pü̧nä̧ wa'adi'ü ttiwe'kiyunä̧ pȩjä̧mü̧ esewinä̧tü̧.

¹⁰ Ja̧'wa̧nü̧ ja̧'a̧ Jesú-mä̧ päinä̧u̧: —Yekuekuätukuä chu̧wo̧juȩtä̧u̧rü Galirea rȩjȩra̧'a̧ tti̧'cha̧ ji'äwätukui, jua'attü tottattü.

Su̧ro̧do̧u̧ jittäwinü̧ wȩnȩ

¹¹ Nä̧tü̧ päjätümä̧ ji̧nä̧ tti̧'cha̧'a̧nä̧ su̧ro̧do̧u̧ tta̧'a̧rä̧jä̧tü̧mä̧ ütawiyära̧'a̧ rȩbȩwi̧pi̧nä̧tü̧. Ja̧'wa̧nü̧ rȩbȩwi̧pü̧ sacerdote tturuwotürü o'kajuiyünä̧ 'kuäopäji ji'äwinä̧tü̧.

¹² Ja̧'wa̧nü̧ ji̧ttä̧wä̧u̧ sacerdote wotümä̧, judío-ttü a̧ci̧a̧nu̧ wotümä̧ toku jȩtü̧'a̧nü̧ ja̧ pä'ü ukuoku 'chi̧nä̧tü̧. Ja̧'wa̧nü̧ ukuokuäjä'kotü su̧ro̧do̧u̧ru̧mä̧ pärätä rü̧ȩnä̧ iyinä̧tü̧,

¹³ Juätürümä̧ pä'inä̧tü̧: —Ji̧nä̧ tä'ekua'anä̧ Jesú u̧wo̧juȩtä̧u̧mä̧, yodó ichäjä'kotü o'ko jäwä nä̧u̧kuä̧chä̧jä̧tü̧ päjätü pä'ü jikuäwätukuaja̧ pättinä̧u̧.

¹⁴ Ja̧'wa̧nü̧ ja̧'a̧nä̧ ru̧wa̧, pi̧yȩ u̧wo̧jui̧pü̧ttü̧mä̧, ujutumä̧ esetipünä̧ tu̧kuo̧kuä̧kua̧, ukuturu suronä̧ jȩpä̧jä̧tü̧ pä'ü surojü jȩü̧ juiyünä̧.

¹⁵ Su̧ro̧do̧u̧mä̧ pärätätä ȩmi̧pü̧ pättäjita'anü̧ jȩpi̧nä̧tü̧. Ja̧'wa̧nü̧ ja̧'a̧ttü̧ pi̧yȩmä̧ jitä mo̧ro̧bü päi'ünä̧ judío ttü̧'kȩtȩnä̧mä̧ jittäwä'chü ja̧'a̧.

Jesú u̧wo̧juȩtä̧u̧rü weinü̧ wȩnȩ

¹⁶ Ja̧'wa̧nü̧ ja̧'a̧ttü̧ ttü̧jä̧pü̧ttü̧ ya̧tȩnü̧ wotü u̧wo̧juȩtä̧u̧mä̧ Galirea rȩjȩ mü̧ä̧'kara̧'a̧, Jesú jiäwäjita'anü̧ 'chi̧nä̧tü̧.

¹⁷ Ja̧'wa̧nü̧ tti̧'chä̧ja̧'a̧ Jesú-ru topümä̧ ttiwe'kiyunä̧ pä̧mä̧dü̧ esewinä̧tü̧, yotukunä̧mä̧ ttesetü juiyünä̧ ji̧nä̧u̧, Jesú pä'ümä̧.

¹⁸ Ja̧'wa̧nü̧ ja̧'a̧ Jesú-mä̧ juätürü tü'künä̧nü̧ 'chä̧wi̧'ü̧ pä'inü̧: —Dio-mä̧ mo̧ro̧jä̧nä̧'i̧nä̧, pi̧jä̧nä̧'i̧nä̧ o'kajuiyünä̧ churuwo weda pä'ü iyinä̧ku̧sä̧.

¹⁹ Ja̧'wa̧nü̧ ja̧'a̧ttü̧ pi̧jä̧ o'kajuiyünä̧ 'chä̧nü̧ ttü̧ja̧rü̧ chu̧wo̧juȩtä̧u̧ jü̧nä̧; Jä'o i̧mi̧nä̧, i̧tti̧ i̧mi̧nä̧ ja̧'wa̧ta̧nü̧ Epíritu Sa̧tu̧ i̧mi̧nä̧ bautizo jȩpä̧tu̧kui̧,

²⁰ Ja̧'wa̧ta̧nü̧ o'kajuiyünä̧ ukuturu chu̧wo̧juȩti̧nü̧mä̧ ttukuotünä̧ wo̧juȩtä̧tu̧kui̧, ttümä̧, pi̧jä̧ beipächomȩbü päi'ünä̧ 'kuäopünä̧ mo̧ro̧ ji̧nü̧'a̧kuä̧ ukututäku chü̧jä̧kua̧sä̧.