San Mateo 2 - Nuevo Testamento Uwotjüja

Mo̧ro̧jä̧ jäwä wo̧juä̧tü̧

¹ Herode Rey ru̧wa̧ weü pä̧nä̧, Jesú-mä̧ Berȩ́ ütawiyä, Judea rȩjȩttü̧ uwäpächomȩnä̧, mo̧ro̧jä̧ jäwä wo̧juä̧tü̧, kkä̧wa̧ räopa'akuttü Jerusarȩ́ ütawiyära̧'a̧ rȩbȩä̧kuä̧wi̧nä̧tü̧,

² Juätümä̧, jä'epü ä̧ju̧kui̧nä̧tü̧: —¿Tȩnȩ́ ü̧ja̧'a̧jä̧ttü̧, judío ttu̧ru̧wa̧ Rey uwäpächäjimä̧? Jua̧u̧ uwäpächü siri'ko kkä̧wa̧ räopa'akuttü i̧jȩkua̧'a̧ topäjä'kotü, jua̧u̧ru̧ eseu ichäjätüjä̧.

³ Pi̧yȩ ä̧ju̧ku̧, Ru̧wa̧ Rey Herode-mä̧ rü̧ȩnä̧ ye'ekue'i'inü̧ ja̧'wa̧ta̧nü̧ Jerusarȩ́ ttü̧ja̧'i̧nä̧ o'katoi'ünä̧ ye'inä̧tü̧.

⁴ Ja̧'wa̧nü̧ ji̧yä̧ku̧, Ru̧wa̧ Rey-mä̧, sacerdote wotü tturuwotü o'katoi'ünä̧rü̧ wopo'ü kkä̧nü̧, ttü̧ja̧rü̧ weäwä wȩnȩ wo̧juȩtä̧'i̧jä̧tü̧rü̧'i̧nä̧ wopo'ü, Crito-mä̧ torü uwäpächäkua'a jä̧'i̧ja̧'a̧ ja̧ pä'ü, jä'epü ä̧ju̧kui̧nä̧u̧.

⁵ Ja̧'wa̧nü̧ jä̧ȩpä̧u̧mä̧, ttädätinä̧ku̧: —Berȩ́ ütawiyä, Judea rȩjȩttü̧ pä'ija'a; profeta i̧wȩyu̧ti̧nü̧mä̧ pa̧'a̧nü̧ pä'attü̧:

⁶ «Uku Berȩ́mä̧ rü̧ȩnä̧ ukuo isomȩjä̧ Judá isotü ttidepiyuttumä̧, Ukuttümä̧ u̧wä̧pä̧chä̧kua̧ ttü̧ja̧ ttu̧ru̧wa̧ príncipe pättäku, chumüwäyotü Irae ttü̧ja̧rü̧ juȩpä̧rä̧kua̧.»

⁷ Ja̧'wa̧nü̧ ä̧ju̧ku̧, Herode-mä̧ mo̧ro̧jä̧ jäwä wo̧juä̧tü̧rü̧ yä̧wä̧i̧nä̧ wopo'ü, jä'epü ä̧ju̧kui̧nä̧u̧, siri'komä̧ ti̧yȩnü̧ räopina̧ já̧ pä'ü.

⁸ Jua̧u̧ o'ka'a, Berȩ́ ütawiyära̧'a̧ we'ü iku päinä̧u̧: —Jua'atä tätukui, ji̧'chi̧cha̧wa̧ ütü'kü jä̧'ȩpä̧rü̧ kuä̧ju̧kuä̧tu̧kua̧; ku̧'o̧kui̧'ä̧tu̧mȩnä̧mä̧, ttürü'i̧nä̧ jikuäwätukuattü, ttü'i̧nä̧ chiwe'kiyunä̧ kkä̧mä̧dü̧ chesewäjarü.

⁹ Pä̧u̧, Ru̧wa̧ Rey ukuokua'a ä̧ju̧kui̧'i̧pü̧, rä'opächü 'chi̧nä̧tü̧; tti̧'cho̧mȩnä̧, kkä̧wa̧ räopa'akuttü tottäjäku siri'ko päjimä̧ ttä'kanä̧ i̧'cha̧'a̧ topinä̧tü̧, ja̧'wa̧nü̧ jä̧ja̧'a̧ttü̧mä̧ ji̧'chi̧cha̧wa̧ ü̧jo̧mȩ wä̧mȩ jo̧mȩ wirochi'ü rä̧mä̧di̧nü̧.

¹⁰ Mo̧ro̧jä̧ jäwä wo̧juä̧tü̧mä̧ siri'korü topü rü̧ȩnä̧ eseäkuäwinä̧tü̧.

¹¹ Isodenä̧ dottächi'omȩnä̧, ji̧'chi̧cha̧wa̧ ja̧ju̧ María-ku ü̧ja̧'a̧ topinä̧tü̧; topümä̧ ttiwe'kiyunä̧ pä̧mä̧dü̧ ttu̧ru̧wa̧ jü̧nä̧ ttesewinä̧ku̧; esewäjä'kotümä̧, ttiäre Pärätä ȩko̧ka̧, ba'epo'ü mippoünä̧ ttiyinä̧ku̧ oro'i̧nä̧, incienso'i̧nä̧, mirra'i̧nä̧ jü̧nä̧.

¹² Ja̧'wa̧nü̧ jä̧ji̧ o'ka'a, Dio-mä̧ ttu̧'kuo̧ti̧nä̧ Herode ü̧ja̧'a̧ ppa̧ttä̧chü̧ juiyünä̧ päjä̧u̧, kko̧ro̧mä̧nä̧tä̧ ppa̧'ä̧chü̧ i̧wi̧nä̧tü̧ tti̧rȩjä̧ra̧'a̧mä̧.

Egito-ra̧'a̧ ji̧'chi̧cha̧wa̧rü̧ o'ipächinä̧tü̧

¹³ Juätü tti̧wi̧'i̧'ä̧ji̧ o'ka'a, Tu̧ru̧wa̧ u̧mü̧wä̧ya̧ á̧gȩ, José-rü u̧'kuo̧ti̧nä̧ i̧jȩku̧ pä'inü̧: Ä̧rä̧mi̧'ü̧, ji̧'chi̧cha̧wa̧rü̧ ja̧ju̧tä̧ku̧ ȩmi̧pü̧ Egito-ra̧'a̧ tü'ipächi; Herode-mä̧ ji̧'chi̧cha̧wa̧rü̧ kuä'ü ikua pä'ü u̧sä̧kua̧, jua'atä ku̧ja̧jä̧ jidäwomȩbü päi'ünä̧.

¹⁴ Ja̧'wa̧nü̧ weäjäku ä̧rä̧mi̧'ü̧, José-mä̧ ji̧'chi̧cha̧wa̧rü̧ ja̧ju̧tä̧ku̧ yodó ȩmi̧pü̧ rä'opächinü̧ Egito-ra̧'a̧,

¹⁵ Jua'atätä kku̧nä̧ri̧nü̧ Herode 'korupäi'omȩbü päi'ünä̧. Ja̧'wa̧nü̧ jo̧mȩnä̧, Tu̧ru̧wa̧ profeta-nä̧ ukuokuinü̧ta'anü̧ 'kuäopina̧'a̧, jua̧u̧mä̧ pa̧'a̧nü̧ pä'inü̧: «Egito-ttü chi̧tti̧rü̧mä̧ wopinü̧sä̧.»

Herode ji̧'ki̧cha̧wa̧rü̧ kuä'ü ikua pä'inü̧

¹⁶ Herode-mä̧, mo̧ro̧jä̧ jäwä wo̧juä̧tü̧ ttüyaparewäku wo̧jui̧'ü̧ rü̧ȩnä̧ a̧mi̧ surächi'äku, ppo̧'ä̧tü̧ todäre a̧'ȩ dȩ'a̧'a̧ku̧ wotürümä̧, Berȩ́ ütawiyänä̧ kka̧kuä̧tü̧rü̧'i̧nä̧, jäyänä̧ kka̧kuä̧tü̧rü̧'i̧nä̧ o'katoi'ünä̧rü̧ kuä'äu ttikua pä'ü we'inü̧, mo̧ro̧jä̧ jäwä wo̧juä̧tü̧ jittäwäjittü amükuädü topü.

¹⁷ Ja̧'wa̧nü̧ 'kuäopina̧'a̧ Dio Profeta Jeremía-nä̧ ukuokuinü̧mä̧, jua̧u̧mä̧ pa̧'a̧nü̧ pä'inü̧:

¹⁸ Ramá-ttü̧, rü̧ȩnä̧ rettü ttajuäkuäu rä̧mi̧pi̧na̧'a̧. Juäju ajuäwäjumä̧, Raquel ji̧na̧'a̧, kki̧tti̧mü̧rü̧ rettü, totte'ächäjiyäkua ro̧ȩkuä̧ juiyünä̧tä̧ kkajuäwa'a.

José-mä̧ i̧tti̧ ja̧ju̧ku̧, i̧tti̧ku̧ Nazare-nä̧ kkä̧mä̧di̧nü̧

¹⁹ Herode wa'ü ikuäji o'ka'a, Egito-ra̧'a̧ttü̧ José-rü u̧'kuo̧ti̧nä̧, Tu̧ru̧wa̧ wȩ'ä̧wa̧ á̧gȩ-mä̧ i̧jȩku̧ pä'inü̧:

²⁰ Ä̧rä̧mi̧'ü̧, ji̧'chi̧cha̧wa̧rü̧ ja̧ju̧tä̧ku̧ ȩmi̧pü̧ Irae rȩjȩra̧'a̧ ppa̧'ä̧chi̧, täkü ji̧'chi̧cha̧wa̧rü̧ kuä'ü ttikua pä'inä̧tü̧mä̧ to'e'ächäjätü.

²¹ Ja̧'wa̧nü̧ ji'äwäjäku, José-mä̧ ä̧rä̧mi̧'ü̧ ji̧'chi̧cha̧wa̧rü̧ ja̧ju̧tä̧ku̧ ȩmi̧pü̧ Irae rȩjȩra̧'a̧ ppa̧'ä̧chi̧nü̧.

²² Ja̧'wa̧nü̧ ja̧'a̧nä̧, José-mä̧ judea rȩjȩra̧'a̧mä̧ ye'eku i̧'cha̧ pä'okü pinü̧, Herode i̧tti̧ o̧'ka̧ Arquerao ru̧wa̧ pü̧do pätta'a ä̧ju̧kuä̧ji̧'ka̧; ja̧'wa̧nü̧ ji̧yä̧ku̧, Dio wȩ'ä̧wa̧ á̧gȩ-mä̧ Galirea rȩjȩra̧'a̧tä̧ i̧'cha̧ päinä̧ku̧.

²³ Juä̧jä̧ rȩjȩnä̧ 'chä̧wi̧'ü̧mä̧, Nazare ütawiyänä̧ idepiyu päi'ünä̧ kkä̧mä̧di̧nü̧. Jua'amä̧ profetas pättinü̧ta̧'a̧nü̧ 'kuäopa'attü, pa̧'a̧nü̧ pä'inä̧tü̧: «Jesú-mä̧ nazare ütawiyä ttü̧ja̧sa̧ pä'ü i̧mi̧kuä̧kua̧.»