San Mateo 19 - Nuevo Testamento Uwotjüja

Jesú ttirekuarü ikuikuokü wȩnȩ ji'äwinü̧

¹ Jua̧u̧ pä'ü kä'ädü, Jesú-mä̧ Galirea rȩjȩttü̧ rä'opächü Judea rȩjȩra̧'a̧ku̧ 'chi̧nü̧, Jordán aje ji̧jä̧ku̧nä̧.

² Ja̧'wa̧nü̧ ja̧'a̧ o'ka'anä̧mä̧ ttü̧ja̧ rekuätü tti̧'chä̧ja̧'a̧, jua'attümä̧ na̧nȩpä̧tü̧rü̧ aditü ikuinü̧.

³ Ja̧'wa̧nü̧ ja̧'a̧ fariseo wotüttü yotüte, ü̧jo̧mȩku̧ 'chä̧wi̧'ü̧ ji̧nä̧ ttiweyettü Jesú-ru jä'epü ä̧ju̧kui̧nä̧tü̧: —¿Ya̧tȩ irekuarü jaroi'a pä'ümä̧, kkorojuei jo̧mȩnä̧'i̧nä̧ jaroia'a pä'ü weäwi'ina̧'a̧ tä̧jí̧?

⁴ Pättiyäku Jesú-mä̧ ädätinä̧u̧: —¿Ukutumä̧ wȩyu̧kuä̧ wȩnȩnä̧, ä̧kuo̧mȩnä̧ uborü'i̧nä̧ isajuru'i̧nä̧ uwäbe'inü̧ pä'ijomȩmä̧ topokotü pä'ijätüjä̧ tä̧jí̧?

⁵ Jua̧u̧mä̧ pä'ija'a: Ja̧'wa̧nü̧ ja̧'a̧ttü̧ ubomä̧ jä'ottü'i̧nä̧, ja̧ju̧ttu̧'i̧nä̧ räopä̧chä̧kua̧, irekuaku ppä'ächi'ümä̧. Ja̧'wa̧nü̧ ja̧'a̧ttü̧ juätümä̧ ji̧nä̧ ji̧yȩtȩ ttäkuotü.

⁶ Ja̧'wa̧nü̧ ja̧'a̧ttü̧, täkü ta̧ju̧mä̧ wokotü ttäkuotü pärokua'aku ji̧nä̧ ji̧yȩtȩ jü̧nä̧tä̧ wotü ttäkuotü. Ja̧'wa̧nü̧ ja̧'a̧ttü̧ Dio abetinü̧mä̧ ttü̧ja̧sa̧ 'kȩpa̧ pä'ümä̧ juiya'a.

⁷ Pä̧i̧yä̧u̧, pättinä̧ku̧: —Ja̧'wa̧nü̧ jü̧ttü̧mä̧, ¿Tta̧'a̧nü̧ pä'ü Moisé-mä̧ jaro'kui'ätukua'attü, kuyäru iyü we'ü kuikuätukuajä̧ pä'ü weina̧'a̧jä̧ttü̧?

⁸ Pättäku, päinä̧u̧: —Jua'amä̧, Dio-rü esetü kukuotätukua päkuätuku juiyüta'anü̧ päinä̧u̧jä̧; ja̧'wa̧nü̧ ja̧'a̧nä̧ ä̧kuo̧mȩnä̧mä̧ ja̧'wa̧nü̧mä̧ jo̧ka̧'a̧ ji̧na̧'a̧.

⁹ Ja̧'wa̧nü̧ ja̧'a̧nä̧ ttümä̧ pädäu̧jä̧, kka̧ra̧ku̧ jȩjo̧ka̧'a̧nä̧ irekuarü kuyäru isojä iyü jaropi'ü kkarajuru ȩmü̧ ü̧jü̧ttü̧mä̧, adulterio pättünä̧ kkü̧; ja̧'wa̧ta̧nü̧ kka̧ra̧ jaroi'äkuarü kkü̧'i̧nä̧ adulterio pättünä̧ kkü̧.

¹⁰ Ja̧'wa̧nü̧ päinä̧u̧ u̧wo̧juȩtä̧u̧mä̧ pättinä̧ku̧: —Jua̧u̧nü̧ ubo irekuaku, kkirekuoku jü̧ttü̧mä̧ ttü'käwa pä'ümä̧ juiya'a.

¹¹ Pättiyäku Jesú-mä̧ ädätinä̧u̧: —Ja̧'wa̧nü̧ ja̧'a̧nä̧, pi̧yȩmä̧ o'katoi'ünä̧ ttȩma̧ pä'ümä̧ jo̧kü̧, jitü Dio iyinä̧u̧ru̧tä̧ ttȩma̧ pä'ü jü̧.

¹² Isopäi'ünä̧ kka̧kuä̧tü̧ ttirekuarü ttȩmü̧ juiyünä̧ wotü ttuwäpächinomȩttü̧ päi'ünä̧, ja̧'wa̧ta̧nü̧ pi̧jä̧ ttü̧ja̧ ja̧'wa̧nü̧ ttü̧ja̧ pä'ü jȩttä̧u̧'i̧nä̧ kka̧kuä̧tü̧ ja̧'wa̧ta̧nü̧ Dio weü jäwänä̧ amükuädü ttirekuarü ȩmo̧ko̧tü̧'i̧nä̧ kka̧kuä̧tü̧, pi̧yȩmä̧ jȩü̧'a̧nü̧ wa̧tä̧ jȩü̧.

Jesú ppo̧'ä̧tü̧rü̧ mȩ'ü̧ ukuokuinü̧

¹³ Ja̧'wa̧nü̧ ja̧'a̧ Jesú-mä̧ ppo̧'ä̧tü̧rü̧ ti'chächini̧yä̧ku̧, u̧mü̧nä̧ mȩ'ü̧ Dio-rü ukuokuiyatü pä'ü; ja̧'wa̧nü̧ ja̧'a̧nä̧ u̧wo̧juȩtä̧u̧mä̧ ja̧'wa̧nü̧ i'kächätürü ya̧'o̧kuä̧ri̧nä̧tü̧.

¹⁴ Ja̧'wa̧nü̧ ji̧yä̧ku̧ Jesú-mä̧ pä'inü̧: —Ppo̧'ä̧tü̧rü̧mä̧ wä̧i̧nä̧ ttüku tticha'anä̧ ja̧'a̧tä̧ topätukui, tto̧kuȩpä̧rä̧tu̧kuä̧, isopäi'ünä̧ Dio weomȩ ä̧tȩkuo̧tü̧mä̧, juätütä ja̧'a̧.

¹⁵ Ja̧'wa̧nü̧ ja̧'a̧ juätürü u̧mü̧nä̧ mȩ'äji̧'ka̧, juorümä̧ rä'opächü 'chi̧nü̧.

Pärätä ru̧wa̧ Jesú-ku ukuokuinü̧

¹⁶ Ja̧'wa̧nü̧ ja̧'a̧ ya̧tȩ ichi'ü päinä̧ku̧: —Adiwä i̧sa̧, wo̧juȩkuä̧ i̧sa̧ ¿kkä̧kuä̧wä̧ i'ko chu̧ju̧nä̧ra̧ pä'ümä̧ däje adiwä juei jȩpü̧tä̧ chu̧ju̧nä̧rü̧'a̧nü̧ttü̧?

¹⁷ Päomȩnä̧ Jesú-mä̧ ädätinä̧ku̧: —¿Tta̧'a̧nü̧ pä'ü adiwäjuei i̧sa̧ päkuätukuäkusä̧ttü̧? adiwä i̧sa̧mä̧ ya̧tȩtä̧ ja̧'a̧. Dio-tä. Ja̧'wa̧nü̧ ja̧'a̧nä̧ kkä̧kuä̧wä̧nä̧ dokuächa päkuttümä̧, weäwä wȩnȩ ukuoti.

¹⁸ Päku ädätinä̧ku̧ ¿Ti̧yȩjä̧ttü̧ jua̧u̧mä̧? Päomȩnä̧ Jesú-mä̧, pi̧yȩ jä̧'i̧ja̧'a̧ päinä̧ku̧: —Kuä'ü kuikuä, kuirekua pokojurumä̧ jȩ'kuä̧'chä̧, ku̧nä̧u̧kuä̧rä̧, kkorotü ttütü'kümä̧ kuyaparewä,

¹⁹ Kuä'orü'i̧nä̧ kua̧ju̧ru̧'i̧nä̧ esetü ukuoti ja̧'wa̧ta̧nü̧ kua̧mü̧nä̧ repekuäuta'anü̧ kua̧wa̧ru̧wa̧rü̧'i̧nä̧ repe'i, pä'ija'a.

²⁰ Päiyäku pä'inü̧: —Jua̧u̧ päkumä̧ o'kajuiyünä̧tä̧ jȩchä̧'i̧jü̧ —¿ti̧yȩtä̧jä̧ttü̧ kkoro jȩcho̧kü̧ jä̧'i̧jü̧, ji̧nä̧ juidümä̧?

²¹ Päku Jesú-mä̧ ädätinä̧ku̧: —O'kajuiyünä̧ jo̧mȩnü̧ kua päkuttümä̧, ku̧ju̧nä̧rü̧ kuiäre mikuä pä'ü iyä'chü ikui, usurä isotürü ppäkuäda. Ja̧'wa̧nü̧ jȩ'ku̧ttü̧mä̧, mo̧ro̧jä̧ra̧'a̧ttü̧ rü̧ȩnä̧ mikuäu ku̧ju̧nä̧rä̧kua̧jä̧. Ja̧'wa̧nü̧ jȩpü̧, cho'ka'anä̧ ichi.

²² Ja̧'wa̧nü̧ pä'a ä̧ju̧ku̧, mü̧ä̧ya̧mä̧ a̧'kua̧ tta̧'ȩku̧ kkä̧nü̧ i̧wi̧nü̧, rü̧ȩnä̧ ru̧wa̧ ja̧'a̧.

²³ Ja̧'wa̧nü̧ ji̧yä̧ku̧ Jesú-mä̧ u̧wo̧juȩtä̧u̧rü pä'inü̧: —Isopäi'ünä̧ pädäu̧jä̧ Dio weomȩ pärätä ru̧wa̧ doächa pä'ümä̧, rü̧ȩnä̧ weyekua'a abotä ja̧'a̧.

²⁴ Pä'äjita'anü̧ pädäu̧jä̧, camellu-mä̧ pä̧ra̧ta̧ri̧ isäjunä̧mä̧ 'kuäunä̧tä̧ 'kuä'o'ü ja̧'wa̧nü̧ ja̧'a̧nä̧ pärätä ru̧wa̧ Dio weomȩ doächa pä'ümä̧ rü̧ȩnä̧ weyekua'a.

²⁵ Pi̧yȩ ä̧ju̧ku̧ u̧wo̧juȩtä̧u̧mä̧ rü̧ȩnä̧ amükuädü pä'inä̧tü̧: —Jua̧u̧nu̧mä̧ ¿Dítä jä̧ttü̧, ra̧wä̧pi̧jü̧ttü̧ ü̧ji̧pä̧kua̧mä̧?

²⁶ Pättiyäku, Jesú-mä̧ topünü̧ päinä̧u̧: —Pi̧jä̧ ttü̧ja̧rü̧mä̧ pi̧yȩmä̧ weyeku ja̧'a̧. Ja̧'wa̧nü̧ ja̧'a̧nä̧ Dio-kumä̧ o'kajuiyünä̧tä̧ weyekuoka'a.

²⁷ Päiyäku, Peduru-mä̧ pä'inü̧: —Ujutumä̧ o'kajuiyünä̧ tu̧ju̧nä̧rä̧'i̧jü̧mä̧ kku̧ni̧pü̧ kuo'ka'anä̧ ichinä̧tü̧jä̧. Ja̧'wa̧nü̧ ja̧'a̧mä̧ ¿däjé tȩmä̧kua̧'a̧jä̧ttü̧?

²⁸ Jesú-mä̧ ädätinä̧u̧: —Isopäi'ünä̧ pädäu̧jä̧, ukutu ttü cho'ka'anä̧ ichinä̧tü̧mä̧, ji̧yȩnü̧ o'kajuiyünä̧tä̧ pärowächü mo̧ro̧ päi'omȩnä̧, ubo I̧tti̧mä̧ chutä uruwo dȩä̧kä̧nä̧ ü̧'ä̧mä̧do̧mȩnä̧ ukutu'i̧nä̧ doce-nü̧ jü̧ ruwo dȩä̧ki̧yä̧nä̧, irae ttü̧ja̧ doce-nü̧ wotürü wekuätukua pä'ü ku̧'ȩjä̧mä̧kuo̧tü̧jä̧.

²⁹ Ja̧'wa̧ta̧nü̧ ttü jäwänä̧ o'katoi'ünä̧rü̧, ojusode'i̧nä̧, ü̧jä̧wa̧tü̧rü̧'i̧nä̧, jä'orü'i̧nä̧, ja̧ju̧ru̧'i̧nä̧, i̧tti̧mü̧rü̧'i̧nä̧, ü'ättiyu'i̧nä̧ kku̧ni̧pi̧nü̧mä̧ ciȩnü̧ jo̧mȩttü̧'i̧nä̧ yabonä̧ ȩmü̧kkä̧nü̧, kkä̧kuä̧wä̧ i'ko'i̧nä̧ ȩmä̧kua̧.

³⁰ Ja̧'wa̧nü̧ ja̧'a̧nä̧ rekuätü ä̧kuo̧mȩnä̧ winä̧tü̧mä̧ rüjinä̧ pätti'äkuotü, ja̧'wa̧ta̧nü̧ rüjinä̧ winä̧tü̧mä̧ ä̧kuo̧mȩnä̧ pätti'äkuotü.