San Mateo 16 - Nuevo Testamento Uwotjüja

Jȩtto̧kü̧ juei jȩa̧'a̧ totta pä'ü jä'epinä̧tü̧

¹ Fariseo wotü'i̧nä̧, saduceo wotü'i̧nä̧ Jesú ü̧jo̧mȩku̧ 'chä̧wi̧'ü̧, ji̧nä̧ ttiweyettü jȩtto̧kü̧ juei mo̧ro̧jä̧ jäwä i̧jȩpa̧tü̧ pä'ü jättepinä̧ku̧.

² Jesú-mä̧ ädätinä̧u̧: Ni̧pä̧ro̧mȩku̧ mo̧ro̧jä̧ tuwa'a topümä̧, adiunä̧ ni̧pa̧'a̧kuä̧ pä'ätüjä̧;

³ Ja̧'wa̧ta̧nü̧ yo̧ȩi̧ ja̧'a̧ku̧, mo̧ro̧jä̧ tuwa'a, ajiya isoppa'i̧nä̧ ra̧'a̧ topümä̧ pä'ätüjä̧, jitä mo̧ro̧mä̧ kkä̧rü̧'ko̧wä̧kua̧'a̧, jü̧nä̧. ¡Ä'koyättütä esetäkuäwä isotüjä̧! mo̧ro̧jä̧ jäwämä̧ adiu ku̧wo̧juä̧tu̧kua̧'a̧nä̧ ¿Tta̧'a̧nü̧ pä'ü jitä mo̧ro̧ 'kuäopümä̧ jerupätüjä̧ttü̧?

⁴ Surojü jȩpü̧ ukuotokotü ttü̧ja̧mä̧ jȩtto̧kü̧ jueitä jȩtta̧'a̧ totta pä'ätü; ja̧'wa̧nü̧ ja̧'a̧nä̧ jȩpä̧kuä̧wi̧yo̧ko̧tü̧ ttäkuotü ja̧'wa̧nü̧ ja̧jü̧jueimä̧ Joná-rü̧ 'kuäopinü̧tä̧ jiäkuäwäkuotü. Ja̧'wa̧nü̧ pä'ipütä i̧wi̧'i̧nü̧.

Fariseo wotü ttütü'kü u̧wo̧juȩti̧nü̧ wȩnȩ

⁵ Jesú u̧wo̧juȩtä̧u̧mä̧ rü̧ä̧ dubora ji̧jä̧ku̧nä̧ tti̧rȩbȩwi̧'ä̧ja̧'a̧, trigo ire o̧si̧ u̧ni̧chi'ü ttȩpo̧ka̧'a̧ jä̧jo̧mȩtä̧mä̧,

⁶ Jesú-mä̧ päinä̧u̧: —Fariseo wotürü'i̧nä̧, saduceo wotürü'i̧nä̧ jȩttü̧ levadura pä'ü mikuttü ttu̧'ȩpä̧rä̧kuäu̧nu̧ tta̧'a̧rä̧kuä̧wä̧tu̧kui̧.

⁷ Päomȩnä̧, u̧wo̧juȩtä̧u̧mä̧ pä'äkuäwinä̧tü̧: —Trigo ire o̧si̧ ti'chächoka'a jä̧ji̧yä̧ku̧ pä'ü 'kua̧ra̧'a̧, jü̧nä̧.

⁸ Ttukuokua'a wo̧jui̧'ü̧ Jesú-mä̧, päinä̧u̧: —¿Tta̧'a̧nü̧ pä'ü trigo ire o̧si̧ jui'ätüjä̧ pä'ü kukuokuätukua'ajä̧ttü̧, tta̧'kua̧ wȩnä̧ro̧ko̧tü̧ 'kua̧rü̧nä̧mä̧?

⁹ ¿Ji̧nä̧ wo̧jui̧'o̧ko̧tü̧jä̧ tä̧jí̧, ji̧mü̧tȩ jäwä trigo ire o̧si̧tä̧ jä̧ja̧'a̧ Cinco mil-nü̧ wotü ttukuinü̧mä̧? ¿ja̧'wa̧ta̧nü̧ kka̧kui̧pä̧ji̧ttü̧ rü̧ȩnä̧ o'ta jo̧mȩnä̧ ku̧ka̧ka̧ti̧nä̧tu̧ku̧mä̧?

¹⁰ ¿Ja̧'wa̧ta̧nü̧ trigo ire o̧si̧mä̧ sietenü̧tä̧ jä̧ja̧'a̧nä̧ Cuatro mil-nü̧ jo̧mȩnä̧ ttukuinü̧'i̧nä̧, juȩnȩ o'komȩnä̧ kka̧kui̧pä̧ji̧ttü̧ ku̧ka̧ka̧ti̧nä̧tü̧ku̧'i̧nä̧, ku̧ni̧chi'inä̧tukua'a?

¹¹ ¿Tta̧'a̧nü̧ pä'ü trigo ire o̧si̧ tü'kü ukuokuokü pä'ümä̧, ku̧wo̧jui̧pä̧tu̧ku̧ juiyünä̧ wotüjä̧ttü̧? ¡fariseo wotürü'i̧nä̧, saduceo wotürü'i̧nä̧ ttu̧ju̧nä̧rü̧ levadura-ttümä̧ ttu̧'ȩpä̧rä̧kuä̧u̧ kka̧kuä̧tu̧kui̧ pä'ü pä'äjisä!

¹² Ja̧'wa̧nü̧ pä̧u̧tä̧, Jesú-mä̧ fariseo wotü'inä̧, saduceo wotü'i̧nä̧ wotü ttu̧wo̧juetü̧ttü̧ tta̧'a̧rä̧kuä̧wä̧tu̧kui̧ pä'ü pä'a, pä'ü wo̧jui̧'i̧nä̧tü̧, trigo ire o̧si̧ jäwä levadura tü'kümä̧ päoka'a jä̧ja̧'a̧dä̧ pä'ü.

Peduru-mä̧, Jesú-ru ukumä̧ Crito-jä̧ pä'inü̧

¹³ Jesú-mä̧, Filipo rȩjȩnä̧, cesarea ütawiyänä̧ rȩbȩwi̧pä̧ji̧'ka̧ u̧wo̧juȩtä̧u̧rü jä'epü ä̧ju̧kui̧nü̧: —¿Tta̧'a̧nü̧ pättä'ijä̧ttü̧ ttü̧ja̧mä̧, ttü ubo I̧tti̧ chütü'kümä̧?

¹⁴ Päomȩnä̧ ttädätinä̧ku̧: —Yotukupünä̧mä̧ Ju̧a̧ bautizo jȩä̧kuä̧wä̧ i̧sa̧jä̧do pä'ä'ijätü, kkorotümä̧ Elía-jä̧do, kkorotütä Jeremía-jä̧do, ja̧'wa̧nü̧ jü̧ juiyüttü'i̧nä̧ profeta winä̧tü̧ttü̧ ya̧tȩjä̧do pä'ä'ijätü.

¹⁵ —Pättiyäku, jitürütä päinä̧u̧: Ja̧'wa̧nü̧ ja̧'a̧mä̧ ¿ukuturumä̧, dí cha'ajä̧ttü̧?

¹⁶ Päomȩnä̧, Simón Peduru-mä̧ päinä̧ku̧: —Ukumä̧, Crito-jä̧, a̧'kua̧rü̧ kkä̧ku̧ Dio weinä̧ku̧.

¹⁷ Ädätäku Jesú-mä̧ päinä̧ku̧: —Simón, Joná i̧tti̧ ukumä̧ rü̧ȩnä̧ eseäkuäwä po̧kui̧pü̧jä̧, pi̧yȩ ku̧wo̧juö̧mä̧ ukutä jäwämä̧kü̧ ja̧'a̧, Chä'o Dio mo̧ro̧jä̧nä̧ kkü̧tä̧ jiäwäkujä̧.

¹⁸ Ukuru'i̧nä̧ pärokua'aku pä'üsä: Ukumä̧ Peduru-jä̧, jü̧nä̧, piwä i̧nä̧wänä̧ chiäre igresia-mä̧ cha̧di̧tä̧kua̧sä̧; ja̧'wa̧nü̧ ja̧'a̧ttü̧ wa'are äpatiyämä̧ kkȩdü̧ ikuokü jä̧kuȩ.

¹⁹ Ukurumä̧ mo̧ro̧jä̧ ru̧wa̧ weü bawekuä llawi o̧kä̧ chi̧yä̧kua̧jä̧; pi̧jä̧nä̧ttü̧ uku ku̧nü̧'kümä̧ mo̧ro̧jä̧nä̧ttü̧'i̧nä̧ nü̧'kächi'äkua'a; ja̧'wa̧ta̧nü̧ pi̧jä̧nä̧ttü̧ kuejädümä̧, mo̧ro̧jä̧nä̧ttü̧'i̧nä̧ ejächi'äkua'a.

²⁰ Ja̧'wa̧nü̧ jä̧ji̧ o'ka'a Jesú-mä̧ u̧wo̧juȩtä̧u̧rümä̧ ya̧tȩrü̧'i̧nä̧ jittäu juiyünä̧tä̧ ro̧'ȩpi̧nü̧, jua̧u̧tä̧ jä̧ja̧'a̧ Crito-mä̧ pä'ümä̧.

Jesú-mä̧ to̧ȩ'ä̧chä̧kuȩ wȩnȩ ji'äwinü̧

²¹ Jua̧u̧nu̧tä̧ kkä̧mä̧dü̧ Jesú-mä̧ u̧wo̧juȩtä̧u̧rü ji'äwinü̧ Jerusarȩ́-ra̧'a̧ i̧'cha̧ pä'ü rekuä rü̧jü̧mä̧, jua'attü judío-ttü a̧ci̧a̧nu̧ wotü'i̧nä̧, sacerdote-tü̧ tturuwotü'i̧nä̧ weäwänä̧ usurä ȩmä̧wi̧'ü̧'ka̧, kuä'ü ttiku o'ka'a wäbodäkuä mo̧ro̧ päi'omȩnä̧ ttoächä̧kuȩ wȩnȩmä̧.

²² Ja̧'wa̧nü̧ jiäwäjiyäku Peduru-mä̧, kkoromȩku̧ o'ipächü i̧'chü̧ juiya pä'ü ukuokuinä̧ku̧: —¡Chu̧ru̧wa̧, jua̧u̧ 'kuäopaku pä'ümä̧! ¡Dio-mä̧ pä̧wä̧juiyäkü!

²³ Ja̧'wa̧nü̧ päku, Jesú-mä̧ kkärächi'ü, Peduru-rü pä'inü̧: —¡Ttüttümä̧ 'kȩ'i̧pä̧chi̧, ukumä̧ satanás-jä̧, ttürü tto̧'ȩpä̧rü̧jä̧! pi̧jä̧ ttü̧ja̧ jäwätä topüjä̧, Dio jäwämä̧ topoküjä̧.

²⁴ Jua̧u̧nü̧ o'ka'a, Jesú-mä̧ u̧wo̧juȩtä̧u̧rü pä'inü̧: —Ya̧tȩ cho'ka'anä̧ icha pä'ümä̧, a̧mü̧nä̧ jäwämä̧ u̧ni̧chi'ü, ü̧jo̧kä̧jäi ȩmi̧pü̧tä̧, cho'ka'anä̧ ichi.

²⁵ Isopäi'ünä̧ ya̧tȩ a̧'kua̧rü̧ ü̧ji̧pa̧ pä'ümä̧, toe'ächä̧kua̧ ja̧'wa̧nü̧ ja̧'a̧nä̧ ttü jäwänä̧ a̧'kua̧rü̧ to'e'ächümä̧, a̧'kua̧rü̧ ü̧'o̧kui̧'ä̧kua̧.

²⁶ ¿Däjé ȩmä̧kua̧'a̧jä̧ttü̧, ya̧tȩ pi̧jä̧ ruwäkuiyä o'kajuiyünä̧ ȩma̧ja̧ pä'üdä̧jä̧, a̧'kua̧rü̧ ȩmo̧ko̧mȩnä̧mä̧? ¿Ja̧'wa̧nü̧ jü̧ juiyüttü'i̧nä̧ däjenä̧ i̧mi̧tü'anü̧ttü̧, ttü̧ja̧sa̧ a̧'kua̧rü̧ mikuämä̧?

²⁷ Isopäi'ünä̧ ttü, ubo I̧tti̧mä̧ Chä'o uruwoku'i̧nä̧, á̧gȩrȩ-ku̧'i̧nä̧ chichomȩnä̧ yotukunä̧ jȩtti̧nü̧ mikuämä̧ chi̧yä̧kua̧sä̧, adiu jȩtti̧na̧ja̧ pä'ü'i̧nä̧, suronä̧ jȩtti̧na̧ja̧ pä'ü'i̧nä̧, jü̧nä̧.

²⁸ —Isopäi'ünä̧ pä'üsä ukuturu, pȩnȩ́ kka̧kuä̧tü̧ttü̧ yotütemä̧ ubo I̧tti̧ ruwo we'ü icha'a tottomȩbü päi'ünä̧ wa'ü ttikua pä'ü ttüjü'kokäkuotü.