San Marcos 9 - Nuevo Testamento Uwotjüja

¹ Ja̧'wa̧ta̧nü̧ Jesú-mä̧ päinä̧u̧: —Isopäi'ünä̧ pȩnȩ́ kka̧kuä̧tü̧ yotukunä̧mä̧ wa'ü ttikua pä'ü pättokäkuotü, ru̧wa̧ Dio weümä̧ ujuruku icha'a tottomȩbü päi'ünä̧.

Jesú ü'ärowächi'inü̧ wȩnȩ

² Kko̧ro̧mü̧ttü̧nü̧ ya'ute mo̧ro̧ o'ka'a Jesú-mä̧, Peduru-rü, Sa̧ti̧a̧ku̧rü ja̧'wa̧ta̧nü̧ Ju̧a̧-rü̧'i̧nä̧ mü̧ä̧'ka ju'toju jä'kara̧'a̧ o'ipächü 'chi̧nü̧. Jua'attümä̧ juätü ttä'ka jo̧mȩttü̧ Jesú-mä̧ pärowächi'inü̧.

³ Ja̧'wa̧nü̧ ja̧'a̧ ü̧'ka̧tä̧wä̧ta̧mä̧ kkä̧dȩ'ü̧nä̧ pärowächi'ina̧'a̧, ja̧'wa̧ta̧nü̧ rü̧ä̧nä̧ teünä̧tä̧, rü̧ä̧nä̧ ttütükaja pä'ü'i̧nä̧ tei'okomȩnä̧.

⁴ Ja̧'wa̧nü̧ päi'omȩnä̧, Elía-rü'i̧nä̧ ja̧'wa̧ta̧nü̧ Moisé-rü'i̧nä̧ Jesú-ku ttukuokua'a topinä̧tü̧.

⁵ Peduru-mä̧, Jesú-ru pä'inü̧: —¡Wo̧juȩkuä̧ i̧sa̧, pȩnȩ́ tü̧ja̧ku̧ttü̧mä̧ juiyo adiwa'anü̧ ja̧'a̧! tü̧jä̧kuȩ ode wäbodekuä tadita: uku kuojusode'i̧nä̧, kkorodemä̧ Moisé ü̧jode'i̧nä̧ ja̧'wa̧ta̧nü̧ Elía ü̧jode'i̧nä̧, jü̧nä̧.

⁶ Ja̧'wa̧nü̧ päi'ä̧u̧mä̧, u̧wo̧juȩtä̧u̧mä̧ rü̧ä̧nä̧ ye'inä̧tü̧ ja̧'wa̧nü̧ jä̧ku̧ Peduru-mä̧ ttu̧wȩpä̧ro̧ka̧'a̧tä̧ ukuokuinü̧.

⁷ Ja̧'wa̧ta̧nü̧ juätü ttu̧wä̧mȩ jo̧mȩ kkä̧rü̧'koppa juiächia'attü, rȩmi̧pi̧na̧'a̧ «pidemä̧, ttütä chi̧tti̧ rü̧ä̧nä̧ rȩni̧'a̧: jua̧u̧ru̧ ä̧ju̧kuä̧tu̧kui̧,» jü̧nä̧.

⁸ Jua̧u̧ o'ka'a tottomȩnä̧ ttippeyänä̧mä̧, suro Jesú kkatätä kki̧nü̧, kkorotü päjätürümä̧ topokotü pinä̧tü̧.

⁹ Ja̧'wa̧nü̧ 'kuäopäji o'ka'a, mü̧ä̧'kattü tti̧mȩyȩwo̧mȩnä̧ Jesú-mä̧ tottäji ya̧tȩrü̧'i̧nä̧ jittäu juiyünä̧tä̧ ro̧ȩpi̧nä̧u̧, Chutä, Ubo I̧tti̧ ttoächomȩbü päi'ünä̧.

¹⁰ Ja̧'wa̧nü̧ ja̧'a̧ttü̧ ro̧ȩpä̧ji̧ta̧'a̧nü̧, jitünä̧tä̧ kki̧'i̧pü̧nä̧ ä̧ppü̧ti̧'i̧nä̧tü̧, ttä̧ppü̧ti̧'a̧'a̧nä̧ däjejä̧ttü̧ wa'arettü ttoächäkuäwämä̧ pä'ü jä̧'ȩpä̧rä̧kuä̧wi̧nä̧tü̧.

¹¹ Ja̧'wa̧ta̧nü̧ Jesú-ru jä'epü ä̧ju̧kui̧nä̧tü̧: —¿Tta̧'a̧nü̧ pä'ü wo̧juȩkuä̧ isotümä̧, Elía-mä̧ ä̧kuo̧mȩnä̧ i̧chä̧kua̧ pättä'ijä̧ttü̧?

¹² Jättepäkumä̧, pä'inü̧: —A̧, Elía-mä̧ isopäi'ünä̧tä̧ ä'kanä̧ i̧chä̧kua̧ ja̧'wa̧ta̧nü̧ jua̧u̧tä̧ jä̧kua̧'a̧ o'kajuiyünä̧tä̧ jo̧mȩnü̧ päi'ünä̧ jȩpü̧ u̧ju̧nä̧kua̧mä̧. Ja̧'wa̧ta̧nü̧ wȩyu̧kuä̧ wȩnȩmä̧ pä'a: Ubo I̧tti̧mä̧ usurä ȩmä̧u̧nä̧ jȩttä̧kua̧ kkü'kü jui'ü.

¹³ Ja̧'wa̧nü̧ ja̧'a̧nä̧ ukuturu pä'üsä Elía-mä̧ täkü ichinü̧ ja̧'wa̧nü̧ ichinü̧rü̧mä̧ o'kajuiyünä̧ jȩtta̧ pättinü̧mä̧ jȩtti̧nä̧ku̧ ja̧'wa̧nü̧ 'kuäopäkua'a pä'ü wȩyu̧kuä̧ wȩnȩnä̧ päinü̧ta'anü̧.

Jesú-mä̧, mü̧ä̧ya̧rü̧ epíritu su̧ro̧pa̧ ü̧jä̧ku̧ru̧ aditü ikuinü̧

¹⁴ U̧wo̧juȩtä̧u̧ ttü̧ja̧kuo̧mȩku̧ ppa̧wä̧chi̧'o̧mȩnä̧, weäwä wȩnȩ wo̧juȩkuä̧ isotü ttü̧'kä̧tȩ jo̧mȩ ttü̧ja̧kua̧'a̧ topinü̧ ja̧'wa̧ta̧nü̧ ttü̧ja̧ rekuätü ttü̧ja̧ ttü̧'kä̧tȩ jo̧mȩ juätürü jä̧'ȩpä̧rü̧ pä'ä'chäkuäwinä̧tü̧.

¹⁵ Ttu̧ni̧chä̧ra̧'a̧nä̧ ichi'äu̧, Jesú-ru topo'ü o'katoi'ünä̧ rü̧ȩnä̧ eseäkuäwinä̧tü̧, o'katoi'ünä̧ te'äwo'ü tti̧'chi̧nä̧ku̧.

¹⁶ Jesú-mä̧ juätürü jä'epü ä̧ju̧kui̧nü̧: —¿Ukutumä̧ däje päkuä'chäkuäwätukua'ajä̧ttü̧ juätükumä̧?

¹⁷ Ja̧'wa̧nü̧ päomȩnä̧ juȩnȩ kka̧kuä̧tü̧ttü̧ ya̧tȩ ädätinä̧ku̧: —Wo̧juȩkuä̧ i̧sa̧, epíritu su̧ro̧pa̧ ü̧jä̧ku̧ ukuokuokürü, chi̧tti̧rü̧ pȩnȩ́ chi'chächäjiyäkujä̧.

¹⁸ Jua̧u̧ epíritu su̧ro̧pa̧ jȩo̧mȩnä̧mä̧ 'poächünä̧ jȩä̧'i̧jä̧ku̧, ä'i̧nä̧ tteyu'kuanü̧tä̧, aku norü juei'ünätä̧. Ku̧wo̧juȩtä̧u̧rü rä'epü ttikuiyattü pä'ü wedäja'anä̧, weyekuäjätü.

¹⁹ Ja̧'wa̧nü̧ päku, Jesú-mä̧ ädätinü̧: —¡Tta̧'kua̧ wȩnä̧rä̧kuä̧wä̧ jui'ätü ttü̧ja̧jä̧! ¿Ti̧yȩnü̧bü päi'ünä̧ ukutumä̧ chü̧jä̧kua̧'a̧jä̧ttü̧? ¿Ti̧yȩnü̧bü ukuturumä̧ cha̧mi̧ 'kidächi'äkua'ajä̧ttü̧? poku i'kächirü.

²⁰ Ja̧'wa̧nü̧ pä̧u̧, Jesú ä'ka jo̧mȩ mü̧ä̧ya̧rü̧ tti'kächipomenä̧, epíritu su̧ro̧pa̧mä̧ Jesú-ru topü, mü̧ä̧ya̧rü̧ 'poächünä̧ jȩpi̧nü̧, rȩjȩ borepü ü̧'ü̧nä̧, änä̧'i̧nä̧ tteyuwoppa räopünä̧.

²¹ Jesú-mä̧ jua̧u̧ jä'orü jä'epü ä̧ju̧kui̧nü̧: —¿Pi̧yȩmä̧ ti̧yȩnü̧ kkä̧mä̧dü̧ ji̧nä̧rü̧ttü̧? päomȩnä̧, jä'omä̧, ädätinü̧: —Ji̧'chi̧cha̧wa̧ttü̧tä̧ päi'ünä̧ winü̧.

²² Ja̧'wa̧ta̧nü̧ kkoronü̧mä̧ epíritu su̧ro̧pa̧mä̧ okuränä̧'i̧nä̧, ajiyanä̧'i̧nä̧ kuä'ü ikua pä'ü jȩä̧'i̧jä̧ku̧. Ja̧'wa̧nü̧ ja̧'a̧ttü̧ ji̧yȩtȩ jȩ'kua̧'a̧nü̧ jü̧ttü̧mä̧ ujuturu rȩrü̧jü̧nü̧ topü ppä'äditü.

²³ Ja̧'wa̧nü̧ päku, Jesú-mä̧ pä'inü̧: ¿Dio-rümä̧ kua̧'kua̧ kku̧wȩnä̧rü̧'a̧nü̧ tä̧jí̧? ¡Esetürümä̧, o'kajuiyünä̧tä̧ eseta'aku iso juoa'a!

²⁴ Ja̧'wa̧nü̧ päomȩnä̧, mü̧ä̧ya̧ jä'omä̧, wopi'inü̧: —Esetüsä. ¡Yabonü̧ chesetünä̧ ppä'ädittü! pä'ü.

²⁵ Jesú-mä̧ ttü̧ja̧ rekuätü ma̧ttä̧ma̧'a̧ topü epíritu su̧ro̧pa̧rü̧ ra̧wä̧ri̧pü̧nü̧ pä'inü̧: —epíritu su̧ro̧pa̧mä̧, ukuokuokümä̧, pide mü̧ä̧ya̧ttü̧ rä'opächi, pä'äjita'anü̧mä̧ dokuächärü.

²⁶ Ja̧'wa̧nü̧ päomȩnä̧, epíritu su̧ro̧pa̧mä̧ wopi'ü, mü̧ä̧ya̧mä̧ 'po'ächü juei'ünä̧ jȩpi̧nü̧, räopächomȩnä̧mä̧. Ja̧'wa̧nü̧ päi'omȩnä̧ rekuätü 'korujuo'ächäjikü̧ pä'inä̧tü̧.

²⁷ Ja̧'wa̧nü̧ ja̧'a̧nä̧ Jesú-mä̧, u̧mü̧ttü̧ ȩmo̧po̧'ü̧ äräbe'äku, ä̧rä̧mi̧'i̧nü̧.

²⁸ Jua̧u̧nü̧ o'ka'a Jesú-mä̧ isodenä̧ doächi'omȩnä̧, kkatätä pä'i'äjirü u̧wo̧juȩtä̧u̧mä̧ jä'epü ttä̧ju̧kui̧nä̧ku̧. —¿Tta̧'a̧nü̧ pä'ü ujutumä̧ epíritu su̧ro̧pa̧rü̧mä̧ rä'epü tiku juiyünä̧ jä̧ja̧'a̧kuä̧ttü̧?

²⁹ Pättäku Jesú-mä̧, ädätinä̧u̧: —Jua̧u̧ su̧ro̧pa̧mä̧ ttu̧kuȩ a̧do̧chü̧ Dio-rü ukuokutä rä'epü i̧kuä̧wa̧ ja̧'a̧.

Jesú to̧ȩ'ä̧chä̧kuȩmä̧ todärenä̧ päi'ünä̧ ji'äwinü̧

³⁰ Juorü rättopächomȩnä̧, Galirea ütawiyänä̧ 'kuä'opinä̧tü̧; ja̧'wa̧nü̧ 'kuättopomȩnä̧ Jesú-mä̧ ya̧tȩ'i̧nä̧ u̧wo̧jui̧pa̧rü̧mä̧ pä'okü pinü̧,

³¹ Jua'amä̧ u̧mü̧wä̧yotürü u̧wo̧juȩta̧'a̧ jä̧ku̧, juätürü pä'inü̧: —Ttü, Ubó I̧tti̧mä̧ ttü̧ja̧rü̧ iyü tti̧kuä̧kua̧sä̧, ja̧'wa̧ta̧nü̧ kuä'ü'i̧nä̧ tti̧kuä̧kua̧sä̧; kuä'ü ttikua'anä̧ wäbodäkuä mo̧ro̧ päi'omȩnä̧ tto̧dä̧chä̧kua̧sä̧.

³² Ja̧'wa̧nü̧ jiäwa'anä̧ yoriso wo̧jui̧'o̧ko̧tü̧ pinä̧tü̧; ja̧'wa̧nü̧ jä̧u̧ jättepa pätta'anä̧ ye'ekuinä̧tü̧.

¿Díjä̧ttü̧ ji̧nä̧so ukuo i̧sa̧mä̧?

³³ Ja̧'wa̧nü̧ ja̧'a̧ Cafarnaúm ütawiyära̧'a̧ tti̧'chi̧'ä̧ja̧'a̧ isodenä̧ ttü̧ja̧kua̧'a̧, Jesú-mä̧ ja'epü ä̧ju̧kui̧nä̧u̧: —¿Mä̧nä̧nä̧ ichümä̧ däjé kukuokuäjätukuättü̧?

³⁴ Pä̧u̧mä̧, 'koruchi'inä̧tü̧, ujututtümä̧ dí jä̧kua̧'a̧jä̧ttü̧, ji̧nä̧so ukuo i̧sa̧ jä̧kua̧mä̧ pä'ü ttukuokuäja'a jä̧u̧.

³⁵ Ja̧'wa̧nü̧ jä̧ji̧ o'ka'a, Jesú-mä̧, pä̧mä̧dü̧ ttü̧jä̧pü̧ttü̧ ta̧ju̧nü̧ wotürü, wopo'ü pä'inü̧: —Ya̧tȩ, ukututtü ji̧nä̧so ukuo i̧sa̧ ja̧ päüttümä̧ o'katoi'ünä̧ttü̧ rüjinä̧ i̧sa̧ jä̧kua̧, o'katoi'ünä̧rü̧tä̧ ppädäkuäwä i̧sa̧ jä̧kua̧.

³⁶ Jua̧u̧nü̧ o'ka'a ji̧'ki̧cha̧wa̧rü̧ ttä'ka jo̧mȩ kku̧nu̧, üjonä̧ wa'adi'ü päinä̧u̧:

³⁷ Ya̧tȩ ttü chi̧mi̧nä̧ ji̧'ki̧cha̧wa̧rü̧ ȩmü̧mä̧, ttürü ȩmü̧; ja̧'wa̧ta̧nü̧ ttürü ȩmü̧mä̧, ttürütämä̧ ȩmo̧kü̧, ji̧nä̧somä̧ ttürü we'inü̧rü̧ ȩmü̧.

Ujuturu to'ija̧'a̧ku̧ pä'okümä̧, ujuturu ppä'ädü

³⁸ Ju̧a̧-mä̧ jua̧u̧ru̧ pä'inü̧: —Wo̧juȩkuä̧ i̧sa̧, ya̧tȩrü̧ uku kui̧mi̧nä̧ epíritu suropätürü rä'epü ikuru topäjätüjä̧ ja̧'wa̧nü̧ ja̧'a̧nä̧ ujutuku kueächiyo̧ko̧u̧ jȩü̧ juiyünä̧tä̧ pätäjäku.

³⁹ Ja̧'wa̧nü̧ pättäku Jesú-mä̧ ädätinü̧. —Ya̧kuo̧pä̧rä̧tu̧kuä̧rü̧, isopäi'ünä̧ ttü chi̧mi̧nä̧ jȩtto̧kü̧ juei jȩpi̧'ü̧'ka̧mä̧ ya̧tȩ'i̧nä̧, ttürümä̧ suronä̧mä̧ pä'okü jä̧kua̧.

⁴⁰ Ja̧'wa̧nü̧ ja̧'a̧ttü̧ ujuturu to'ija̧'a̧ku̧ amükuädokümä̧, ujuturu ppä̧'ä̧dä̧rü̧ ja̧'a̧.

⁴¹ Ya̧tȩ, ukuturu i̧so̧'ta̧nä̧, ajiya iyomȩnä̧, Crito isotü kuätukua'attü, isopäi'ünä̧ jua̧u̧mä̧ mikuämä̧ to'e'ächokü jä̧kua̧.

Surojünä̧ ma̧'ä̧chü̧rü̧ ra̧wä̧pi̧ja̧'a̧

⁴² Ya̧tȩ, pitü ppo̧'ä̧tü̧rü̧, ttürü esetätürü suronä̧ jȩä̧kuä̧wä̧nä̧ ma̧ttä̧chü̧nä̧ jȩpü̧rü̧mä̧, molino ido'kiku u̧ru̧pä̧'kȩnä̧ ti̧'ä̧dü̧, rü̧ä̧ duboranä̧ do'opü ttikuttütä adiu'anü̧ ja̧'a̧.

⁴³ Ja̧'wa̧ta̧nü̧ ku̧mü̧ suronä̧ jȩä̧kuä̧wä̧nä̧ ma̧kuä̧chü̧nä̧ jȩü̧ttü̧mä̧ 'kui'oku ikuí; a̧'kua̧rä̧kuä̧wä̧ra̧'a̧ ji̧mü̧tȩ jui̧'a̧ dokuächüttütä adiu'anü̧ ja̧'a̧; ja̧'wa̧nü̧ jü̧ juiyüttümä̧ ku̧mü̧pi̧yä̧ to̧mü̧rȩkue'ü ku̧ju̧nä̧ra̧ja̧ pä'üdä̧jä̧ okurä na̧wi̧pokorära̧'a̧ iku ikuäwäkua̧jä̧.

⁴⁴ [Juȩnȩmä̧ mi̧yü̧'i̧nä̧ 'korupätti'okomȩ ja̧'wa̧ta̧nü̧ okurä'i̧nä̧ yorisotä na̧hui̧po̧ko̧mȩ.]

⁴⁵ Ja̧'wa̧ta̧nü̧ ku̧jä̧pü̧ suronä̧ jȩä̧kuä̧wä̧nä̧ ma̧kuä̧chü̧nä̧ jȩü̧ttü̧mä̧, 'kui'oku ikuí; a̧'kua̧rä̧kuä̧wä̧ra̧'a̧ ji̧'u̧tȩ jui̧'a̧ dokuächüttüttä adiu'anü̧ ja̧'a̧; ja̧'wa̧nü̧ jü̧ juiyüttümä̧ ku̧jä̧pi̧yä̧ to̧'ü̧rȩkuȩ'ü̧ kka̧ja̧ pä'ü'i̧nä̧ okurä na̧wi̧pokorära̧'a̧ do'opü i̧kuä̧wä̧kua̧jä̧.

⁴⁶ [Juȩnȩmä̧ mi̧yü̧'i̧nä̧ 'korupätti'okomȩ ja̧'wa̧ta̧nü̧ okurä'i̧nä̧ yorisotä na̧wi̧po̧mȩ.]

⁴⁷ Ja̧'wa̧ta̧nü̧ kui'äre suronä̧ jȩä̧kuä̧wä̧nä̧ ma̧kuä̧chü̧nä̧ jȩü̧ttü̧mä̧, baroku ikuí; ru̧wa̧ Dio weomȩ kui'äre jiretetä kka̧'a̧nä̧ dokuächüttütä adiu'anü̧ ja̧'a̧; ja̧'wa̧nü̧ jü̧ juiyüttümä̧ kui'äre torerekue'ü kka̧ja̧ pä'ü'i̧nä̧ okurä na̧wi̧pokorära̧'a̧ do'opü i̧kuä̧wä̧kua̧jä̧.

⁴⁸ Mi̧yü̧'i̧nä̧ 'koru jüttächokomȩ ja̧'wa̧ta̧nü̧ okurä'i̧nä̧ na̧wi̧po̧ko̧mȩ.

⁴⁹ Juȩnȩmä̧ o'katoi'ünä̧rü̧ pojopü jȩä̧kuä̧wä̧kua̧'a̧ 'käruwäbünä̧, okurä jȩtta̧jü̧'a̧nü̧.

⁵⁰ 'Käruwäbümä̧ adiu ja̧'a̧, ja̧'wa̧nü̧ ja̧'a̧nä̧ ü̧sa̧di̧ toepächomȩnä̧mä̧, ¿Ukumä̧ toku jȩpü̧tä̧ ü̧nü̧ä̧mä̧ nü̧kuȩpä̧kua̧'a̧jä̧ttü̧? Ja̧'wa̧nü̧ jü̧ta̧'a̧nü̧ sa̧dü̧ kkü̧nä̧ kka̧kuä̧tu̧kui̧: Adiwä juei jȩpü̧tä̧ ja̧'wa̧ta̧nü̧ kkorotüku wȩnȩ juiyünä̧ kka̧kuä̧tu̧kui̧.