San Marcos 7 - Nuevo Testamento Uwotjüja

Ttü̧ja̧rü̧ surojuoepü wȩnȩ

¹ Fariseo wotümä̧, weäwä wȩnȩ wo̧juȩkuä̧ isotü Jerusarȩ́-ra̧'a̧ttü̧ ichäjätüku, Jesú ü̧jo̧mȩku̧ ichi'inä̧tü̧.

² Ichi'opo'ü, pitümä̧, Jesú u̧wo̧juȩtä̧u̧ yotukunä̧ ttu̧mü̧ idikua'anä̧ ttu̧kui̧yä̧u̧, jua'amä̧ ttütükäwoka'a jä̧ji̧yä̧u̧ topü suronä̧ pättinä̧u̧.

³ Jua'amä̧ fariseo wotümä̧ ja̧'wa̧ta̧nü̧ judío o'katoi'ünä̧tä̧ ttü̧tä̧mü̧mi̧nä̧ jȩtti̧nü̧'a̧kuä̧, ttu̧mü̧ ttütükäwoka'amä̧ kuokotü ja̧'a̧ttü̧ ji̧na̧'a̧.

⁴ Ja̧'wa̧ta̧nü̧, ttu̧kuȩ ȩmä̧wo̧mȩttü̧ ȩmü̧ 'chi̧'ü̧'kotü ppa̧ttä̧cho̧mȩnä̧mä̧, ttu̧mü̧ ttütükäwoka'amä̧ kuokotü pinä̧tü̧. Suro jua̧u̧tä̧mä̧kü̧ kkoro'i̧nä̧ jȩpi̧nä̧tü̧; vaso o̧'ta̧wi̧yä̧'i̧nä̧, 'kä̧nä̧ri o̧yu̧'i̧nä̧, kuoräu o̧'ta̧wi̧yä̧'i̧nä̧, camiyü̧'i̧nä̧ tükü iku kku̧ni̧pü̧tä̧ ttukuä'ija'a jä̧u̧.

⁵ Fariseo wotümä̧ ja̧'wa̧ta̧nü̧ weäwä wȩnȩ wo̧juȩkuä̧ isotümä̧ jä'epü ttä̧ju̧kuä̧ku̧: —¿Tta̧'a̧nü̧ pä'ü uku ku̧wo̧juȩtä̧u̧mä̧ ujutu tü̧tä̧mü̧mi̧nä̧ jȩtti̧nü̧'a̧kuä̧mä̧ jȩtto̧ka̧'a̧ ttu̧mü̧ idikua'anä̧ kuätüjä̧ttü̧?

⁶ Jesú-mä̧ ädätinä̧u̧: —Ä'koyättütä esetätüjä̧, ja̧'wa̧nü̧ ji̧yä̧ku̧ profeta Isaía-mä̧, wȩyu̧ti̧nü̧: Pitü ttü̧ja̧mä̧ ttättütä tteseta'anä̧, tta̧mi̧ iso'kinä̧mä̧ ttüttümä̧ otó wotü.

⁷ Yaparetätä ttürü ukuotätü 'kua̧rü̧nä̧ kuesewätukuäkusä, ttü̧ja̧ weäwätä kkä̧kuä̧wä̧ wȩnȩ 'kua̧rü̧nä̧ ku̧wo̧juȩtä̧tu̧kua̧'a̧mä̧.

⁸ Ukutumä̧, Dio weäwä wȩnȩmä̧ kä'ädi'ü, pärokuä pi̧jä̧ ttü̧ja̧ weäwätä ukuotätüjä̧.

⁹ Ja̧'wa̧ta̧nü̧ päinä̧u̧. —Ku̧tä̧mü̧mi̧nä̧ jȩpü̧ ttü̧ji̧nü̧nä̧tä̧ juiyo adiu ukuotü jȩpä̧tü̧jä̧, Dio weinü̧mä̧ ukuotü jȩ'kuä̧tu̧kuo̧ka̧'a̧nä̧.

¹⁰ Isopäi'ünä̧, Moisé-mä̧ pä'inü̧: «Kuä'orü'i̧nä̧, kua̧ju̧ru̧'i̧nä̧ ukuotü esewi» ja̧'wa̧ta̧nü̧ «jä'orü'i̧nä̧, ja̧ju̧ru̧'i̧nä̧ ukuotü esewokürümä̧ wa'ü ikua pä'ütä pä̧wi̧'ä̧kua̧.»

¹¹ Ja̧'wa̧nü̧ ja̧'a̧nä̧ ukutumä̧ pä'ätüjä̧: Ya̧tȩ jä'orü jü̧ttü̧'i̧nä̧, ja̧ju̧ru̧ jü̧ttü̧'i̧nä̧ päü'anü̧ ja̧'a̧: Ppädädü juiyü'anü̧ wa̧jä̧, suro o'kajuiyünä̧ chu̧ju̧nä̧rü̧mä̧ Corbán-tä ja̧'a̧ttü̧, (jua̧u̧mä̧ Dio-rü iyäwä pä'ü päwä).

¹² Ja̧'wa̧nü̧ pä'ü ukutumä̧ wo̧juȩtä̧tü̧jä̧, ttä'orü ja̧ pä'üdä̧jä̧, tta̧ju̧ru̧ ja̧ pä'üdä̧jä̧ täkü ppäkuädätukua pä'ümä̧ juiya'a: «Täkü tiya pätäjimä̧ o'kajuiyünä̧tä̧ Dio-rü chiyä̧kuȩtä̧ ja̧'a̧» pättünä̧.

¹³ Ja̧'wa̧nü̧ jȩpü̧ Dio i̧wȩnȩmä̧ si'epü ikuätüjä̧ ku̧tä̧mü̧mi̧nä̧tu̧ku̧ jäwätä wo̧juȩtü̧. Kkoro'i̧nä̧ pi̧yȩ jü̧ta̧'a̧nü̧tä̧ wo̧juȩtä̧tü̧jä̧.

¹⁴ Jua̧u̧nü̧ o'ka'a, Jesú-mä̧, ttü̧ja̧rü̧ wopo'ü pä'inü̧: —O'katoi'ünä̧ ku̧wo̧jui̧pä̧tu̧ku̧nä̧ adiu ä̧ju̧kuä̧tu̧kui̧.

¹⁵ Ji̧yȩtȩ'i̧nä̧ juiya'a u̧mi̧nä̧ttü̧ doächüttü ttü̧ja̧sa̧rü̧ surojuoepümä̧ ja̧'wa̧nü̧ ja̧'a̧nä̧ a̧mi̧ iso'kittü räopütä ja̧'a̧ surojuoepümä̧.

¹⁶ [Ukutu ä̧ju̧kuä̧tü̧mä̧, adiu ä̧ju̧kuä̧tu̧kui̧.]

¹⁷ Ttü̧ja̧ttü̧ rekuätüttü 'kȩ'i̧pä̧chä̧ji̧'ka̧ isodenä̧ doächi'omȩnä̧, u̧wo̧juȩtä̧u̧mä̧ u̧wo̧juȩtä̧ji̧ tü'kü jä'epü ttä̧ju̧kui̧nä̧ku̧.

¹⁸ Juätürü pä'inü̧: —¿Ja̧'wa̧ta̧nü̧ ukutu'i̧nä̧ yoriso wo̧jui̧'o̧ko̧tü̧jä̧ tä̧jí̧? O'kajuiyünä̧ wä̧mȩttü̧ ttü̧ja̧sa̧rü̧ doächümä̧, jua̧u̧ru̧ surojuepokü pä'ümä̧

¹⁹ Jua'amä̧, tta̧mi̧ iso'kira̧'a̧mä̧ doächokü pärokua'aku ttü'käbiyura̧'a̧tä̧ 'kuä'o'i'ü rejura̧'a̧tä̧ räopächü pä'inü̧. Pi̧yȩ pä'ümä̧, o'kajuiyünä̧ ttukumä̧ surojuoepokü jä̧kuȩ pä'ü, pä'inü̧.

²⁰ Ja̧'wa̧ta̧nü̧ pä'inü̧: —Ttü̧ja̧sa̧ttü̧ räopütä ja̧'a̧ churutä surojuoepümä̧,

²¹ Jua'amä̧, ttü̧ja̧ tta̧mi̧ iso'kittütä räopa'a suronä̧ amükuädäkuäwämä̧, nä̧tü̧ku̧'i̧nä̧, u̧mä̧tu̧ku̧'i̧nä̧ jȩä̧'chä̧kuä̧wä̧mä̧, nä̧u̧kuä̧rä̧kuä̧wä̧mä̧, ttü̧ja̧rü̧ kuä'ü ikuäwämä̧,

²² o'kajuiyünä̧ ttu̧ju̧nä̧ra̧ pä'ü kkü'käwämä̧, yapareäkuäwämä̧, tta̧mü̧nä̧ ukuo teäkuäwämä̧ ja̧'wa̧ta̧nü̧ wo̧juȩku̧nä̧ amükuädäkuäwokümä̧.

²³ O'kajuiyünä̧ pi̧yȩ surojümä̧, jakuänä̧ttü̧tä̧ räopü, jua̧u̧tä̧ ja̧'a̧ ttü̧ja̧sa̧rü̧ surojuoepümä̧.

Judío isaju pokoju kka̧'kua̧ wȩnä̧ri̧nä̧ju̧

²⁴ Jesú-mä̧, juorü rä'opächü Tiro rȩjȩra̧'a̧ku̧, 'chi̧nü̧. I̧'chi̧'o̧mȩnä̧ isodenä̧ do'ächi'omȩnä̧, ttü̧ja̧ ttu̧wo̧jua̧rü̧ pä'okü pinü̧ ja̧'wa̧nü̧ ja̧'a̧nä̧ udajui'ü juiyünä̧ ji̧nä̧ku̧.

²⁵ Jua̧u̧ ütü'kü yotäku ä̧ju̧kuo̧po̧'ü̧, epíritu su̧ro̧pa̧rü̧ kku̧nä̧rä̧ju̧ mü̧ä̧yaju Kka̧ju̧mä̧, Jesú ü̧jo̧mȩku̧ ichi'ü kkiwe'kiyunä̧ kkä̧mä̧di̧nä̧jü̧.

²⁶ Juajumä̧, Judío isaju pinä̧ju̧, ji̧nä̧somä̧ Sirofenicia isotü isaju ja̧'wa̧nü̧ ja̧'a̧ttü̧ epíritu su̧ro̧pa̧, kkittijuttü rä'epü ikuiyajü pä'ü Jesú-ru 'chä̧wi̧'ü̧ ajawäkuäwinä̧jü̧.

²⁷ Ja̧'wa̧nü̧ kkajakuäwäku Jesú-mä̧ päinä̧kua̧: —Ä̧kuo̧mȩnä̧ i̧tti̧mü̧rü̧ suttädi'ünä̧ ttukua'anä̧ ja̧'a̧tä̧ topi. Isopäi'ünä̧ adiwoka'a i̧tti̧mü̧ ttu̧kuȩ 'cho'ipü, ä̧wi̧ri̧tü̧rü̧ iyäwänä̧mä̧.

²⁸ Päkuamä̧, kkädätinä̧ku̧: —Iweye ja̧'wa̧nü̧tä̧ ja̧'a̧nä̧ Chu̧ru̧wa̧ ja̧'wa̧nü̧ ja̧'a̧nä̧ ä̧wi̧ri̧tü̧'i̧nä̧ i̧tti̧mü̧ ttukuomȩnä̧ mesa isodä dȩa̧'a̧nä̧ ma̧ä̧chü̧ttü̧ kuätü.

²⁹ Päjiyäku Jesú-mä̧ pä'inü̧: —Ja̧'wa̧nü̧ päkua'attü̧ täkü täi, epíritu su̧ro̧pa̧mä̧ täkü kuittijüttümä̧ rä'opächäji.

³⁰ Kkojusodera̧'a̧ kki̧'chi̧'o̧mȩnä̧ ji'kichawajurumä̧ epíritu suropäjimä̧ räopächäkuatä cama-nä̧mä̧ kkü̧'a̧'a̧ topinä̧ju̧.

I̧wȩnȩ tta̧tta̧pü̧kkä̧nü̧ jä̧ri̧yä̧wa̧rü̧, Jesú-mä̧ aditü ikuinü̧

³¹ Jesú-mä̧, pä'äji jä̧ji̧ta̧'a̧nü̧ Tiro rȩjȩttü̧ rä'opächü Sidón ütawiyänä̧ 'kuä'o'ü Galirea rü̧ä̧ duboranä̧ rȩbȩwi̧pi̧nü̧, Decápoli rȩjȩnä̧ 'kuä'opünü̧.

³² Juorümä̧ i̧wȩnȩ tta̧tta̧pü̧ ukuokuokü, jä̧ri̧yä̧wa̧rü̧ i'chächipü, jua̧u̧ru̧ u̧mü̧ mȩi̧ya̧tü̧ pä'ü jättepinä̧ku̧.

³³ Ja̧'wa̧nü̧ ja̧'a̧, Jesú-mä̧, ttü̧ja̧ttü̧ 'kȩ'i̧pä̧chü̧ kkara'aku jua̧u̧ru̧ ȩmi̧pü̧ ä̧ja̧ isäjunä̧ üdo'chenä̧ rä'ädükkä̧nü̧, ä soya su'opo'ü i̧nȩnä̧'i̧nä̧ jȩpi̧nü̧.

³⁴ Jua̧u̧ o'komȩnä̧ mo̧ro̧jä̧ku̧ topünü̧, rü̧ȩnä̧ juäpü pä'inü̧: «¡Efatá!» jua̧u̧mä̧, («¡ba'ekuächi!» pä'ü pä'inü̧).

³⁵ Ja̧'wa̧nü̧ päomȩnä̧ yotäku ä̧ja̧ isäjumä̧ bawekuächinä̧ku̧, i̧nȩ'i̧nä̧ ejächi'inä̧ku̧ adiu ukuokunä̧tä̧.

³⁶ Aditü kä'ädü, Jesú-mä̧, ya̧tȩrü̧'i̧nä̧ jittäu juiyü̧nä̧tä̧ weinä̧u̧; ro̧'ȩpü̧ wea'anä̧ yabonü̧tä̧ jittäwini̧yä̧ku̧.

³⁷ Isoo pä'ü kkä̧nü̧ pä'inä̧tü̧; o'kajuiyünä̧tä̧ adiu jȩpü̧, ä̧ju̧kuo̧ko̧tü̧rü̧'i̧nä̧ ttä̧ju̧ku̧nä̧tä̧ ja̧'wa̧ta̧nü̧ tti̧wȩnȩ jui'ätürü'i̧nä̧ ttukuokunä̧tä̧ jȩa̧'a̧ttü̧, pä'inä̧tü̧.