San Marcos 5 - Nuevo Testamento Uwotjüja

Gadara rȩjȩ ttü̧ja̧sa̧rü̧ epíritu-tu̧ suropätü kka̧kui̧nä̧tü̧

¹ Rü̧ä̧ dubora ji̧jȩnä̧, Gerasa ttü̧ja̧ tti̧rȩjä̧nä̧ tti̧rȩbȩwi̧'ä̧ja̧'a̧.

² Jesú-mä̧ woi'kattü u̧wä̧mi̧'i̧'o̧mȩnä̧, ya̧tȩ epíritu su̧ro̧pa̧ ü̧jä̧ku̧, wa'are ikuäwä idoriyättü rä'o'ü ichi'inä̧ku̧.

³ Jua̧u̧mä̧ wa'are idoriyänä̧tä̧ ojusode jü̧nä̧ kki̧nü̧. Ya̧tȩ'i̧nä̧ ti̧ttä̧dü̧ juiyünä̧ winü̧, kä̧rȩnä̧sa̧nä̧ ti̧ttä̧do̧mȩnä̧'i̧nä̧ ttiweyekunä̧tä̧.

⁴ Ja̧'wa̧ta̧nü̧, kko̧ro̧nü̧ jü̧ta̧'a̧nü̧ kuoräu isobünä̧, kuoräu i̧sä̧sa̧nä̧, ü̧jä̧pü̧nä̧'i̧nä̧, u̧mü̧nä̧'i̧nä̧ ti̧ttä̧dä̧'cho̧mȩnä̧ jua̧ro̧kuä̧rü̧ ikuä'ija'a ji̧na̧'a̧, ya̧tȩ'i̧nä̧ 'chuädü juiyünä̧tä̧.

⁵ Jua̧u̧mä̧, mo̧ro̧'i̧nä̧, yodo'i̧nä̧ 'kuäo'ünä̧tä̧ müä'kiyunä̧'i̧nä̧, wa'are wattomȩ'i̧nä̧ wopü kue'ächinü̧, ido o'kinä̧ a̧mü̧nä̧ pa̧ja̧tü̧ saräkuäu kkä̧nü̧.

⁶ Ja̧'wa̧nü̧ wä'ijümä̧, Jesú-ru topo'ü, pä̧i̧ku̧nä̧ jopipünü̧ ichi'ü, Jesú ä'ka jo̧mȩ iwe'kiyunä̧, kkä̧mä̧dü̧,

⁷ wopi'ünü̧ pä'inü̧: —¡Mȩkuo̧pä̧rä̧ttü̧, Dio, mo̧ro̧jä̧ Ru̧wa̧ I̧tti̧, Jesú-mä̧, usurä chȩmä̧u̧nä̧mä̧ jȩ'kuä̧ttü̧, Dio i̧mi̧nä̧ jädepäkujä̧!,

⁸ ¡epíritu su̧ro̧pa̧, jua̧u̧ttü̧mä̧ rä'opächi pä'ü!, Jesú weäku: —woina̧'a̧ jua'amä̧.

⁹ Jesú, jäepinä̧ku̧: —¿Toku mi̧kua̧jä̧ttü̧? —Päkumä̧, ädätinü̧: —Chi̧mi̧mä̧, Legión pä'ü mi̧kua̧sä̧. Jua'amä̧ rekuätü ta'attü̧.

¹⁰ Ja̧'wa̧nü̧ ja̧'a̧mä̧, Jesú-ru rü̧ȩnä̧ ajuäkuäwinü̧, juä̧jä̧ rȩjȩttü̧ rä'epü iku juiyarü pä'ü.

¹¹ Ja̧'wa̧nü̧ ja̧'a̧nä̧ juorü tü'künä̧nü̧, mü̧ä̧'ka jäyä ku̧chi̧tü̧ rekuätü ttu̧kuȩ kuä̧nü̧ kka̧kui̧nä̧tü̧.

¹² Ja̧'wa̧nü̧ ja̧'a̧ epíritu-tu̧ suropätümä̧, ajuäkuäunü̧, —¡ku̧chi̧tü̧nä̧tä̧ dotächünä̧ we'itü, pä'ü jä̧ttȩpä̧ri̧nä̧ku̧!.

¹³ Jättepäku, A̧ tätukui pä'ü weinä̧u̧. Weomȩnä̧, epíritu-tu̧ suropätümä̧ jua̧u̧ ttü̧ja̧sa̧ttü̧ rä'opächü ku̧chi̧tü̧nä̧ dodepächinä̧tü̧. Ja̧'wa̧nü̧ pä̧i̧'ä̧u̧, juätü ku̧chi̧tü̧ jisate isotümä̧, idose dȩa̧'a̧ku̧ ma̧'ä̧chü̧, rü̧ä̧ duboranä̧ a̧'ä̧kuä̧u̧ ikuinä̧tü̧.

¹⁴ Ja̧'wa̧nü̧ päi'omȩnä̧, ku̧chi̧tü̧rü̧ tta̧'a̧rä̧jä̧tü̧mä̧, juorü tü'ipächü ppo̧ü̧ ütawiyära̧'a̧ kka̧kuä̧tü̧rü̧'i̧nä̧ ja̧'wa̧ta̧nü̧ rü̧ö̧ ütawiyänä̧ kka̧kuä̧tü̧rü̧'i̧nä̧ ji'äwä'chinä̧tü̧ jua̧u̧ 'kuäopäji tü'kümä̧. Ja̧'wa̧nü̧ jittäwiyä̧u̧, däjé 'kuäopäja'a ja̧ pä'ü topü 'chi̧nä̧tü̧, ttü̧ja̧mä̧.

¹⁵ Jesú ü̧jo̧mȩ tti̧'chi̧'o̧mȩnä̧. Jua̧u̧, epíritu-tu̧ suropätü ttü̧jä̧'i̧jä̧ku̧ päjimä̧, ü̧'ka̧tä̧wä̧ta̧ 'ka̧tü̧ rütäwa'a, adiwächäjitä ü̧'a̧'a̧ topü, ttü̧ja̧mä̧ rü̧ȩnä̧ ye'inä̧tü̧.

¹⁶ Ja̧'wa̧nü̧ ja̧'a̧, jua̧u̧ epíritu-tu̧ suropätü ttü̧ja̧kuä̧'i̧jä̧ku̧ru̧ 'kuäopäji ji'äu kkä̧nü̧ ja̧'wa̧ta̧nü̧ ku̧chi̧tü̧rü̧ 'kuäopäji'i̧nä̧, topäjätümä̧ kkorotürü ji'äwinä̧tü̧.

¹⁷ Ja̧'wa̧nü̧ jȩä̧ji̧yä̧u̧, Jesú-rumä̧, tti̧rȩjä̧ttü̧ räopächa pä'ü, esekutä we'ü ttikuinä̧ku̧.

¹⁸ Pä'äjita'anü̧, Jesú-mä̧ woi'kara̧'a̧ ichi'omȩnä̧, epíritu-tu̧ suropätü ttü̧jä̧jä̧ku̧ päjimä̧, chutäku kueächa pä'ü ajuäkuäunü̧ jä̧ȩpä̧ri̧nä̧ku̧.

¹⁹ Ja̧'wa̧nü̧ ajuäkuäwa'anä̧, Jesú-mä̧ o'ipü jui'ü, päinä̧ku̧: —Kuojusodera̧'a̧, kuawaruwärütä jikuäwa ppa̧'ä̧chi̧. Ku̧ru̧wa̧, ukuru rü̧ȩnä̧ jü̧ ppädäji ji'äu kkä̧nü̧, rȩrü̧jü̧ toäji'i̧nä̧ jikuäwäkua'anü̧.

²⁰ Ja̧'wa̧nü̧ jä̧ji̧ o'ka'a, jua̧u̧mä̧, Decápoli rȩjȩnä̧ Jesú ppädäji tü'kü ji'äu kue'ächinü̧. Ja̧'wa̧nü̧ jiäwomȩnä̧, ttü̧ja̧mä̧, ¡Isoo pä'ü, eseäkuäwinä̧tü̧!

Na̧'ä̧chä̧ju̧ru̧'i̧nä̧, Jairo ittijuru'i̧nä̧ aditü ikuinü̧

²¹ Pä'äjita'anü̧, Jesú-mä̧, woi'kanä̧ kkäwächü rü̧ä̧ dubora ji̧jä̧ku̧nä̧ i̧rȩbȩwi̧'ä̧ja̧'a̧ ttü̧ja̧ rü̧ȩnä̧ ttü̧ka̧ka̧kuä̧ji̧yä̧ku̧, juȩnȩ jäyoranä̧tä̧ kki̧nü̧.

²² Ja̧'wa̧nü̧ ü̧ja̧'a̧, ya̧tȩ, sinagoga u̧ru̧wa̧, Jairo pä'ü mi̧kua̧ ichi'inü̧. Jua̧u̧mä̧ Jesú-ru topo'ü, ü̧jä̧pü̧ jo̧mȩ iwe'kiyunä̧ pä̧mä̧dü̧,

²³ rü̧ȩnä̧ ajuäkuäwinü̧: —Chittiju täkü 'korupäji'omȩtä̧ ji̧yä̧ku̧sä̧; ku̧mü̧nä̧, mȩ'ä̧chi̧yi̧ttü̧, a̧'kua̧ttü̧ juo'ü kka̧'kua̧ri̧'i̧ya̧ttü̧.

²⁴ Pä'ü ajuäkuäwäku, Jesú-mä̧ jua̧u̧tä̧ku̧ i̧'cha̧'a̧ ttü̧ja̧ rekuätü, ppi̧ttä̧chä̧rü̧nä̧tä̧ päi'ünä̧ 'chi̧nä̧tü̧.

²⁵ Ja̧'wa̧nü̧ tti̧'cho̧mȩ 'kä̧tȩnä̧, Yajute ttü̧jä̧pü̧ttü̧nü̧ todäre a̧'ȩ jo̧mȩnä̧ ppü'ottü usurä ȩmä̧wä̧'i̧jä̧ju̧'i̧nä̧ 'chi̧nä̧ju̧.

²⁶ Jawapü adikuä isotürü wȩjä̧rä̧kuä̧wa̧'a̧nä̧'i̧nä̧, yabokutä usurä ȩmä̧wi̧nä̧ju̧, kkiäre pärätä kku̧ju̧nä̧rü̧ o'kajuiyünä̧ bejekua'anä̧ kku̧mä̧richeimä̧ yabokutä juoächinä̧kua̧.

²⁷ Jesú ütü'kü ttukuokua'a ä̧ju̧kui̧pü̧, aboja̧'a̧ku̧nä̧, ttü̧ja̧ ttü̧'kä̧tȩnä̧ 'chä̧wi̧'ü̧ ü̧'ka̧tä̧wä̧ta̧nä̧ mȩ'i̧nä̧ju̧.

²⁸ Jua'amä̧, kka̧'kua̧nä̧ «Suro, ü̧'ka̧tä̧wä̧ta̧nä̧tä̧ mȩdü̧ttü̧'i̧nä̧ chü̧'i̧pä̧kua̧ju̧sä̧» pä'ü, kka̧mü̧kuäda'attü̧.

²⁹ Ja̧'wa̧nü̧ mȩjo̧mȩnä̧, yotäku, kkukuojamä̧ ojuchi'inä̧kua̧. Ojuchi'omȩnä̧, na̧jä̧chä̧ji̧ttü̧mä̧, kkidepä a̧'kua̧ttü̧ päia'a wo̧jui̧'i̧nä̧ju̧.

³⁰ Jesú-mä̧, chutättü ujuru räopächäjäku wo̧juä̧u̧, ttü̧ja̧rü̧ kkärächi'ü pä'inü̧: —¿Chü̧'ka̧tä̧wä̧ta̧nä̧mä̧, dí mȩä̧jä̧ttü̧ttü̧?

³¹ Päomȩnä̧, u̧wo̧juȩtä̧u̧mä̧ pättinä̧ku̧: —Ttü̧ja̧ rü̧ȩnä̧, ppi̧kuä̧chä̧rü̧nä̧, o'katoi'ünä̧ jȩtta̧'a̧mä̧ ¿Toku pä'ü, Dí mȩä̧jä̧ttü̧ttü̧ päkua'ajä̧ttü̧?

³² Ja̧'wa̧nü̧ pätta'anä̧, Jesú-mä̧, yabokutä ippeyänä̧ kka̧kuä̧tü̧rü̧, dí mȩä̧ja̧rü̧ já̧ pä'ü topä'chinü̧.

³³ Ja̧'wa̧nü̧ ji̧yä̧kua̧ na̧'ä̧chä̧jä̧ju̧mä̧ rü̧ȩnä̧ ye'ü tti̧'ä̧u̧ kkä̧nü̧, jua̧u̧ 'kuäopäjimä̧ kku̧wo̧jua̧'a̧ttü̧ 'chä̧wi̧'ü̧, jua̧u̧ ä'ka jo̧mȩ kkiwe'kiyunä̧ pä̧mä̧dü̧ o'kajuiyünä̧ jueünä̧ jijäwinä̧ku̧.

³⁴ Ja̧'wa̧nü̧ jijäwäku, Jesú-mä̧, päinä̧kua̧: —Chittiju, kua̧'kua̧ ku̧wȩnä̧ra̧'a̧ttü̧ na̧kuä̧chü̧ttü̧mä̧ pi̧'ä̧ju̧jä̧. Kua̧'kua̧ tta̧kuȩkuo̧ka̧'a̧ täi, täkü kumä̧richeittümä̧ pi̧'ä̧jä̧ju̧jä̧.

³⁵ Jesú-mä̧, ja̧'wa̧nü̧ ukuokua'a 'kä̧tȩnä̧, Jairo ojusodera̧'a̧ttü̧ ichi'ü jittäwinä̧ku̧: —Kuittijumä̧, täkü 'koru pä'i'äjäju ¿tta̧'a̧nü̧ pä'ü wo̧juȩkuä̧ i̧sa̧rü̧ yabonü̧ o̧kui̧pä̧ra̧'a̧jä̧ttü̧?

³⁶ Ja̧'wa̧nü̧ pätta'a ä̧ju̧ku̧ Jesú-mä̧ sinagoga u̧ru̧wa̧, Jairo-rü, pä'inü̧: —Yekuekuä, suro esetütä eseti.

³⁷ Pä'ü kkä̧nü̧, kkorotürümä̧ oipoka'a Peduru-kutä ja̧'wa̧ta̧nü̧ Sa̧ti̧a̧ku̧ku̧tä̧ ü̧jä̧wa̧ Ju̧a̧-kutä o'ipächü i̧'chi̧nä̧u̧.

³⁸ Ja̧'wa̧nü̧ ja̧'a̧, sinagoga u̧ru̧wa̧ Jairo ojusodenä̧ i̧'chi̧'o̧mȩnä̧, ttü̧ja̧ rü̧ȩnä̧ ajuäkuäu wotta'a topinü̧.

³⁹ Ja̧'wa̧nü̧ ja̧'a̧, do'ächi'ü päinä̧u̧: —¿Tta̧'a̧nü̧ pä'ü rü̧ȩnä̧ ajuäkuäu wo'kuätukua'ajä̧ttü̧? ji̧'ki̧chawajumä̧ 'korujuo'ächokoju päjäju ja̧'a̧, suro ä'ütä ä'äju.

⁴⁰ Päomȩnä̧, ttü̧ja̧mä̧ Jesú-ru ya̧'a̧wä̧'chi̧nä̧tü̧. Ja̧'wa̧nü̧ ja̧'a̧nä̧, o'katoi'ünä̧rü̧ rä'epo'ü iku, kkä'orütä, kka̧ju̧rü̧tä̧ ja̧'wa̧ta̧nü̧ chutäku ichäjätukutä o'ipächü, ji'chichawaju kkü̧'o̧mȩ do'ächi'inü̧.

⁴¹ 'Chä̧wi̧'ü̧, kku̧mü̧ ȩmo̧po̧'ü̧ päinä̧kua̧: —Talita kumi (mü̧ä̧yaju ukuru pä'üsä, ä̧rä̧mi̧'i̧), päinä̧kua̧.

⁴² Päomȩnä̧, mü̧ä̧yajumä̧ ttü̧jä̧pü̧ttü̧nü̧ todäre año-nü̧ jo̧mȩnä̧ kku̧nä̧rä̧ju̧ ja̧'a̧, yotäku ä̧rä̧mi̧'ü̧ kue'ächinä̧jü̧. Ja̧'wa̧nü̧ kuejächiyä̧u̧ ttü̧ja̧mä̧ ¡isoo! pä'ü to̧pä̧ri̧nä̧tü̧.

⁴³ Ja̧'wa̧nü̧ ja̧'a̧nä̧, Jesú-mä̧ ya̧tȩrü̧'i̧nä̧ jittäu juiyünä̧ we'ünü̧ ro̧ȩpi̧nä̧u̧, jua̧u̧ o'ka'amä̧ ji'chichawajurumä̧ ku̧kuȩ ttiya pä'ütä weinä̧u̧.