San Marcos 16 - Nuevo Testamento Uwotjüja

Jesú ttoächinü̧ wȩnȩ

¹ Sawaru mo̧ro̧ 'kuäopäji o'ka'a, María Madarena'i̧nä̧, Sa̧ti̧a̧ku̧ ja̧ju̧ María'i̧nä̧, Saromé'i̧nä̧ a̧mȩu̧ ȩmi̧nä̧tü̧, Jesú 'korujuo'ächäjirü tu'epü tti̧'cha̧ pä'ü.

² Ja̧'wa̧nü̧ ȩmä̧jä̧'kotü, semana-ttü̧ ä̧kuo̧mȩnä̧ mo̧ro̧ yo̧ä̧i̧, kkä̧wa̧ räopäji o'ka'a wa'are idorära̧'a̧ku̧ ichinä̧tü̧.

³ Ichükkä̧nü̧, yajukunä̧ jä'ekuinä̧tü̧: —¿Díjä̧ttü̧, wa'are idorä ä'ka i̧nä̧bi mü̧ȩkuäbi pporädü iku, ujuturu ppä̧dä̧kua̧mä̧?

⁴ Pä'ü kkä̧nü̧, tottomȩnä̧ i̧nä̧bi rü̧ä̧jäbimä̧, pporädü ikuäwa'atä topinä̧tü̧.

⁵ Ja̧'wa̧nü̧ ja̧'a̧, wa'are idoränä̧ dottächi'omȩnä̧, mü̧ä̧ya̧ ü̧'ka̧tä̧wä̧ta̧ tȩä̧ta̧ otoünä̧ 'ka̧tä̧u̧ru̧, wa'are pä̧jä̧mȩ u̧wo̧jua̧'a̧ku̧nä̧ ü̧'a̧'a̧ topinä̧tü̧. Ja̧'wa̧nü̧ ü̧'a̧'a̧ topü, nä̧tü̧mä̧ rü̧ȩnä̧ ye'inä̧tü̧.

⁶ Ja̧'wa̧nü̧ ja̧'a̧nä̧, päinä̧u̧: —Yekuekuätukuä, Jesú Nazare ütawiyä i̧sa̧rü̧ ü̧jo̧kä̧nü̧ jäinä̧ kku̧nu̧, kuä'ü ttikuäjäkuru usätüjä̧; jua̧u̧mä̧, tto'ächäji, pȩnȩ́ ttütäjomȩmä̧ toa'a, topätukui.

⁷ Ja̧'wa̧nü̧ ja̧'a̧nä̧, Peduru-rü'i̧nä̧, u̧wo̧juȩtä̧u̧ pä'ijätürü'i̧nä̧ ji'äwäjätukui, Galirea-ra̧'a̧ kuä'katukunä̧ 'chü̧ pä'ü; jua'attütä to'kuätukuä̧kua̧ päinü̧ta'anü̧ pä'inä̧tü̧.

⁸ Ja̧'wa̧nü̧ jä̧u̧, nä̧tü̧mä̧ ye'i'ü tti̧'ä̧u̧kkä̧nü̧ wa'are idorättü rä'opächü, dü'ekuächinä̧tü̧. Ja̧'wa̧nü̧ ye'äjä'kotü, yoriso ya̧tȩrü̧'i̧nä̧, ya'utekutä ji'äwokotü pinä̧tü̧.

María Madarena-rü̧ Jesú-mä̧ i̧jȩkui̧nü̧

⁹ [Ja̧'wa̧ta̧nü̧, semana kkä̧mä̧da̧'a̧ ä̧kuo̧mȩnä̧ mo̧ro̧, pä'ü mo̧ro̧ päia'a, Jesú-mä̧ tto'ächäji̧'ka̧, ä̧kuo̧mȩnä̧mä̧ María Madarena-rü̧ i̧jȩkui̧nü̧, kko̧ro̧mü̧ttü̧nü̧ ta̧ju̧ wotü epíritu-tu̧ suropätürü rä'epü ikuinä̧kua̧rü̧.

¹⁰ Juajumä̧, Jesú-ku kue'ächä'ijätürü, tta̧'kua̧tta̧ jä̧u̧ ajuäkuäu pȩjä̧tü̧rü̧ ji'äu 'chi̧nä̧ju̧.

¹¹ Ja̧'wa̧nü̧ ja̧'a̧, juätümä̧, Jesú-mä̧ a̧'kua̧ri̧'ä̧ji̧ päji, tochäjäku pä'ü jijäwa'anä'i̧nä̧ esetokotü pinä̧tü̧.

U̧wo̧juȩtä̧u̧ pä'ijätüttü ta̧ju̧ru̧, Jesú-mä̧ i̧jȩkui̧nü̧

¹² Jua̧u̧ jä̧ji̧ o'ka'a, Jesú-mä̧ i̧jȩkui̧nü̧ juätüttü ta̧ju̧ru̧, pättara̧'a̧ 'chä̧tü̧rü̧.

¹³ Juätümä̧ kkorotürü ji'äu 'chi̧nä̧tü̧; jittäwomȩnä̧, juätürü'i̧nä̧ yoriso esetokotü pinä̧tü̧.

Jesú u̧wo̧juȩtä̧u̧rü weinü̧ wȩnȩ

¹⁴ Jua̧u̧ jä̧ji̧ o'ka'amä̧, o̧cȩnü̧ wotü u̧wo̧juȩtä̧u̧ pä'ijätü mesa-nä̧ ttü̧'ȩja̧'a̧, Jesú-mä̧ i̧jȩkui̧nü̧. Ttoächaja'a topäjätü jittäwa'anä̧ ttesetokomȩjä̧mȩnä̧, tta̧'kua̧ ttu̧wȩnä̧ro̧kü̧ tü'kü'i̧nä̧, tta̧mi̧ 'kitteku tü'kü'i̧nä̧ pä̧i̧ku̧nä̧ päinä̧u̧.

¹⁵ Ja̧'wa̧ta̧nü̧ päinä̧u̧: Pi̧jä̧ o'kajuiyünä̧ 'chä̧nü̧, o'katoi'ünä̧rü̧ jareü wȩnȩ ji'äwätukui.

¹⁶ Esetürü, bautizo jȩttä̧ku̧mä̧ ra̧wä̧pi̧jü̧ttü̧ ü̧ji̧pä̧kua̧; ja̧'wa̧nü̧ ja̧'a̧nä̧, esetokürümä̧ usurä ȩmä̧wa̧ pä'ütä pätetü kku̧nä̧wä̧kua̧'a̧.

¹⁷ Ja̧'wa̧ta̧nü̧ esetätümä̧, pi̧yȩ tottünä̧ jȩttä̧kuo̧tü̧: Ttü chi̧mi̧nä̧mä̧ epíritu suropätürü'i̧nä̧ rä'epä'chü ttikua'anä̧, jareü wȩnȩ'i̧nä̧ ttukuokuäkuotü;

¹⁸ Ä̧ka̧tü̧rü̧ 'chuttäda'anä'i̧nä̧; ni̧yȩkua̧'a̧ ttauttu'i̧nä̧ surojuoepo̧ko̧u̧ ttäkuotü; ja̧'wa̧ta̧nü̧ na̧'ä̧chä̧tü̧rü̧ ttu̧mü̧ mȩtto̧mȩnä̧'i̧nä̧ ttü̧'i̧pi̧yä̧kuä̧u̧.

Jesú mo̧ro̧jä̧ra̧'a̧ käekuächinü̧ wȩnȩ

¹⁹ Juätürü ji'äu käda'a, Tu̧ru̧wa̧ Jesú-mä̧ mo̧ro̧jä̧ra̧'a̧ kä'ekuächü, Tü̧ä̧nä̧wa̧ Dio u̧wo̧jua̧'a̧ku̧nä̧ pä̧mä̧di̧nü̧.

²⁰ Ja̧'wa̧nü̧ ja̧'a̧, juätümä̧ kkoromȩ pünä̧ o'kajuiyünä̧ 'chä̧nü̧ jareü wȩnȩ ji'äwinä̧tü̧; Tu̧ru̧wa̧mä̧ ppä̧dinä̧u̧, jȩtto̧kü̧ jä̧'i̧jü̧ juei jȩttü̧nä̧, jareü wȩnȩ jittäwa'anä̧mä̧. Amȩ́.]