San Marcos 15 - Nuevo Testamento Uwotjüja

Jesú-ru Pilato ä'ka jo̧mȩ ttȩpi̧nü̧ wȩnȩ

¹ Mo̧ro̧ päia'a, yotäku, sacerdote wotü tturuwotümä̧, judío-ttü a̧ci̧a̧nu̧ wotüku ja̧'wa̧ta̧nü̧ weäwä wȩnȩ wo̧juȩkuä̧ isotüku'i̧nä̧, ja̧'wa̧ta̧nü̧ Sanedrín wotüku'i̧nä̧ o'katoi'ünä̧ ka̧ka̧kui̧pü̧ ukuokuäjä'kotü. Jesú-ru nü̧'käwa̧rü̧tä̧ ȩmi̧pü̧, Pilato-rü iyinä̧tü̧.

² Pilato-mä̧, Jesú-ru jä'epü ä̧ju̧kui̧nü̧: —¿Uku ja̧'a̧, judío ttu̧ru̧wa̧ Rey-mä̧? —Jäepäku, Jesú-mä̧ ädätinü̧: —A̧'a̧, ukutämä̧, ja̧'wa̧nü̧tä̧ pä'üjä̧.

³ Sacerdotes wotü tturuwotü rü̧ȩnä̧ pä'ä'chü ra̧wä̧rü̧ wottiyäku,

⁴ Pilato-mä̧, ppa̧'a̧dü̧ jä'epü ä̧ju̧kui̧nä̧ku̧: —¿Yorisotä, kuädätoka'a? Ukuru rü̧ȩnä̧ pätta'amä̧, topi.

⁵ Ja̧'wa̧nü̧ pä'anä̧'i̧nä̧, Jesú-mä̧ weyekunä̧tä̧ 'korupinü̧; ja̧'wa̧nü̧ ädätiyokoku, Pilato-mä̧, rü̧ȩnä̧tä̧ amükuädünä̧ ji̧nä̧ku̧.

Jesú-ru kuä'ü ttikua pä'ü weäwi'ina̧'a̧

⁶ Kkoro pä'käri jü̧ta̧'a̧nü̧, Pilato-mä̧ kärenä̧ pȩjä̧tü̧ttü̧ ya̧tȩ ttü̧ja̧ jättepäkurü rä'epü ikuä'ija'a ji̧na̧'a̧.

⁷ Ja̧'wa̧ta̧nü̧, ya̧tȩ Barrabá pä'ü mi̧kua̧, kkorotüku kärenä̧ pinü̧, ttürowäwomȩttü̧ ttü̧ja̧sa̧rü̧ kuä'ü ttikuina̧'a̧ ja̧'a̧.

⁸ Ja̧'wa̧nü̧ ja̧'a̧, ttü̧ja̧ ichi'ü, Pilato-rü kko̧ro̧nü̧ jä̧'i̧jü̧ta̧'a̧nü̧ ya̧tȩ kärenä̧ pü̧rü̧ rä'epü ikua pä'ü jä'epinä̧tü̧.

⁹ Ja̧'wa̧nü̧ jättepiyäku, Pilato-mä̧ päinä̧u̧: —¿Ukutumä̧, judío ttu̧ru̧wa̧ Rey-rü rä'epü chikua pä'ätüjä̧?

¹⁰ Jua'amä̧, sacerdote wotü tturuwotürümä̧, ä'kuoyäkuäu iyü ikuäjätü pä'ü u̧wo̧jua̧'a̧ttü̧ jä'epü ä̧ju̧kui̧nä̧u̧.

¹¹ Ja̧'wa̧nü̧ ja̧'a̧nä̧, sacerdote wotü tturuwotümä̧, ttü̧ja̧rü̧ ji'äu kku̧ni̧nä̧tü̧ Barrabá-rütä rä'epü ikunä̧ jätteparü pä'ü.

¹² Ja̧'wa̧nü̧ jättepiyäku, Pilato-mä, pä'äji jä̧ji̧ta̧'a̧nü̧ päinä̧u̧: —¿Jua̧u̧nu̧mä̧, däje jȩcha̧ päkuätukua'ajä̧ttü̧, judío ttu̧ru̧wa̧ Rey päkuä'ijätukuäkurumä̧?

¹³ Ja̧'wa̧nü̧ jä̧ȩpä̧u̧, pä'äji jä̧ji̧ta̧'a̧nü̧ pä̧i̧ku̧nä̧ wopinä̧tü̧: —¡Ü̧jo̧kä̧ jäinä̧ kku̧nu̧ kuä'ü ikuätukuirü!

¹⁴ Ja̧'wa̧nü̧ wottiyäku, Pilato-mä̧ päinä̧u̧: —Jua̧u̧nu̧mä̧, ¿däje surojü jȩä̧ja̧'a̧jä̧ttü̧? Ja̧'wa̧nü̧ päomȩnä̧, pä'äji jä̧ji̧ta̧'a̧nü̧ yabonü̧ wopinä̧tü̧: —¡Ü̧jo̧kä̧ jäinä̧ kku̧nu̧ kuä'ü ikuätukuirü!, jü̧nä̧.

¹⁵ Ja̧'wa̧nü̧ wottiyäku, Pilato-mä ttü̧ja̧ tteseunä̧ jȩa̧ pä'ü, Barrabá-rütä rä'epü iku; Jesú-rumä̧ kuäkuättünä̧ we'äji̧'ka̧, ü̧jo̧kä̧nü̧ jäinä̧ kku̧nu̧ kuä'ü ttikuarü pä'ü iyü ikuinä̧ku̧.

¹⁶ Ja̧'wa̧nü̧ weomȩnä̧, su̧ro̧do̧u̧mä̧ Jesú-ru ȩmi̧pi̧nä̧tü̧; ȩmi̧päjä'kotü isode u̧mi̧, pretorio pä'ü mi̧kuomȩttü̧, ka̧ka̧ti̧nä̧tü̧ kkorotü su̧ro̧do̧u̧ o'katoi'ünä̧rü̧.

¹⁷ Ja̧'wa̧nü̧ ja̧'a̧, ü̧'ka̧tä̧wä̧ta̧, wä̧mȩ i̧sä̧ta̧mä̧ rü̧ȩnä̧ tädünä̧ tu̧wä̧ta̧ 'ka̧tü̧ kkä̧nü̧, puttäwäkä so̧ä̧kä, unä̧ ttu̧wȩni̧nä̧ku̧.

¹⁸ Jua̧u̧ o'ka'a, wopipinä̧tü̧: —¡Judío ttu̧ru̧wa̧ rey-mä̧, rekuo ku̧jä̧kua̧jä̧!, jü̧nä̧.

¹⁹ Ja̧'wa̧nü̧ wopü, unä̧, i̧so̧'kȩnä̧ kuäkuäpü kkä̧nü̧, surepü'i̧nä̧, ttiwe'kiyunä̧ kka̧kuä̧mä̧'chü̧ ukuotü jȩpä̧'chü̧ tettäwinä̧ku̧.

²⁰ Ja̧'wa̧nü̧ ya̧ttä̧wä̧'chä̧ku̧ o̧'ka̧rü̧mä̧ ü̧'ka̧tä̧wä̧ta̧, wä̧mȩ i̧sä̧ta̧ rü̧ȩnä̧ tädünä̧ tu̧wä̧jä̧ta̧mä̧ kko̧'ä̧dü̧ iku, a̧mü̧nä̧ ü̧'ka̧tä̧wä̧ta̧tä̧ 'ka̧tü̧, u̧mi̧ku̧ rättepächinä̧ku̧ ü̧jo̧kä̧ jäinä̧ kku̧nu̧ kuä'ü ttikuarü pä'ümä̧.

Jesú-ru ü̧jo̧kä̧ jäinä̧ pȩ'o̧pü̧ ttu̧ju̧ni̧nü̧ wȩnȩ

²¹ Ja̧'wa̧nü̧ ja̧'a̧, Simón pä'ü mi̧kua̧, Cirene ttü̧ja̧sa̧, Alejandro'i̧nä̧, Rufo'i̧nä̧ ttä'orü pättara̧'a̧ttü̧ ppa̧'ä̧chü̧ juȩnȩnä̧ 'kuäopa'a ja̧'a̧. Jua̧u̧ru̧, ra̧wärü̧nü̧ we'inä̧tü̧, ü̧jo̧kä̧nü̧ kkä̧nü̧ toe'ächäkuäi ȩpi̧ya̧rü̧ pä'ü.

²² Jesú-rumä̧, Gólgota pä'ü mikuomȩku̧ ȩpi̧nä̧tü̧ (ja̧'wa̧nü̧ pä'ümä̧: Wa'inü̧ u, pä'ü päwä).

²³ Jua'attümä̧, vino isoya mirra-ku wiwakuoya awa pä'ü ttiya'anä̧, awokü pinü̧.

²⁴ Ja̧'wa̧nü̧ jȩpü̧ ü̧jo̧kä̧nü̧ jäinä̧ ttu̧ju̧ni̧nä̧ku̧. Kku̧nä̧jä̧'kotü su̧ro̧do̧u̧mä̧, Jesú ü̧'ka̧tä̧wä̧ta̧ dirü pätekuächü'a̧nü̧ ja̧ pä'ü, jȩpü̧ topinä̧tü̧.

²⁵ Ü̧jo̧kä̧nü̧ jäinä̧ kku̧nu̧ jua̧u̧ru̧ kuä'ü ttikuinü̧mä̧, yo̧ä̧i̧ ja̧'a̧ku̧ a las nueve-nä̧ ji̧na̧'a̧.

²⁶ Ja̧'wa̧ta̧nü̧ u̧wä̧mȩ jo̧mȩmä̧, churutä pätetü kuä'ü ttiku tü'kü wȩyu̧kua̧'a̧ pi̧na̧'a̧: «Judío ttu̧ru̧wa̧ Rey ja̧'a̧» pä'ü.

²⁷ Jua̧u̧ku̧ yo̧mȩtȩnä̧mä̧, ta̧ju̧ nä̧u̧kuä̧rä̧'i̧jä̧tü̧rü̧'i̧nä̧, ü̧jo̧kä̧nü̧ jäinä̧ kku̧nu̧ kuä'ü ikuinä̧tü̧; ya̧tȩrü̧mä̧ u̧wo̧jua̧'a̧ku̧nä̧ kku̧nu̧, kka̧ra̧rü̧tä̧ ü'owekunä̧ kku̧ni̧nä̧tü̧.

²⁸ Ja̧'wa̧nü̧ ja̧'a̧ttü̧ wȩyu̧kuä̧ wȩnȩ: Suropätuku ttü̧'a̧ti̧nä̧ku̧, pä'ü wȩyu̧kuä̧'i̧jo̧mȩ jo̧mȩnü̧ päi'a pä'ü ji̧na̧'a̧.

²⁹ Ja̧'wa̧ta̧nü̧ juȩnȩnä̧ 'kuä'opätümä̧, suronä̧ ya̧'a̧wä̧'chü̧, ttu roripünü̧ pättä'chinä̧ku̧: —¡Jü̧! Uku, Dio-rü ukuokuäkuäwode kkä'ü ikuipü'ka̧, wäbodäkuä mo̧ro̧ päi'omȩnä̧ pä'äjita'anü̧ äräbe'üsä pä'ä'ijümä̧,

³⁰ Kua̧mü̧nä̧ pa̧ja̧tü̧, ü̧jo̧kä̧nü̧ jäittümä̧ mȩyȩwä̧chü̧ kki̧'i̧pi̧.

³¹ Ja̧'wa̧ta̧nü̧ sacerdote wotü tturuwotü'i̧nä̧, weäwä wȩnȩ wo̧juȩkuä̧ isotü'i̧nä̧ jua̧u̧ru̧ ya̧'a̧wä̧'chi̧nä̧tü̧: —«Kkorotürümä̧ ppädina̧'a̧nä̧, a̧mü̧nä̧ pa̧ja̧tü̧mä̧ ppä'ädäkuäu juiyünä̧ wa̧ pättä'chinä̧ku̧.

³² ¡Crito, Irae ttü̧ja̧ ttu̧ru̧wa̧ Rey, kuttümä̧! topü tesetaku, jitätä ü̧jo̧kä̧nü̧ jäittü mȩyȩwä̧chi̧.» Ja̧'wa̧ta̧nü̧, ü̧jo̧kä̧nü̧ jäinä̧ kka̧kuä̧tü̧'i̧nä̧, kkü'kü jui'ü suronä̧ pättä'chinä̧ku̧.

Jesú 'korujuoächinü̧ wȩnȩ

³³ Ja̧'wa̧nü̧ ja̧'a̧mä̧, kkä̧wa̧ jueü kkü̧rü̧ päia'a pi̧jä̧ o'kajuiyünä̧ yo̧i̧'i̧na̧'a̧, ni̧pä̧ro̧mȩ las tres-bü päi'ünä̧.

³⁴ Jua̧u̧tä̧ hora-nä̧, Jesú-mä̧ pä̧i̧ku̧nä̧ wopi'inü̧: «Eloí, Eloí, ¿lemá sabactani?» (Ja̧'wa̧nü̧mä̧ pa̧'a̧nü̧ pä'ü päwä: Chä'o Dio, Chä'o Dio, ¿Tta̧'a̧nü̧ pä'ü, ja̧'a̧tä̧ to'kuättüttü̧?)

³⁵ Ja̧'wa̧nü̧ woa'a ä̧ju̧ku̧, juȩnȩ kka̧kuä̧tü̧ yotukunä̧ pä'inä̧tü̧: —Ä̧ju̧kuä̧tu̧kui̧, profeta Elía-rü woa'a.

³⁶ Ja̧'wa̧nü̧ ja̧'a̧, juätüttü ya̧tȩ jopächü vino isoya a̧'ti̧poya, i̧sä̧ppä̧nä̧ pütädopo'ü i̧so̧'kȩnä̧ kku̧nu̧, Jesú awa pä'ü iyü, pä'inü̧. —Ja̧'a̧tä̧ topätukuirü, ü̧jo̧kä̧ jäittü Elía mȩyȩdü̧ iku icharü ja̧ pä'ü.

³⁷ Ja̧'wa̧nü̧ ja̧'a̧nä̧, Jesú-mä̧ pä̧i̧ku̧nä̧ wopi'ü kkä̧nü̧ 'koru pä'inü̧.

³⁸ 'Korupäi'omȩnä̧, Dio-rü ukuokuäkuäwode i̧sä̧ta̧, ju'tojunä̧ttü̧ kkä̧mä̧dü̧, rȩjȩku̧ kkä̧'ko̧ta̧nä̧ sȩrä̧wi̧'i̧na̧'a̧.

³⁹ Ja̧'wa̧ta̧nü̧, su̧ro̧do̧u̧ ttu̧ru̧wa̧ ja̧'wa̧nü̧ 'korupäi'a'a pä̧tȩkuä̧nü̧ to̧pä̧rü̧ kkä̧ji̧mä̧, pä'inü̧: —Isopäi'ünä̧tä̧, pidemä̧ Dio i̧tti̧ jä̧'i̧ja̧'a̧dä̧.

⁴⁰ Ja̧'wa̧ta̧nü̧, nä̧tü̧ juorü otonä̧ to̧pä̧rü̧ kka̧kui̧nä̧tü̧, juätüttümä̧, María Madarena'i̧nä̧ ja̧'wa̧ta̧nü̧ José-ku, Sa̧ti̧a̧ku̧ rüjí ru̧wa̧ku̧ tta̧ju̧ María'i̧nä̧ ja̧'wa̧ta̧nü̧ Saromé'i̧nä̧, ji̧na̧'a̧.

⁴¹ Pitü nä̧tü̧mä̧, Jesú-ku Galirea-ra̧'a̧ ü̧jä̧i̧ kue'ächü ppä'ädä̧'ä̧ri̧nä̧tü̧'i̧nä̧ ja̧'a̧nä̧, kkorotü nä̧tü̧ chutäku Jerusarȩ́-ra̧'a̧ ichäjätü'i̧nä̧ ji̧na̧'a̧.

Jesú-ru ttu'turinü̧ wȩnȩ

⁴² Täkü ni̧pä̧cho̧mȩnä̧, jo̧mȩnü̧ aditü ttü̧jü̧nä̧'i̧jü̧, sawaru mo̧ro̧ ä'kanä̧ ja̧'a̧,

⁴³ Arimatea ttü̧ja̧sa̧, José, sanedrín wotü i̧sa̧, ru̧wa̧ Dio wȩä̧kuȩ tta̧'a̧rä̧'i̧jü̧ ja̧'a̧, Jesú 'koru juo'ächäjirü Pilato-rü jä'epü 'chi̧nü̧.

⁴⁴ Pilato-mä̧, täkü 'koru juoächäja'a ä̧ju̧ku̧; isoó pä'ü amükuädü, su̧ro̧do̧u̧ ttu̧ru̧wa̧rü̧ wopo'ü, 'korupäi'äja'attümä̧ tta̧'a̧nü̧ rekuotä ja̧ pä'ü, jä'epü ä̧ju̧kui̧nü̧.

⁴⁵ Su̧ro̧do̧u̧ ttu̧ru̧wa̧ jiäwäji o'ka'a Pilato-mä, 'korujuo'ächäji Jesú-rumä̧, José-rü iyinü̧.

⁴⁶ Ja̧'wa̧nü̧ ja̧'a̧, José-mä̧ sa̧wa̧na̧'kua ȩmä̧ji̧'ka̧, ü̧jo̧kä̧nü̧ jäittü mȩyȩdü̧ juä'kuanä̧ juä'opäji'ka̧ wa'are idorä jakuä sawäwäjünä̧ rütinü̧, rütü kä'ädü doächäkuäwomemä̧ i̧nä̧binä̧ mü̧'ȩpi̧nü̧.

⁴⁷ Ja̧'wa̧nü̧ jȩtta̧'a̧nä̧, María Madarena'i̧nä̧, José ja̧jü̧ María'i̧nä̧, wa'are ttütome to̧pä̧rü̧ kka̧kui̧nä̧tü̧.