San Marcos 10 - Nuevo Testamento Uwotjüja

Jesú ttirekuarü ikuikuokü wȩnȩ ji'äwinü̧

¹ Ja̧'wa̧ta̧nü̧ Jesú-mä̧ Cafarnaúm ütawiyättü ra'opächü Judea rȩjȩra̧'a̧, Jordán aje ji̧jȩku̧ra̧'a̧ku̧ i̧'chä̧ja̧'a̧. Pä'äjita'anü̧ kko̧ro̧nü̧ jä̧'i̧ta̧'a̧nü̧ ttü̧ja̧ ttü̧ka̧ka̧kuä̧ja̧'a̧ kkä̧mä̧dü̧ wo̧juȩti̧nü̧.

² Ja̧'wa̧nü̧ u̧wo̧juȩta̧'a̧, fariseo wotüttü yotüte, Jesú ü̧ja̧'a̧ku̧ 'chä̧wi̧'ü̧, ji̧nä̧ ttiweyettü, jä'epü ttä̧ju̧kui̧nä̧ku̧. ¿Ya̧tȩ irekuarümä̧ jaroi'ü'anü ja̧'a̧ tä̧jí̧? pä'ü.

³ Ja̧'wa̧nü̧ jättepäku ädätinä̧u̧: —¿Moisé weinü̧mä̧ ti̧yȩ ja̧'a̧jä̧ttü̧?

⁴ Päomȩnä̧, ttädätinä̧ku̧: —Moisé-mä̧ we'inü̧, ttirekuarü ikuipümä̧ kuyäru isojä ttiya pä'ü.

⁵ Ja̧'wa̧nü̧ pättäku, Jesú-mä̧ päinä̧u̧: —Moisé-mä̧, jua'amä̧ kua̧mi̧ po'eku kuesetiyätukuokoku weinä̧u̧jä̧:

⁶ Ja̧'wa̧nü̧ ja̧'a̧nä̧, Dio, ä̧kuo̧mȩnä̧ aditinü̧mä̧, uborü'i̧nä̧ isajuru'i̧nä̧ aditinü̧.

⁷ Ja̧'wa̧nü̧ ja̧'a̧ttü̧, ubomä̧ jä'ottü'i̧nä̧, ja̧ju̧ttu̧'i̧nä̧ 'kȩi̧pä̧chä̧kua̧, irekuaku ppä'ächi'ümä̧.

⁸ Ja̧'wa̧nü̧ ja̧'a̧ttü̧, ta̧ju̧ päjätümä̧ ji̧nä̧ ji̧yȩtȩtä̧ ttäkuotü. Ja̧'wa̧nü̧ jo̧mȩttü̧ täkü ta̧ju̧mä̧ wokotü, ji̧nä̧ ya̧tȩtä̧ wotü.

⁹ Ja̧'wa̧nü̧ ja̧'a̧ttü̧, Dio abetinä̧u̧ru̧mä̧ ttü̧ja̧sa̧ 'kȩ'ȩpü̧ ikua pä'ümä̧ juiya'a.

¹⁰ Juȩnȩ o'komȩnä̧, täkü isodenä̧ ü̧ja̧'a̧, u̧wo̧juȩtä̧u̧mä̧ pä'äjita'anü̧ ttirekuarü ikuikuokü wȩnȩ jä'epü ttä̧ju̧kui̧nä̧ku̧.

¹¹ Ja̧'wa̧nü̧ jättepäku Jesú-mä̧ päinä̧u̧: —Irekuarü jaropi'ü, kkarajuru irekua päi'ünä̧ ȩmo̧mȩnä̧mä̧, adulterio pättünä̧ kkü̧;

¹² Ja̧'wa̧ta̧nü̧ isaju'i̧nä̧ kkirekuorü jaropi'ü kka̧ra̧rü̧ ȩmü̧ kkü̧jo̧mȩnä̧mä̧, adulterio pättünä̧ kkä̧ju̧.

Jesú ppo̧'ä̧tü̧rü̧ mȩ'ü̧ ukuokuinü̧

¹³ Ja̧'wa̧nü̧ ja̧'a̧ ppo̧'ä̧tü̧rü̧ Jesú ü̧ja̧'a̧ku̧ i'kächinä̧tü̧ u̧mü̧nä̧ mȩi̧ya̧tü̧ pä'ü. Ja̧'wa̧nü̧ tti'kächiyä̧u̧ u̧wo̧juȩtä̧u̧mä̧, i'kächätürü ya'okuinä̧tü̧.

¹⁴ Ja̧'wa̧nü̧ yattokua'a topü Jesú-mä̧ üjü'kü juiyünä̧ päi'äku päinä̧u̧: —Ya̧kuo̧pä̧rä̧tu̧kuä̧tü̧, wä̧i̧nä̧ ttüku tticha'anä̧, ja̧'a̧tä̧ topätukui ppo̧'ä̧tü̧rü̧mä̧, Dio ru̧wa̧ weümä̧ juätürütä ä̧tȩkuä̧ ja̧'a̧.

¹⁵ Isopäi'ünä̧ pädäu̧jä̧, ji̧'chi̧cha̧wa̧ jä̧'i̧nü̧'a̧nü̧ Dio weü ȩmo̧kü̧mä̧, juȩnȩ Dio weomȩmä̧ do'ächokü jä̧kua̧.

¹⁶ Ja̧'wa̧nü̧ pä'ü, ppo̧'ä̧tü̧rü̧ ja̧ppo̧wi̧'ü̧, u̧mü̧nä̧ ttu wä̧mȩ mȩ'ü̧ ukuokuinä̧u̧.

Pärätä ru̧wa̧mä̧ Jesú-ku ukuokuinü̧

¹⁷ Ja̧'wa̧nü̧ ja̧'a̧ Jesú mä̧nä̧nä̧ i̧'cho̧mȩnä̧, ya̧tȩ jopipü ichi'ü, ä'kajo̧mȩ iwe'kiyunä̧ kkä̧mä̧dü̧ jä'epü ä̧ju̧kui̧nü̧: —Chu̧ru̧wa̧ adiwä i̧sa̧, ¿däjetä jȩchü̧'a̧nü̧ttü̧ kkä̧kuä̧wä̧ i'ko chu̧ju̧nä̧ra̧ pä'ümä̧?

¹⁸ Päku, Jesú-mä̧ ädätinü̧: —¿Tta̧'a̧nü̧ pä'ü adiwä i̧sa̧, okuäkusättü̧? adiwä i̧sa̧mä̧, ya̧tȩtä̧ ja̧'a̧: Dio-tä.

¹⁹ Weäwä wȩnȩmä̧, täkü wo̧jua̧jä̧: Kuä'ü kuikuä, ku̧jo̧ko̧ku̧ku̧mä̧, ku̧jo̧ko̧kua̧ku̧mä̧ jȩ'kuä̧'chä̧tu̧kuä̧, ku̧nä̧u̧kuä̧rä̧, kuyaparewätukuä kkorotü ttütü'kü, jȩ'kua̧ päkuäjimä̧ kuyaparewä, kuä'orü'i̧nä̧ kua̧ju̧ru̧'i̧nä̧ eseunu̧ ukuoti, pä'ijümä̧.

²⁰ Päkumä̧, ädätinä̧ku̧: —Wo̧juȩkuä̧ i̧sa̧, jua̧u̧mä̧ o'kajuiyünä̧ cha̧'u̧kuä̧i̧ttü̧tä̧ päi'ünä̧ jȩpä̧'i̧jü̧sä̧.

²¹ Pä'anä̧, Jesú-mä̧ topü eseunu̧ päinä̧ku̧: —Ji̧nä̧, ji̧yȩtȩ jui̧'a̧jä̧: ku̧ju̧nä̧rü̧ o'kajuiyünä̧ mikuä pä'ü iyä'chü ikuäji, rekuä rü̧jä̧u̧ru̧ kuiyäkua'anü̧. Ja̧'wa̧nü̧ jȩ'kuo̧mȩnä̧ mo̧ro̧jä̧ra̧'a̧ttü̧ pärätä ku̧ju̧nä̧rä̧kua̧jä̧. Ja̧'wa̧nü̧ jȩpü̧, ü̧jo̧kä̧nü̧ ȩmi̧pü̧, cho'ka'anä̧ ichi.

²² Ja̧'wa̧nü̧ pä'a ä̧ju̧ku̧, a̧'kua̧ tta̧'ȩkui̧pü̧, mȩya̧pä̧chi̧'ä̧ji̧tä̧ i̧wi̧nü̧, rü̧ȩnä̧ ru̧wa̧ ja̧'a̧.

²³ Ja̧'wa̧nü̧ ji̧yä̧ku̧, Jesú-mä̧ kkärächi'ü topü u̧wo̧juȩtä̧u̧rü pä'inü̧: —¡Ru̧wa̧ Dio weomȩ järe ruwotü dottächa pä'ümä̧, yoriso rü̧ȩnä̧ 'kiya'a abotä dottächäkuotü!

²⁴ Ja̧'wa̧nü̧ pä'a ä̧ju̧ku̧ u̧wo̧juȩtä̧u̧mä̧ ¡rü̧ȩnä̧ amükuädinä̧tü̧! ja̧'wa̧nü̧ ji̧yä̧ku̧ Jesú-mä̧ pä'äjita'anü̧ päinä̧u̧: —Chi̧tti̧mü̧, ¡ja̧'wa̧nü̧ 'kiya'a tä̧jí̧ pärätänä̧ tta̧'kua̧ wȩnä̧rä̧tü̧ ru̧wa̧ Dio weomȩ dottächa pä'ümä̧!

²⁵ Camellu-rümä̧ pä̧ra̧ta̧ri̧ isäjunä̧ doächa pä'ümä̧, 'kuäunä̧tä̧ doächa'anä̧; ru̧wa̧rü̧ Dio weomȩ doächa pä'ümä̧ rü̧ȩnä̧tä̧ iweyekunä̧ ja̧'a̧.

²⁶ Jua̧u̧ ä̧ju̧ku̧, jua'a yabonü̧, ye'ünä̧nü̧ amükuädü pä'äwinä̧tü̧: —¿Jua̧u̧nu̧mä̧, ditä jä̧kua̧'a̧jä̧ttü̧ ra̧wä̧pi̧jü̧ttü̧ ü̧ji̧pä̧kua̧mä̧?

²⁷ Pä'ü, jättekua'a topü, Jesú-mä̧ päinä̧u̧: —Ttü̧ja̧rü̧mä̧ weyekua'a. Ja̧'wa̧nü̧ ja̧'a̧nä̧, Dio-rümä̧ weyekuoka'a, isopäi'ünä̧ o'kajuiyünä̧ jȩü̧tä̧ wa̧ ja̧'a̧ttü̧.

²⁸ Päiyäku, Peduru-mä̧ pä'inü̧: —Topittü̧, ujutumä̧ o'kajuiyünä̧ tu̧ju̧nä̧ri̧nü̧mä̧ kku̧ni̧pü̧, kuo'ka'anä̧ ichinätü̧jä̧.

²⁹ Ja̧'wa̧nü̧ pättäku Jesú-mä̧ ädätinä̧u̧: —Isopäi'ünä̧ pä'üsä ukuturu ya̧tȩ'i̧nä̧ toa'a, ttü jäwänä̧ ja̧'wa̧ta̧nü̧ jareü wȩnȩ jäwänä̧ ojusode'i̧nä̧, ü̧jä̧wa̧tü̧rü̧'i̧nä̧, üjäwaju̧tu̧rü̧'i̧nä̧, jä'orü'i̧nä̧, ja̧ju̧ru̧'i̧nä̧, i̧tti̧mü̧rü̧'i̧nä̧, idepiyu'i̧nä̧ jaropi'inümä̧,

³⁰ Jitä pä̧nä̧mä̧, Ciȩttü̧'i̧nä̧ yabonä̧nü̧ ȩmo̧ka̧'a̧mä̧ ü̧ji̧po̧kä̧kua̧ ojusodettü'i̧nä̧, ü̧jä̧wa̧tü̧ttü̧'i̧nä̧, ijäwajutu̧ttü̧'i̧nä̧, ja̧ju̧tü̧ttü̧'i̧nä̧ i̧tti̧mü̧ttü̧'i̧nä̧, ü'ättattü'i̧nä̧, usurä ȩmä̧wa̧'a̧mä̧ ja̧'wa̧ta̧nü̧ kkä̧kuä̧wä̧ ichü mo̧ro̧ päi'omȩnä̧'i̧nä̧, kkä̧kuä̧wä̧ i'ko ȩmä̧kua̧.

³¹ Ja̧'wa̧nü̧ ja̧'a̧ttü̧, rekuätü ä̧kuo̧mȩnä̧ wotümä̧, rüjinä̧ pätti'äkuotü ja̧'wa̧ta̧nü̧ rüjinä̧ wotütä ä̧kuo̧mȩnä̧ pätti'äkuotü.

Wäbodäkuä päi'ünä̧, Jesú-mä̧ toe'ä̧kuȩ ji'äwinü̧

³² Ja̧'wa̧ta̧nü̧, Jerusarȩ́-ra̧'a̧ku̧ tti̧'cho̧mȩnä̧, Jesú-mä̧ u̧wo̧juȩtä̧u̧ ttä'kanä̧ 'chi̧nü̧. Juätümä̧, rü̧ȩnä̧ amükuädinä̧tü̧ ja̧'wa̧ta̧nü̧ o'ka'anä̧ 'chä̧tü̧mä̧ ye'ekuinä̧tü̧. Ttü̧jä̧pü̧ttü̧ ta̧ju̧nü̧ wotü, u̧wo̧juȩtä̧u̧rü kkoromȩku̧ o'ipächü pä'äji ta̧'a̧nü̧ churutä 'kuäopä̧kuȩ ji̧ä̧wi̧nä̧u̧:

³³ Topätukui, Jerusarȩ́-ra̧'a̧ku̧ 'cha'achätüjä̧ jua'attümä̧ Ttü Ubo i̧tti̧rü̧ iyü ttikuäkuotü sacerdote wotü tturuwotürü ja̧'wa̧ta̧nü̧ wo̧juȩkuä̧ isotürü ja̧'wa̧nü̧ ja̧'a̧ juätümä̧ kuä'ü ttikuäkua̧sä̧, kko̧ro̧jä̧ ruwä ttu̧mü̧nä̧.

³⁴ Ja̧'wa̧nü̧ jȩpü̧, ttürü ya̧ttä̧wä̧'chä̧kuo̧tü̧, surettäkuotü, kuäkuäpü, kuä'ü ttikuäkua̧sä̧; ja̧'wa̧nü̧ ja̧'a̧nä̧ wäbodäkuä mo̧ro̧ päi'omȩnä̧, tto̧dä̧chä̧kua̧sä̧.

Sa̧ti̧a̧ku̧'i̧nä̧, Ju̧a̧'i̧nä̧ Jesú-ru jä'epinä̧tü̧

³⁵ Ja̧'wa̧ta̧nü̧ Zebedeo i̧tti̧mü̧ ta̧ju̧, Sa̧ti̧a̧ku̧'i̧nä̧, Ju̧a̧'i̧nä̧, Jesú ü̧jo̧mȩku̧ 'chä̧wi̧'ü̧ pättinä̧ku̧: —Wo̧juȩkuä̧ i̧sa̧ ujutu jätepü kuiyatü pä'ätüjä̧.

³⁶ Pättäku, jä'epü ä̧ju̧kui̧nä̧u̧: —¿Ukutumä̧, däje chiyätukuaku päkuätukua'ajä̧ttü̧?

³⁷ Jäepomȩnä̧, pättinä̧ku̧: —Kuruwonä̧ ku̧'ä̧mä̧do̧mȩnä̧mä̧, ya̧tȩrü̧mä̧ ku̧wo̧jua̧'a̧ku̧nä̧, kka̧ra̧rü̧tä̧ ku'owe ja̧'a̧ku̧nä̧ tü̧'ä̧mä̧dü̧nä̧ kutatü pä'ätüjä̧.

³⁸ Jättepomȩnä̧ Jesú-mä̧ ädätinä̧u̧: —Jäkuepätukumä̧, yoriso jerupätüjä̧ ¿iso̧'ta̧ttü̧, reoya chauta'anü̧ kuawätuku'anü̧ ja̧'a̧ tä̧jí̧ ja̧'wa̧ta̧nü̧ bautizo jȩchä̧kuä̧u̧ta̧'a̧nü̧ jȩ'kuä̧kuä̧wä̧kuo̧tü̧jä̧ tä̧jí̧?

³⁹ Jäepomȩnä̧, ttädätinä̧ku̧: —A̧'a̧, jȩtü̧'a̧nü̧ ja̧'a̧. Pättäku, Jesú-mä̧ päinä̧u̧: —Reoya a̧kuo̧'ta̧ chawomȩttü̧ kuawäkuotüjä̧ ja̧'wa̧ta̧nü̧ bautizo jȩchä̧kuä̧u̧ttü̧'i̧nä̧ je'kuä̧kuä̧wä̧kuo̧tü̧jä̧;

⁴⁰ Ja̧'wa̧nü̧ ja̧'a̧nä̧, chu̧wo̧jua̧'a̧ku̧nä̧, chü'owe ja̧'a̧ku̧nä̧ rütäkuäwämä, ttü chiya pä'ümä̧ juiya'a, jua'amä̧ pätetü jo̧mȩnü̧ kku̧nä̧wo̧tü̧rü̧tä̧ i̧yä̧wä̧kuȩ ja̧'a̧.

⁴¹ Ja̧'wa̧nü̧ ä̧ju̧ku̧, kkorotü u̧wo̧juȩtä̧u̧ to̧mü̧rȩ ruwämä̧, Jacobo-rü'i̧nä̧ Ju̧a̧-rü̧'i̧nä̧ ra̧wä̧ri̧pi̧nä̧tü̧.

⁴² Ja̧'wa̧nü̧ ji̧yä̧ku̧, Jesú-mä̧ juätürü wopo'ü pä'inü̧: —Ukutumä̧ wo̧juä̧tü̧jä̧, judío pokotürü ruwotü we'ätümä̧, ttü̧ja̧rü̧ kkȩdä̧rü̧ jä̧'i̧nü̧'a̧nü̧tä̧ we'ätü ja̧'wa̧ta̧nü̧ juätü we'ätümä̧, jua'a yabo juätürü'i̧nä̧ tturuwotü ttu̧wä̧mȩnä̧ wȩttä̧u̧.

⁴³ Ja̧'wa̧nü̧ ja̧'a̧nä̧, ukututtümä̧ ja̧'wa̧nü̧mä̧ jo̧ka̧'a̧ jä̧kua̧'a̧. Jua̧u̧ ja̧jü̧ jueimä̧, ukututtü ya̧tȩ uruwo u̧ju̧nä̧ra̧ pä'ümä̧, ukutu ku̧mü̧wä̧ya̧tu̧ku̧ jä̧kua̧.

⁴⁴ Ja̧'wa̧ta̧nü̧, ukututtü ä̧kuo̧mȩnä̧ i̧sa̧ päi'a, pä'ümä̧, o'katoi'ünä̧ ttu̧mü̧wä̧ya̧ jä̧kua̧.

⁴⁵ Isopäi'ünä̧, ubo I̧tti̧'i̧nä̧ umüwäyotü u̧ju̧nä̧ra̧ pä'ümä̧ ichokü pinü̧ pärokua'aku ttu̧mü̧wä̧ya̧ jü̧nä̧tä̧ ichinü̧, rekuätürü ppä'ädü, a̧'kua̧rü̧ iyäutä.

Jesú-mä̧, ä̧to̧ka̧ Bartimeo-rü̧ aditü ikuinü̧

⁴⁶ Ja̧'wa̧ta̧nü̧ Jericó ütawiyära̧'a̧ ichi'inä̧tü̧. Ichi'ä'kotü Jerico-ttü Jesú u̧wo̧juȩtä̧u̧ku, ttü̧ja̧ rekuätüku räopächomȩnä̧, ya̧tȩ ä̧to̧ka̧, Timeo i̧tti̧, Bartimeo pä'ü mi̧kua̧, mä̧nä̧ jäyä jä̧'ȩpä̧rü̧ pi̧nü̧.

⁴⁷ Ja̧'wa̧nü̧ ü̧'a̧'a̧, Nazare ttü̧ja̧sa̧, Jesú ichü pätta'a ä̧ju̧ku̧, wopipinü̧: —¡Dawi i̧tti̧, Jesú, rȩrü̧jü̧ topittü! jü̧nä̧.

⁴⁸ Ja̧'wa̧nü̧ woiyä̧u̧, ttü̧ja̧ rekuätü ü'koruchi'a pätta'anä̧, yabokutä wopinü̧: —¡Jesú, Dawi i̧tti̧, rȩrü̧jü̧ topittü!, jü̧nä̧.

⁴⁹ Ja̧'wa̧nü̧ woäku, Jesú-mä̧ i̧'cho̧mȩttü̧ kkä̧mä̧dü̧ pä'inü̧: —Wopätukuirü. Päomȩnä̧, ä̧to̧ka̧rü̧ wopümä̧, pä'inä̧tü̧: —Woäkujä̧, ä̧rä̧mi̧'i̧.

⁵⁰ Pättäku, ä̧to̧ka̧mä̧ wä̧mȩnä̧ ü̧'ka̧tä̧wä̧ta̧ do'opü ikuipü, tü'ächü, Jesú ü̧jo̧mȩku̧ 'chä̧wi̧'i̧nü̧.

⁵¹ I̧'chi̧'a̧'a̧, jä'epü ä̧ju̧kui̧nä̧ku̧: —¿Däjé jȩcha̧ku̧ päkuättü̧? jäepomȩnä̧, ä̧to̧ka̧mä̧ ädätinü̧: —Wo̧juȩkuä̧ i̧sa̧, pä'äjita'anü̧ tocha pä'üsä.

⁵² Päiyäku, Jesú-mä̧ päinä̧ku̧: —Täkü täi; kua̧'kua̧ ku̧wȩnä̧ro̧mȩttü̧ pi̧'i̧pü̧jä̧. Päüta'anü̧, ä̧to̧ka̧mä̧ yotäku, pä'äji ji̧nü̧ta'anü̧ toünä̧ päi'inä̧ku̧. Ja̧'wa̧nü̧ pi̧'ä̧ji̧'ka̧, Jesú-ku mä̧nä̧nä̧ 'chi̧nü̧.