San Marcos 1 - Nuevo Testamento Uwotjüja

Bautizo jȩpä̧'i̧jü̧, Ju̧a̧ jiäwinü̧ wȩnȩ

¹ Tü̧ä̧nä̧wa̧ Dio I̧tti̧, i̧chä̧kua̧ pä'ü ukuowinü̧, Jesú ütü'kü jäwä, jareü wȩnȩmä̧, pa̧'a̧nü̧ kkä̧mä̧di̧na̧'a̧.

² Profeta Isaía i̧wȩyu̧ti̧nü̧ jiäwinü̧ta̧'a̧nü̧, 'kuäopina̧'a̧. Jua̧u̧ pä'inü̧: Kuä'kanä̧ we'üsä ttü chi̧wȩnȩ ȩkuä̧ i̧sa̧rü̧, ku̧mä̧nä̧ aditü u̧ju̧nä̧kua̧rü̧,

³ Rȩba̧ dȩ'a̧ra̧'a̧ttü̧, ya̧tȩ i̧wȩnȩ pä̧i̧ku̧nä̧ rȩmi̧pa̧'a̧: «Tu̧ru̧wa̧ u̧mä̧nä̧ aditü kku̧nä̧tu̧kui̧; Tto̧ȩpä̧rü̧ juiyünä̧ u̧mä̧nä̧ jue'epiyätukuirü»

⁴ Ja̧'wa̧nü̧ ja̧'a̧ttü̧ ji̧yȩnü̧ mo̧ro̧, bautizo jȩä̧kuä̧wä̧ i̧sa̧ Ju̧a̧-mä̧, rȩba̧ dȩ'a̧ra̧'a̧ttü̧, o'katoi'ünä̧rü̧ ji'äwinü̧: Surojü jȩ'kuä̧tu̧ku̧ kä'ädi'ü bautizo jȩpä̧kuä̧u̧ Dio-ku ppa̧'ä̧chä̧tu̧kui̧, surojü jui'ätü 'kua̧rü̧nä̧ Dio jȩä̧tu̧kua̧ku̧ pä'ümä̧, pä'inü̧.

⁵ Ja̧'wa̧nü̧ ja̧'a̧ttü̧ Judea rȩjȩ ttü̧ja̧'i̧nä̧, Jerusarȩ́ ttü̧ja̧'i̧nä̧, o'katoi'ünä̧ ichinä̧tü̧ Ju̧a̧ jiäu ä̧ju̧ku̧mä̧. Ja̧'wa̧ta̧nü̧ o'katoi'ünä̧ suronä̧ jȩttä̧'i̧jü̧ ji'äu ikuätürümä̧, Jordán ajettü, Ju̧a̧-mä̧ bautizo jȩi̧nä̧u̧.

⁶ Ju̧a̧ ü̧'ka̧tä̧wä̧ta̧mä̧, camellu uwo'chettü adikuä̧ta̧ 'ka̧tä̧wi̧nü̧. Äkäisäyamä i̧sa̧ i̧jȩta̧ttü̧ adikuäya ti̧'ä̧dä̧kuä̧wi̧nü̧. U̧kuȩmä̧ ji̧ri̧chu̧tu̧ru̧tä̧ kuinü̧ ja̧'wa̧ta̧nü̧ a̧wȩmä̧ de'a mayatä awinü̧.

⁷ Jua̧u̧mä̧ pa̧'a̧nü̧, ji'äwinü̧: Ttü cho'ka'anä̧ ya̧tȩ ichü. Jua̧u̧mä̧ ttüttü'i̧nä̧ abonä̧nü̧ uruwo kku̧nä̧rü̧. Jua̧u̧ ü̧jä̧pü̧ isäya isappä'i̧nä̧ ja̧rȩyu̧ pä'i'ümä̧ chejädü juiyü'anü̧ wa̧sä̧.

⁸ Ttümä̧, ajiyanä̧tä̧ bautizo jȩchä̧'i̧jä̧u̧jä̧; ja̧'wa̧nü̧ ja̧'a̧nä̧, Jua̧u̧mä̧, Epíritu Sa̧tu̧nä̧ bautizo jȩä̧kuä̧u̧jä̧.

Jesú-ru, Ju̧a̧ bautizo jȩi̧nü̧ wȩnȩ

⁹ Ji̧yȩnü̧ mo̧ro̧, Jesú-mä̧ Galirea rȩjȩnä̧ttü̧, Nazare ütawiyättü rä'opächü i̧'chä̧ja̧'a̧, i̧rȩbȩwi̧'o̧mȩnä̧, Ju̧a̧-mä̧ Jordán ajettü bautizo jȩi̧nä̧ku̧.

¹⁰ Ja̧'wa̧nü̧ jȩä̧ji̧ o'ka'a, Jesú-mä̧ ajettü u̧wä̧mi̧'i̧'o̧mȩnä̧, mo̧ro̧jä̧ bawekuächa'attü, Dio a̧'kua̧rü̧ i̧sa̧, unuku 'kua̧ra̧, churutä ü̧jä̧mä̧da̧ pä'ü i̧mȩyȩwi̧'a̧'a̧ topinü̧.

¹¹ Ja̧'wa̧nü̧ päi'omȩnä̧, ya̧tȩ i̧wȩnȩ, mo̧ro̧jä̧ra̧'a̧ttü̧ rä̧mi̧pi̧na̧'a̧: «Ukumä̧ ttü chi̧tti̧jä̧ rü̧ȩnä̧ rȩni̧'a̧, ukuru rü̧ȩnä̧ repe'üsä.»

Äwettä Jesú-ru kka̧kuä̧mȩ'ü̧ toinü̧ wȩnȩ

¹² Jua̧u̧ o'ka'a, Dio i̧sa̧ Epíritu Jesú-ru rȩba̧ dȩ'a̧ra̧'a̧ku̧ o'ipinü̧.

¹³ Jua'a rȩba̧ dȩ'a̧ra̧'a̧mä̧, ttü̧ja̧ ta̧ju̧ mo̧ro̧ jo̧mȩnä̧ kki̧nü̧. Juȩnȩ, ü̧jo̧mȩnä̧ de'iyü isotü ra̧wä̧pi̧wotü rekuinä̧tü̧. Jua'attü ta̧bo̧i̧ya̧ Satanás kka̧kuä̧mȩ'ü̧ toinä̧ku̧; ja̧'wa̧ta̧nü̧ A̧gȩrȩ-mä̧ tta̧ttä̧ri̧nä̧ku̧.

Jesú aditäwä kkä̧mä̧dü̧ aditinü̧

¹⁴ Ju̧a̧-rü̧ kärenä̧ ttütäji o'ka'a, Jesú-mä̧ Galirea rȩjȩra̧'a̧, jareünä̧ ru̧wa̧ Dio weü wȩnȩ ji'äu 'chi̧nü̧.

¹⁵ Jua'attü ji'äwinü̧: «Dio ü'ätetinü̧ mo̧ro̧, jo̧mȩnü̧ päia'a. Täkü, Dio wȩä̧kuȩ mo̧ro̧ tü'kü ja̧'a̧; surojü jȩ'kuä̧tu̧ku̧ kä'ädi'ü, jareü wȩnȩ esetü pärowächätukui,» jü̧nä̧.

Pa̧ja̧kuä̧nü̧ wotü po̧i̧ ȩmä̧tü̧rü̧, Jesú-mä̧ wopinü̧

¹⁶ Jesú-mä̧, Galirea dubora jäyoranä̧ 'kuäopomȩnä̧, po̧i̧ ȩmä̧wä̧ isotürü po̧kui̧pi̧nü̧. Juätümä̧, Simón ji̧na̧'a̧ i̧jä̧wa̧ André-ku. Juätürü, po̧i̧ wo̧ä̧wä̧sa̧nä̧ po̧i̧rü̧ wo'ü ttü̧ja̧kui̧yä̧ku̧,

¹⁷ Jesú-mä̧, pä'inü̧: —Ttüku ichätukui, ttü̧ja̧rü̧ ȩmä̧wä̧ isotü jü̧nä̧, chü'ärotätukuaku.

¹⁸ Ja̧'wa̧nü̧ pä̧u̧, yotäku ttiäre o̧sa̧ kä'ädi'ü, chutäku 'chi̧nä̧tü̧.

¹⁹ Juȩnȩ yabonä̧, Jesú i̧'chi̧'o̧mȩnä̧, Zebedeo i̧tti̧mü̧rü̧, woi'kanä̧, ttiäre ma'ayä i̧sä̧sa̧ ti̧'chä̧rü̧ ttü̧'ȩja̧'a̧ po̧kui̧pi̧nü̧. Juätümä̧, Sa̧ti̧a̧ku̧ i̧jä̧wa̧ Ju̧a̧-ku̧ ji̧na̧'a̧.

²⁰ Juätü'i̧nä̧ wo̧ä̧u̧, yotäku, ttä'o Zebedeo-rümä̧ umüwäyotükutä woi'kanä̧ ü̧ji̧pa̧'a̧nä̧, Jesú-ku 'chi̧nä̧tü̧.

Epíritu su̧ro̧pa̧ ttü̧ja̧sa̧nä̧ ü̧ji̧nü̧ wȩnȩ

²¹ Cafarnaúm ütawiyänä̧ tti̧rȩbȩwi̧'ä̧ja̧'a̧. Sawaru mo̧ro̧ päi'omȩnä̧, Jesú-mä̧ sinagoga isodenä̧ do'ächi'ü wo̧juȩti̧nü̧.

²² U̧wo̧juȩtü̧ kkä̧kuä̧wä̧ wȩnȩ rü̧ȩnä̧ amükuädinä̧tü̧, ukuo kkü̧nä̧ u̧wo̧juȩti̧yä̧u̧, weäwä wȩnȩ wo̧juȩtä̧tü̧ ttu̧wo̧juȩto̧ko̧mȩ jä'i̧jo̧mȩnä̧.

²³ Juode, sinagoga isodettü, ya̧tȩ epíritu su̧ro̧pa̧ ü̧jä̧ku̧, wopinü̧:

²⁴ —¿Tta̧'a̧nü̧ pä'ü, uku Jesú Nazare ttü̧ja̧sa̧mä̧, ujuturu mȩ'o̧pä̧rü̧ ichüjä̧ttü̧? ¿be'epäjipü iku kui̧chä̧jä̧u̧jä̧ tä̧jí̧? ukurumä̧, Dio ȩmi̧nä̧ku̧ pä'ü wo̧jua̧sä̧.

²⁵ Ja̧'wa̧nü̧ woäku, jua̧u̧ ttü̧ja̧sa̧nä̧ kkü̧ epíritu su̧ro̧pa̧rü̧ Jesú-mä̧ ujuruku wopi'inü̧: —¡'Koruchi'i! ¡jua̧u̧ ku̧jä̧ku̧ttü̧ rä'opächi!, jü̧nä̧.

²⁶ Woi'omȩnä̧, ü̧jä̧ku̧mä̧, ttiriri päi'ünä̧ tti̧ä̧wi̧pa̧'a̧nä̧, epíritu su̧ro̧pa̧mä̧ jua̧u̧ttü̧ pä̧i̧ku̧nä̧ wopü kkä̧nü̧ rä'opächinü̧.

²⁷ Jua̧u̧ topü, o'katoi'ünä̧, ye'ünä̧nü̧, yotukunä̧ jä̧'ȩpä̧rä̧kuä̧wi̧nä̧tü̧: —¿Pi̧yȩmä̧ däjejä̧ttü̧? ¿Jareünä̧ kkä̧kuä̧wä̧ u̧wo̧juȩtü̧mä̧? ja̧'wa̧ta̧nü̧ ¿ujuruku weümä̧? ¿juiyo, epíritu suropätü'i̧nä̧ ttukuotünä̧ weümä̧?

²⁸ Ja̧'wa̧nü̧ aditomȩnä̧, yotäku, Jesú ütü'kümä̧ Galirea rȩjȩ o'kajuiyünä̧ ukuowi'ina̧'a̧.

Simón ü̧sä̧da̧rü̧ Jesú aditü ikuinü̧

²⁹ Jesú-mä̧, Sa̧ti̧a̧ku̧ku̧, Ju̧a̧-ku̧, sinagoga isodettü rä'opächü, Simón i̧jä̧wa̧ André-ku ttojusodera̧'a̧ 'chi̧nü̧.

³⁰ I̧'chi̧'o̧mȩnä̧, Simón ü̧sä̧da̧, kkiäre ka̧ma̧nä̧, rü̧ȩnä̧ du'unä̧ na̧'ä̧chü̧ kkü̧'a̧'a̧ jittäwinä̧ku̧.

³¹ Ja̧'wa̧nü̧ ja̧'a̧, 'chä̧wi̧'ü̧ kku̧mü̧ttü̧ ȩmo̧po̧'ü̧ äräbe'omȩnä̧; yotäku du'unä̧ na̧jä̧chä̧ji̧ttü̧mä̧ pi̧'i̧nä̧ju̧. Jua̧u̧ o'ka'amä̧ ttu̧kuȩ iyü jȩpi̧nä̧ju̧.

Na̧nȩpä̧tü̧rü̧ Jesú aditü ikuinü̧

³² Täkü, kkä̧wa̧ ma̧ä̧chä̧ji̧ o'ka'a, yodó päi'omȩnä̧. Ttü̧ja̧mä̧, rü̧ȩnä̧ na̧nȩpä̧tü̧rü̧'i̧nä̧ ja̧'wa̧ta̧nü̧ epíritu-tu̧ suropätü ttü̧ja̧kuä̧u̧ru̧'i̧nä̧ Jesú ü̧jo̧mȩku̧ i'kächinä̧tü̧.

³³ Ja̧'wa̧nü̧ ja̧'a̧, ttü̧ja̧mä̧ o'katoi'ünä̧, Simón ojusode äpate ä'ka rü̧ȩnä̧ ka̧ka̧kui̧nä̧tü̧.

³⁴ Ttü̧ka̧ka̧kuä̧ja̧'a̧, rekuätürü ttumä̧richei pünä̧ aditü ikuinä̧u̧. Ja̧'wa̧ta̧nü̧ epíritu-tu̧ suropätü ttü̧ja̧kuä̧u̧ na̧nȩpä̧tü̧rü̧'i̧nä̧, ttü̧'i̧pü̧nä̧ rä'epä'chü ikuinü̧. Ja̧'wa̧nü̧ ja̧'a̧nä̧ juätü epíritu suropätümä̧, ttu̧wo̧juä̧ku̧ ttukuoku juiyünä̧tä̧ jȩi̧nä̧u̧.

Sinagoga odewiyättü Jesú jiäwinü̧ wȩnȩ

³⁵ Pä'ü mo̧ro̧ juoa'a, ji̧nä̧ yo̧a̧'a̧nä̧, Jesú-mä̧ ütawiyättü rä'opächü, ttü̧ja̧ toächomȩku̧, Dio-rü ukuoku 'chi̧nü̧.

³⁶ Ja̧'wa̧nü̧ i̧'chä̧ja̧'a̧, Simón-mä̧ awaruwäku, Jesú-ru usú 'chi̧nü̧.

³⁷ 'Chä̧jä̧'kotü po̧kui̧pü̧ pättinä̧ku̧: —O'katoi'ünä̧tä̧ ttusäkujä̧.

³⁸ Pättäku, ädätinä̧u̧: —Porü, tü'künä̧nü̧ kka̧ku̧ ütawiyä pünä̧ ti̧'cha̧ tätukui; jua̧u̧nä̧dä̧jä̧ jareü wȩnȩ jidäwäkua'anü̧. Ttümä̧, jua̧u̧tä̧ ä̧tȩkuä̧nä̧ ichinü̧sä̧.

³⁹ Ja̧'wa̧nü̧ ja̧'a̧ttü̧, sinagoga odewiyä pünä̧, Galirea rȩjȩnä̧mä̧ o'kajuiyünä̧tä̧ jareü wȩnȩmä̧ ji'äwinü̧, epíritu-tu̧ suropätürü'i̧nä̧ rä'epe'ü iku kkä̧nü̧.

Repra na̧'ä̧chü̧rü̧ Jesú aditü ikuinü̧

⁴⁰ Ya̧tȩ Repra mä̧richei na̧'ä̧chü̧, Jesú ä'ka jo̧mȩ ichi'opo'ü, iwe'kiyunä̧ pä̧mä̧dü̧ ajuäkuäwinü̧: —Aditü kuikua päkuttümä̧, aditü kuiku'anü̧ wa̧sä̧, aditü ikuittü, jü̧nä̧.

⁴¹ Jesú-mä̧ rȩrü̧jü̧nü̧ topü, u̧mü̧nä̧ mȩ'ü̧, päinä̧ku̧: —A̧, aditü chikua pä'üsä, ¡Kumä̧richeittümä̧ pi̧'ü̧jä̧!

⁴² Päomȩnä̧, yotäku, Repra märicheimä̧, jui̧'a̧tä̧ pä'i'inü̧.

⁴³ Ja̧'wa̧nü̧ pi̧'ä̧ji̧rü̧, we'ü iku ro̧ȩpi̧nä̧ku̧:

⁴⁴ —¡Adiu ä̧ju̧kui̧ttü̧! Yoriso, ya̧tȩrü̧'i̧nä̧ jikuäwoka'a; sacerdote ä'ka jo̧mȩtä̧ i̧jȩkuä̧ji̧, kuadiwächäja'a, Dio-rü kuiyäkua'anü̧, ofrenda ȩpü̧ 'chä̧nü̧, Moisé weinüta'anü̧, sacerdote wotü ttu̧wo̧juä̧kua̧'a̧nü̧.

⁴⁵ Ja̧'wa̧nü̧ ro̧ȩpä̧jä̧ku̧mä̧, juorü rä'opächü o'katoi'ünä̧rü̧ churutä 'kuäopäjimä̧ ji'äwä'chinü̧. Ja̧'wa̧nü̧ jo̧mȩnä̧, Jesú-mä̧ wäjunä̧, ütawiyäpünä̧mä̧ doächü juiyünä̧ jä̧ku̧, ttü̧ja̧ tometä̧ kkä̧'chi̧nü̧. Ja̧'wa̧nü̧ ja̧'a̧nä̧ ttidepiyu pünä̧, o'katoi'ünä̧tä̧ ka̧ka̧ku̧ topü ttichinä̧ku̧.