San Lucas 6 - Nuevo Testamento Uwotjüja

U̧wo̧juȩtä̧u̧ sawaru mo̧ro̧ trigo ocha ka̧ka̧ti̧nä̧tü̧

¹ Jesú-mä̧ sawaru mo̧ro̧ pättiyu 'kä̧tȩ jo̧mȩnä̧ 'kuäopomȩnä̧. U̧wo̧juȩtä̧u̧, trigo o̧cha̧ ka̧ka̧tü̧ bi̧'ko̧pä̧rü̧ kuinä̧tü̧.

² Ja̧'wa̧nü̧ jȩtti̧yä̧u̧, fariseo wotüttü yotüte jä'epü ttä̧ju̧kui̧nä̧u̧: —¿Tta̧'a̧nü̧ pä'ü ukutumä̧, sawaru mo̧ro̧ jȩä̧kuä̧wo̧kü̧ jȩpä̧tü̧jä̧ttü̧?

³ Pättiyäku Jesú ädätinä̧u̧: —¿Ukutumä̧, Dawi kuȩä̧chä̧u̧ku̧, ukua ppä̧i̧ri̧jä̧ku̧, ya'utenä̧ jȩi̧nü̧ wȩyu̧kuo̧mȩ jä̧'i̧jo̧mȩ'i̧nä̧ topokotü pä'ijätüjä̧?

⁴ ¿Dio-rü ukuokuäkuäwodenä̧ do'ächi'ü, ro̧ü̧ sacerdote wotütä ttukuä'ijü pan kuȩä̧chä̧u̧ku̧ ttukuino̧mȩ jä̧'i̧jo̧mȩmä̧?

⁵ Ja̧'wa̧ta̧nü̧ päinä̧u̧: —Ubo I̧tti̧mä̧, sawaru mo̧ro̧'i̧nä̧ u̧ru̧wa̧ ja̧'a̧.

Jesú-mä̧ u̧mü̧ su̧ro̧pa̧rü̧ sawaru mo̧ro̧ aditü ikuinü̧

⁶ Ja̧'wa̧ta̧nü̧ kkoro sawaru mo̧ro̧ Jesú-mä̧ sinagoga isodenä̧ do'ächi'ü wo̧juȩti̧nü̧. Ja̧'wa̧nü̧ ja̧'a̧ juodenä̧ ya̧tȩ u̧mü̧ u̧wo̧jua̧'a̧ku̧nä̧ joächächinä̧kü̧ kki̧nü̧.

⁷ Ja̧'wa̧nü̧ ja̧'a̧, weäwä wȩnȩ wo̧juȩkuä̧ isotü'i̧nä̧ ja̧'wa̧ta̧nü̧ fariseo wotü'i̧nä̧, Jesú-ru to̧pä̧ri̧nä̧tü̧ sawaru mo̧ro̧ jua̧u̧ru̧ aditü ikuaja ja̧ pä'ü, ji̧yȩnä̧tä̧ suronä̧ kkorotürü jittäwa pä'ü.

⁸ Ja̧'wa̧nü̧ jakuänä̧ tta̧mü̧kuädiyäku, Jesú-mä̧, päini̧yä̧u̧: —Ä̧rä̧mi̧'ü̧, yȩna̧ja̧, kkä'ko kkä̧mä̧di̧. Päomȩnä̧, yotäku ä̧rä̧mi̧'ü̧ ü̧jä̧mä̧da̧'a̧nä̧.

⁹ Jä'epü ä̧ju̧kui̧nä̧u̧: —Ji̧yȩtȩ jä'epü chä̧ju̧kuä̧u̧jä̧: ¿Sawaru mo̧ro̧mä̧, däjetä jȩtta̧ pä'ü weäwa'ajä̧ttü̧: Ppätäda pä'ü, ppätädü juiya pä'ü? ¿Tta̧'kua̧ri̧'ü̧nä̧ ppättädü'anü̧ tä̧jí̧, ppättädü juiyü'anü̧ tä̧jí̧?

¹⁰ pä'ü kä'ädü o'katoi'ünä̧rü̧ topünü̧, jua̧u̧ru̧ pä'inü̧: —Ku̧mü̧ te'ädi. Päku, teädomȩnä̧ u̧mü̧nä̧ adiwächi'inä̧ku̧.

¹¹ Ja̧'wa̧nü̧ ji̧yä̧u̧ kkorotümä̧ rü̧ȩnä̧ ra̧wä̧ri̧pü̧, Jesú-ru suronä̧ jȩtta̧ pä'ü jȩpü̧ kku̧nu̧ ukuokuäkuäwinä̧tü̧.

Apótore doce-nü̧ wotürü pojopinü̧

¹² Ji̧yȩnü̧ mo̧ro̧, Jesú-mä̧ mü̧ä̧'kara̧'a̧ Dio-rü ukuoku 'chä̧ji̧'ka̧, yodó 'kuäo'ünä̧ ukuokuinü̧.

¹³ Kkoro mo̧ro̧juoäja'a u̧wo̧juȩtä̧u̧rü wopo'ü juätüttü doce-nü̧ wotürü pojopü ȩmü̧: O̧i̧nä̧u̧ apótore, pä'ü.

¹⁴ Juätümä̧ pitü ji̧na̧'a̧: Simón, kkoro i̧mi̧mä̧ Peduru pä'ü oinä̧ku̧'i̧nä̧; ja̧'wa̧ta̧nü̧ ü̧jä̧wa̧ André'i̧nä̧; Sa̧ti̧a̧ku̧'i̧nä̧, Ju̧a̧'i̧nä̧, Felipe'i̧nä̧, Bartoromé'i̧nä̧,

¹⁵ Mateo'i̧nä̧, Tomá'i̧nä̧, Alfeo i̧tti̧ Sa̧ti̧a̧ku̧'i̧nä̧, Simón Zerote pä'ü oinä̧ku̧'i̧nä̧.

¹⁶ Ja̧'wa̧ta̧nü̧, Jacobo i̧tti̧ Juda'i̧nä̧ ja̧'wa̧ta̧nü̧ Juda Icariote Jesú-ru iyü ikuinü̧'i̧nä̧, ji̧na̧'a̧.

Jesú rekuätürü wo̧juȩti̧nü̧

¹⁷ Jesú-mä̧ müä'kara̧'a̧ttü̧ juätütäku mȩyȩwä̧ji̧'ka̧ mȩje'ka jo̧mȩ kkä̧mä̧di̧nü̧ u̧wo̧juȩtä̧u̧ku ja̧'wa̧ta̧nü̧ ttü̧ja̧ rekuätü, judea rȩjȩ ütawiyä'i̧nä̧, Jerusarȩ́-ttü̧'i̧nä̧, Tiro rȩjȩttü̧'i̧nä̧, Sidón rȩjȩnä̧ttü̧'i̧nä̧ ichäjätü pinä̧tü̧ jiäu ttä̧ju̧kua̧ pä'ü ja̧'wa̧ta̧nü̧ na̧nȩttü̧'i̧nä̧ aditü ikuatü pä'ümä̧,

¹⁸ ja̧'wa̧nü̧ ja̧'a̧ttü̧ epíritu-tu̧ttü̧ surojuo'ächinä̧tü̧'i̧nä̧ aditü ikuinä̧u̧.

¹⁹ Ja̧'wa̧nü̧ ja̧'a̧ttü̧ ttü̧ja̧ o'katoi'ünä̧tä̧ mȩtta̧rü̧ pä'ü jȩpi̧nä̧tü̧, Chunä̧tä̧ ujuru kka̧'a̧ ttumä̧richei aditü ikuiyä̧u̧.

Eseäwäkuäwä wȩnȩ ji'äwinü̧

²⁰ Ja̧'wa̧ta̧nü̧ Jesú-mä̧ u̧wo̧juȩtä̧u̧rü topünü̧ pä'inü̧: Usurä isotürümä̧ eseäkuäwä rȩbȩä̧kuä̧wa̧'a̧, jua'amä̧ ru̧wa̧ Dio weümä̧ juätütä ttȩmä̧kuȩ ja̧'a̧ttü̧.

²¹ Jitä ppäi ttu'ätürü eseäkuäwä rȩbȩä̧kuä̧wa̧'a̧, jua'amä̧ suttädi'äkua'attü. «Jitä ajuäkuäwätürü eseäkuäwä rȩbȩä̧kuä̧wä̧kua̧'a̧, jua'amä̧ ya̧ttä̧wä̧kua̧'a̧ttü̧».

²² Eseäkuäwä rȩbȩä̧kuä̧wä̧kua̧'a̧, Ttü jäwänä̧, ttü̧ja̧ ukuturu kkü'kü jui'ü ya̧'a̧wä̧'chü̧, kuäkuäpü jȩtto̧mȩnä̧.

²³ Ja̧'wa̧nü̧ jü̧ mo̧ro̧mä̧ eseäkuäwätukui, jua'amä̧ mo̧ro̧jä̧ra̧'a̧ttü̧ ukuturu i̧yä̧wä̧kuȩmä̧ rü̧ȩnä̧ jü̧ jä̧kua̧'a̧; isopäi'ünä̧ ku̧tä̧mü̧tu̧ku̧ mi̧nä̧mä̧, profeta winä̧tü̧rü̧mä̧ ja̧'wa̧nü̧tä̧ jȩpi̧nä̧tü̧.

²⁴ Ja̧'wa̧nü̧ ja̧'a̧nä̧, ukutu ¡ruwotümä̧, ukutuwe!, täkü kueseäkuäwätukumä̧ kku̧nä̧rä̧tü̧jä̧.

²⁵ ¡Isottü̧, ukutuwe, jitä rü̧ȩnä̧ kuä̧nü̧ esewätürümä̧, ra̧wä̧pi̧ja̧'a̧, ppäi ttukuäkuotüjä̧! ¡Ukutuwe! ¡jitä do̧ri̧ä̧u̧mä̧, kua̧'kua̧ tta̧'ȩku̧ kuajäkuäwäkuotüjä̧!

²⁶ Pi̧jä̧ ttü̧ja̧ ukuturu adiu ttukuokuomȩnä̧, ¡Ukutuwe! kuä'otuku mi̧nä̧mä̧ ja̧'wa̧nü̧ jȩpi̧nä̧tü̧ yapareunä̧ profeta wotürümä̧.

Ttaboiyotürü eseäkuäwä

²⁷ Ja̧'wa̧nü̧ ja̧'a̧nä̧ ttü pädü ä̧ju̧kuä̧tü̧rü̧, pä'üsä: Kuaboiyotürü repe'ätukui, ukuturu kkü'kokotürü adiu jȩpä̧tu̧kui̧.

²⁸ Adiutä pä'ätukui, ukuturu suronä̧ pä'ätürü. Ja̧'wa̧ta̧nü̧ ukuturu wȩnȩ kkä'äbe'ätürü, Dio-rütä ukuokuätukuitü.

²⁹ Ya̧tȩ kui'ä pätekua'anä̧ kuäüttümä̧, kkara'anä̧ iyäwirü; ja̧'wa̧ta̧nü̧ wä̧mȩnä̧ ku̧'ka̧tä̧wä̧ta̧ 'choipüttümä̧ jakuänä̧ ku̧'ka̧tä̧wä̧ta̧'i̧nä̧ iyirü.

³⁰ Kkorojuei ya̧tȩ jäepüttümä̧, iyirü; kuiäre ya̧tȩ ȩmi̧pü̧ttü̧mä̧ ppa̧kuä̧dä̧rü̧.

³¹ Ukuturu kkorotü jȩttä̧tu̧kua̧ku̧ päkuätukumä̧, ukutu'i̧nä̧ jȩpä̧tu̧kui̧.

³² Suro ukuturu repe'ätürütä repekuätukuttümä̧, ¿Däjejä̧ttü̧ yabonä̧nü̧ adiu jȩ'kuä̧tu̧ku̧mä̧? ja̧'wa̧nü̧mä̧ surojü jȩä̧kuä̧wä̧ isotü'i̧nä̧ jȩttü̧.

³³ Ja̧'wa̧ta̧nü̧ ukuturu adiu jȩpä̧tü̧rü̧tä̧, adiu jȩ'kuä̧tu̧kuo̧mȩnä̧mä̧, ¿Ti̧yȩtä̧jä̧ttü̧ juätü ttu̧wä̧mȩnä̧ adiu jȩ'kuä̧tu̧ku̧mä̧? surojünä̧ kkä̧tü̧'i̧nä̧ jua̧u̧mä̧ jȩttü̧ ja̧'a̧mä̧.

³⁴ Ja̧'wa̧ta̧nü̧ kkorojuei'i̧nä̧ mikuä ttiyü'anü̧ wotürütä ku'ärowätukuomȩnä̧mä̧ ¿ti̧yȩtä̧jä̧ttü̧ üadiwä jȩ'kuä̧tu̧ku̧mä̧? jua̧u̧mä̧ surojünä̧ kka̧kuä̧tü̧'i̧nä̧ jȩttü̧, mikuä ja̧'a̧tȩ'ü̧ päroäkuäwämä̧.

³⁵ Ja̧'wa̧nü̧ ja̧'a̧ttü̧ kuaboiyotürümä̧ eseu, adiutä jȩpü̧ pärowätukui juätüttü mikuä tta̧kuä̧rä̧tu̧kuo̧ka̧'a̧; ja̧'wa̧nü̧ jȩ'kuä̧tu̧kuo̧mȩnä̧ mikuäwächünä̧mä̧ rü̧ȩnä̧ iyäwäkua'a. Ja̧'wa̧ta̧nü̧ Mo̧ro̧jä̧ Ru̧wa̧ i̧tti̧mü̧ kuäkuotüjä̧. Jua̧u̧mä̧ ppättäda'anä̧ esewokotüru'i̧nä̧, suronä̧ jȩpä̧tü̧rü̧'i̧nä̧ rȩrü̧jü̧ toäkuäwä i̧sa̧ ja̧'a̧ttü̧.

³⁶ Ukutu'i̧nä̧ rȩrü̧jü̧ topätukui, Kuä'o Dio-tuku'i̧nä̧ rȩrü̧jü̧ toäkuäwä i̧sa̧ ja̧'a̧ttü̧.

Kkorotürü suronä̧ päwokü wȩnȩ

³⁷ Surojü jȩttü̧mä̧ päkuätukuä, ukuturu'i̧nä̧ surojü jȩ'kuä̧tu̧ku̧ Dio päü juiyäkua'anü̧. Usurä ttȩmä̧u̧nä̧ päkuätukuä, ukuturu'i̧nä̧ usurä kuȩmä̧wä̧tu̧ku̧nä̧ Dio päü juiyäkua'anü̧. Pärokua'aku mikuämä̧ kuamükuädätukuä, ukuturu'i̧nä̧ pärokua'aku mikuä, Dio amükuädü juiyäkua'anü̧.

³⁸ Iyätukui, ukuturu'i̧nä̧ iyäwi'äkua'anü̧. Isopäi'ünä̧ Dio-mä̧ kkorotürü kuiyätukuta'anü̧ i̧yä̧kuä̧u̧jä̧. Trigo kuiyätukuttumä̧, trigo ȩkä̧yü su̧'pȩnü̧, ti̧'ä̧dü̧ ȩnä̧wa̧'a̧ iyäwi'ä̧kuä̧u̧jä̧, ȩmü̧mä̧ kui̧'chä̧tu̧kuo̧'ka̧'a̧nä̧tä̧.

³⁹ Ja̧'wa̧ta̧nü̧ Jesú-mä̧ pi̧yȩ wȩnȩtü̧ päinä̧u̧: ¿Ya̧tȩ ä̧to̧ka̧mä̧ kka̧ra̧ ä̧to̧ka̧rü̧ oipü'anü̧ tä̧jí̧? ¿Ta̧ju̧kuä̧yotü rejunä̧ ma̧'ä̧cho̧ko̧tü̧ tä̧jí̧?

⁴⁰ Ya̧tȩ wo̧jui̧pü̧mä̧, wo̧juȩtü̧ u̧wä̧mȩnä̧mä̧ wokü: o'katoi'ünä̧ jo̧mȩnü̧ ttu̧wo̧jui̧'o̧mȩnä̧mä̧, ttu̧ru̧wa̧ wo̧juȩtü̧ jü̧'a̧nü̧tä̧ juo'ächätü.

⁴¹ ¿Tta̧'a̧nü̧ pä'ü kui̧jä̧wa̧ i'ärenä̧ ȩkü̧tä̧ topüjä̧ttü̧; kua̧mü̧nä̧ kui'ärenä̧ ȩkü̧mä̧ to'kuäkuäwoka'anä̧?

⁴² ¿Kua̧mü̧nä̧ pa̧ja̧tü̧ kui'ärenä̧ ȩkä̧'ka to'kuäkuäwoka'anä̧mä̧, tta̧'a̧nü̧ pä'ü kui̧jä̧wa̧rü̧mä̧ kui'ärenä̧ ȩko̧'ki ȩmü̧ chikuaku päkua'ajä̧ttü̧? ¡ä'koyättütä esetüjä̧!, ä̧kuo̧mȩnä̧mä̧ kua̧mü̧nä̧ kui'ärenä̧ ȩkä̧'ka ȩmä̧u̧ ikui, kui̧jä̧wa̧ i'ärenä̧ ȩko̧'ki topü ȩmü̧ kuikua pä'ümä̧.

U̧wä̧ju̧ttü̧ topü wo̧juä̧wä̧ wȩnȩ

⁴³ Dau adiwäjuei isäi ja̧'a̧nä̧ u̧wä̧ju̧ surojü wȩjäimä̧ yoriso juiya'a. Ja̧'wa̧ta̧nü̧ dau suräjuäi isäi ja̧'a̧nä̧ u̧wä̧ju̧ adiwä juei wȩjäimä̧ yoriso juiya'a.

⁴⁴ Dauwiyämä̧ jíkunä̧, u̧wä̧ju̧ttü̧ topü wo̧juä̧wä̧tü̧jä̧. So̧u̧ dauttumä̧, uwa wȩja̧'a̧mä̧ ȩmä̧wo̧kü̧ ja̧'wa̧ta̧nü̧ higo wȩja̧'a̧ 'to'ümä̧ kuokotüjä̧.

⁴⁵ Ttü̧ja̧sa̧ adiwä i̧sa̧mä̧, a̧mi̧so'kittümä̧ adiwäjueitä rä'epü. Ja̧'wa̧ta̧nü̧ ttü̧ja̧sa̧ su̧ro̧pa̧mä̧, a̧mi̧so'kittümä̧ surojütä rä'epü. Jua'amä̧, a̧mi̧so'kinä̧ ȩjü̧tä̧tä̧, änä̧mä̧ räopa'a ukuoku.

⁴⁶ ¿Tta̧'a̧nü̧ pä'ü: Chu̧ru̧wa̧, Chu̧ru̧wa̧, pä'ü wo'kuätukuäkusä̧ttü̧, Ttü pädümä̧ jȩ'kuä̧tu̧kuo̧ka̧'a̧nä̧?

⁴⁷ O'katoi'ünä̧ Ttüku ichü, chi̧wȩnȩ ä̧ju̧ku̧ ukuotätümä̧, pa̧'a̧nü̧ wotüjä̧:

⁴⁸ Ya̧tȩ ojusode aditü, 'kiyünä̧ 'chu̧ä̧rä̧kuȩ o'ka, rȩjȩ 'kiyomȩ täkunä̧ sa'ü kku̧ni̧nü̧'anü̧ wa̧. Ja̧'wa̧nü̧ ja̧'a̧, aje suwädi'omȩnä̧, ajiya rü̧ȩnä̧ dü'ü ikuomȩnä̧, yoriso 'kiyünä̧ wi̧na̧'a̧, jua'amä̧ 'kiyomȩ aditü wȩnä̧wa̧'a̧ttü̧.

⁴⁹ Ja̧'wa̧nü̧mä̧ jo̧ka̧'a̧, Ttü chi̧wȩnȩ ttä̧ju̧kua̧'a̧nä̧'i̧nä̧ jȩtta̧ pä'okotürümä̧; jua̧u̧mä̧ ya̧tȩ ojusode 'chu̧ä̧rä̧'ka re'tünä̧, rȩjȩ wä̧mȩ kku̧ni̧nü̧. Juodenä̧ aje dü'ü ikuomȩnä̧, juodemä̧ yorisotä pparächi'ü ma̧ä̧chi̧nü̧'anü̧ wa̧.