San Lucas 5 - Nuevo Testamento Uwotjüja

Ttiweyekuomȩttü̧ po̧i̧ 'cho'inä̧tü̧

¹ Ya'utenä̧ Jesú-mä̧ Genesaret rü̧ä̧ dubora jäyora ü̧ja̧'a̧, Dio i̧wȩnȩ ttä̧ju̧kua̧ pä'ü ttü̧ja̧mä̧ rü̧ȩnä̧ ttü̧ka̧ka̧kuo̧mȩnä̧ ppi̧ä̧chä̧rü̧nä̧ ja̧'a̧,

² Topinü̧ woi'kiyu to'kare juora jäyora rü̧ja̧'a̧. Po̧i̧ woäwä isotü, jua̧u̧ o'kattü mȩjä̧wä̧chä̧jä̧'kotü ttiäre ma'aya o̧sa̧ ttütüka'a.

³ Juorü ji'katemä̧, Simón uwe'ka ja̧'a̧ttü̧, Jesú-mä̧ kkä'kotokunä̧nü̧ kki'opü u̧ni̧ya̧rü̧ pä'ü wȩ'ä̧ji̧'ka̧. Juä'kanä̧ 'cha'ächi'ü pä̧mä̧dä̧ji̧'ka̧ ttü̧ja̧ rekuätürü wo̧juȩti̧nü̧, juä'kattü.

⁴ Ukuoku kä'ädü Simón-rü̧ pä'inü̧: —Woi'ka rü̧ä̧ dubora täkuomȩku̧ ȩpä̧tu̧kui̧. Jua'attü kui̧ä̧rȩsa̧tu̧ku̧ kuikuätukua po̧i̧rü̧ wokuo'ätukuäkua'anü̧.

⁵ Päiyäku Simón-mä̧ ädätinä̧ku̧: —Wo̧juȩkuä̧ i̧sa̧, yodó 'kuäo'ünä̧ usurä tȩmä̧wa̧'a̧nä̧ yorisotä wo'opokotü päjätüjä̧; ja̧'wa̧nü̧ ja̧'a̧nä̧, uku kui̧wȩnȩ päkua'attü̧ chiäre ma'aya i̧sä̧sa̧ iku 'chü̧sä̧.

⁶ Ja̧'wa̧nü̧ wȩä̧jä̧u̧ ttikuomȩnä̧, ma'aya i̧sä̧sa̧'i̧nä̧ 'toruwipü'a̧nü̧ päi'ünä̧ wo'opinä̧tü̧ po̧i̧rü̧mä̧.

⁷ Ja̧'wa̧nü̧ jä̧u̧, ttawaruwä kkoro'kanä̧ rü̧jä̧tü̧rü̧ wȩkä̧wi̧nä̧tü̧, ppättädächatü pä'ü; ttichi'äja'a, to'karekue'ü suwädi'ünä̧ wo'opinä̧tü̧, ma̧ttä̧chä̧rü̧nä̧ päi'ünä̧.

⁸ Ja̧'wa̧nü̧ ja̧'a̧ topü Simón Peduru-mä̧, Jesú ä'ka jo̧mȩ iwe'kiyunä̧ pä̧mä̧dü̧nü̧ pä'inü̧: —¡Chu̧ru̧wa̧, ttüttümä̧ 'kȩ'i̧pä̧chi̧. Ttümä̧ surojütä jȩä̧kuä̧wä̧ i̧sa̧sä̧!

⁹ Po̧i̧ rü̧ȩnä̧ wottopäja'a rü̧ȩnä̧ ye'i'inü̧. Ja̧'wa̧ta̧nü̧ chutäku kkä̧jä̧tü̧'i̧nä̧ o'katoi'ünä̧tä̧ ye'inä̧tü̧.

¹⁰ Ja̧'wa̧ta̧nü̧ Simón jitüku aditä̧u̧, Zebedeo i̧tti̧mü̧'i̧nä̧: Sa̧ti̧a̧ku̧'i̧nä̧, Ju̧a̧'i̧nä̧ ye'inä̧tü̧. Ja̧'wa̧nü̧ ji̧yä̧ku̧ Jesú-mä̧ Simón-rü̧ pä'inü̧: —Yekuekuä; jitä porü yabokumä̧ ttü̧ja̧rü̧tä̧ 'choäwä i̧sa̧ kuä̧kua̧jä̧.

¹¹ Ja̧'wa̧nü̧ ja̧'a̧ woi'kiyumä̧ de'aku rütipü, o'kajuiyünä̧ kä'ädi'ü, Jesú-ku 'chi̧nä̧tü̧.

Jesú-mä̧ repra na̧'ä̧chü̧rü̧ aditü ikuinü̧

¹² Ya'utenä̧ Jesú-mä̧ ji̧yȩtȩ ütawiyänä̧ ü̧ja̧'a̧, Repra mä̧richei jä̧ttä̧pä̧ya̧tä̧ juo'ächinü̧ ya̧tȩ ichi'ä̧ji̧'ka̧; Jesú-ru topo'ü rȩjȩku̧ ja̧rȩyu̧nu̧ pä'i'ü ajuäkuäwinü̧: —Chu̧ru̧wa̧, uku ttürü aditü kuikuattü päkuttümä̧, aditü kuiku'anü̧ wa̧sä̧.

¹³ Ja̧'wa̧nü̧ ajuäkuäwäku, u̧mü̧nä̧ mȩ'ü̧, Jesú-mä̧ päinä̧ku̧: —Aditü chikua pä'üsä. ¡Kumä̧richeittümä̧ pi̧'i̧pi̧! Päomȩnä̧, yotäku Repra märicheimä̧ jui̧'a̧tä̧ pä'i'inü̧.

¹⁴ Ja̧'wa̧nü̧ ja̧'a̧ Jesú-mä̧ weinä̧ku̧: —Ya̧tȩrü̧'i̧nä̧ jikuäwoka'a, sacerdote wa̧ ä'ka jo̧mȩtä̧ i̧jȩkuä̧ji̧. Kuadiwächäja'a, ofrenda ȩpü̧ 'chä̧nü̧, Moisé weinü̧'a̧kuä̧. Juätü sacerdote wotü ttu̧wo̧juä̧kua̧'a̧nü̧.

¹⁵ Ja̧'wa̧nü̧tä̧tä̧ Jesú ütü'kümä̧ yabokunü̧ ukuowächina̧'a̧. Ttü̧ja̧ rekuätü ka̧ka̧kui̧nä̧tü̧ ttä̧ju̧kua̧rü̧ pä'ü'i̧nä̧, ttumä̧richeittü aditü ikuatü pä'ü'i̧nä̧, jü̧nä̧.

¹⁶ Ja̧'wa̧nü̧ ja̧'a̧nä̧ Jesú-mä̧, 'kuäopünä̧tä̧ Dio-rü ukuoku 'chä̧nü̧ ttü̧ja̧ tomȩku̧ 'kȩ'i̧pä̧chä̧ri̧nü̧.

Jesú-mä̧ parárisi na̧'ä̧chü̧rü̧ äräbe'inü̧

¹⁷ Ya'ute mo̧ro̧ Jesú u̧wo̧juȩto̧mȩnä̧, Galirea rȩjȩ ütawiyättü'i̧nä̧, Judea rȩjȩ ütawiyättü'i̧nä̧, Jerusarȩ́ ütawiyättü'i̧nä̧ ichäjä'kotü fariseo wotü'i̧nä̧, weäwä wȩnȩ wo̧juȩkuä̧ isotü'i̧nä̧ pȩji̧nä̧tü̧. Tu̧ru̧wa̧ ujurumä̧ kki̧na̧'a̧ na̧'ä̧chä̧tü̧rü̧ aditü ikua'a i̧jȩkuä̧chü̧nä̧.

¹⁸ Jua̧u̧ 'kä̧tȩnä̧ yotüte u̧mä̧tü̧ i'kächipinä̧tü̧, ya̧tȩ parárisi na̧'ä̧chü̧rü̧ isäbänä̧ ü̧'a̧'a̧. Jua̧u̧ru̧ Jesú ä'ka jo̧mȩ ttütarü pä'ü, isode jakuojuku dottädarü pä'ü jȩpi̧nä̧tü̧.

¹⁹ Ja̧'wa̧nü̧ ja̧'a̧nä̧ ttü̧ja̧ rü̧ȩnä̧ ttirekua'a, dottächü juiyünä̧ jä̧u̧ isode wä̧mȩnä̧ 'tä̧'ȩpäjä'kotü isäbänä̧ ü̧'a̧'a̧nä̧ juittädinä̧ku̧ kkä'kopäte'ü jo̧mȩ, Jesú ä'ka jo̧mȩ ü̧'ä̧mä̧dü̧nä̧.

²⁰ Ja̧'wa̧nü̧ tta̧'kua̧ ttu̧wȩnä̧ra̧'a̧ topü, Jesú-mä̧ na̧'ä̧chü̧rü̧ pä'inü̧: —Cha̧wa̧ru̧wa̧, suronä̧ jȩ'kuä̧'i̧jü̧mä̧ jȩä̧cha̧'a̧.

²¹ Ja̧'wa̧nü̧ pä̧i̧yä̧u̧, weäwä wȩnȩ wo̧juȩkuä̧ isotü'i̧nä̧, fariseo wotü'i̧nä̧ ukuokuinä̧tü̧: ¿Díjä̧ttü̧ ja̧'wa̧nü̧ Dio-rü suronä̧ pä'ümä̧? ¡suronä̧ jȩttü̧ jȩpü̧ iku Dio-mä̧, ya̧tȩtä̧ ja̧'a̧!, pä'ü

²² Ja̧'wa̧nü̧ ttamükuäda'a wo̧juö̧, Jesú-mä̧ päinä̧u̧: —¿Tta̧'a̧nü̧ pä'ü, ja̧'wa̧nü̧ amükuädätüjä̧ttü̧?

²³ Ji'äwätukuittü, toku pättüttütä adiu'anü̧ttü̧: ¿Suronä̧ jȩ'kuä̧'i̧jü̧mä̧ jȩä̧chä̧ku̧jä̧, pättü'anü̧ tä̧jí̧ ja̧'wa̧nü̧ pä'ü jui'üdä̧jä̧, ä̧rä̧mi̧'ü̧ täi pättüttütä adiwa'a tä̧jí̧?

²⁴ Ja̧u̧ttü̧mä̧, isopäi'ünä̧, pi̧jä̧ttü̧mä̧ Ubo I̧tti̧mä̧ suronä̧ jü̧ttü̧'i̧nä̧ jȩpü̧ ikua pä'ü ujuru kku̧nä̧rü̧ pä'ü ku̧wo̧juä̧tu̧kuä̧kua̧'a̧nü̧, i̧'chü̧ juiyünä̧ wa̧ parárisi na̧'ä̧chü̧rü̧ pä'inü̧: —Ukuru pä'üsä, ä̧rä̧mi̧'ü̧, ku̧'ä̧bä, ȩmi̧pü̧ kuojusodera̧'a̧ täi.

²⁵ Päü kä'ädü, yotäku ttä'ka jo̧mȩttü̧ ä̧rä̧mi̧'ü̧ ü̧'ä̧bä ȩmi̧pü̧, Dio-rü esewä̧ya̧ ojusodera̧'a̧ku̧ i̧wi̧nü̧.

²⁶ O'katoi'ünä̧, ¡isottü̧! pä'ü ye'inä̧tü̧, ye'ükkä̧nü̧ Dio-rü eseäkuäu, pä'inä̧tü̧: —Jitä mo̧ro̧ totokü jä̧'i̧jü̧ topäjätüjä̧.

Jesú-mä̧ Mateo-rü wopinü̧

²⁷ Jua̧u̧ o'ka'a Jesú-mä̧ rä'opächü kkä̧nü̧, Roma-ra̧'a̧ weäwä impuesto ka̧ka̧tä̧'i̧jü̧ Mateo pä'ü mi̧kua̧rü̧ topinü̧. Jua̧u̧ru̧ impuesto ka̧ka̧kuo̧mȩ ü̧'a̧'a̧ topü, Jesú-mä̧ päinä̧ku̧: Ttüku ichi

²⁸ Ja̧'wa̧nü̧ päku, Mateo-mä̧ yotäku o'kajuiyünä̧ kä'ädi'ü, ä̧rä̧mä̧chü̧ Jesú-ku 'chi̧nü̧.

²⁹ Mateo-mä̧ ojusodettü, Jesú-ru eseu ü'ä'käri jȩi̧ni̧yä̧ku̧; ja̧'wa̧nü̧ u̧ju̧na̧'a̧ kkorotü impuesto ka̧ka̧tä̧'i̧jä̧tü̧'i̧nä̧ ja̧'wa̧ta̧nü̧ kkorotü'i̧nä̧ juätütäku mesa isodenä̧ pȩji̧nä̧tü̧.

³⁰ Ja̧'wa̧nü̧ ji̧yä̧u̧ fariseo wotümä̧ ja̧'wa̧ta̧nü̧ weäwä wȩnȩ wo̧juȩkuä̧ isotü'i̧nä̧ Jesú u̧wo̧juȩtä̧u̧rü ttüjü'kü juiyünä̧ jä̧u̧ pä'inä̧tü̧: —¿Tta̧'a̧nü̧ pä'ü ukutumä̧ impuesto ka̧ka̧kuä̧ isotüku, suronä̧ jȩä̧kuä̧wä̧ isotüku kuänü̧'i̧nä̧, au'i̧nä̧ pȩjä̧tü̧jä̧ttü̧?

³¹ Pättiyäku Jesú päinä̧u̧: Na̧'ä̧cho̧ko̧tü̧mä jawapü ru̧wa̧rü̧mä̧ rekuä rü̧jo̧ko̧u̧, na̧'ä̧chä̧tü̧tä̧ ja̧'a̧ jua̧u̧ru̧ rekuä rü̧jä̧u̧mä̧.

³² Ttümä̧ adiu jȩpä̧tü̧rü̧mä̧ ȩmü̧ ichokü pinü̧sä̧, pärokua'akutä surojü jȩpä̧tü̧rü̧, jua̧u̧ttü̧ kättädächa pä'ü ȩmü̧ ichinü̧sä̧.

A̧do̧chä̧kuä̧wä̧, Jesú-ru jä'epinä̧tü̧

³³ Jesú-ru pä'inä̧tü̧: —¿Tta̧'a̧nü̧ pä'ü Ju̧a̧ u̧wo̧juȩtä̧u̧'i̧nä̧, fariseo wotü ttu̧wo̧juȩtä̧u̧'i̧nä̧ ttu̧kuȩ a̧do̧chü̧ Dio-rü ukuoku jȩtta̧'a̧nä̧, uku ku̧wo̧juȩtä̧u̧mä̧ a̧wä̧rü̧tä̧, kuä̧nü̧tä̧tä̧ jȩpä̧tü̧jä̧ttü̧?

³⁴ Pättiyäku Jesú-mä̧ ädätinä̧u̧: —¿Ditäjä̧ttü̧, ya̧tȩ irekuarü ȩmü̧ pä'käri jȩo̧mȩnä̧, ä̧tȩpä̧jä̧u̧ttu̧ u̧kuȩ a̧do̧chü̧mä̧, chutä ä̧tȩpä̧ji̧ jitütäku ü̧ja̧'a̧nä̧mä̧?

³⁵ Ja̧'wa̧nü̧ ja̧'a̧nä̧, irekuarü ȩmä̧ji̧rü̧ ttȩmi̧pü̧ mo̧ro̧ rȩbȩä̧kuä̧wä̧kua̧'a̧. Ja̧'wa̧nü̧ jü̧ mo̧ro̧mä̧, ttu̧kuȩ a̧do̧chü̧ Dio-rü ttukuokuäkuotü.

³⁶ Ja̧'wa̧ta̧nü̧ wȩnȩtü̧ päinä̧u̧: —Ya̧tȩ'i̧nä̧ pü̧jä̧ta̧ tä̧bo̧i̧sä̧ta̧ttü̧mä̧ 'kui'opümä̧, ja̧rȩä̧ta̧nä̧mä̧ be'epümä̧ 'tü̧ä̧wo̧kü̧; ja̧'wa̧nü̧ 'tü̧ttü̧ttü̧mä̧ ja̧rȩä̧ta̧ 'tü̧ȩkuä̧cho̧mȩnä̧ tä̧bo̧i̧sä̧ta̧mä̧, sȩrä̧wi̧'a̧'a̧nä̧, ja̧rȩä̧ta̧tä̧tä̧ kki̧'i̧pa̧'a̧, adiu yoräteunä̧mä̧ kki̧'o̧ka̧'a̧ tä̧bo̧i̧sä̧ta̧ku̧mä̧.

³⁷ Ja̧'wa̧ta̧nü̧ vino isoya jareoyamä̧, odres isäba täboisäbanämä̧ 'karü kku̧nä̧wo̧kü̧; ja̧'wa̧nü̧ ttü'karüttümä̧ vino isoya akuäba odres isäbatä sȩrä̧wi̧'a̧'a̧, ja̧'wa̧nü̧ päi'omȩnä̧ vino isoyamä̧ to'äu iku toe'ächa'a.

³⁸ Ja̧'wa̧nü̧ jü̧ ja̧'a̧ttü̧ vino isoya jareoyamä̧ ji̧yȩta̧'a̧kuä̧ odres isäba jareäbanä̧ 'karü kku̧nä̧wä̧ ja̧'a̧.

³⁹ Ya̧tȩ'i̧nä̧ vino isoya a̧'ti̧poya awipü'ka̧mä̧; jareoyamä̧ awa päokä̧kua̧, jua'amä̧: A̧'ti̧po̧yatä adiwoyamä̧ pä'attü̧.