San Lucas 4 - Nuevo Testamento Uwotjüja

Äwettä Jesú-ru kka̧kuä̧mȩ'ü̧ toinü̧ wȩnȩ

¹ Epíritu Sa̧tu̧ jo̧mȩnü̧tä̧ wa̧, Jesú-mä̧ Jordán ajera̧'a̧ttü̧ ppa̧wä̧chi̧'a̧'a̧, Epíritumä̧ rȩbi̧yu̧ dȩ'a̧ra̧'a̧ku̧ oipi̧nä̧ku̧.

² Jua'amä̧, ttü̧ja̧ ta̧ju̧ mo̧ro̧ jo̧mȩnä̧ kki̧nü̧, äwettä kka̧kuä̧mȩ'ü̧ toa'anä̧. Jua̧u̧nü̧ mo̧ro̧ yoriso u̧kuȩ ukuoka'atä kki̧nü̧, ji̧yȩnü̧ mo̧ro̧ 'kuäopäji o'ka'a ukua ppä̧'i̧ri̧ji̧nä̧ku̧.

³ Ja̧'wa̧nü̧ ja̧'a̧ äwettämä̧ päinä̧ku̧; —Isopäi'ünä̧ Dio i̧tti̧ kuttümä̧ po'ki ido'ki trigo i̧ri̧si̧tä̧ pärowächi'ünä̧ pä'i.

⁴ Ja̧'wa̧nü̧ päiyäku Jesú-mä̧ ädätinä̧ku̧: —Wȩyu̧kuä̧ wȩnȩmä̧ pä'a: Ttü̧ja̧sa̧mä̧ suro trigo i̧ri̧si̧ttü̧tä̧mä̧ a̧'kua̧ro̧kü̧ jä̧kua̧.

⁵ Jua̧u̧nü̧ o'ka'a äwettämä̧ ju'toju jo̧mȩ o'ipächäji̧'ka̧, pi̧jä̧ttü̧ ruwo o'kajuiyünä̧ i̧jȩpü̧

⁶ Päinä̧ku̧: —Ukurumä̧ pi̧yȩ ruwo weäwä'i̧nä̧ ja̧'wa̧ta̧nü̧ üadiwä'i̧nä̧ o'kajuiyünä̧ chi̧yä̧kua̧jä̧. Jua'amä̧ ttürü iyäwi'inü̧ ja̧'a̧ttü̧, chiya pädäkurumä̧ iyüsä.

⁷ Uku kuiwe'kiyunä̧ kkä̧mä̧dü̧ ttürü kueseuttümä̧, pi̧yȩ o'kajuiyünä̧tä̧ kuiäre jä̧kua̧'a̧.

⁸ Jesú-mä̧ ädätü päinä̧ku̧: —Porümä̧ tü'ipächi satanás, wȩyu̧kuä̧ wȩnȩmä̧ pä'a: Ku̧ru̧wa̧ Dio-rütä kuiwe'kiyunä̧ kkä̧mä̧dü̧ eseu, Jua̧u̧ru̧tä̧ kukuotajä̧, jü̧nä̧.

⁹ Jua̧u̧nü̧ o'ka'a äwettämä̧ Jerusarȩ́ ütawiyära̧'a̧ o'ipächü, Dio-rü ukuokuäkuäwode wä̧mȩ 'cha'ädäji̧'ka̧ päinä̧ku̧: —Isopäi'ünä̧ Dio i̧tti̧ kuttümä̧ porü, rȩjȩku̧ tü'ächi;

¹⁰ Wȩyu̧kuä̧ wȩnȩmä̧ pä'a: Dio-mä̧ á̧gȩrȩ-rü wȩä̧kua̧ ukuru tokue'ü juiyünä̧ tta̧ttä̧ra̧ku̧ pä'ümä̧.

¹¹ Ttu̧mü̧nä̧ 'chu̧ttä̧dä̧kua̧jä̧ juädu inä̧dunä̧ kui̧jä̧pü̧ ppeokuächü juiyünä̧.

¹² Päiyäku, Jesú-mä̧ ädätinä̧ku̧: —Ja̧'wa̧ta̧nü̧ päwina̧'a̧ jä̧'i̧ja̧'a̧: Ku̧ru̧wa̧ Dio-rümä̧ kka̧kuä̧mȩ'ü̧mä̧ to'kuä, jü̧nä̧.

¹³ Täkü, äwettämä̧ o'kajuiyünä̧ kka̧kuä̧mȩ'ü̧ topäji̧'ka̧, Jesú ü̧jo̧mettü̧mä̧ 'ke'i̧pä̧chi̧nü̧, juiyo rekuomä̧kü̧tä̧.

Jesú aditäwä kkä̧mä̧dü̧ aditinü̧

¹⁴ Jesú Epíritu Sa̧tu̧ jo̧mȩnü̧ wa̧ Galirea rȩjȩra̧'a̧ku̧ ppa̧wä̧chi̧'a̧ja̧'a̧, o'katoi'ünä̧ juȩnȩ ütawiyä jäyänä̧ kka̧kuä̧tü̧ jua̧u̧ ütü'kü ukuowa'a ä̧ju̧kui̧nä̧tü̧.

¹⁵ Sinagoga odenä̧ ütawiyä o̧du̧nä̧ kka̧ku̧ odettü u̧wo̧juȩto̧mȩnä̧, o'katoi'ünä̧ ttesewinä̧ku̧.

Jesú Nazare-nä̧ ü̧ji̧nü̧ wȩnȩ

¹⁶ Ja̧'wa̧nü̧ jä̧ji̧ o'ka'a Jesú-mä̧ büó juoinomȩ Nazare ütawiyäku ichinü̧. Kko̧ro̧nü̧ jä̧'i̧jü̧ta̧'a̧nü̧ sawaru mo̧ro̧ päi'omȩnä̧ sinagoga isodenä̧ do'ächi'äji̧'ka̧ wȩyu̧kuä̧ wȩnȩ ukuokua pä'ü ä̧rä̧mi̧'i̧nü̧.

¹⁷ Ä̧rä̧mi̧'ä̧ja̧'a̧ profeta Isaía kuyäru'tä ttiyinä̧ku̧. Ttiyäjäku ba'epü toomȩnä̧ pa̧'a̧nü̧ wȩyu̧kuo̧mȩ po̧kui̧pi̧nü̧:

¹⁸ Dio i̧sa̧ Epíritu ttünä̧tä̧ kkü̧, Jua'amä̧ ȩmi̧nä̧ku̧ cha'attü, usurä isotürü adiwäjuei jareü wȩnȩ ȩpü̧ chiya pä'ü; weinä̧ku̧sä̧ tta̧mi̧ iso'kinä̧ usurä ȩmä̧wä̧tü̧rü̧ aditü chikua pä'ü. Kärenä̧ pȩjä̧tü̧rü̧ rä'epü chikua pä'ü. Ja̧'wa̧ta̧nü̧ ä̧to̧kä̧tü̧rü̧ tottünä̧ jȩcha̧ pä'ü; suronä̧ jȩttä̧u̧ usurä ȩmä̧wä̧tü̧rü̧ rä'epü chikua pä'ü;

¹⁹ Tu̧ru̧wa̧ ppädü año jidäwa pä'ü.

²⁰ Pä'ü kä'ädü Jesú-mä̧, kuyäru'tä jutäwa'a kkäropü, sinagoga isodenä̧ ppä̧'ä̧dä̧rü̧rü̧ pä'äjita'anü̧ iyopo'ü ü̧'ä̧mä̧da̧'a̧, o'katoi'ünä̧ juȩnȩ pȩjä̧tü̧mä̧ to̧ttä̧ri̧nä̧ku̧.

²¹ Ja̧'wa̧nü̧ ja̧'a̧, kkä̧mä̧dü̧ päinä̧u̧: —Jitä mo̧ro̧, pätekuächa'a pi̧yȩ wȩyu̧kuä̧ wȩnȩ päümä̧, ukutu kuä'katuku jo̧mȩttü̧.

²² O'katoi'ünä̧tä̧ Jesú ütü'kümä̧ adiu ukuokuinä̧tü̧ ja̧'wa̧ta̧nü̧ adiwä jueitä ukuokuiyä̧u̧, isoo pä'ü amükuädinä̧tü̧. Jua̧u̧ pä'ü kkä̧nü̧ pä'inä̧tü̧: —¿Pidemä̧ José i̧tti̧ pä'ijümä̧kü̧?

²³ Pättiyäku Jesú ädätinä̧u̧: —Isopäi'ünä̧ ukutumä̧ päkuä'chätukuäkua̧sä̧: Jawapü adikuä i̧sa̧ kua'attü̧, kua̧mü̧nä̧ pa̧ja̧tü̧ adiku ikui: O'kajuiyünä̧ Cafarnaúm ütawiyättü jȩ'ku̧ ukuowa'a tä̧ju̧kuä̧ji̧mä̧, porü kui̧rȩjä̧ttü̧'i̧nä̧ jȩpi̧ jü̧nä̧.

²⁴ Jua'a yaboku päinä̧u̧: —Isopäi'ünä̧ pädäu̧jä̧, profeta wa̧mä̧ ya̧tȩ'i̧nä̧ toa'a idepiyuttü ttesewäkumä̧.

²⁵ Isopäi'ünä̧ Iraettümä̧ rekuätü rȩkua̧mü̧ kka̧kui̧nä̧tü̧ Elía ü̧ji̧nü̧ pä̧nä̧, wäbodäkuä año ja̧'a̧nä̧ kkoro año ju'to jo̧mȩnä̧ juä̧jä̧ttü̧ ppäi ttuttinü̧ mo̧ro̧mä̧.

²⁶ Ja̧'wa̧nü̧ ja̧'a̧nä̧ juätü nä̧tü̧ ttü̧ja̧'a̧ku̧mä̧ Elía-rümä̧ weäwi'oka'a ji̧na̧'a̧. Jua'a ja̧jü̧ jueimä̧, Sarepta ütawiyänä̧, Sidón ütawiyä tü'kü kkä̧ju̧ru̧tä̧ ppädünä̧ weäwi'ina̧'a̧.

²⁷ Ja̧'wa̧ta̧nü̧ Irae rȩjȩnä̧, profeta jü̧nä̧ Eliseo ü̧ji̧nü̧ pä̧nä̧ rekuinä̧tü̧ Repra mä̧richei na̧nȩpä̧tü̧mä̧, juätüttümä̧ ya̧tȩrü̧'i̧nä̧ aditü ikuäwoka'anä̧, Naamán, Siria ttü̧ja̧sa̧rü̧tä̧ ü̧'i̧pü̧nä̧ aditü ikuäwina̧'a̧.

²⁸ Pi̧yȩ pä'a ä̧ju̧ku̧, sinagogas isodenä̧ kka̧kuä̧tü̧mä̧ o'katoi'ünä̧ rü̧ȩnä̧ ra̧wä̧ri̧pü̧,

²⁹ ä̧rä̧mä̧kuä̧wi̧'ü̧, Jesú-ru 'chu'ädo'ü ütawiyä u̧mi̧ku̧ rä'epü iku, ütawiyä kkü̧nä̧ro̧mȩ, mü̧ä̧'ka 'to'tose jo̧mȩ, rȩjȩku̧ kki'opü ttikuarü pä'ü ttȩmi̧pä̧ja̧'a̧nä̧,

³⁰ ttü̧'kä̧tȩ jo̧mȩnä̧ tü'ipächü i̧wi̧'i̧ni̧yä̧u̧.

Epíritu su̧ro̧pa̧ ttü̧ja̧sa̧nä̧ ü̧ji̧nü̧ wȩnȩ

³¹ Jesú-mä̧ Galirea rȩjȩra̧'a̧, Cafarnaúm ütawiyära̧'a̧ 'chä̧ji̧'ka̧, sawaru mo̧ro̧ jü̧'a̧kuä̧ juätü ttü̧ja̧rü̧ wo̧juȩti̧nü̧.

³² Ja̧'wa̧nü̧ u̧wo̧juȩtü̧mä̧ ¡isoo! pä'ü tta̧mu̧kuädinä̧ku̧, ukuo kkü̧nä̧ ukuokuiyä̧u̧.

³³ Juode sinagoga isodenä̧, ya̧tȩ epíritu su̧ro̧pa̧ ü̧jä̧ku̧ kki̧nü̧; jua̧u̧mä̧ ujuruku pä̧i̧ku̧nä̧ wopi'inü̧:

³⁴ Ja̧'a̧tä̧ topitü; ¿Däjé jȩ'kua̧ päkuätüttü̧ ujuturumä̧, Jesú Nazare ttü̧ja̧sa̧mä̧? ¿Ujuturu Be'epäjipü kuichäja'a? ukurumä̧ wo̧jua̧sä̧: Dio i̧sa̧ Sa̧tu̧ pä'ümä̧.

³⁵ Pä'ü woiyäku, Jesú-mä̧ ra̧wä̧ri̧pü̧nä̧nü̧ päinä̧ku̧: —¡'Koruchi'i! ¡jua̧u̧ ku̧jä̧ku̧ttü̧ rä'opächi!, päomȩnä̧. Jua̧u̧ ttü̧ja̧sa̧tä̧ ttü̧'kä̧tȩ jo̧mȩ ma̧ä̧ma̧'a̧nä̧, epíritu su̧ro̧pa̧mä̧ jua̧u̧ttü̧ rä'opächinü̧, jua̧u̧ru̧ suronä̧ jȩo̧ka̧'a̧nä̧tä̧.

³⁶ Ja̧'wa̧nü̧ päi'i̧yä̧u̧ o'katoi'ünä̧, ye'ünä̧nü̧ pä'äkuäwinä̧tü̧: —¿Pi̧yȩmä̧ ti̧yȩ wȩnȩjä̧ttü̧, ujuruku i̧wȩnȩku̧ weomȩnä̧'i̧nä̧ epíritu suropätü'i̧nä̧ rättächünä̧, jü̧mä̧?

³⁷ Ja̧'wa̧nü̧ aditomȩnä̧, Jesú ütü'kümä̧ Galirea rȩjȩ o'kajuiyünä̧tä̧ ukuowi'ina̧'a̧.

Simón i̧mi̧yajuru Jesú aditü ikuinü̧

³⁸ Jesú-mä̧ sinagoga isodettü rä'opächü 'chä̧ji̧'ka̧ Simón ojusodenä̧ doächi'omȩnä̧. Simón i̧mi̧yaju rü̧ȩnä̧ du'unä̧ na̧jä̧chi̧yä̧u̧ Jesú-ru ppädiyatü pä'ü jättepinä̧ku̧,

³⁹ Ja̧'wa̧nü̧ ja̧'a̧, juäju kkü̧'a̧'a̧ku̧ ja̧rȩyu̧nu̧ pä'i'ü, na̧jä̧chü̧ we'ünä̧nü̧ päomȩnä̧; na̧jä̧chä̧ji̧ttü̧mä̧ pi̧'ä̧jä̧ju̧ o'kajumä̧ ä̧rä̧mi̧'ü̧ ttu̧kuȩ iyinä̧ju̧.

Jesú-mä̧ na̧nȩpä̧tü̧rü̧ aditü ikuinü̧

⁴⁰ Kkä̧wa̧ ma̧ä̧cho̧mȩnä̧, o'katoi'ünä̧ ttumä̧richei na̧nȩpä̧tü̧rü̧ kku̧nä̧rä̧tü̧mä̧, Jesú ü̧jo̧mȩku̧ i'kächinä̧tü̧. Ja̧'wa̧nü̧ ja̧'a̧ juätü yotukunä̧rü̧ u̧mü̧ mȩ'ü̧ aditü ikuinä̧u̧.

⁴¹ Ja̧'wa̧ta̧nü̧ rekuätü epíritu-tu̧ rä'äkuäu wopinä̧tü̧: ¡Ukumä̧ Dio i̧tti̧jä̧! pä'ü wottäku, Jesú-mä̧ wottü juiyünä̧tä̧ ra̧wä̧rü̧nü̧ wȩo̧ko̧u̧ pinä̧tü̧, Chujuamä̧ Crito ja̧'a̧ pä'ü ttu̧wo̧juä̧ku̧.

Sinagoga odewiyättü Jesú jiäwinü̧ wȩnȩ

⁴² Kkoro mo̧ro̧ juomȩnä̧ Jesú-mä̧, ütawiyättü rä'opächü, ttü̧ja̧ toächomȩku̧ 'chi̧nü̧. Ja̧'wa̧nü̧ i̧'chä̧ja̧'a̧ ttü̧ja̧mä̧ usú 'chä̧jä̧'kotü po̧kui̧pü̧mä̧, i̧wi̧'ü̧ juiyünä̧tä̧ jättepinä̧ku̧.

⁴³ Ja̧'wa̧nü̧ ja̧'a̧nä̧, Jesú-mä̧ päinä̧u̧: —Kkoro ütawiyänä'i̧nä̧, jareünä̧ Dio weü wȩnȩ jidäwa pä'ü rekuä rü̧ja̧'a̧, jua'amä̧ pi̧yȩtä̧ ja̧'a̧tȩ'ü̧ wȩ'ä̧wa̧ cha'attü̧.

⁴⁴ Ja̧'wa̧nü̧ pä'ü Galirea rȩjȩnä̧ sinagoga odewiyättü ji'äwinü̧.