San Lucas 3 - Nuevo Testamento Uwotjüja

Bautizo jȩpä̧'i̧jü̧, Ju̧a̧ jiäwinü̧ wȩnȩ

¹ Tiberio ru̧wa̧ emperador jü̧nä̧mä̧, ttü̧jä̧pü̧ttü̧ ji̧mü̧tȩ año jo̧mȩnä̧ päi'ünä̧ wea'a, Poncio Pilato-mä Judea rȩjȩttü̧ ru̧wa̧ gobernador ji̧na̧'a̧. Ja̧'wa̧ta̧nü̧ Herode-mä̧ Galirea rȩjȩnä̧ ru̧wa̧ gobernador pinü̧, i̧jä̧wa̧ Filipo-mä̧ Iturea rȩjȩnä̧'i̧nä̧ ja̧'wa̧ta̧nü̧ Traconite rȩjȩnä̧'i̧nä̧ ru̧wa̧ gobernador ü̧'a̧'a̧; ja̧'wa̧ta̧nü̧ Lisanias-mä̧ Abilene rȩjȩnä̧ ru̧wa̧ pi̧nü̧.

² Aná'i̧nä̧, Caifái̧nä̧ sacerdote-tü̧ tturuwotü jü̧nä̧ ttü̧ja̧ku̧ pä̧nä̧. Zacaría i̧tti̧ Ju̧a̧-rü̧ rȩbi̧yu̧ dȩ'a̧ra̧'a̧ttü̧ Dio ukuokuinü̧.

³ Ja̧'wa̧nü̧ ja̧'a̧ Ju̧a̧-mä̧ Jordán aje i̧sä̧jä̧nä̧ kka̧ku̧ ütawiyä o'kajuiyünä̧ 'chä̧nü̧ ji'äwinü̧, suronä̧ jȩttä̧'i̧jü̧ Dio jȩpü̧ ikuatü pä'ümä̧, bautizo jȩttä̧kuä̧u̧nä̧.

⁴ Profeta Isaía i̧wȩti̧nä̧'tänä̧, pa̧'a̧nü̧ päü'a̧kuä̧ ji̧na̧'a̧: Rȩba̧ dȩ'a̧ra̧'a̧ttü̧ ya̧tȩ i̧wȩnȩ pä̧i̧ku̧nä̧ rȩmi̧pa̧'a̧: Tu̧ru̧wa̧ u̧mä̧nä̧ aditiyätukuirü, u̧mä̧ni̧yä̧ jue'epiyätukuirü.

⁵ Müä'kiyu kkada'ka wäose jo̧mȩ'i̧nä̧ yorekuäkua'a, Ja̧'wa̧ta̧nü̧ müä'kiyu'i̧nä̧, jua̧u̧nä̧ todeu müä'kiyu'i̧nä̧ yorätewächi'ünä̧ jui'ädü ikuäwäkua'a. Mä̧ni̧yä̧ wi̧sä̧u̧mä̧ juekuäkua'a ja̧'wa̧ta̧nü̧ mä̧ni̧yä̧ surojü'i̧nä̧ aditü ikuäwäkua'a.

⁶ Ja̧'wa̧ta̧nü̧ ttü̧ja̧mä̧ o'katoi'ünä̧, ra̧wä̧pi̧jü̧ttü̧ ppä'ädürü Dio wea'a tottäkuotü.

⁷ Chutä, bautizo jȩa̧tü̧ pä'ü, ttü̧ja̧ rekuätü ttichiyäku, Ju̧a̧-mä̧ päinä̧u̧: ¡Ä̧ka̧tü̧ wotü isotüjä̧! ¿Dí jiäwinä̧tu̧kuä̧ku̧ttü̧ Dio ro̧ȩpä̧kuȩttü̧ tü'ipü ku̧ji̧pä̧tu̧kua̧ pä'ümä̧?

⁸ Isopäi'ünä̧ surojü käkuädi'ätukua'attü ttü̧ja̧ tottünä̧ i̧jȩkuä̧tu̧kui̧, kua̧'kua̧tu̧ku̧ jakuänä̧: «Ujutumä̧ Abraha̧ i̧tti̧mü̧jä̧» pä'ümä̧ kuamükuädätukuä. Isopäi'ünä̧tä̧ pädäu̧jä̧, Dio-mä̧ pidü inäduttü'i̧nä̧ Abraha̧ i̧tti̧mü̧rü̧mä̧ rä'epü u̧ju̧nu̧'a̧nü̧ ja̧'a̧.

⁹ Ja̧'wa̧ta̧nü̧ i̧da̧pä̧'kȩmä̧ täkü dauwiyä kkada'ka jȩpü̧ kku̧nä̧wa̧'a̧ kka̧'a̧; dauwiyä o'kajuiyünä̧ adiwä juei u̧wä̧ju̧ wȩjo̧kü̧mä̧ kku̧'u̧ iku, okuränä̧ kkuwü ikuäwä ja̧'a̧.

¹⁰ Ja̧'wa̧nü̧ ji̧ä̧wi̧yä̧u̧ ttü̧ja̧mä̧ jä'epü ttä̧ju̧kui̧nä̧ku̧: —¿Ujutumä̧, däjetä jȩta̧ pä'ü ja̧'a̧jä̧ttü̧?

¹¹ Jättepäku Ju̧a̧-mä̧ ädätinä̧u̧: —ü̧'ka̧tä̧wä̧ti̧yu̧ to̧ta̧rȩ kku̧nä̧rü̧mä̧, jui̧'a̧rü̧ ppä'ädi; ja̧'wa̧ta̧nü̧ u̧kuȩ kku̧nä̧rü̧'i̧nä̧, u̧kuȩ jui̧'a̧rü̧ ppä'ädi.

¹² Ja̧'wa̧ta̧nü̧ impuesto pättü, pärätä ka̧ka̧tä̧'i̧jä̧tü̧ttü̧ bautizo jȩttä̧kuä̧wa̧ pä'ü ichäjä'kotü, yotüte Ju̧a̧-rü̧ jä'epü ä̧ju̧kui̧nä̧tü̧: —Wo̧juȩkuä̧ i̧sa̧, ¿däjetä jȩtü̧'a̧nü̧jä̧ttü̧?

¹³ pättäku päinä̧u̧: —We'ü kku̧nä̧wo̧mȩttü̧'i̧nä̧ abonä̧nü̧mä̧ jä̧kuȩpä̧tu̧kuä̧.

¹⁴ Ja̧'wa̧ta̧nü̧ su̧ro̧do̧u̧ttü̧'i̧nä̧ yotüte jä'epü ttä̧ju̧kui̧nä̧ku̧: —Ujutu'i̧nä̧ ¿däjetä jȩtü̧'a̧nü̧jä̧ttü̧? Jättepäku ädätinä̧u̧: —Ya̧tȩrü̧'i̧nä̧ ye'epä'chü jȩ'kuä̧tu̧kuä̧, jȩtto̧ka̧'a̧nä̧mä̧ yapareu kärenä̧ ttütünä̧mä̧ jȩ'kuä̧'chä̧tu̧kuä̧: —Kuäditäwätuku ttimi̧tünä̧tä̧ esewätukui.

¹⁵ Ttü̧ja̧mä̧ to̧pä̧rü̧ tta̧ttä̧ro̧mȩ ja̧'a̧, o'katoi'ünä̧ jakuänä̧tä̧ amükuädinä̧tü̧ Ju̧a̧-rü̧mä̧, Crito ja̧'a̧ tä̧jí̧ pä'ü.

¹⁶ Jua̧u̧ topü Ju̧a̧-mä̧ päinä̧u̧: Ttümä̧, isopäi'ünä̧ ukuturumä̧ ajiyanä̧tä̧ bautizo jȩpü̧sä̧; ja̧'wa̧nü̧ ja̧'a̧nä̧, ttüttü'i̧nä̧ abonä̧nü̧ ujuru kku̧nä̧rü̧ ichü; jua̧u̧ ü̧jä̧pü̧ isäya isappä chejädü juiyü'anü̧ wa̧sä̧. Jua̧u̧tä̧tä̧ jä̧kua̧'a̧ ukuturu Epíritu Sa̧tu̧nä̧'i̧nä̧, okuränä̧'i̧nä̧ bautizo jȩä̧kuä̧mä̧.

¹⁷ U̧mü̧nä̧ 'chu̧ä̧rä̧nü̧ i'chachü trigo pojäwäkä, jua̧u̧ pojü ikua pä'ü. Jua̧u̧ trigo-mä̧ i̧so̧ka̧nä̧ wa'adü kku̧nu̧, wä̧mȩ isä'kuatä okurä yoriso na̧wi̧pokoränä̧ kkuwü i̧kuä̧kua̧.

¹⁸ Ju̧a̧-mä̧, pa̧'a̧nü̧'i̧nä̧ ja̧'wa̧ta̧nü̧ kkoromȩnä̧'i̧nä̧ ujuruku wo̧juȩtü̧nü̧ ttü̧ja̧rü̧mä̧ adiwäjuei jareü wȩnȩ ji'äwinü̧.

¹⁹ Ja̧'wa̧ta̧nü̧ ru̧wa̧ Herode-rü ujuruku pä'inü̧, ü̧jä̧wa̧ irekua Herodía-rü irekua jü̧nä̧ ü̧ji̧yä̧ku̧ ja̧'wa̧ta̧nü̧ kkoro rü̧ȩnä̧ surojü'i̧nä̧ jȩi̧yä̧ku̧.

²⁰ Jua̧u̧ jä̧jo̧mȩttü̧'i̧nä̧ abonä̧nü̧ suronä̧ jȩpü̧ Herode-mä̧ Ju̧a̧-rü̧ kärenä̧ rütinü̧.

Ju̧a̧-mä̧, Jesú-ru bautizo jȩpi̧nü̧

²¹ O'katoi'ünä̧ bautizo jȩpä̧kuä̧u̧ kättäda'anä̧, Jesú'i̧nä̧ bautizo jȩi̧nä̧ku̧; Dio-rü ukuokua'a jakuänä̧ mo̧ro̧jä̧ bawekuächa'attü,

²² Epíritu Sa̧tu̧ i̧mȩyȩwi̧'i̧nä̧ku̧ unuku 'kua̧ra̧nä̧; ja̧'wa̧nü̧ päi'a'attü, ya̧tȩ i̧wȩnȩ, mo̧ro̧jä̧ra̧'a̧ttü̧ rä̧mi̧pi̧na̧'a̧: —«Ukumä̧ ttü chi̧tti̧jä̧ rȩni̧'a̧; ukuru rü̧ȩnä̧ eseusä.»

Jesucrito ü̧tä̧mü̧mi̧nä̧

²³ Jesú-mä̧ treinta-nü̧ año jo̧mȩnä̧ kku̧nä̧ri̧nü̧ aditäwä kkä̧mä̧dü̧ aditinü̧mä̧. Jesú-mä̧ José i̧tti̧ pä'ütä ttu̧wo̧jui̧nä̧ku̧. José-mä̧ Elí i̧tti̧ ji̧na̧'a̧,

²⁴ jua'a yabo Matat i̧tti̧ ji̧na̧'a̧, jua'a yabo Rewí i̧tti̧ ji̧na̧'a̧, jua'a yabo Mequí i̧tti̧ ji̧na̧'a̧, jua'a yabo Janai i̧tti̧ ji̧na̧'a̧, jua'a yabo José i̧tti̧ ji̧na̧'a̧,

²⁵ jua'a yabo Matatias i̧tti̧ ji̧na̧'a̧, jua'a yabo Amós i̧tti̧ ji̧na̧'a̧, jua'a yabo Nahúm i̧tti̧ ji̧na̧'a̧, jua'a yabo Eslí i̧tti̧ ji̧na̧'a̧, jua'a yabo Nagai i̧tti̧ ji̧na̧'a̧,

²⁶ jua'a yabo Máat i̧tti̧ ji̧na̧'a̧, jua'a yabo Matatías i̧tti̧ ji̧na̧'a̧, jua'a yabo Semeí i̧tti̧ ji̧na̧'a̧, jua'a yabo Josec i̧tti̧ ji̧na̧'a̧, jua'a yabo judá i̧tti̧ ji̧na̧'a̧,

²⁷ jua'a yabo Joanán i̧tti̧ ji̧na̧'a̧, jua'a yabo Resá i̧tti̧ ji̧na̧'a̧, jua'a yabo Zorobabel i̧tti̧ ji̧na̧'a̧, jua'a yabo Salatiel i̧tti̧ ji̧na̧'a̧, jua'a yabo Nerí i̧tti̧ ji̧na̧'a̧,

²⁸ jua'a yabo Mequí i̧tti̧ ji̧na̧'a̧, jua'a yabo Adí i̧tti̧ ji̧na̧'a̧, jua'a yabo Cosam i̧tti̧ ji̧na̧'a̧, jua'a yabo Emada̧ i̧tti̧ ji̧na̧'a̧,

²⁹ jua'a yabo Er i̧tti̧ ji̧na̧'a̧, jua'a yabo Jesú i̧tti̧ ji̧na̧'a̧, jua'a yabo Eliezer i̧tti̧ ji̧na̧'a̧, jua'a yabo Jorim i̧tti̧ ji̧na̧'a̧,

³⁰ jua'a yabo Matat i̧tti̧ ji̧na̧'a̧, jua'a yabo Rewí i̧tti̧ ji̧na̧'a̧, jua'a yabo Simeón i̧tti̧ ji̧na̧'a̧, jua'a yabo Judá i̧tti̧ ji̧na̧'a̧, jua'a yabo José i̧tti̧ ji̧na̧'a̧, jua'a yabo Jonam i̧tti̧ ji̧na̧'a̧,

³¹ jua'a yabo Eliaquim i̧tti̧ ji̧na̧'a̧, jua'a yabo Meleá i̧tti̧ ji̧na̧'a̧, jua'a yabo Mená i̧tti̧ ji̧na̧'a̧, jua'a yabo Matatá i̧tti̧ ji̧na̧'a̧,

³² jua'a yabo Natán i̧tti̧ ji̧na̧'a̧, jua'a yabo Dawi i̧tti̧ ji̧na̧'a̧, jua'a yabo Jesé i̧tti̧ ji̧na̧'a̧, jua'a yabo Obed i̧tti̧ ji̧na̧'a̧, jua'a yabo Booz i̧tti̧ ji̧na̧'a̧, jua'a yabo Salmón i̧tti̧ ji̧na̧'a̧,

³³ jua'a yabo Naasón i̧tti̧ ji̧na̧'a̧, jua'a yabo Aminadab i̧tti̧ ji̧na̧'a̧, jua'a yabo Admín i̧tti̧ ji̧na̧'a̧, jua'a yabo Arní i̧tti̧ ji̧na̧'a̧, jua'a yabo Esrom i̧tti̧ ji̧na̧'a̧, jua'a yabo Fare i̧tti̧ ji̧na̧'a̧,

³⁴ jua'a yabo Judá i̧tti̧ ji̧na̧'a̧, jua'a yabo Jaco i̧tti̧ ji̧na̧'a̧, jua'a yabo Isaac i̧tti̧ ji̧na̧'a̧, jua'a yabo Abraha̧ i̧tti̧ ji̧na̧'a̧, jua'a yabo Taré i̧tti̧ ji̧na̧'a̧,

³⁵ jua'a yabo Nakor i̧tti̧ ji̧na̧'a̧, jua'a yabo Serug i̧tti̧ ji̧na̧'a̧, jua'a yabo Ragáu i̧tti̧ ji̧na̧'a̧, jua'a yabo Péleg i̧tti̧ ji̧na̧'a̧, jua'a yabo Éber i̧tti̧ ji̧na̧'a̧,

³⁶ jua'a yabo Selah i̧tti̧ ji̧na̧'a̧, jua'a yabo Cainán i̧tti̧ ji̧na̧'a̧, jua'a yabo Arfaxad i̧tti̧ ji̧na̧'a̧, jua'a yabo Sem i̧tti̧ ji̧na̧'a̧, jua'a yabo Nué i̧tti̧ ji̧na̧'a̧,

³⁷ jua'a yabo Lamec i̧tti̧ ji̧na̧'a̧, jua'a yabo Matusalén i̧tti̧ ji̧na̧'a̧, jua'a yabo Enoc i̧tti̧ ji̧na̧'a̧, jua'a yabo Járed i̧tti̧ ji̧na̧'a̧, jua'a yabo Malaleel i̧tti̧ ji̧na̧'a̧,

³⁸ jua'a yabo Cainán i̧tti̧ ji̧na̧'a̧, jua'a yabo Enó i̧tti̧ ji̧na̧'a̧, jua'a yabo Set i̧tti̧ ji̧na̧'a̧, jua'a yabo Adá̧ i̧tti̧ ji̧na̧'a̧, jua'a yabo Adá̧-mä̧ Dio i̧tti̧ ji̧na̧'a̧.