San Lucas 2 - Nuevo Testamento Uwotjüja

Jesú uwäpächinü̧ wȩnȩ

¹ Ji̧yȩnü̧ pä̧nä̧ Césa Augusto ru̧wa̧ pä̧nü̧ ttü̧ja̧ o'katoi'ünä̧rü̧ we'inü̧ tti̧mi̧ tti̧wȩyu̧kuä̧kuä̧wa̧ pä'ü.

² Pi̧yȩ ä̧kuo̧mȩnä̧ tti̧mi̧ tti̧wȩyu̧ku̧mä̧, Siria rȩjȩttü̧ Quirinio ru̧wa̧ gobernador jü̧nä̧ weü pä̧nä̧ kkä̧mä̧dü̧ jȩpi̧nä̧tü̧.

³ Ja̧'wa̧nü̧ ja̧'a̧ttü̧ o'katoi'ünä̧ tta̧mü̧nä̧ ttidepiyura̧'a̧ku̧ tti̧mi̧ wȩyu̧ku̧ 'chi̧nä̧tü̧.

⁴ Ja̧'wa̧nü̧ ji̧yä̧ku̧ José-mä̧ Nazare ütawiyättü, Galirea rȩjȩnä̧ttü̧ rä'opächü Judea rȩjȩra̧'a̧ku̧, Berȩ́ ütawiyä Dawi idepiyura̧'a̧ku 'chi̧nü̧, José-mä̧ Dawi isotü i̧sa̧ ja̧'a̧ttü̧.

⁵ Ja̧'wa̧nü̧ jȩpü̧ 'chä̧nü̧mä̧ irekua jä̧kua̧ju̧ María-ku tti̧wȩyu̧ta̧tü̧ pä'ü, 'chi̧nä̧tü̧, muchaju kka'a ja̧'a̧.

⁶ Ja̧'wa̧nü̧ jä̧u̧ Berȩ́ ütawiyänä̧ ttü̧ja̧kua̧'a̧nä̧, kkuwäbeku mo̧ro̧ päi'ina̧'a̧.

⁷ Ja̧'wa̧nü̧ jä̧kua̧, juorütä kki̧tti̧ chu̧'ä̧kua̧ uborümä̧ uwäbekuinä̧ju̧, uwäbekuä'koju pü̧jä̧ta̧ i̧sä̧'chȩnä̧ juä'opü, äjikuäkuäwotü ttukuä'ijomȩ rütinä̧ju̧, tti̧rȩbȩwode juiya'attü̧.

Á̧gȩrȩ'i̧nä̧, pató-tü̧'i̧nä̧, jü̧nä̧

⁸ Berȩ́ ütawiyä jäyä dȩ'a̧ra̧'a̧ku̧ oweja-tü̧rü̧ tta̧wä̧rä̧kuä̧wä̧ isotü, yodó 'kuäopü ttä'i'oka'a ttä̧ji̧mü̧rü̧ tta̧'a̧rü̧ kka̧kui̧nä̧tü̧.

⁹ Ttu̧ni̧chä̧ra̧'a̧nä̧, ya̧tȩ á̧gȩ Tu̧ru̧wa̧ Dio wȩ'ä̧wa̧ räo'omȩnä̧, Tu̧ru̧wa̧ Dio ujuru i̧tȩya̧u̧ ttüsobukuächünä̧ kkȩdȩ'ä̧u̧ rü̧ȩnä̧ ye'inä̧tü̧.

¹⁰ Yettiyäku á̧gȩ-mä̧ päinä̧u̧: «Yekuekuätukuä, adiwäjuei wȩnȩ chi'kächiyä̧u̧jä̧, jua̧u̧nä̧mä̧ ttü̧ja̧ o'katoi'ünä̧ rü̧ȩnä̧ tteseäkuäwäkuotü:

¹¹ Jitä mo̧ro̧mä̧ Dawi idepiyuttü üwäpächäjiyä̧u̧jä̧, ya̧tȩ ppädäkuäwä i̧sa̧, jua̧u̧mä̧ Tu̧ru̧wa̧ Crito ja̧'a̧.

¹² Pi̧yȩttü̧ topü ku̧wo̧juä̧kuo̧tü̧jä̧: Ji̧'ki̧cha̧wa̧mä̧ pü̧jä̧ta̧ i̧sä̧'chȩnä̧ juä̧'o̧kua̧, äjikuäkuäwotü ttukuä'ijomȩ sä̧bü̧kä̧nü̧ ü̧'a̧'a̧ to'kuäkuotüjä̧.»

¹³ Pä'a 'kä̧tȩnä̧, yotäku jua̧u̧ á̧gȩ ippeyänä̧ kkorotü mo̧ro̧jä̧nä̧ttü̧ á̧gȩrȩ-tü̧ rä'o'ü Dio-rü eseäkuäu ra̧'i̧nä̧tü̧:

¹⁴ «¡Mo̧ro̧jä̧nä̧ttü̧mä̧ Dio-rü uruwo eseäkuäwi'a'a! ¡ja̧'wa̧ta̧nü̧ pi̧jä̧nä̧ttü̧ wȩnȩ juiya'a Dio esewäu̧ru̧mä̧!»

¹⁵ A̧gȩrȩ-tü̧mä̧ pä'äjita'anü̧ mo̧ro̧jä̧ra̧'a̧ku̧ ppa̧ttä̧chä̧chä̧ji̧ o'ka'a, oweja-tü̧rü̧ tta̧'a̧rä̧tü̧mä̧ pä'inä̧tü̧: —Jua̧u̧nu̧mä̧ Berȩ́ ütawiyära̧'a̧ku̧ ti̧'chä̧tu̧kua̧, jua̧u̧ 'kuäopäji, Tu̧ru̧wa̧ jiäwäji tota.

¹⁶ Ja̧'wa̧nü̧ pä'ü pä̧i̧ku̧nä̧ jopächü topü tti̧'chä̧ja̧'a̧ María-rü'i̧nä̧, José-rü'i̧nä̧, po̧kui̧pi̧nä̧tü̧ ja̧'wa̧ta̧nü̧ ji̧'ki̧cha̧wa̧mä̧ äjikuäkuäwotü ttukuä'ijomȩ sä̧bü̧kä̧nü̧ ü̧'a̧'a̧.

¹⁷ Ja̧'wa̧nü̧ topäkuäumä̧, ji̧'ki̧cha̧wa̧ ütü'kü á̧gȩ jiäwäji jä̧ji̧ ji'äwinä̧tü̧.

¹⁸ Ja̧'wa̧ta̧nü̧ oweja-tü̧rü̧ tta̧'a̧rä̧tü̧ jua̧u̧ jittäwa'a ä̧ju̧ku̧ o'katoi'ünä̧ ä̧ju̧kuä̧tü̧mä̧ rü̧ȩnä̧ eseäkuäwinä̧tü̧.

¹⁹ Ja̧'wa̧nü̧ ja̧'a̧nä̧ María-mä̧ pi̧yȩ 'kuäopü o'kajuiyünä̧ kku̧ni̧chi'oka'a kka̧mi̧so'kinä̧ wa'adü kku̧ni̧nä̧ju̧.

²⁰ Oweja-tü̧rü̧ tta̧'a̧rä̧tü̧mä̧ pä'äji jä̧ji̧ta̧'a̧nü̧ ppa̧'ä̧chi̧nä̧tü̧ Dio-rü eseäkuäwäyotütä, o'kajuiyünä̧ tottäji'i̧nä̧, ttä̧ju̧kuä̧ji̧'i̧nä̧ jiäwäja'aku jä̧ji̧yä̧u̧.

Ji̧'ki̧cha̧wa̧ Jesú-ru Dio-rü ukuokuäkuäwodeku ttȩpi̧nü̧ wȩnȩ

²¹ Kko̧ro̧mü̧ttü̧nü̧ wäbodäkuä mo̧ro̧ päi'omȩnä̧ ji̧'ki̧cha̧wa̧rü̧ circuncisión pättü jȩpü̧nü̧, i̧mi̧'i̧nä̧ Jesú pä'ü ottinä̧ku̧, ji̧nä̧ muchaju juojü juiyäi á̧gȩ jiäwinü̧ta̧'a̧nü̧.

²² Jesú uwäpächäji o'ka'attümä̧ ttü̧ja̧ ta̧ju̧ mo̧ro̧ päi'omȩnä̧ Jerusarȩ́-ra̧'a̧ Dio-rü ukuokuäkuäwodeku ttȩpi̧nä̧ku̧, Dio-rü ttukuokuarü pä'ü Moisé weinü̧nä̧ pȩjü̧ta̧'a̧nü̧.

²³ Tu̧ru̧wa̧ weinü̧mä̧ pa̧'a̧nü̧ pä̧i̧yä̧u̧: «O'katoi'ünä̧ttü̧ ä̧kuo̧mȩnä̧ uwäpächürümä̧ Dio-rü iyü ukuokuäkuäwäkua̧ pä'attü̧.»

²⁴ Ja̧'wa̧nü̧ pä'attü sacrificio pättü jȩpü̧ 'chä̧nü̧mä̧ ȩpi̧nä̧tü̧: Tȩyu̧tu̧mä̧ ta̧ju̧ jo̧mȩnä̧ ja̧'wa̧ta̧nü̧ u̧nu̧ku̧tu̧ru̧'i̧nä̧ ta̧ju̧ jo̧mȩnä̧, weäwä wȩnȩ päü'a̧kuä̧.

²⁵ Jua̧u̧nü̧ pä̧nä̧ Jerusarȩ́ ütawiyänä̧mä̧ ya̧tȩ Simeón pä'ü mi̧kua̧ kki̧nü̧. Jua̧u̧mä̧ rȩrü̧jü̧ toäkuäwä i̧sa̧ jü̧nä̧ kkä̧nü̧'i̧nä̧ Dio-rü ukuotinü̧, Irae ttü̧ja̧rü̧ surojüttü rä'epü ikuiyarü pä'ü tta̧'ä̧ri̧nü̧. Ja̧'wa̧nü̧ ü̧jo̧mȩnä̧ Epíritu Sa̧tu̧'i̧nä̧ ü̧ji̧nä̧ku̧,

²⁶ Jua̧u̧mä̧ jiäwinä̧ku̧, Crito pättäku Dio wȩ'ä̧wa̧rü̧ to'ku juiyäimä̧ wa'ü ikuokü kuä̧kua̧jä̧, jü̧nä̧.

²⁷ Epíritu Sa̧tu̧ juȩpä̧rä̧ku̧ Dio-rü ukuokuäkuäwodera̧'a̧ 'chi̧nü̧, jua̧u̧ Simeón-mä̧. I̧'chi̧'o̧mȩnä̧ ji̧'ki̧cha̧wa̧ ja̧ju̧'i̧nä̧, jä'o'i̧nä̧ Jesú-ru i'kächipinä̧tü̧ weäwä wȩnȩ wea'aku jȩtta̧ pä'ü.

²⁸ Jua̧u̧ru̧ ȩmo̧po̧'ü̧ ja̧ppo̧wi̧'ü̧, Dio-rü eseu ukuoku pä'inü̧:

²⁹ Jitämä̧ Chu̧ru̧wa̧ päkuinü̧'a̧kuä̧, ku̧mü̧wä̧ya̧rü̧mä̧ wȩnȩ juiyünä̧ wa'ü ikunä̧ jȩpi̧.

³⁰ Jua'amä̧ ra̧wä̧pi̧jü̧ttü̧ ppä'ädürü täkü tocha'attü̧.

³¹ Jua̧u̧ru̧mä̧ ttü̧ja̧ o'katoi'ünä̧ ttä'ka jo̧mȩttü̧, tottünä̧ jo̧mȩnü̧tä̧ jȩpü̧ ku̧ju̧na̧'a̧ttü̧.

³² Jua̧u̧tä̧ ja̧'a̧ pi̧jä̧ ttü̧ja̧ o'katoi'ünä̧rü̧ tȩya̧u̧nä̧ kkȩdȩpä̧kua̧mä̧ ja̧'wa̧ta̧nü̧ Irae ttü̧ja̧ tteseunä̧ jȩä̧kua̧mä̧.

³³ Jua̧u̧ ji̧'ki̧cha̧wa̧ ütü'kü, Simeón ja̧'wa̧nü̧ ukuokua'a ä̧ju̧ku̧ isoo pä'ü amükuädinä̧tü̧, jä'o'i̧nä̧, ja̧ju̧'i̧nä̧, jü̧nä̧mä̧.

³⁴ Ja̧'wa̧nü̧ ja̧'a̧ttü̧ Simeón-mä̧, juätürü Dio ppädiyarü pä'ünü̧, María-rü pä'inü̧: —Pide ji̧'ki̧cha̧wa̧mä̧ Irae ttü̧ja̧ rekuätü ttä̧rä̧mu̧nä̧'i̧nä̧, ja̧'wa̧ta̧nü̧ rekuätü ma̧ttä̧chü̧nä̧'i̧nä̧ ja̧ pä'ü wȩ'ä̧wa̧ ja̧'a̧. Ja̧'wa̧nü̧ ja̧'a̧ttü̧ jua̧u̧ru̧ to'ija̧'a̧ku̧ ttukuokuäkuotü.

³⁵ Pi̧yȩmä̧ ukurumä̧ kua̧mi̧'iso'kinä̧ kurodä 'kuäo'a'a jä̧'i̧nü̧'a̧nü̧ jä̧kua̧'a̧. Rekuätü tta̧mi̧'iso'kinä̧ ttü̧da̧jä̧rä̧'i̧jü̧ i̧jȩkuä̧cha̧ pä'ü.

³⁶ Ja̧'wa̧ta̧nü̧ juȩnȩmä̧ profeta isaju, Ana pä'ü mi̧kuaju kki̧nä̧ju̧, Fanuel ittiju, Aser isotü isaju, buasaju juo'ächinä̧ju̧. Uborü jerupajuru kkirekuo ȩmi̧na̧'a̧ttü̧mä̧, kko̧ro̧mü̧ttü̧nü̧ todäre a̧'ȩ'tä̧ kkü̧ji̧na̧'a̧ ji̧na̧'a̧.

³⁷ Ochenta y cuatro año-nü̧ jo̧mȩnä̧ 'kuäopina̧'a̧ ji̧na̧'a̧, rekua juojina̧'a̧ttü̧mä̧. Juajumä̧, Dio-rü ukuokuäkuäwodettümä̧, räjopoka'atä mo̧ro̧'i̧nä̧, yodo'i̧nä̧ Dio-rü ukuoku kki̧nä̧ju̧, ayuno'i̧nä̧ jȩpü̧nü̧.

³⁸ Jua̧u̧nu̧tä̧, yotäku ichi'ü Ana-mä̧ kkü̧ä̧nä̧wa̧ Dio-rü eseu ukuokuinä̧ju̧ ja̧'wa̧ta̧nü̧ ji̧'ki̧cha̧wa̧ Jesú ütü'kü ukuokuinä̧ju̧, Jerusarȩ́ ttü̧ja̧rü̧ surojüttü rä'epü ikuäkua'a tta̧'a̧rä̧'i̧jä̧tü̧ o'katoi'ünä̧rü̧.

Nazare-ra̧'a̧ku̧ ppa̧ttä̧chi̧nü̧ wȩnȩ

³⁹ Ja̧'wa̧nü̧ Tü̧ä̧nä̧wa̧ Dio weinü̧mä̧ o'kajuiyünä̧ jȩpü̧ kä'ädäjä'kotü pä'äjita'anü̧ Galirea rȩjȩra̧'a̧, ttidepiyu Nazare ütawiyära̧'a̧ku̧ ppa̧'ä̧chi̧nä̧tü̧.

⁴⁰ Ji̧'ki̧cha̧wa̧mä̧ ujuruku'i̧nä̧, wo̧juä̧wä̧nä̧'i̧nä̧ ja̧'wa̧ta̧nü̧ chutä'i̧nä̧ buojuo'inü̧ ja̧'wa̧ta̧nü̧ Dio-mä̧ jua̧u̧ru̧ juiyo esewinü̧.

Jesú a̧'u̧kuä̧i̧ Dio-rü ukuokuäkuäwodenä̧ ü̧ja̧'a̧ ttü̧'o̧kui̧'i̧nü̧ wȩnȩ

⁴¹ Jesú jä'o'i̧nä̧, ja̧ju̧'i̧nä̧ kkoro a̧'ȩ jü̧ta̧'a̧nü̧ Pacua pä'käri kka̧'a̧ Jerusarȩ́ ütawiyära̧'a̧ kue'ächi'enä̧tü̧.

⁴² Jesú-mä̧ täkü ttü̧jä̧pü̧ttü̧ todäre año u̧ju̧nä̧ra̧'a̧, jȩttä̧'i̧jü̧'a̧kuä̧ jȩpü̧ 'chi̧nä̧tü̧ Jerusarȩ́-ra̧'a̧ pä'käri kka̧'a̧.

⁴³ Jua̧u̧ juei mo̧ro̧ 'kuä'opäjä'kotü ppa̧ttä̧cho̧mȩnä̧ Jesú-mä̧ Jerusarȩ́-nä̧ ü̧ji̧pi̧ni̧yä̧u̧ tieruwünä̧tä̧.

⁴⁴ Ja̧'wa̧nü̧ to̧ȩpi̧yä̧u̧ ttü̧ja̧ i̧wä̧tü̧ ttü̧'kä̧tȩnä̧ kkü̧kü̧ pä'ü, mo̧ro̧'i̧nä̧ 'kuäo'ünä̧ usinä̧tü̧ ja̧'wa̧ta̧nü̧ ttawaruwänä'i̧nä̧, ttu̧wo̧juä̧u̧nä̧'i̧nä̧ jü̧nä̧.

⁴⁵ Ttusomȩnä̧, ttü̧'o̧kui̧'ü̧ juiyünä̧ jä̧u̧ pä'äjita'anü̧ Jerusarȩ́-ra̧'a̧ku̧ usú 'chä̧nü̧ ppa̧'ä̧chi̧nä̧tü̧.

⁴⁶ Ja̧'wa̧nü̧ jä̧ja̧'a̧ttü̧mä̧ wäbodäkuä mo̧ro̧ o'ka'atä, Dio-rü ukuokuäkuäwodenä̧ weäwä wȩnȩ wo̧juȩkuä̧ isotü ttü̧'kä̧tȩ jo̧mȩ, ä̧ju̧kuä̧rü̧ ttü̧'ȩja̧'a̧, jä̧'ȩpä̧rü̧'i̧nä̧ jȩttä̧ku̧ ü̧'a̧'a̧ ttü̧'o̧kui̧'i̧nä̧ku̧.

⁴⁷ Ja̧'wa̧nü̧ ja̧'a̧ o'katoi'ünä̧ jua̧u̧ru̧ ä̧ju̧kuä̧rä̧tü̧mä̧, wo̧juȩku̧nä̧ ä̧dä̧tä̧ri̧yä̧u̧ ja̧'wa̧ta̧nü̧ rü̧ȩnä̧ u̧wo̧jui̧yä̧u̧ ¡isoo! pä'ü amükuädinä̧tü̧.

⁴⁸ Ja̧'wa̧nü̧ topo'ü jä'o'i̧nä̧, ja̧ju̧'i̧nä̧ ¡isoo! pä'ü amükuädü ja̧ju̧mä̧ päjinä̧ku̧: —U̧bo̧ ¿Tta̧'a̧nü̧ pä'ü ja̧'wa̧nü̧ jȩ'kuä̧jä̧tü̧ttü̧? Topi, kuä'okumä̧ ajuäkuäu u̧sä̧rä̧jä̧tü̧jä̧.

⁴⁹ Päjiyäku Jesú-mä̧ ädätinä̧kua̧: ——¿Tta̧'a̧nü̧ pä'ü ku̧sä̧rä̧jä̧tu̧kuä̧ttü̧ttü̧? Chä'o üärenä̧ chü̧ja̧ pä'ü rekuä rü̧ja̧'a̧mä̧, ¿kuieruwätukua'a tä̧jí̧?

⁵⁰ Ja̧'wa̧nü̧ jiäwa'anä̧, juätümä̧ yoriso wo̧jui̧'o̧ko̧tü̧ pinä̧tü̧.

⁵¹ Ja̧'wa̧nü̧ jä̧ja̧'a̧mä̧, juätütäku Nazare ütawiyära̧'a̧ ppa̧'ä̧chi̧nü̧. Jua'attümä̧ juätü pätta'akutä ukuotü kki̧nü̧. Ja̧'wa̧nü̧ ja̧'a̧ ja̧ju̧mä̧ pi̧yȩ o'kajuiyünä̧ kka̧mi̧so'kinä̧ wa'adü kku̧ni̧nä̧ju̧.

⁵² Jesú-mä̧ wo̧juä̧wä̧nä̧'i̧nä̧, ttü̧ja̧ ttesewomȩnä̧'i̧nä̧, Dio esewomȩnä̧'i̧nä̧ buojuo'inü̧.