San Lucas 13 - Nuevo Testamento Uwotjüja

Jȩpü̧ ttü̧jü̧ pärowächäkuäwä wȩnȩ

¹ Ji̧yȩnü̧ pä̧nä̧, yotäku ichi'ü Jesú-ru ji'äwinä̧tü̧, gobernador Pilato-mä̧ Galirea ttü̧ja̧rü̧ sacrificio jȩpü̧ Dio-rü ttukuokua'a jakuänä̧ kuä'äu ttikunä̧ we'äji, pä'ü.

² Jesú päinä̧u̧: «¿Toku kuamükuädätukuättü̧, juätü ttü̧ja̧rü̧ 'kuäopäjimä̧, jua'amä̧ Galirea ttü̧ja̧ kkorotüttü'i̧nä̧ abonä̧nü̧ suronä̧ jȩttä̧'i̧ja̧'a̧ 'kuä̧o̧pä̧jä̧u̧?

³ Ja̧'wa̧nü̧mä̧ jo̧ka̧'a̧; ä'kanä̧ suronä̧ jȩ'kuä̧'i̧jü̧tu̧ku̧ttü̧ käkuädi'ätuku juiyüttümä̧, ukutu'i̧nä̧ o'katoi'ünä̧ tokue'ächäkuotüjä̧.

⁴ ¿Ja̧'wa̧ta̧nü̧ jitü dieciocho-nü̧ wotü Siroé pä'ü mi̧kuomȩttü̧, isode isä'ka ma̧ä̧u̧ to'e'ächinä̧tü̧mä̧, ukutu päkuätukumä̧ Jerusarȩ́ ütawiyättü kkorotüttü'i̧nä̧ abonä̧nü̧ suronä̧ jȩpä̧tü̧ ja̧'a̧ to'e'ächinä̧tü̧ päkuätukua'a tä̧jí̧?

⁵ Ja̧'wa̧nü̧mä̧kü̧ ja̧'a̧; ukutu'i̧nä̧ surojü käkuädi'ätuku juiyüttümä̧, o'katoi'ünä̧tä̧ tokue'ächäkuotüjä̧.»

Higuera dau u̧wä̧ju̧ juiyäinä̧ wȩnȩtü̧ ji'äwinü̧

⁶ Jesú pi̧yȩ wȩnȩtü̧ ji̧ä̧wi̧nä̧u̧: Ya̧tȩ uwa pättanä̧, higo dau kku̧ni̧nü̧'ka̧ u̧wä̧ju̧ wȩji̧ya̧rü̧ ja̧ pä'ü topü i̧'chä̧ja̧'a̧, yoriso higo otemä̧ wȩjo̧koi ji̧na̧'a̧.

⁷ Ja̧'wa̧nü̧ ji̧yä̧ku̧ uwa pätta tta̧wä̧rä̧kuä̧wä̧ i̧sa̧rü̧ pä'inü̧: Topittü̧, wäbodäkuä año jo̧mȩnä̧, pi higuera dau u̧wä̧ju̧ wa̧ja̧ pä'ü topü ichä'ijüsä ja̧'wa̧nü̧ ja̧'a̧nä̧ yorisotä wȩjo̧koi jä̧'i̧jäi. Ja̧'wa̧nü̧ ja̧'a̧ttü̧ kku̧'u̧ ikuäikui; ¿tta̧'a̧nü̧ pä'ü, ji̧ya̧'a̧kuä̧ra̧'a̧ rȩjȩ toe'ächünä̧ ku̧ju̧nä̧rä̧ttü̧?

⁸ Päku, pätta tta̧wä̧rä̧kuä̧wa̧ i̧sa̧mä̧ pä'inü̧: Chu̧ru̧wa̧, ji̧nä̧ pi̧yȩ año-bütä tta̧'ä̧ri̧pi̧; kkada'kai jäyänä̧ rȩjȩ sa'opo'ü ppürüwächi'ünä̧ chütä'cha'anä̧.

⁹ Ja̧'wa̧nü̧ jȩcho̧mȩnä̧, u̧wä̧ju̧ iyüttümä̧ adiwäkua'a; wȩjü̧ juiyüttümä̧, 'kui'opü kuikuäikuajä̧.

Jesú-mä̧ na̧'ä̧chä̧ju̧ru̧ sawaru mo̧ro̧ aditü ikuinü̧

¹⁰ Sawaru mo̧ro̧ Jesú sinagoga isodettü u̧wo̧juȩto̧mȩnä̧;

¹¹ Juȩnȩ yajute kki̧nä̧ju̧ dieciocho año-nü̧ jo̧mȩnä̧ na̧'ä̧chä̧'i̧jä̧ju̧. Epíritu su̧ro̧pa̧, surojuoepina̧'a̧ 'tu̧wa̧yu̧nü̧ kkü̧jü̧nä̧tä̧ juo'ächinä̧ju̧, jȩä̧kuä̧wä̧ juiyünä̧tä̧.

¹² Juäjuru topü, Jesú-mä̧ kkichi'a pä'ü wopo'äji̧'ka̧ päinä̧kua̧: —Isaju, täkü kumä̧richeittümä̧ pi̧'ä̧ju̧jä̧.

¹³ Pä'ükkä̧nü̧, kku̧wä̧mȩ mȩo̧mȩnä̧, yotäku, 'tu̧wa̧yu̧nü̧ kkäja'amä̧ jue'ächipü, Dio-rü rü̧ȩnä̧ esewinä̧ju̧.

¹⁴ Ja̧'wa̧nü̧ Jesú-mä̧ Sawaru mo̧ro̧ aditü ikua'a topü, sinagoga isode u̧ru̧wa̧mä̧ ra̧wä̧ri̧pü̧ ttü̧ja̧rü̧ pä'inü̧: —Kko̧ro̧mü̧ttü̧nü̧ ya'ute mo̧ro̧ jo̧mȩnä̧ kka̧'a̧ adikuä mo̧ro̧mä̧; jua̧u̧nü̧ mo̧ro̧tä̧ ichätukui, ja̧'wa̧nü̧ ja̧'a̧nä̧ Sawaru mo̧ro̧mä̧ aditü ttikuätukuaku pä'ümä̧ kuichätukuä.

¹⁵ Päiyäku, Jesú-mä̧ ädätinä̧ku̧: —Ä'koyättütä esetätüjä̧, ¿ukutu'i̧nä̧ kuä̧ji̧mu̧tu̧ku̧ buey-rü'i̧nä̧, Buro-rü'i̧nä̧ ajiya ttawa pä'ümä̧, Sawaru mo̧ro̧ ȩpo̧ko̧tü̧ pä'ijä̧tü̧jä̧ tä̧jí̧?

¹⁶ Paju Abraha̧ isotü isaju ja̧'a̧, Satanás dieciocho año jo̧mȩnä̧, nü̧'kü u̧ju̧ni̧nä̧kua̧rü̧mä̧ ¿Sawaru mo̧ro̧ ja̧'a̧nä̧ jua̧u̧ usurä kkȩmä̧u̧ttü̧ ejädü ttikuaju pä'ümä̧ rekuä rü̧jo̧ko̧kua̧ tä̧jí̧?

¹⁷ Pi̧yȩ, Jesú pä'a ä̧ju̧ku̧, aboiyotümä̧ o'katoi'ünä̧tä̧ dä'ä ttu'inä̧tü̧; ja̧'wa̧nü̧ ja̧'a̧nä̧ ttü̧ja̧mä̧ o'katoi'ünä̧ Jesú jȩü̧ topü eseäkuäwinä̧tü̧.

Mostaza pättü u̧wä̧ju̧nä̧ wȩnȩtü̧ ji'äwinü̧

¹⁸ Ja̧'wa̧ta̧nü̧ Jesú-mä̧ wȩnȩtü̧ pä'inü̧: ¿Däjé 'kua̧rü̧nä̧ ja̧'a̧jä̧ttü̧, Ru̧wa̧ Dio weümä̧ ja̧'wa̧ta̧nü̧ däjenä̧ wȩnȩtü̧ jidäwa'ajä̧ttü̧?

¹⁹ Jua̧u̧mä̧ mostaza u̧wä̧ju̧, pättanä̧ ya̧tȩ u̧ju̧no̧mȩnä̧. Büó juoächü o'ko'i, täkü rü̧ä̧i jo̧mȩnä̧, ä̧na̧jui̧yä̧nä̧ ppi̧yu̧ ttä̧'ti̧yu̧ ttu̧wȩna̧'a̧ jä̧'i̧nü̧'a̧nü̧ ja̧'a̧.

Levadura pättünä̧ wȩnȩtü̧ ji'äwinü̧

²⁰ Ja̧'wa̧ta̧nü̧ Jesú-mä̧ pä'inü̧: «¿Ru̧wa̧ Dio weümä̧ däjenä̧ wȩnȩtü̧ päda'ajä̧ttü̧?

²¹ Yajute isaju wäbodäkuänä̧ pa̧ja̧tü̧ trigo isäwanä̧ levadura kkȩno̧mȩnä̧, o'kajuiyünä̧tä̧ a̧'ti̧'a̧'a̧ jä̧'i̧nü̧'a̧nü̧ jü̧.»

Äpate 'ko̧a̧te wȩnȩ

²² Jesú-mä̧ Jerusarȩ́ ütawiyära̧'a̧ku̧ 'chä̧nü̧ kkä̧nü̧, ütawiyä ppo̧ü̧nä̧'i̧nä̧, rü̧o̧mȩ pünä̧'i̧nä̧ wo̧juȩti̧nü̧.

²³ Ja̧'wa̧nü̧ ja̧'a̧ ya̧tȩ jä'epü ä̧ju̧kui̧nä̧ku̧: —Chu̧ru̧wa̧, ¿a̧'u̧ku̧nä̧ wotütä ja̧'a̧, ra̧wä̧pi̧jü̧ttü̧ ttü̧ja̧kui̧'ä̧kuo̧tü̧mä̧? Päomȩnä̧, Jesú-mä̧ ädätinü̧:

²⁴ Kujuruku amükuädätukui äpate a̧'u̧kuatenä̧ dode'kuätukua; isopäi'ünä̧ rekuätü dodetta pä'ü jȩtta̧'a̧nä̧, dodepokotü ttäkuotü.

²⁵ Isode u̧ru̧wa̧ ä̧rä̧mi̧'ü̧ äpate mü̧'ȩpü̧ iku o'ka'a jü̧ttü̧mä̧, u̧mi̧ kka̧kuä̧tü̧mä̧ wottäkuotü: Chu̧ru̧wa̧ ba'epitü. Ja̧'wa̧nü̧ ja̧'a̧nä̧ ä̧dä̧tä̧kuä̧u̧jä̧: Ukuturumä̧ yoriso jȩru̧pa̧sä̧, jü̧nä̧tä̧.

²⁶ Päomȩnä̧, ukutumä̧ wo'kuäkuäwi'äkuotüjä̧: Uku kuä'ka jo̧mȩttü̧ tu̧kuȩmä̧ kuinä̧tü̧jä̧, au'i̧nä̧ awinä̧tü̧jä̧, ja̧'wa̧ta̧nü̧ tidepiyu mä̧ni̧yä̧ttü̧ wo̧juȩti̧nü̧jä̧.

²⁷ Päkuiyätukuäku, pä̧kuä̧u̧jä̧: yoriso ukuturumä̧ jȩru̧pa̧sä̧; ttüttümä̧ 'kȩ'i̧pä̧chä̧tu̧kui̧ o'katoi'ünä̧tä̧ suronä̧ jȩä̧kuä̧wä̧ isotüjä̧.

²⁸ Ja̧'wa̧nü̧ ya'oku ikuomȩnä̧, jua'attümä̧ tta̧'kua̧ tta̧'ȩku̧, usurä ȩmä̧u̧ ajuäkuäu tottäkuotü, Abraha̧-rü̧'i̧nä̧, Isaa-rü'i̧nä̧, Jaco-rü'i̧nä̧, o'katoi'ünä̧ profetas winä̧tü̧rü̧'i̧nä̧, Ru̧wa̧ Dio weomȩ ttü̧ja̧kua̧'a̧. Ja̧'wa̧nü̧ ja̧'a̧nä̧ ukutumä̧, yorisotä u̧mi̧ku̧ rä'epü ikuäwäkuotüjä̧.

²⁹ Ja̧'wa̧ta̧nü̧ ttü̧ja̧mä̧ kkä̧wa̧ räopa'akuttü'i̧nä̧, ma̧ä̧cha̧'a̧ku̧ttü̧'i̧nä̧, Norte pätta'akuttu'i̧nä̧, Sur pätta'akuttu'i̧nä̧ ichü ttü'ȩmä̧kuo̧tü̧ Ru̧wa̧ Dio weomȩ, ttu̧kuȩ kuä̧nü̧.

³⁰ Ja̧'wa̧nü̧ ja̧'a̧ttü̧ juorümä̧ yotukunä̧, rüjinä̧ wotümä̧, ä̧kuo̧mȩnä̧ pätti'äkuotü ja̧'wa̧ta̧nü̧ ä̧kuo̧mȩnä̧ wotütä, rüjinä̧ pätti'äkuotü.

Jerusarȩ́ amükuädü ukuoku, Jesú-mä̧ ajuäwinü̧

³¹ Ja̧'wa̧ta̧nü̧ ji̧yȩnü̧ mo̧ro̧, fariseo wotü ichi'ü Jesú-ru pä'inä̧tü̧: —Porümä̧ tü'ipächi, ru̧wa̧ Herode-mä̧ kuä'ü ikua pä'ü usäkujä̧.

³² Pättäku Jesú-mä̧ ädätinä̧u̧: Jua̧u̧ awarirümä̧ ji'äwäjätukui: —Jitä mo̧ro̧'i̧nä̧, yo̧i̧mo̧ro̧'i̧nä̧ epíritu-tu̧ suropätürü rä'epe'ü iku kkä̧nü̧, na̧nȩpä̧tü̧rü̧'i̧nä̧ aditü ikusä, ja̧'wa̧nü̧ ja̧'a̧nä̧ wäbodäkuä mo̧ro̧ päi'omȩnä̧ kädädäkua̧sä̧.

³³ Ja̧'wa̧nü̧ ja̧'a̧nä̧, chi̧'cha̧ pädäja'amä̧ jitä mo̧ro̧'i̧nä̧, yo̧i̧mo̧ro̧'i̧nä̧, yo̧i̧mo̧ro̧ o'komȩ'i̧nä̧ 'chü̧sä̧; isopäi'ünä̧ ya̧tȩ profeta wa̧mä̧ Jerusarȩ́ ütawiyä u̧mi̧ttü̧ 'korujuoächa pä'ümä̧ juiya'a.

³⁴ ¡Jerusarȩ́ ttü̧ja̧we, Jerusarȩ́ ttü̧ja̧we, profetas wotürü kuä'äu iku, Dio wȩä̧u̧ru̧'i̧nä̧ inä̧dunä̧ ikuäu kuä'äu ikuätüjä̧! ¡kko̧ro̧nü̧ jü̧ta̧'a̧nü̧, kui̧tti̧mü̧tu̧ku̧ru̧mä̧, äkärä isaju kki̧tti̧mü̧rü̧ kkujuabiyä dȩa̧'a̧ kkü̧tä̧ra̧'a̧ jä̧'i̧jü̧'a̧nü̧ chü̧ka̧ka̧ta̧ pädomȩnä̧, kkü'kokotü pä'ijätüjä̧!

³⁵ Ja̧'wa̧nü̧ ja̧'a̧ttü̧ topätukui, kuojusodetukumä̧ toünä̧ kki̧'ä̧kuode ja̧'wa̧ta̧nü̧ pädäu̧jä̧ pä'äji jä̧ji̧'a̧nü̧mä̧ to'kuätukuokoku chä̧kua̧sä̧, ukutu pa̧'a̧nü̧ päkuätuku mo̧ro̧bü päi'ünä̧: «Tu̧ru̧wa̧ i̧mi̧nä̧ ichürümä̧ adiunä̧tä̧ jä̧kua̧,» jü̧nä̧.