San Lucas 1 - Nuevo Testamento Uwotjüja

Ä'kanä̧ jiäwinü̧ Teófilo-rü

¹ Rekuätü ja̧'a̧ ujutu tü̧'kä̧tȩttü̧, 'kuäopinü̧ jueü wȩnȩ yorätetü wȩyu̧tu̧ rütü jȩtta̧ pä'ü amükuädätümä̧.

² Ä̧kuo̧mȩnä̧ttü̧ kkä̧mä̧dü̧ tti'ärenä̧ tottinü̧'a̧kuä̧, Dio i̧wȩnȩ ji'äwinä̧tü̧.

³ Ja̧'wa̧ta̧nü̧ Ttü'i̧nä̧, ä̧kuo̧mȩnä̧ ji̧nü̧ttü̧ kkä̧mä̧dü̧ o'kajuiyünä̧tä̧ usú tochomȩnä̧ adiunä̧ jä̧ku̧, ji̧nü̧'a̧kuä̧ wȩyu̧tu̧ wedäku pä'ü amükuädinü̧sä̧, uku ru̧wa̧ Teófilo-rümä̧,

⁴ ukuru ttu̧wo̧juȩtinü̧ jueü wȩnȩ, jo̧mȩnü̧ adiu ku̧wo̧juä̧kua̧'a̧nü̧.

Bautizo jȩpä̧'i̧jü̧, Ju̧a̧ uwäpächäkua'a jiäwinü̧ wȩnȩ

⁵ Judea rȩjȩnä̧, ru̧wa̧ Herode ü̧'ü̧ pä̧nä̧ ya̧tȩ sacerdote Abía isotü i̧sa̧, Zacaría pä'ü mi̧kua̧ kki̧nü̧. Jua̧u̧ irekuamä̧ Isabe pä'ü mikuinä̧ju̧, kkü̧tä̧mü̧ttü̧mä̧ Aaro̧ isotü isaju.

⁶ Jua̧u̧ irekuaku ta̧ju̧kuäyotü Dio ä'kattümä̧ adiwomȩnä̧ kki̧nä̧tü̧ ja̧'wa̧ta̧nü̧ tu̧ru̧wa̧ weü'anü̧tä̧ ukuotü kka̧kui̧nä̧tü̧,

⁷ Ja̧'wa̧nü̧ ja̧'a̧nä̧ tti̧tti̧mü̧mä̧ to'inä̧tü̧, jua'amä̧ Isabe muchaju juojü juiyünä̧ ja̧'a̧ttü̧, jua'a yabo päi'ünä̧ ttubüäkuomȩtä̧mä̧.

⁸ Ya'utenä̧, Zacaría isotürü sacerdote jü̧nä̧ ttaditäwä, Dio ä'ka jo̧mȩ ttadita pä'ü ji̧na̧'a̧,

⁹ jȩttä̧'i̧jü̧ a̧kuä̧ jȩpü̧ tottomȩnä̧, incienso pättü, santuario pättomȩ Zacaría-rü adita pä'ü päwächina̧'a̧.

¹⁰ Ja̧'wa̧nü̧ incienso pättü ujuwa'anä̧mä̧, o'katoi'ünä̧ ttü̧ja̧mä̧ u̧mi̧nä̧ Dio-rü ukuoku kka̧kui̧nä̧tü̧.

¹¹ Ja̧'wa̧nü̧ jȩa̧'a̧nä̧, Tu̧ru̧wa̧ i̧sa̧ á̧gȩ, incienso kkuwäwomȩ altar pättomȩ, u̧wo̧jua̧'a̧ku̧nä̧ i̧jȩkui̧nä̧ku̧.

¹² Jua̧u̧ru̧ topü Zacaría-mä̧, jȩü̧ juiyünä̧, rü̧ȩnä̧tä̧ ye'inü̧.

¹³ Ja̧'wa̧nü̧ yeiyäku, á̧gȩ-mä̧ jua̧u̧ru̧ pä'inü̧: —Yekuekuä, Zacaría, Dio-rü kukuokuäjimä̧ ä̧ju̧kuä̧jä̧ku̧jä̧; kuirekua Isabe-mä̧ kki̧tti̧rü̧ kkuwäbekuäkuaju, jua̧u̧ru̧mä̧ Ju̧a̧ pä'ü okuarüjä̧.

¹⁴ Ukumä̧ rü̧ȩnä̧ kuesewä̧kua̧jä̧ ja̧'wa̧ta̧nü̧ uwäpächomȩnä̧mä̧ kkorotü'i̧nä̧ ttü̧ja̧ rekuätü tteseäkuäwäkuotü.

¹⁵ Ja̧'wa̧ta̧nü̧ jua̧u̧mä̧ Dio ä'ka jo̧mȩttü̧ ukuo i̧sa̧ jä̧kua̧. Vino isoya'i̧nä̧ ja̧'wa̧ta̧nü̧ niyaiya'i̧nä̧ awokü jä̧kua̧, uwäpächäkua'a Ä'kanä̧tä̧ päi'ünä̧ Epíritu Sa̧tu̧mä̧ jo̧mȩnü̧ ü̧jä̧kua̧.

¹⁶ Ja̧'wa̧ta̧nü̧ Irae ttü̧ja̧ rekuätürü ttu̧ru̧wa̧ Dio-ku ppa̧ttä̧chü̧nä̧ jȩä̧kua̧.

¹⁷ Ja̧'wa̧ta̧nü̧ jua̧u̧ Ju̧a̧-mä̧, Tu̧ru̧wa̧ ä'kanä̧ i̧'chä̧kua̧, Elía i̧'chi̧nü̧ta'anü̧, epírituku, ujuruku, jü̧nä̧; ttä̧'o̧tü̧rü̧ tti̧tti̧mü̧ku̧ ttesekunä̧. Ja̧'wa̧ta̧nü̧ jarodätürü'i̧nä̧ adiwä jueiku ttukuotünä̧. Ja̧'wa̧nü̧ jȩpü̧, ttü̧ja̧rü̧ jo̧mȩnü̧ jȩpü̧ u̧ju̧nä̧kua̧, Ttu̧ru̧wa̧ ichome tteseäkuäwa pä'ü.

¹⁸ Ja̧'wa̧nü̧ jiäwäku Zacaría-mä̧ á̧gȩ-rü̧ pä'inü̧: —¿Pi̧yȩ jikuäumä̧ däjettü̧ topü chu̧wo̧juä̧kua̧'a̧jä̧ttü̧? ¿Ttümä̧ täkü bü̧o̧sa̧ cha'amä̧, chirekua'i̧nä̧ buasaju kka'amä̧?

¹⁹ Päomȩnä̧ á̧gȩ-mä̧ ädätinä̧ku̧: —Ttümä̧ Gabrie pä'ü mi̧kua̧sä̧, Dio ä'ka jo̧mȩ aditüsä; ja̧'wa̧nü̧ ja̧'a̧ttü̧ ukuru pi̧yȩ adiwäjuei jareü wȩnȩ jidäwa pä'ü weäwi'äjäkusä.

²⁰ Ja̧'wa̧nü̧ ja̧'a̧nä̧ jidäwäji kuesetoka'a jä̧ja̧'a̧ttü̧, jitämä̧ kui̧wȩnȩ jui̧'a̧tä̧ ku̧ji̧pä̧kua̧jä̧; pi̧yȩ jidäwäjimä̧ o'kajuiyünä̧ jo̧mȩnü̧ päiomȩbü päi'ünä̧.

²¹ Ja̧'wa̧nü̧ 'kuäopa'anä̧mä̧, u̧mi̧nä̧ tta̧'ä̧rü̧ kka̧kuä̧tü̧ ttü̧ja̧mä̧, Zacaría-rümä̧ tta̧'a̧nü̧ pä'ü santuario-ttümä̧ juiyo rekuo to'epüttü̧ pä'ü amükuädinä̧tü̧.

²² Ja̧'wa̧nü̧ jä̧jí̧ o'ka'a räo'omȩnä̧mä̧, juätürümä̧ i̧wȩnȩ ukuoku juiyünä̧ jä̧ku̧, u̧mü̧nä̧tä̧ jȩi̧yä̧u̧; Dio jäwä i̧jȩkuä̧jä̧ku̧ ja̧'a̧, santuario-ttümä̧, pä'ü wo̧jui̧'i̧nä̧tü̧.

²³ Ja̧'wa̧nü̧ ja̧'a̧, aditäwä jo̧mȩnü̧ kä'ädäkuäwäji̧'ka̧, Zacaría-mä̧ ojusodera̧'a̧ku̧ i̧wi̧nü̧.

²⁴ Pi̧yȩ jä̧jí̧ o'ka'a irekua Isabe-mä̧ muchaju juo'äjä'kaju, kkä̧wa̧tü̧mä̧ ji̧mü̧tȩ wotü jo̧mȩnä̧ kkojusodettümä̧ räjopoka'a kki̧nä̧ju̧, amükuädü:

²⁵ «Chu̧ru̧wa̧mä̧ pi̧yȩ mo̧ro̧ rȩrü̧jü̧nü̧ toäkua̧sä̧, täkü ttü̧ja̧ ya̧ttä̧wä̧'chü̧ juiyattü pä'ü.»

Jesú uwäpächäkua'a ji'äwinü̧

²⁶ Kkä̧wa̧tü̧ kko̧ro̧mü̧ttü̧nü̧ ya̧tȩ päi'omȩnä̧, Dio we'inü̧ á̧gȩ Gabrie-rü Galirea rȩjȩnä̧ wȩjü̧ ütawiyä Nazare pä'ü mikuomȩku̧.

²⁷ Yajute uborü jerupaju, José jä'epü u̧ju̧ni̧nä̧kua̧ kkü̧jo̧mȩku̧, ü̧tä̧mü̧ttü̧mä̧ Dawi isotü i̧sa̧ ji̧na̧'a̧. Juäju uborü jerupajumä̧ María pä'ü mikuinä̧ju̧.

²⁸ Ja̧'wa̧nü̧ ja̧'a̧ á̧gȩ-mä̧ juäju kkü̧jo̧mȩ do'ächi'ü pä'inü̧: —¡Ukuru te'äusä, Dio-mä̧ adiu ppädä̧kua̧jä̧! Tu̧ru̧wa̧mä̧ ukutäku kkü̧. Kkorotü nä̧tü̧ o'katoi'ünä̧ttü̧mä̧ ukutäjä̧ ppädäkuäwi'äkuamä̧.

²⁹ Päomȩnä̧, María-mä̧ ye'inä̧ju̧. Pi̧yȩmä̧ tta̧'a̧nü̧ pä'ü ja̧'wa̧nü̧ teäwäkuasä̧ttü̧ pä'ü.

³⁰ Yejiyäku á̧gȩ-mä̧ päinä̧kua̧: —Yekuekuä, María. Isopäi'ünä̧ Dio-mä̧ adiutä jȩä̧kua̧jä̧

³¹ Ja̧'wa̧nü̧ ja̧'a̧ttü̧ muchaju juo'ü kui̧tti̧rü̧ kuwäbekuäkuajujä̧, jua̧u̧ru̧mä̧ Jesú pä'ü okuarüjä̧.

³² Jua̧u̧mä̧ ukuo i̧sa̧ jä̧kua̧, Mo̧ro̧jä̧ Ru̧wa̧ I̧tti̧ pä'ü o̧ttä̧kua̧; ja̧'wa̧ta̧nü̧ Tu̧ru̧wa̧ Dio-mä̧, jä'o Dawi uruwo ji̧nü̧ i̧yä̧kua̧.

³³ Ja̧'wa̧nü̧ ja̧'a̧ttü̧ Jaco i̧tti̧mü̧ o'kotürü 'kuäopünä̧tä̧ ru̧wa̧ jü̧nä̧ wȩä̧kua̧. Jua̧u̧ Ru̧wa̧ jü̧nä̧ weümä̧ beipokü jä̧kuȩ.

³⁴ Päkua, María-mä̧ á̧gȩ-rü̧ pä'inä̧ju̧: —¿Pi̧yȩmä̧, tta̧'a̧nü̧ jä̧kua̧'a̧jä̧ttü̧ uborü chieruwa'amä̧?

³⁵ Päjäku á̧gȩ-mä̧ ädätinä̧kua̧: —Epíritu Sa̧tu̧ ukuru ichü ü̧jä̧mä̧dä̧kua̧. Ja̧'wa̧nü̧ jo̧mȩnä̧ Mo̧ro̧jä̧ Ru̧wa̧ ujuru a̧'kua̧juä̧nä̧ 'ka̧tä̧chi̧'ä̧kua̧ju̧jä̧. Ja̧'wa̧nü̧ ja̧'a̧ttü̧ ji̧'ki̧cha̧wa̧ u̧wä̧pä̧chä̧kua̧mä̧ Dio i̧tti̧, surojü jui̧'a̧ pä'ü o̧ttä̧kua̧.

³⁶ Kuawaruwaju Isabe'i̧nä̧ kki̧tti̧rü̧ kku̧ju̧nä̧rä̧kua̧ju̧ büasaju kka'anä̧, täkü jitämä̧ kko̧ro̧mü̧ttü̧nü̧ ji̧yȩtȩ kkä̧wa̧tü̧ jo̧mȩnä̧ ja̧'a̧ kki̧tti̧mü̧ to'aju pättä'ijäkuarü ja̧'wa̧nü̧ ja̧'a̧mä̧.

³⁷ Isopäi'ünä̧ Dio iweyekumä̧ yoriso juiya'a.

³⁸ Päkua María-mä̧ pä'inä̧ju̧: —Ttümä̧ iweye Chu̧ru̧wa̧ umüwäyajusä; uku päkuta'anü̧ wä̧i̧nä̧ jä̧kua̧sä̧. Pä'ü käjädomȩnä̧ á̧gȩ-mä̧, kkü̧ji̧pa̧'a̧nä̧ i̧wi̧'i̧nü̧.

María-mä̧, Elísabe-rü do'ächü 'chi̧nä̧ju̧

³⁹ Ja̧u̧nu̧tä̧ pä̧nä̧ María-mä̧, jurunä̧ rä'opächü mü̧ä̧'kiyutä jä̧jä̧ rȩjȩku̧, Judá ütawiyära̧'a̧ku̧ 'chi̧nä̧ju̧.

⁴⁰ Ja̧'wa̧nü̧ ja̧'a̧ Zacaría ojusodenä̧ do'ächi'ü Isabe-rü te'äwinä̧ju̧.

⁴¹ Ja̧'wa̧nü̧ ja̧'a̧ Isabe-mä̧ María tejäwa'a kkä̧ju̧kuo̧mȩnä̧, kku̧kuä̧ba̧ jakuättü ji̧'chi̧cha̧wa̧mä̧ borepi'inü̧. Elísabe-mä̧ Epíritu Sa̧tu̧ jo̧mȩnü̧ winä̧ju̧.

⁴² Pä̧i̧ku̧nä̧ wopi'ünü̧ pä'inä̧ju̧: —¡Dio-mä̧ kkorotü nä̧tü̧ttü̧'i̧nä̧ abonä̧nü̧ ppädä̧kua̧jä̧ ja̧'wa̧ta̧nü̧ kui̧tti̧rü̧'i̧nä̧ ppädiyä̧kua̧jä̧!

⁴³ ¿Tta̧'a̧nü̧ pä'ü ttürümä̧ pi̧yȩ iyäwi'äkuasä̧ttü̧, Chu̧ru̧wa̧ ja̧ju̧ ttürü do'ächü kkichattü pä'ümä̧?

⁴⁴ Do'ächi'ü uku, ttürü tekuäwa'a chä̧ju̧ku̧ta̧'a̧nü̧, chi̧tti̧mä̧ chu̧kuä̧ba̧ jakuättümä̧ eseu borei'äjäkuasä.

⁴⁵ 'Kuäopä̧kuȩ wȩnȩ, Tu̧ru̧wa̧ jiäu kuesetina̧'a̧ttü̧ eseäkuäwä rȩbȩä̧kuä̧wä̧kua̧jä̧.

⁴⁶ Päjäkua María-mä̧ pä'inä̧ju̧: Cha̧'kua̧rü̧ rü̧ȩnä̧ esewa'a Chu̧ru̧wa̧rü̧;

⁴⁷ Cha̧'kua̧rü̧ i̧sa̧mä̧, ttürü surojüttü rä'epü ikuinü̧ Dio-rü esewa'a.

⁴⁸ Jua'amä̧, Dio ttü umüwäyaju usurä isajuru toäja'attü̧, Ja̧'wa̧ta̧nü̧ jitätä kkä̧mä̧dü̧ eseäkuäwä kku̧nä̧rä̧ju̧ pä'ü, ttü̧ja̧mä̧ ottäkuajusä;

⁴⁹ Isopäi'ünä̧ o'kajuiyünä̧ ju̧ru̧wa̧ Dio-mä̧ rü̧ȩnä̧ jü̧nä̧tä̧ jȩä̧kua̧sä̧. ¡Ja̧'wa̧nü̧ ja̧'a̧ttü̧, Jua̧u̧ i̧mi̧mä̧ Surojü Jui̧'a̧ ja̧'a̧!

⁵⁰ Dio-mä̧ 'kuäopünä̧tä̧ rȩrü̧jü̧ topü churutä ukuotätürümä̧ kkorotü, kkorotünü̧ 'kuäopa'anä̧.

⁵¹ Üjonä̧ ujuru o'kajuiyünä̧ i̧jȩpi̧nü̧: Ukuo te'äkuäwätürü jueünä̧ tta̧mü̧kuädü juiyünä̧ jerutu ikuinü̧.

⁵² Ruwotürümä̧ tturuwo 'cho'ipü, usurä isotürütä tturuwo iyinü̧.

⁵³ Ppäi ttu'ätürümä rü̧ȩnä̧ ttiäre iyü, pärokuotü ruwotürümä̧ yoriso jui'ätürütä we'ü ikuinü̧.

⁵⁴ Irae ttü̧ja̧rü̧mä̧ ppä'ädinü̧, umüwäyotü ja̧'a̧ttü̧, rȩrü̧jü̧nü̧ toümä̧ kä̧di̧'o̧ko̧u̧ pinä̧tü̧.

⁵⁵ Tä̧do̧tü̧ mi̧nä̧rü̧ 'kuäopünä̧tä̧ ppä̧dä̧kuȩ ukuokuinü̧. Abraha̧-ttü̧ kkä̧mä̧dü̧ jua'a yabo i̧tti̧mü̧ o'kotürü'i̧nä̧ 'kuäopünä̧tä̧ päi'ünä̧.

⁵⁶ Ja̧'wa̧nü̧ jä̧ja̧'a̧ María-mä̧ kkawaruwaju Elísabe kkojusodera̧'a̧ do'ächü 'chä̧jä̧'kajumä̧ kkä̧wa̧tü̧ wä̧mȩtukuä jo̧mȩnä̧ kki̧nä̧ju̧; kkä̧jä̧'kaju kkojusodera̧'a̧ku̧mä̧ ppa̧'a̧chi̧nä̧ju̧.

Bautizo jȩpä̧'i̧jü̧, Ju̧a̧ uwäpächinü̧ wȩnȩ

⁵⁷ Isabe o'kaju juojü mo̧ro̧ päi'omȩnä̧, kki̧tti̧rü̧mä̧ uborü uwabekuinä̧ju̧.

⁵⁸ Kkojusode ppeyä kka̧kuä̧tü̧'i̧nä̧, kkawaruwä'i̧nä̧ Tu̧ru̧wa̧ Dio juäjuru rȩrü̧jü̧ topü rü̧ȩnä̧ jȩä̧ji̧ ä̧ju̧kui̧pä̧jä'kotü, juäjuru eseu 'chi̧nä̧tü̧

⁵⁹ Kko̧ro̧mü̧ttü̧nü̧ wäbodäkuä mo̧ro̧ päi'omȩnä̧, jua̧u̧ ji̧'ki̧cha̧wa̧rü̧ circuncisión jȩtti̧ya̧tü̧ pä'ü ttȩpä̧ja̧'a̧, jä'o i̧mi̧ ottarü pä'ü jȩpi̧nä̧tü̧, Zacaría, jü̧nä̧.

⁶⁰ Ja̧'wa̧nü̧ pättiyäkua ja̧ju̧mä̧ pä'inä̧ju̧: —Ja̧'wa̧nü̧mä̧kü̧, Ju̧a̧ pä'ü i̧mi̧kuä̧kua̧.

⁶¹ Päjomȩnä̧, pättinä̧kua̧: —¿Tta̧'a̧nü̧ pä'ü, ja̧'wa̧nü̧ mi̧kua̧jä̧ttü̧? kuawaruwä ja̧'wa̧nü̧ mikuätümä̧ tokuä'ija'anä̧.

⁶² Ja̧'wa̧nü̧ päjiyä̧u̧ jä'orü ttu̧mü̧nä̧tä̧ jȩpü̧ ji̧'ki̧cha̧wa̧ i̧mi̧ tta̧'a̧nü̧ oajá pä'ü jä'epü ttä̧ju̧kui̧nä̧ku̧,.

⁶³ Ja̧'wa̧nü̧ jättepäku, dau isodä jä'epo'ü, juodä wä̧mo̧dä wȩyu̧ti̧nü̧: «I̧mi̧mä̧ Ju̧a̧ pä'ü i̧mi̧kuä̧kua̧,» jü̧nä̧. Ja̧'wa̧nü̧ i̧wȩyu̧ti̧yä̧u̧ o'katoi'ünä̧tä̧ toó topäkuäwinä̧tü̧.

⁶⁴ Pä'äji ji̧nü̧ta'anü̧ ja̧u̧nu̧tä̧ i̧wȩnȩ räo'äku, Zacaría-mä̧ Dio üadiwä esewinü̧.

⁶⁵ O'katoi'ünä̧ juȩnȩ ppeyänä̧ kka̧kuä̧tü̧mä̧ rü̧ȩnä̧ ye'inä̧tü̧. Ja̧'wa̧ta̧nü̧ o'katoi'ünä̧tä̧ judea rȩjȩnä̧ kka̧kuä̧tü̧'i̧nä̧ pi̧yȩ tü'kümä̧ juo'ekuinä̧tü̧.

⁶⁶ O'katoi'ünä̧ pi̧yȩ tü'kü ä̧ju̧kuä̧tü̧mä̧ jakuänä̧tä̧ amükuädinä̧tü̧: ¿Däjetäki̧ jȩä̧kua̧jä̧, Pide ji̧'ki̧cha̧wa̧mä̧? Jua'amä̧ Jua̧u̧nä̧tä̧ Dio kkü̧ pä'ü ttu̧wo̧jua̧'a̧ttü̧ amükuädinä̧tü̧.

Zacaría Dio-rü esewinü̧ wȩnȩ

⁶⁷ Ji̧'ki̧cha̧wa̧ jä'o Zacaría-mä̧, Epíritu Sa̧tu̧ jäwä jo̧mȩnü̧ kkä̧ku̧, ukuoku pä'inü̧:

⁶⁸ ¡Irae ttü̧ja̧ ttu̧ru̧wa̧ Dio-rü teseäkuäwätukua, isopäi'ünä̧ u̧mü̧wä̧yotürü topü ichükkä̧nü̧, surojüttü rä'epü iku ichä'attü̧!

⁶⁹ Ja̧'wa̧ta̧nü̧ ujuru kku̧nä̧rü̧ ra̧wä̧pi̧jü̧ttü̧ ppädäkuäwä i̧sa̧rü̧ weäja'attü, chutä u̧mü̧wä̧ya̧ Dawi pinü̧ isotürü ja̧'a̧tȩ'ü̧.

⁷⁰ Pi̧yȩmä̧ ä̧kuo̧mȩnä̧ttü̧tä̧ päi'ünä̧, Profetas jü̧nä̧ ȩmi̧nä̧u̧ ttänä̧, chi̧yä̧kua̧sä̧ pä'ü ukuokuinü̧tä̧ ja̧'a̧.

⁷¹ Taboiyotüttü'i̧nä̧ Ja̧'wa̧ta̧nü̧ tta̧mi̧suru topätüttü'i̧nä̧ ku̧ji̧pä̧tu̧ku̧nä̧ ppädäkuäwä i̧sa̧ päinü̧ ja̧'a̧.

⁷² Tä̧do̧tü̧ mi̧nä̧rü̧ eseku, rȩrü̧jü̧ to̧chä̧kuä̧u̧jä̧ päinü̧.

⁷³ Ja̧'wa̧ta̧nü̧ tä̧do̧ Abraha̧ mi̧nä̧rü̧ Jȩchä̧kua̧sä̧ pä'ü juramento pättünä̧, iya päinü̧tä̧ ja̧'a̧:

⁷⁴ Taboiyotürü rä'epü ikuomȩnä̧ yekuäkuäwä juiyünä̧, weütä jȩpü̧ kkä̧nü̧ tesewarü pä'inü̧.

⁷⁵ Surojü juiyünä̧, adiwomȩnä̧tä̧ chutä ä'kattümä̧, ttü̧jo̧mȩbü päi'ünä̧, tü̧ji̧ya̧rü̧ pä'inü̧.

⁷⁶ Ukú ji̧'ki̧cha̧wa̧mä̧, mo̧ro̧jä̧ ru̧wa̧ wȩ'ä̧wa̧ profeta pä'ü ottäkua̧jä̧ u̧mä̧nä̧ jo̧mȩnü̧ jȩpü̧ ku̧ju̧nä̧kua̧'a̧ttü̧,

⁷⁷ Jua'amä̧ kki̧'i̧kuä̧ wȩnȩ ttu̧wo̧jui̧pü̧nä̧ kuiya pä'ü, ja̧'wa̧ta̧nü̧ suronä̧ jȩttä̧'i̧jü̧ttü̧ rä'epü ikuatü pä'ü,

⁷⁸ Tü̧ä̧nä̧wa̧ Dio-mä̧ rü̧ȩnä̧ rȩrü̧jü̧ topü mo̧ro̧jä̧ra̧'a̧ttü̧ do'ächü i̧chä̧kuä̧u̧jä̧ jareünä̧ mo̧ro̧ juoa'a jä̧'i̧nü̧'a̧nü̧,

⁷⁹ Rü̧ȩnä̧ yo̧ü̧nä̧ kka̧kuä̧tü̧rü̧ ja̧'wa̧ta̧nü̧ wa'are ujurunä̧ kka̧kuä̧tü̧rü̧ tȩya̧u̧ i'chächü iya pä'ü. Ja̧'wa̧ta̧nü̧ wȩnȩ jui̧yä̧mä̧nä̧ ti̧'chü̧nä̧ weye juoepa pä'ü.

⁸⁰ Ji̧'ki̧cha̧wa̧mä̧ büó juoüta'anü̧ epíritu jäwänä̧'i̧nä̧ ä̧rä̧mi̧nü̧; ja̧'wa̧nü̧ ja̧'a̧mä̧ rȩba̧ dȩ'a̧ra̧'a̧tä̧ kki̧nü̧, Irae ttü̧ja̧rü̧ i̧jȩkuo̧mȩbü päi'ünä̧.