San Juan 8 - Nuevo Testamento Uwotjüja

¹ Ja̧'wa̧nü̧ ja̧'a̧, Jesú-mä̧ Olivos müä'kara̧'a̧ku̧ 'chi̧nü̧.

² Kkoro mo̧ro̧ yo̧ä̧i̧, Dio-rü ukuokuäkuäwodenä̧ pä'äjita'anü̧ ichinü̧. Ja̧'wa̧nü̧ ja̧'a̧ ttü̧ja̧ ttü̧ka̧ka̧kui̧'ä̧ja̧'a̧ pä̧mä̧dü̧ wo̧juȩti̧nü̧.

³ Ja̧'wa̧nü̧ ja̧'a̧ weäwä wȩnȩ wo̧juȩkuä̧ isotü'i̧nä̧, fariseo wotü'i̧nä̧ isaju yajuterü, kkirekuo woküku suronä̧ jȩja̧'a̧ po̧kui̧pä̧jä̧'kotü, ttü̧ja̧ ttü̧'kä̧tȩ jo̧mȩ i'kächipü kku̧nu̧,

⁴ Jesú-ru pä'inä̧tü̧: —Wo̧juȩkuä̧ i̧sa̧, pajumä̧ kkirekuo poküku suronä̧ jȩja̧'a̧ tü̧'o̧kui̧'ä̧jä̧kua̧.

⁵ Moisé weäwä wȩnȩnä̧mä̧, pa̧'a̧nü̧ jȩpä̧ju̧ru̧mä̧ ido'kiyänä̧ ikuäu, kuä'ü tikua pä'ü we'inü̧, ¿Ukumä̧ toku päkua'ajä̧ttü̧?

⁶ Ja̧'wa̧nü̧ ja̧'a̧nä̧, a̧mü̧nä̧ kka̧kuä̧mȩ'ü̧ topü, jua̧u̧nä̧tä̧ wȩnȩtü̧ jittäwarü pä'ü pä'inä̧tü̧. Ja̧'wa̧nü̧ pätta'anä̧, Jesú-mä̧ ja̧rȩyu̧nu̧ kkä̧nü̧ üdo'chenä̧ rȩjȩ wȩyu̧ti̧nü̧.

⁷ Ja̧'wa̧nü̧ ja̧'a̧nä̧, yabonü̧ jä̧ttȩpä̧rä̧ku̧, ä̧rä̧mi̧'ü̧ päinä̧u̧: —Ukututtü, ya̧tȩ surojü jui̧'a̧mä̧, ä̧kuo̧mȩnä̧ kkä̧mä̧dü̧ ido'ki ikuiju.

⁸ Pä'ü kkä̧nü̧, pä'äjita'anü̧ ja̧rȩyu̧ pä'i'ü, yaboku rȩjȩ wȩyu̧ti̧nü̧.

⁹ Ja̧'wa̧nü̧ pä'a ä̧ju̧ku̧, tta̧mü̧kuädü jakuänä̧ ji̧ä̧wä̧u̧ ya̧ku̧nä̧ dü'ekuinä̧tü̧, büäkuächätüttü kkä̧mä̧dü̧ yoyoja̧'a̧ año a̧'u̧kuo̧tübü päi'ünä̧. Ja̧'wa̧nü̧ ja̧'a̧ Jesú-mä̧ kkatä, isajukutä kki̧'i̧pü̧.

¹⁰ Ä̧rä̧mi̧'ü̧ topü, jä'epü, ä̧ju̧kui̧nä̧kua̧: —Isaju ¿to tti̧'chä̧jä̧ttü̧? ¿Ya̧tȩ'i̧nä̧ kuä'ü ttikua, pättokokua päjäjujuä̧?

¹¹ Kkädätinä̧ku̧: —Ya̧tȩ'i̧nä̧ jȩpo̧kü̧ päjí, Chu̧ru̧wa̧. Jesú päinä̧kua̧: —Ttü'i̧nä̧ kuä'ü ttikua pä'ümä̧ pädokokuajä̧; täkü täi, pä'äjita'anü̧mä̧, surojümä̧ jȩ'kuä̧.]

Jesú, pi̧jä̧ttü̧ i̧tȩya̧u̧ wȩnȩ

¹² Jesú-mä̧ pä'äjita'anü̧ ttü̧ja̧rü̧ pä'inü̧: Ttütäsä pi̧jä̧ttü̧ tȩya̧u̧mä̧; ttüku ichümä̧, yo̧ü̧nä̧mä̧ kue'ächokü jä̧kua̧, pärokuä tȩya̧u̧ tta̧'kua̧rü̧tä̧ u̧ju̧nä̧rä̧kua̧.

¹³ Päomȩnä̧ fariseo wotümä̧ pä'inä̧tü̧: —Ukumä̧ kua̧mü̧nä̧ pa̧ja̧tü̧ kuadiwä ji'äkuäujä̧ ja̧'wa̧nü̧ ja̧'a̧ttü̧ jikuäumä̧ mikuäwokü ja̧'a̧.

¹⁴ Jesú ädätinä̧u̧: —Ttü cha̧mü̧nä̧ pa̧ja̧tü̧ chüadiwä jidäkuäuttu'i̧nä̧, ttü jidäkuäumä̧ isopäi'ünä̧ jäwä ja̧'a̧. Jua'amä̧ chichinomȩ'i̧nä̧, chi̧'chä̧kuo̧mȩ'i̧nä̧ chu̧wo̧jua̧'a̧ttü̧; ja̧'wa̧nü̧ ja̧'a̧nä̧ ukutumä̧ chichinomȩ'i̧nä̧, chi̧'chä̧kuo̧mȩ'i̧nä̧ jerupätüjä̧.

¹⁵ Ukutumä̧ pi̧jä̧ ttü̧ja̧ ttamu̧kuäda'akutä, adiu ja̧ pä'ü'i̧nä̧, surojü ja̧ pä'ü'i̧nä̧ pä'ätüjä̧. Ttümä̧ ya̧tȩrü̧'i̧nä̧, adiu ja̧ pä'ü'i̧nä̧, surojü ja̧ pä'ü'i̧nä̧ pä'oküsä.

¹⁶ Ja̧'wa̧nü̧ ja̧'a̧nä̧, ttü adiu ja̧ pä'ü'i̧nä̧, surojü ja̧ pä'ü'i̧nä̧ pädomȩnä̧mä̧ isopäi'ünä̧ jäwätä pä'üsä; jua'amä̧ ttü kkatätämä̧ jo̧ka̧'a̧ttü̧, ttükumä̧ Chä'o ttürü we'inü̧'i̧nä̧ ja̧'a̧ttü̧.

¹⁷ Ukutu kukuotätuku weäwä wȩnȩmä̧ wȩyu̧kua̧'a̧: Kkoro juei tottäji ta̧ju̧nä̧ pättomȩnä̧mä̧ isopäi'ünä̧ wȩnȩ ja̧'a̧, pä'ätüjä̧.

¹⁸ Ja̧'wa̧nü̧ ja̧'a̧ttü̧, ttütä chütü'kü ji'äwätümä̧ ta̧ju̧nä̧ ja̧'a̧, ttütä'i̧nä̧, Chä'o ttürü we'inü̧'i̧nä̧, jü̧nä̧.

¹⁹ Päomȩnä̧, jä'epü ttä̧ju̧kui̧nä̧ku̧: —¿Kuä'omä̧ too ü̧ja̧jä̧ttü̧? Jesú ädätinä̧u̧: —Ukutumä̧ ttürü'i̧nä̧ jerupätüjä̧ ja̧'wa̧nü̧ kuieruwätükua'amä̧, Chä'orü'i̧nä̧ jerupätüjä̧; ttürü ku̧wo̧juä̧tu̧ku̧ttu̧mä̧, chä'orü'i̧nä̧ wo̧jua̧ja̧tü̧jä̧.

²⁰ Pi̧yȩmä̧ Dio-rü ukuokuäkuäwodettü, ofrenda rütäwo̧ka̧ kko̧mȩttü̧ wo̧juȩtü̧ päinü̧. Ja̧'wa̧nü̧ ja̧'a̧nä̧ ji̧nä̧ u̧mo̧ro̧ rȩbȩä̧kuä̧wo̧ka̧'a̧ttü̧, ya̧tȩ'i̧nä̧ 'chuttädokoku pinü̧.

«Ttü chi̧'cha̧'a̧mä̧ ichokotüjä̧»

²¹ Jesú-mä̧ pä'äjita'anü̧ päinä̧u̧: —Ttümä̧ i̧u̧sä̧, chi̧u̧ o'ka'a kusätukuä̧kua̧sä̧, kusätukua'anä̧, surojünä̧tä̧ wa'ü kuikuäkuotüjä̧. Ttü chi̧'cha̧'a̧mä̧, kuichätuku juiyünä̧ ja̧'a̧.

²² Päomȩnä̧, judío-mä̧ pä'inä̧tü̧: —¿Jua'amä̧ kuä'äu ikua pä'üdí̧ pä'a, ttü chi̧'cha̧'a̧mä̧, kuichü juiyünä̧ wotüjä̧ pä'amä̧?

²³ Pättiyäku Jesú päinä̧u̧: Ukutumä̧ po rȩjȩtä̧ isotüjä̧, ttümä̧ ju'toju i̧sa̧sä̧; ukutumä̧ pi̧jä̧nä̧ ttü̧ja̧jä̧, ttümä̧ pi̧jä̧ ttü̧ja̧sa̧mä̧kü̧sä̧.

²⁴ Ja̧'wa̧nü̧ ji̧yä̧ku̧ pä'äjisä, surojü jȩ'kuä̧tu̧ku̧nä̧tä̧ wa'ü kuikuäkuotüjä̧ pädäja'amä̧; jua'amä̧ ttürü, ttütäsä päda'anä̧ kuesetätukuoka'attü.

²⁵ Pä̧i̧yä̧u̧ jättepinä̧ku̧: —¿Ukumä̧ dí kua'ajä̧ttü̧? Jesú ädätinä̧u̧: —Ä̧kuo̧mȩnä̧ttü̧ päi'ünä̧ jidäwinü̧tä̧ ja̧'a̧.

²⁶ Rü̧ȩnä̧ ja̧'a̧ ukuturu chukuokua pädümä̧ ja̧'wa̧ta̧nü̧ adiu jȩ'kuä̧tu̧ku̧ ja̧ pä'ü'i̧nä̧, surojü jȩ'kuä̧tu̧ku̧ ja̧ pä'ü'i̧nä̧, jü̧nä̧; ja̧'wa̧nü̧ ja̧'a̧nä̧ ttürü we'inü̧mä̧ jueü wȩnȩtä̧ wa̧ ja̧'a̧; ja̧'wa̧nü̧ ja̧'a̧ttü̧, jua̧u̧ttü̧ chä̧ju̧kui̧nü̧tä̧ pi̧jä̧ ttü̧ja̧rü̧mä̧ ukuokusä.

²⁷ Ja̧'wa̧nü̧ ukuokua'anä̧, Jä'o ütü'kü ukuoku pä'ümä̧ wo̧jui̧'o̧ko̧tü̧ pinä̧tü̧.

²⁸ Ja̧'wa̧nü̧ ttiyäku, päinä̧u̧: Ubo I̧tti̧rü̧ ju'toju kä'epü ttu̧ju̧nu̧ mo̧ro̧ päi'omȩnä̧, jua̧u̧nu̧tä̧ ku̧wo̧jui̧pä̧kuo̧tü̧jä̧, isopäi'ünä̧ Ttütäsä pädäji jä̧ji̧mä̧ ja̧'wa̧ta̧nü̧ ttü jȩchü̧, ttütä amükuädü jȩcho̧ka̧'a̧, Chä'o u̧wo̧juȩti̧na̧'a̧ku̧ chukuokumä̧.

²⁹ Isopäi'ünä̧ ttürü we'inü̧mä̧ ttütäku kkü̧; Chä'omä̧, kkatämä̧ u̧ju̧ni̧'o̧ko̧ku̧sä̧ ja̧'wa̧nü̧ ja̧'a̧ttü̧ churutä pä̧wä̧rü̧jü̧tä̧ jȩpü̧sä̧.

³⁰ Pa̧'a̧nü̧, Jesú jiäwomȩnä̧mä̧ rekuätü, Jua̧u̧ru̧ esetinä̧tü̧.

Isopäi'ünä̧ wȩnȩmä̧ 'chu̧ä̧rü̧ttü̧ rä'epü iku ja̧'a̧

³¹ Ja̧'wa̧nü̧ ja̧'a̧ Jesú-mä̧, churutä esetätü judío-rü pä'inü̧: —Isopäi'ünä̧ ttü chi̧wȩnȩnä̧ ku̧jätu̧ku̧ttü̧mä̧, isopäi'ünä̧ chumüwäyotü kuäkuotüjä̧.

³² Ja̧'wa̧ta̧nü̧ isopäi'ünä̧ wȩnȩ ku̧wo̧juä̧kuo̧tü̧jä̧, jua̧u̧ isopäi'ünä̧ wȩnȩtä̧ jä̧kua̧'a̧ ukuturu 'chu̧ä̧rü̧ttü̧ rä'epü i̧kuä̧kuȩmä̧.

³³ Päomȩnä̧, ttädätinä̧ku̧: Ujutumä̧ Abraha̧ i̧tti̧mü̧ isotüjä̧ ja̧'wa̧nü̧ ja̧'a̧ttü̧ ya̧tȩ'i̧nä̧ ttu̧wo̧juȩtä̧u̧ jü̧nä̧mä̧ wȩtto̧ko̧u̧jä̧; ¿Tta̧'a̧nü̧ pä'ü rä'epü ikuäwäkuotüjä̧ pä'ajä̧ttü̧?

³⁴ Jesú ädätinä̧u̧: —Isopäi'ünä̧ pädäu̧jä̧, o'katoi'ünä̧ surojü jȩpä̧tü̧mä̧, surojütä 'kiyünä̧ wȩä̧u̧ ja̧'a̧.

³⁵ Ya̧tȩ, yotüte ttu̧mü̧wä̧ya̧ jü̧nä̧ kkü̧mä̧, 'kuäopünä̧mä̧ isodenä̧ kko̧kü̧ ja̧'wa̧nü̧ ja̧'a̧nä̧ ji̧nä̧so i̧tti̧tä̧ ja̧'a̧ 'kuäopünä̧ juodenä̧ isodenä̧ kkü̧mä̧.

³⁶ Ja̧'wa̧nü̧ ja̧'a̧ttü̧, I̧tti̧ ukuturu u̧mü̧wä̧ya̧ jü̧nä̧ 'chu̧ä̧rü̧ttü̧ rä'epü ikuttümä̧, isopäi'ünä̧tä̧ 'chu̧ä̧rü̧mä̧ juikuäkuotüjä̧.

³⁷ Jua'akumä̧, Abraha̧ i̧tti̧mü̧ isotüjä̧ pä'ümä̧ wo̧jua̧sä̧; ja̧'wa̧nü̧ ja̧'a̧nä̧ kuä'ü kuikuätukua päkuätukuäkusä chi̧wȩnȩ esetü jui'ü.

³⁸ Ttümä̧, chä'ottü tochinü̧tä̧ ukuokusä; ukutumä̧ kuä'otüttü̧ kuä̧ju̧kui̧nä̧tu̧ku̧tä̧ jȩpä̧tü̧jä̧.

³⁹ Päomȩnä̧, pättinä̧ku̧: —¡Ujutu tä'omä̧, Abraha̧ ja̧'a̧! Pättiyäku Jesú ädätinä̧u̧: —Isopäi'ünä̧ Abraha̧ i̧tti̧mü̧ kuätukuttümä̧, Jua̧u̧ jȩi̧nü̧mä̧ jȩpa̧ja̧tü̧jä̧.

⁴⁰ Ja̧'wa̧nü̧ ja̧'a̧nä̧, kuä'ü kuikuätukua päkuätukuäkusä, Dio-ttü chä̧ju̧kui̧nü̧ jueü wȩnȩ jidäwa'anä̧. ¡Abraha̧-mä̧ ja̧'wa̧nü̧mä̧ jȩpo̧kü̧ pinü̧!

⁴¹ Ukutumä̧, kuä'otuku jȩü̧tä̧ jȩpä̧tü̧jä̧. Päomȩnä̧ ttädätinä̧ku̧: —Ujutumä̧, u̧mi̧ isotüttümä̧ tti̧tti̧mü̧mä̧ku̧jä̧; ujutu Tä'omä̧ ya̧tȩtä̧ ja̧'a̧, Dio-tä.

⁴² Pättiyäku Jesú-mä̧ ädätinä̧u̧: —Isopäi'ünä̧ Dio kuä'otuku jü̧ttü̧mä̧, ttürü eseu repe'atüjä̧; ttümä̧ jua̧u̧ttü̧ rä'opü chichina̧'a̧ttü̧. Ttümä̧, cha̧mü̧nä̧ amükuädümä̧ ichokü pinü̧sä̧, pärokua'aku Dio-tä ja̧'a̧ ttürü we'inü̧mä̧.

⁴³ ¿Tta̧'a̧nü̧ pä'ü ttü chukuokumä̧ wo̧jui̧'o̧ko̧tü̧jä̧ttü̧? Jua'amä̧ chi̧wȩnȩ kuä̧ju̧kuä̧tu̧ku̧ juiyünä̧ ja̧'a̧ttü̧.

⁴⁴ Ukutumä̧ kuä'otuku äwettä i̧tti̧mü̧jä̧; jua̧u̧ru̧ pä̧wä̧rü̧jü̧tä̧ jȩ'kuä̧tu̧kua̧'a̧ttü̧. Jua̧u̧mä̧ ä̧kuo̧mȩnä̧ttü̧tä̧ päi'ünä̧ kkä̧mä̧dü̧ ttü̧ja̧rü̧ kuäwä i̧sa̧ pinü̧. Jua̧u̧mä̧ isopäi'ünä̧ wȩnȩ jäwänä̧mä̧ kko̧kü̧ pinü̧, chunä̧tä̧ isopäi'ünä̧ wȩnȩ juiya'attü. Ja̧'wa̧nü̧ ja̧'a̧ttü̧ yapareu wȩnȩ ukuokuomȩnä̧mä̧, chuttutä rä'eku ukuoku; jua'amä̧ ya̧pa̧rȩwa̧ ja̧'a̧ttü̧ ja̧'wa̧ta̧nü̧ jua̧u̧mä̧ yapareäkuäwätä jä'o ja̧'a̧.

⁴⁵ Ja̧'wa̧nü̧ ja̧'a̧nä̧, ttürümä̧ jueü wȩnȩ jidäwa'a ja̧'a̧, kuesetätukuokokusä.

⁴⁶ ¿Díjä̧ttü̧ ukututtü ji̧yȩtȩ surojü jȩchü̧ päü'anü̧ wa̧mä̧? ja̧'wa̧nü̧ ja̧'a̧ttü̧ isopäi'ünä̧ wȩnȩ päda'amä̧, ¿Tta̧'a̧nü̧ pä'ü kuesetätukuokokusättü̧?

⁴⁷ Dio i̧tti̧mä̧, Dio i̧wȩnȩ ä̧ju̧ku̧; ja̧'wa̧nü̧ ja̧'a̧ttü̧, ukutumä̧ ä̧ju̧kuo̧ko̧tü̧jä̧, Dio i̧tti̧mü̧ kuätukuoka'attü̧.

Crito-mä̧, Abraha̧-ttü̧'i̧nä̧ ä'koji kki̧nü̧

⁴⁸ Ja̧'wa̧nü̧ pä̧i̧yä̧u̧ judío-mä̧ pättinä̧ku̧: —Ja̧'wa̧nü̧ ji̧yä̧u̧, ujutumä̧, ukurumä̧ Samaria ttü̧ja̧sa̧jä̧, epíritu su̧ro̧pa̧ ü̧jä̧ku̧ pätäkujä̧.

⁴⁹ Jesú-mä̧ ädätinä̧u̧: —Ttümä̧ epíritu su̧ro̧pa̧rü̧mä̧ kkü̧nä̧ro̧kü̧sä̧. Pärokua'aku, Chä'orütä ukuotüsä; ja̧'wa̧nü̧ ja̧'a̧nä̧ ukutumä̧ suronä̧tä̧ päkuätukuäkusä.

⁵⁰ Ja̧'wa̧nü̧ ja̧'a̧nä̧ ttümä̧, churuwo adiu pättattü pä'oküsä; ya̧tȩ Dio-tä ja̧'a̧ jua̧u̧ pä'ümä̧, ja̧'wa̧nü̧ ja̧'a̧ttü̧ Jua̧u̧tä̧ ja̧'a̧ adiu ja̧ pä'ü'i̧nä̧, surojü jȩ'kuä̧tu̧kua̧ja̧ pä'ü'i̧nä̧ pä'ümä̧.

⁵¹ Isopäi'ünä̧ pädäu̧jä̧, chi̧wȩnȩ päü jȩpü̧mä̧, wa'ü ikuokü jä̧kua̧.

⁵² Judío-mä̧ ttädätinä̧ku̧: —Jitämä̧, isopäi'ünä̧ epíritu su̧ro̧pa̧ ü̧jä̧ku̧ pä'ü wo̧juä̧tü̧jä̧. Abraha̧'i̧nä̧, profeta-tü̧'i̧nä̧ wa'ü ttikuina̧'a̧nä̧, ukumä̧, ttü chi̧wȩnȩ ukuotätümä̧ wa'ü ikuokotü ttäkuotü päkua'attü̧.

⁵³ ¿Jua̧u̧ttü̧mä̧, ukumä̧, tä'o Abraha̧-mi̧nä̧ttü̧'i̧nä̧ abonä̧nü̧ wa̧jä̧ tä̧jí̧? Jua̧u̧mä̧ wa'ü ikuinü̧ ja̧'wa̧ta̧nü̧ profeta-tü̧'i̧nä̧ wa'ü ikuinä̧tü̧. ¿Ji̧nä̧so ukuo i̧sa̧sä̧ päkua'a, ukumä̧?

⁵⁴ Jesú ädätinä̧u̧: —Ttütä cha̧mü̧nä̧ churuwo chi̧jȩku̧ttü̧mä̧, ttü churuwomä̧ mikuäwokü ja̧'a̧; ja̧'wa̧nü̧ ja̧'a̧nä̧, ttürü churuwo jȩpü̧mä̧ Chä'o ja̧'a̧, jua̧u̧tä̧ ukutu chä'o Dio päkuätukuäku.

⁵⁵ Ja̧'wa̧nü̧ ja̧'a̧nä̧ ukutumä̧ kuieruwätukuäku; ttümä̧ chu̧wo̧juä̧ku̧; ja̧'wa̧nü̧ ja̧'a̧nä̧ chieruwäku pädüttü'i̧nä̧, yapare ji'äusä ukutu jü̧ ta̧'a̧nü̧; ja̧'wa̧nü̧ jo̧ka̧'a̧ ttümä̧ chu̧wo̧juä̧ku̧ ja̧'a̧; ja̧'wa̧ta̧nü̧ i̧wȩnȩ'i̧nä̧ ukuotüsä.

⁵⁶ Kuä'otuku Abraha̧-mi̧nä̧mä̧, ttü chu̧mo̧ro̧ toa pä'ü esewinü̧; ja̧'wa̧nü̧ ji̧na̧'a̧ topümä̧ rü̧ȩnä̧ esewinü̧.

⁵⁷ Ja̧'wa̧nü̧ pä̧i̧yä̧u̧ judío-mä̧ Jesú-ru pä'inä̧tü̧: Ji̧nä̧ cincuenta-nü̧ año'i̧nä̧ jui̧'a̧ja̧'a̧nä̧, ¿Abraha̧-rü̧mä̧ topinü̧ ja̧'a̧ tä̧jí̧?

⁵⁸ Jesú päinä̧u̧: —Isopäi'ünä̧ ukuturu pä'üsä: Abraha̧ ü̧jä̧kua̧'a̧'i̧nä̧, ä'kanä̧ ttümä̧ kki̧nü̧sä̧.

⁵⁹ Päomȩnä̧, juätü judío-mä̧ inä̧du ȩmi̧nä̧tü̧ ikuäu ttikuarü pä'ü; ja̧'wa̧nü̧ ja̧'a̧nä̧ Jesú-mä̧, ttü̧ja̧ ttü̧'kä̧tȩ jo̧mȩnä̧ dajawächü Dio-rü ukuokuäkuäwodettümä̧ rä'opächinü̧.