San Juan 7 - Nuevo Testamento Uwotjüja

Jesú ü̧jä̧wa̧tü̧mä̧ esetokotü pinä̧tü̧

¹ Jua̧u̧ 'kuäopäji o'ka'a Jesú-mä̧ Galirea rȩjȩnä̧ kue'ächinü̧; ja̧'wa̧nü̧ ja̧'a̧nä̧ Judea rȩjȩnä̧mä̧ ü̧ja̧ pä'okü pinü̧, judío kuä'ü ttikua pättäku.

² Ja̧'wa̧ta̧nü̧ judío jȩttä̧'i̧jü̧ Tabenákuro pä'käri pättü tü'küwächi'iyä̧u̧,

³ Jesú ü̧jä̧wa̧tü̧mä̧ pättinä̧ku̧: —Porümä̧ rä'opächü judea rȩjȩra̧'a̧tä̧ täi, uku ku̧wo̧juȩtä̧'i̧jä̧u̧'i̧nä̧ jȩ'ku̧ tottäkua'anü̧.

⁴ Isopäi'ünä̧ ya̧tȩ ttü̧ja̧rü̧ i̧jȩkua̧ pä'ümä̧, yä̧wä̧i̧nä̧mä̧ jȩpo̧kü̧. Pi̧yȩ isopäi'ünä̧ jȩ'ku̧ttü̧mä̧, pi̧jä̧ ttü̧ja̧ tottünä̧ jȩpi̧.

⁵ Pi̧yȩmä̧ pättinä̧ku̧, a̧mü̧nä̧ ü̧jä̧wa̧tü̧'i̧nä̧ esetü jui'ü,

⁶ pättäku Jesú-mä̧ päinä̧u̧: —Ttü chu̧mo̧ro̧mä̧, ji̧nä̧ rȩbȩwi̧'o̧ka̧'a̧ ja̧'wa̧nü̧ ja̧'a̧nä̧ ukutu ku̧mo̧ro̧tu̧ku̧mä̧ 'kuäopünä̧tä̧ kkä̧u̧jä̧.

⁷ Pi̧jä̧ ttü̧ja̧mä̧, ukuturu ttüjü'koka'amä̧ jȩtto̧ko̧u̧jä̧; ja̧'wa̧nü̧ ja̧'a̧nä̧ ttürümä̧ kkü'kokotü, ukutumä̧ surojü jȩpä̧tü̧jä̧ pä'ü jidäwä̧u̧.

⁸ Ukututä tätukui pä'kärira̧'a̧mä̧; ttümä̧ 'cho̧kü̧sä̧, ji̧nä̧ chu̧mo̧ro̧mä̧ rȩbȩä̧kuä̧wo̧ka̧'a̧ttü̧.

⁹ Ja̧'wa̧nü̧ pä'äji̧'ka̧, Galirea rȩjȩnä̧tä̧ kki̧'i̧pi̧nü̧.

Judío jȩttü̧ pä'kärira̧'a̧, Jesú i̧'chi̧nü̧ wȩnȩ

¹⁰ Ja̧'wa̧nü̧ ja̧'a̧nä̧, Jesú-mä̧, ü̧jä̧wa̧tü̧ tti̧'chä̧ji̧ o'ka'a, ttü̧ja̧ ttu̧wo̧jui̧pü̧ juiyünä̧tä̧, yä̧wä̧i̧nä̧ 'chi̧nü̧ pä'kärira̧'a̧.

¹¹ Ja̧'wa̧nü̧ ja̧'a̧, Judío-mä̧ pä'kärira̧'a̧ttü̧ u̧sä̧rü̧ pä'inä̧tü̧: —¿Chupä'ijümä̧, too ü̧ja̧'a̧jä̧ttü̧?

¹² Ja̧'wa̧nü̧ ja̧'a̧, Jua̧u̧ ütü'kü ttü̧ja̧mä̧ rü̧ȩnä̧ ukuokuinä̧tü̧: kkorotümä̧, «adiwä i̧sa̧ pä'ijü pätta'anä̧, kkorotümä̧ ttü̧ja̧rü̧ surojuo'epü» pä'ü.

¹³ Ja̧'wa̧nü̧ ja̧'a̧nä̧, jua̧u̧ ütü'kümä̧, ttü̧ja̧ ttä'kattü wäjuönä̧mä̧ judío-rü ye'eku ukuokuokotü pinä̧tü̧.

¹⁴ Ja̧'wa̧nü̧ ja̧'a̧mä̧, Jesú-mä̧ pä'käri kkä'ko päi'ünä̧ jȩtta̧'a̧ jakuänä̧, Dio-rü ukuokuäkuäwodenä̧ do'ächi'ü kkä̧mä̧dü̧ wo̧juȩti̧nü̧.

¹⁵ Jua̧u̧ wo̧juȩtü̧ wo̧juȩku̧nä̧ u̧wo̧juȩti̧yä̧u̧, judío-mä̧ isoó, pä'inä̧tü̧: —¿Toku ja̧'a̧ wo̧jua̧jä̧ttü̧ chujuamä̧, kuyärumä̧ uwo̧jui̧'o̧ka̧'a̧ ji̧na̧'a̧nä̧?

¹⁶ Jesú-mä̧ ädätinä̧u̧: —Ttü chu̧wo̧juȩtü̧mä̧, ttü jäwämä̧kü̧ ja̧'a̧, ttürü we'inü̧ jäwä ja̧'a̧.

¹⁷ Ya̧tȩ Dio-rü pä̧wä̧rü̧jü̧ jȩa̧ pä'ütä ja̧'a̧, isopäi'ünä̧ Ttü chu̧wo̧juȩtü̧, Dio-ttü ichü pä'ü wo̧jua̧mä̧ ja̧'wa̧ta̧nü̧ jü̧ juiyüttü'i̧nä̧, churutä pä̧wä̧rü̧jü̧tä̧ wo̧juȩtü̧tó pä'ü wo̧jua̧mä̧.

¹⁸ Ya̧tȩ chutä a̧mü̧nä̧ pa̧ja̧tü̧ amükuädäkuäu ukuokumä̧, churutä tesewarü pä'ü usú ja̧'wa̧nü̧ ja̧'a̧nä̧, churutä we'inü̧rü̧ ttesewiyarü pä'ü usomȩnä̧mä̧, jueü wȩnȩtä̧ ukuoku, surojü jui'attü.

¹⁹ «¿Ukuturu weäwä wȩnȩ iyinü̧mä̧, Moisé-mä̧ jo̧ka̧'a̧ ji̧na̧'a̧ tä̧jí̧? Ja̧'wa̧nü̧ ja̧'a̧nä̧ ukutumä̧ ya̧tȩ'i̧nä̧ jua̧u̧ ukuotokotüjä̧. ¿Tta̧'a̧nü̧ pä'ü kuä'ü kuikuätukua päkuätukuäkusä̧ttü̧?»

²⁰ Päomȩnä̧ ttü̧ja̧mä̧, ädätinä̧tü̧: —¡epíritu su̧ro̧pa̧rü̧ kku̧nä̧rü̧! ¿Dí kuä'ü ikua päkuttü̧?

²¹ Jesú-mä̧ päinä̧u̧: —Ukutumä̧ o'katoi'ünä̧, sawaru mo̧ro̧ jȩchi̧nü̧tä̧, isoó pä'ü rü̧ȩnä̧ amükuädätüjä̧.

²² Ja̧'wa̧nü̧ ja̧'a̧nä̧, Moisé-mä̧ circuncisión jȩ'kuä̧tu̧kua̧ pä'ü weinä̧u̧jä̧ (Moisé-ttümä̧ ichokü ji̧na̧'a̧nä̧, kuä'o̧tü̧ mi̧nä̧ttü̧ ichinü̧ ja̧'a̧nä̧), ja̧'wa̧nü̧ ja̧'a̧ ukutumä̧, 'kuä'ächi'ü pä̧mä̧dä̧kuä̧wä̧ mo̧ro̧'i̧nä̧ circuncisión jȩpä̧tü̧jä̧.

²³ Ja̧'wa̧nü̧ Moisé weinü̧, jarodü jui'ü, sawaru mo̧ro̧ ja̧'a̧nä̧'i̧nä̧ circuncisión ttü̧ja̧rü̧ jȩ'kuä̧'i̧jä̧tu̧kua̧'a̧nä̧, ¿Tta̧'a̧nü̧ pä'ü, ttürümä̧ ku̧ra̧wä̧rä̧tü̧kua̧'a̧jä̧ttü̧, ttü̧ja̧sa̧rü̧ sawaru mo̧ro̧ jo̧mȩnü̧ aditü chikuäja'amä̧?

²⁴ Ukutumä̧ surojü jȩtta̧ja̧ pä'ü'i̧nä̧, adiu jȩtta̧ja̧ pä'ü'i̧nä̧ wä̧mȩnä̧tä̧ topü pä'ätüjä̧, adiu jueünä̧ jü̧ttü̧tä̧ topü pä'ätukui.

Jesú-mä̧ ichinomȩ tü'kü ukuokuinü̧

²⁵ Jerusarȩ́ ütawiyä ttü̧ja̧, juȩnȩ kka̧kuä̧tü̧mä̧ pä'inä̧tü̧: —¿Chujuamä̧ jo̧ka̧'a̧, kuä'ü tikuarü pä'ü ttusäjäkumä̧?

²⁶ Topätukui, ttü̧ja̧ ttä'ka jiäwa'anä̧ ja̧'a̧tä̧ tottäku. ¿Ruwotümä̧dí̧, isopäi'ünä̧ pidetä ja̧'a̧ Crito-mä̧ pä'ü ttu̧wo̧juä̧ku̧?

²⁷ Ja̧'wa̧nü̧ ja̧'a̧nä̧, ujutumä̧ pide ichinomȩmä̧ wo̧juä̧tü̧jä̧; ja̧'wa̧nü̧ jo̧ka̧'a̧ jä̧kua̧'a̧, Crito ichomȩnä̧mä̧, juorü ichü pä'ümä̧ ya̧tȩ'i̧nä̧ ttieruwäkuotü.

²⁸ Ja̧'wa̧nü̧ ttukuokua'a ä̧ju̧ku̧, Jesú-mä̧ pä̧i̧ku̧nä̧ päinä̧u̧: ¡Ye isopäi'ünä̧ ttürümä̧, chichinomȩ'i̧nä̧, ttürütä'i̧nä̧ wo̧juä̧tü̧jä̧!; cha̧mü̧nä̧ pa̧ja̧tü̧ amükuädümä̧ ichokü pinü̧sä̧, ttürü we'inü̧mä̧ isopäi'ünä̧ wa̧, jua̧u̧ru̧mä̧ ukutumä̧ jerupätüjä̧.

²⁹ Ja̧'wa̧nü̧ ja̧'a̧nä̧ ttümä̧ Jua̧u̧ru̧ wo̧jua̧sä̧; jua̧u̧ttü̧tä̧ chichina̧'a̧ttü̧ ja̧'wa̧ta̧nü̧ jua̧u̧tä̧ ja̧'a̧ ttürü we'inü̧mä̧.

³⁰ Ja̧'wa̧nü̧ ja̧'a̧, 'chuttädarü pätta'anä̧, 'chuttädü juiyünä̧ winü̧, ji̧nä̧ u̧mo̧ro̧ rȩbȩä̧kuä̧wo̧ka̧'a̧ttü̧.

³¹ Ja̧'wa̧nü̧ ja̧'a̧mä̧, rekuätü Jua̧u̧ru̧ esetätümä̧ pä'inä̧tü̧: —Chutä Crito ichomȩnä̧mä̧ ¿Pide jȩü̧ abonä̧nü̧dí̧ jȩä̧kua̧, jȩtto̧kü̧ jueimä̧?

Fariseo-mä̧ Jesú-ru 'chuttäda pä'ü we'inä̧tü̧

³² Fariseo wotümä̧ Jesú ütü'kü ttü̧ja̧ ttukuokua'a ä̧ju̧ku̧, sacerdote wotü tturuwotüku, Dio-rü ukuokuäkuäwode tta̧wä̧rä̧kuä̧wä̧ isotü su̧ro̧do̧u̧ru̧ 'chuttädäjarü pä'ü we'inä̧tü̧.

³³ Ja̧'wa̧nü̧ ja̧'a̧ Jesú-mä̧ päinä̧u̧: —Suro a̧'u̧kua̧'a̧tä̧ ukutukumä̧ chü̧jä̧kua̧sä̧, kki̧'i̧pü̧'ka̧ ttürü we'inü̧ ü̧ja̧'a̧ ppa̧dä̧chä̧kua̧sä̧.

³⁴ Kusätukua'anä̧, ku̧'o̧kui̧'ä̧tu̧kuo̧ko̧ku̧ chä̧kua̧sä̧, ttü chi̧'cho̧mȩmä̧, kuichätuku juiyünä̧ ja̧'a̧ttü̧.

³⁵ Ja̧'wa̧nü̧ pä̧i̧yä̧u̧, judío-mä̧ pä'ä'chäkuäwinä̧tü̧: —¿Tȩnȩ́ i̧'chä̧kua̧'a̧jä̧ttü̧, pidemä̧, ujutu tü̧'o̧kui̧'ü̧ juiyünä̧ jo̧mȩmä̧? ¿Judío, kko̧ro̧jä̧ra̧'a̧ grecia ttü̧ja̧ku̧ wiwawächinä̧tü̧rü̧ ja̧'wa̧ta̧nü̧ griego-rü'i̧nä̧ ji'äu i̧'cha̧ pä'ü, pä'ü 'kua̧ra̧'a̧?

³⁶ ¿Pa̧'a̧nü̧mä̧ toku pä'ü, pä'ajä̧ttü̧: kusätukuä̧kua̧sä̧, kusätukua'anä̧ ku̧'o̧kui̧'ä̧tu̧kuo̧ko̧ku̧ chä̧kua̧sä̧; ja̧'wa̧ta̧nü̧ ttü chi̧'cho̧mȩmä̧ kuichätuku juiyünä̧ ja̧'a̧ttü̧, päjimä̧?

Ajiya a̧'kua̧rü̧ kkoya wȩnȩ

³⁷ Ukuo mo̧ro̧, pä'käri rüjí kka̧'a̧, Jesú-mä̧ kkä̧mä̧dü̧ pä̧i̧ku̧nä̧ pä'inü̧: —Ya̧tȩ awa a̧di̧ri̧jü̧ttü̧mä̧, ttüku ichü ttüttü awi.

³⁸ Ttürü esetümä̧, wȩyu̧kuä̧ wȩnȩ pä'ijüta'a̧nü̧, a̧'kua̧rü̧ jakuättümä̧, ajiya a̧'kua̧rü̧ kkoya, rȩjȩ jakuättü räopoya jä̧'i̧nü̧'a̧nü̧ räopäkua'a.

³⁹ Ja̧'wa̧nü̧ päomȩnä̧mä̧, churutä esetätümä̧, Epíritu-ru ttȩmä̧kua̧'a̧ ji'äu pä'inü̧; ja̧'wa̧nü̧ ja̧'a̧mä̧, Epíritumä̧ ji̧nä̧ ichü juiyäi ji̧na̧'a̧, Jesú-mä̧ ji̧nä̧ wa'ü ikuäji̧'ka̧ wa'arettü ttoächü juiyäi ja̧'a̧ttü̧.

Jesú ütü'kü pä'ä'chäkuäu 'kȩttȩkuä̧chi̧nü̧ wȩnȩ

⁴⁰ Pi̧yȩ ä̧ju̧ku̧, ttü̧ja̧ ttü̧'kä̧tȩttü̧, yotukunä̧ pä'inä̧tü̧: —Isopäi'ünä̧, pidetä ja̧'a̧ profeta-mä̧.

⁴¹ Kkorotümä̧ pä'inä̧tü̧ —Pidetä, Crito-mä̧, Pätta'anä̧, yotukunä̧mä̧ pä'inä̧tü̧: —¿Crito-mä̧ Galirea rȩjȩttü̧, i̧chä̧kua̧ pä'ija'a?

⁴² Wȩyu̧kuä̧ wȩnȩmä̧ pä'ija'a: Crito-mä̧, Rey Dawi isotüttü, Berȩ́ ütawiyättü, Dawi idepiyu ji̧no̧mȩttü̧ i̧chä̧kua̧, jü̧nä̧.

⁴³ Ja̧'wa̧nü̧ jo̧mȩnä̧, Jesú jäwänä̧ pä'äkuäu ttü̧ja̧mä̧ 'kȩ'ȩkuä̧chi̧nä̧tü̧.

⁴⁴ Ja̧'wa̧ta̧nü̧ yotukunä̧mä̧, kärenä̧ 'chu'ädi'ü ttȩmi̧pa̧ pätta'anä̧, ttȩmi̧pü̧ juiyünä̧ ji̧nä̧u̧.

Ukuo isotü Jesú-ru esetokotü pinä̧tü̧

⁴⁵ Ja̧'wa̧nü̧ ja̧'a̧, Dio-rü ukuokuäkuäwode tta̧wä̧rä̧kuä̧wä̧ isotü, su̧ro̧do̧u̧ päjätümä̧, fariseo wotü'i̧nä̧, sacerdote wotü tturuwotü'i̧nä̧ ttä'ka jo̧mȩ ppa̧ttä̧chi̧'a̧'a̧ jä'epü ttä̧ju̧kui̧nä̧u̧: —¿Tta̧'a̧nü̧ pä'ü, kui'kächätukuokoku jä̧ttü̧?

⁴⁶ Pättomȩnä̧, su̧ro̧do̧u̧mä̧ ädätinä̧tü̧: —¡Ya̧tȩ'i̧nä̧, ja̧'wa̧nü̧ ukuokurumä̧ ä̧ju̧kuo̧ko̧tü̧ pä'ijätüjä̧!

⁴⁷ Pä̧tti̧yä̧u̧, fariseo wotümä̧ pä'inä̧tü̧: —¿Ukutu'i̧nä̧ yapare wȩnȩ kuesetätukua'a?

⁴⁸ ¿Ukutu to'kuätukuomȩnä̧, turuwotü ukuo isotü'i̧nä̧, fariseo wotü'i̧nä̧ yotukunä̧ Jua̧u̧ru̧ esetätü ja̧'a̧?

⁴⁹ Ja̧'wa̧nü̧ ja̧'a̧nä̧, pitü ttü̧ja̧ weäwä wȩnȩ jerupätürümä̧, surojütä 'kuäopäkuä̧u̧.

⁵⁰ Pättiyäku, Nicodemo-mä̧ ya'utenä̧ Jesú-ru topü i̧'chi̧na̧'a̧ ja̧'a̧ pä'inü̧:

⁵¹ ¿Ujutu jȩtü̧ weäwä wȩnȩmä̧, chutä jȩä̧ji̧ wȩnȩ jiäwa'a ttä̧ju̧kuo̧ka̧'a̧nä̧, usurä ȩmä̧u̧nä̧ pä'ü ttu̧ju̧na̧rü̧ pä'ü wea'a tä̧jí̧?

⁵² Päomȩnä̧, ttädätinä̧ku̧: ¿Uku'i̧nä̧, Galirea ttü̧ja̧sa̧jä̧? Wȩyu̧kuä̧ wȩnȩ wo̧jui̧pü̧ topi. Yorisotä Galirea-ttümä̧, profeta-mä̧ rä'opokotü pä'ijätü. [

Kkirekuomü̧ pokotüku jȩjä̧'chäkuä̧wi̧nü̧

⁵³ Jua̧u̧ o'ka'a, yotukunä̧ ttojusodera̧'a̧ku̧ i̧wi̧nä̧tü̧.