San Juan 3 - Nuevo Testamento Uwotjüja

Jesú, Nicodemo-ku̧ ukuokuinü̧ wȩnȩ

¹ Fariseo wotü i̧sa̧, ya̧tȩ, judío ttu̧ru̧wa̧ Nicodemo pä'ü mi̧kua̧ kki̧nü̧,

² Jua̧u̧mä̧ Jesú-ru yodó do'ächü 'chä̧ji̧'ka̧ pä'inü̧: —Wo̧juȩkuä̧ i̧sa̧, ukurumä̧ wo̧juȩkuä̧ i̧sa̧ jü̧nä̧ Dio-ttü ichinü̧ pä'ü wo̧juä̧tü̧jä̧; isopäi'ünä̧ uku, jȩtto̧kü̧ juei jȩ'ku̧mä̧, ya̧tȩ'i̧nä̧ Dio ü̧jo̧ko̧ku̧mä̧ jȩo̧kü̧ pä'ü tu̧wo̧jua̧'a̧ttü̧.

³ Jesú-mä̧ jua̧u̧ru̧ pä'inü̧: —Isopäi'ünä̧tä̧ pädäkujä̧, jareünä̧ uwäpächokümä̧, Ru̧wa̧ Dio weomȩmä̧ topokü jä̧kua̧.

⁴ Päku, Nicodemo-mä̧ jä'epinü̧: —¿Jua̧u̧nu̧mä̧, täkü büäkuächätü tta'amä̧, pä'äji ta'anümä̧, toku ttuwäpächü'anü̧ ja̧'a̧jä̧ttü̧? ¿Pä'äji ji̧nü̧ta'anü̧ ppa̧'ä̧chü̧ ja̧ju̧ kku̧kuä̧ba̧ jakuä doächü'anü̧ ja̧'a̧, uwäpächa pä'ümä̧?

⁵ Jesú ädätinä̧ku̧: —Isopäi'ünätä̧ pädäkujä̧, ajiyattü'i̧nä̧, Epíritu-ttü'i̧nä̧ uwäpächokümä̧ Ru̧wa̧ Dio weomȩmä̧ do'ächokü jä̧kua̧.

⁶ Ttü̧ja̧ttü̧ uwäpächümä̧, ttü̧ja̧sa̧ ja̧'a̧; ja̧'wa̧ta̧nü̧ Epíritu-ttü uwäpächümä̧ Epíritu i̧sa̧ ja̧'a̧.

⁷ Jareünä̧ ttuwäpächa pä'ü rekuä rü̧ja̧'a̧ pädäja'amä̧, isoó pä'ümä̧ kuamükuädä.

⁸ Kkä̧rü̧'koppamä̧ pä̧wä̧rü̧ja̧'a̧ku̧ttu̧, kkä̧rü̧'ko̧wa̧'a̧; jua'akumä̧ juoppa icha'a kuä̧ju̧kua̧'a̧nä̧, jua'attü icha'a; Ja̧'wa̧ta̧nü̧ jua'aku 'cha̧'a̧ pä'ümä̧ jȩru̧pa̧jä̧. Ja̧'wa̧nü̧ wotü ja̧'a̧, o'katoi'ünä̧ Epíritu-ttü uwäpächätümä̧.

⁹ Päku, Nicodemo-mä̧ pä'äjita'anü̧ jä'epinü̧: —Jua̧u̧mä̧ ¿Tta̧'a̧nü̧ jo̧mȩnä̧tä̧ jü̧ttü̧?

¹⁰ Jesú päinä̧ku̧: —¿Ukumä̧, Iraettü wo̧juȩkuä̧ isotüttü ttu̧wä̧mȩnä̧ wa̧ kua'anä̧, pi̧yȩmä̧ kuieruwa'a tä̧jí̧?

¹¹ Isopäi'ünä̧ pädäkujä̧, ujutumä̧ tu̧wo̧juö̧nä̧ ukuokuätüjä̧ ja̧'wa̧ta̧nü̧ totinü̧tä̧ ji'äwätüjä̧ ja̧'wa̧nü̧ ja̧'a̧nä̧ ukutumä̧ jitäu esetokotüjä̧.

¹² Pi̧jä̧ jäwä jidäwomȩnä̧'i̧nä̧ kuesetätukuoka'amä̧, ¿Toku kuesetätukuäkua'ajä̧ttü̧ mo̧ro̧jä̧ jäwä jidäwomȩnä̧mä̧?

¹³ Ya̧tȩ'i̧nä̧ mo̧ro̧jä̧ra̧'a̧ i̧u̧ i̧wi̧nü̧mä̧ toa'a; jua̧u̧ ja̧jü̧jueimä̧ mo̧ro̧jä̧ttü̧ mȩyȩwi̧nü̧tä̧ ja̧'a̧, Ttü ubo i̧tti̧tä̧.

¹⁴ Ja̧'wa̧ta̧nü̧ Moisé rȩba̧ dȩ'a̧ra̧'a̧ttü̧ ä̧ka̧rü̧ ju'toju äräbe'ü u̧ju̧ni̧nü̧ta̧'a̧nü̧; Ttü, Ubo I̧tti̧'rü̧'i̧nä̧ rekuä rü̧ja̧'a̧ ju'toju äräbe'ü ttu̧ju̧na̧ttü̧ pä'ü.

¹⁵ Isopäi'ünä̧ o'katoi'ünä̧ Ttürü esetätümä̧ totte'ächü juiyäkua'anü̧, pärokuä kkä̧kuä̧wä̧ i'kotä ttu̧ju̧nä̧rä̧kua̧'a̧nü̧.

Dio pi̧jä̧ ttü̧ja̧rü̧ eseu repeinü̧ wȩnȩ

¹⁶ Isopäi'ünä̧ Dio-mä̧ pi̧jä̧ ttü̧ja̧rü̧ rü̧ȩnä̧ repea'attü̧; Ttü i̧tti̧ chu̧'ä̧kua̧rü̧ iyinä̧u̧jä̧. O'katoi'ünä̧ Ttürü esetätümä̧ 'korujuottächü juiyäkua'anü̧; pärokuä kkä̧kuä̧wä̧ i'kotä ttu̧ju̧nä̧rä̧kua̧'a̧nü̧.

¹⁷ Isopäi'ünä̧ Dio-mä̧ pi̧jä̧ra̧'a̧mä̧ ttü̧ja̧rü̧ ro̧dȩpa̧ pä'ümä̧ we'okü pinü̧sä̧, pärokua'aku pi̧jä̧ ttü̧ja̧rü̧ ra̧wä̧pi̧jü̧ttü̧ ttü̧ji̧pi̧ya̧rü̧ pä'ü weinä̧ku̧sä̧.

¹⁸ Ttü, Dio I̧tti̧rü̧ esetümä̧, täbokuämä̧ 'kuäopoka'a jä̧kua̧'a̧. Ja̧'wa̧nü̧ ja̧'a̧nä̧ esetokümä̧, täkü täbokuänä̧ kkü̧; Dio i̧tti̧ chu'ä̧kua̧rü̧ esetoka'attü̧.

¹⁹ Pa̧'a̧nü̧ jo̧mȩnä̧ ro̧ȩpä̧kua̧ Dio-mä̧: Ttümä̧ pi̧jä̧ra̧'a̧ ichinü̧sä̧, Ttütä ja̧'a̧ tȩya̧u̧, yo̧mȩ kkȩdȩpü̧mä̧; ja̧'wa̧nü̧ ja̧'a̧nä̧ ttü̧ja̧mä̧ yo̧ü̧tä̧ eseu repe'ätü, surojütä jȩtta̧'a̧ttü̧.

²⁰ Isopäi'ünä̧, o'katoi'ünä̧ surojü jȩpä̧tü̧mä̧ tȩya̧u̧ kkü'kokotü; tȩya̧u̧ra̧'a̧mä̧ ichokotü, suronä̧ jȩttä̧'i̧jü̧ i̧jȩkuä̧chü̧ juiyatü pä'ü.

²¹ Ja̧'wa̧nü̧ ja̧'a̧nä̧, jueü wȩnȩnä̧ jȩpü̧ kka̧kuä̧tü̧mä̧ tȩya̧u̧ra̧'a̧ku̧ ichätü, Dio a̧'kua̧ iweyenä̧ jȩpü̧ ttü̧jä̧'i̧jü̧ i̧jȩkuä̧chü̧nä̧.

Bautizo jȩpä̧'i̧jü̧ Ju̧a̧-mä̧, Jesú ütü'kü ji'äwinü̧

²² Jua̧u̧ jä̧ji̧ o'ka'a, Jesú-mä̧ u̧wo̧juȩtä̧u̧ku Judea rȩjȩra̧'a̧ ichäji̧'ka̧, a̧'u̧kua̧'a̧tä̧ mo̧ro̧ kkä̧nü̧, juätütäku bautizo jȩpi̧nü̧.

²³ Ja̧'wa̧ta̧nü̧ Ju̧a̧'i̧nä̧ Enó̧-nä̧ bautizo jȩpü̧ kki̧nü̧, Salim pä'ü mi̧kuomȩ tü'künä̧nü̧. Juȩnȩ aje rü̧ȩnä̧ akua'attü̧, ttü̧ja̧ tticha'a bautizo jȩpi̧nü̧.

²⁴ Jua̧u̧nu̧mä̧, Ju̧a̧-rü̧ kärenä̧ ttütäkua'a ä'kanä̧ 'kuäopina̧'a̧.

²⁵ Ja̧'wa̧nü̧ ja̧'a̧, Ju̧a̧ u̧wo̧juȩtä̧u̧mä̧ judío i̧sa̧ku̧ pä'ä'chäkuäwinä̧tü̧ surojü tükäu ikuäwä tü'kü.

²⁶ Ja̧'wa̧nü̧ jä̧ji̧ o'ka'a, Ju̧a̧-rü̧ ichi'ü ji'äwinä̧tü̧: —Wo̧juȩkuä̧ i̧sa̧ topittü̧, Jordán aje ji̧jȩku̧nä̧ttü̧, ukutäku ü̧ja̧'a̧, ütü'kü jikuäwäjäku päjimä̧, bautizo jȩpü̧ ja̧'wa̧nü̧ jȩa̧'a̧ o'katoi'ünä̧ jua̧u̧tä̧ku̧ 'chä̧tü̧.

²⁷ Pättiyäku, Ju̧a̧-mä̧ päinä̧u̧: —Ttü̧ja̧sa̧rü̧ kkorojuei Dio iyoka'a jo̧mȩnä̧mä̧, yoriso u̧ju̧nä̧ra̧ pä'ümä̧ jui̧'a̧.

²⁸ Ukutumä̧, jidäwa'a ä̧ju̧kuä̧jä̧tü̧jä̧: Ttümä̧ Crito-mä̧kü̧sä̧ pä'ü, ttümä̧ jua̧u̧tä̧ ä'kanä̧ wȩ'ä̧wa̧sä̧, pä'ü.

²⁹ Ya̧tȩ irekuarü ȩmo̧mȩttü̧, irekuarü repe'ü kkü̧mä̧ kkirekuotä ja̧'a̧; ja̧'wa̧nü̧ ja̧'a̧nä̧ kkirekuo a̧wa̧ru̧wa̧mä̧, ippeyänä̧ kkä̧nü̧, suro i̧wȩnȩtä̧ ä̧ju̧ku̧'i̧nä̧ eseu. Ja̧'wa̧nü̧ jü̧ta̧'a̧nü̧, ttü cheseumä̧ jo̧mȩnü̧ päi'äkusä.

³⁰ Rü̧ȩnä̧ rekuä rü̧ja̧'a̧ Jua̧u̧ ukuo rü̧ä̧cha̧ pä'ümä̧; pä̧ro̧kua̧ ttü chukuo juidächa'anä̧.

Mo̧ro̧jä̧ra̧'a̧ttü̧ ichinü̧ wȩnȩ

³¹ Mo̧ro̧jä̧ra̧'a̧ttü̧ rȩbȩu̧mä̧, o'kajuiyünä̧tä̧ u̧wä̧mȩnä̧ wa̧; pi̧jä̧ i̧sa̧mä̧, pi̧jä̧nä̧tä̧ wa̧; ja̧'wa̧nü̧ ja̧'a̧ttü̧ pi̧jä̧ jäwätä ukuoku ja̧'wa̧nü̧ ja̧'a̧nä̧ mo̧ro̧jä̧ra̧'a̧ttü̧ ichümä̧ o'kajuiyünä̧ u̧wä̧mȩnä̧ wa̧.

³² Ja̧'wa̧nü̧ ja̧'a̧ttü̧ toä'ijütä, ä̧ju̧kuä̧'i̧jü̧tä̧ jiäwa'anä̧; jiäumä̧ ya̧tȩ'i̧nä̧ tteseta pä'okotü.

³³ Ja̧'wa̧nü̧ ja̧'a̧nä̧, ya̧tȩ Jua̧u̧ru̧ esetümä̧, Dio-mä̧ Jueü wȩnȩ ja̧'a̧ pä'ü wo̧jui̧'ü̧.

³⁴ Ja̧'wa̧nü̧ ja̧'a̧ttü̧, Dio I̧tti̧ ukuokuomȩnä̧mä̧, Dio-tä ja̧'a̧ ukuokumä̧; jua'amä̧ Dio-mä̧ Epíritu-ru jo̧mȩnü̧ iyäku ja̧'a̧ttü̧.

³⁵ Jä'o Dio-mä̧, i̧tti̧rü̧ eseu repea'attü̧, o'kajuiyünä̧ u̧mü̧nä̧ jü̧nä̧tä̧ iyinä̧ku̧.

³⁶ I̧tti̧rü̧ esetümä̧, kkä̧kuä̧wä̧ i'ko kku̧nä̧rü̧; ja̧'wa̧nü̧ ja̧'a̧nä̧, i̧tti̧rü̧ esetokümä̧ kkä̧kuä̧wä̧ topokü, pärokua'aku usurä ȩmä̧u̧nä̧ Dio ro̧ȩpa̧rü̧ pä'ütä wa̧.