San Juan 20 - Nuevo Testamento Uwotjüja

Jesú ttoächinü̧ wȩnȩ

¹ Semana-ttü̧ ä̧kuo̧mȩnä̧ mo̧ro̧, María Madarena-mä̧ mo̧ro̧ päia'a, ji̧nä̧ yo̧a̧'a̧nä̧ wa'are idorära̧'a̧ 'chä̧jä̧'kaju tojomȩnä̧; ä'koju mü̧ȩkuäjäyumä̧ pporädü ikuäwa'atä topinä̧ju̧.

² Ja̧'wa̧nü̧ ja̧'a̧ topo'ü Simón Peduru-rü'i̧nä̧ ja̧'wa̧ta̧nü̧ kka̧ra̧, Jesú u̧wo̧juȩtä̧u̧ttü̧ rü̧ȩnä̧ repeä'ijäkuru'i̧nä̧ 'chä̧wi̧'ü̧ jopächü 'chä̧wi̧'ü̧ pä'inä̧ju̧: —¡Ttu̧ru̧wa̧rü̧mä̧, wa'are idorättümä̧ ȩmi̧pä̧jä̧tü̧ päjätü ja̧'wa̧nü̧ ja̧'a̧ ttütäjomȩmä̧ tieruwünä̧tä̧!

³ Päjiyä̧u̧, Peduru-mä̧ ja̧'wa̧ta̧nü̧ kka̧ra̧ u̧mü̧wä̧ya̧ pä'ijüku, rä'opächü wa'are idorära̧'a̧ku̧ jopächü 'chi̧nä̧tü̧.

⁴ Ta̧ju̧kuäyotü yo̧mȩtȩnä̧ jotta'anä̧, kka̧ra̧mä̧ Peduru-rü'i̧nä̧ 'kuä'oü jopächü, wa'are idorära̧'a̧ ä̧kuo̧mȩnä̧ 'chä̧wi̧'i̧nü̧.

⁵ Ja̧'wa̧nü̧ ja̧'a̧, do'ächi'ünä̧nü̧ toomȩnä̧, juä'opü ttütäjä̧ta̧tä̧ pa̧'a̧nä̧, jakuäkumä̧ do'ächi'okü pinü̧.

⁶ Jua̧u̧tä̧ o'ka'anä̧, Simón Peduru-mä̧ ichi'opo'ü, wa'are idorä jakuä do'ächi'ü, toomȩnä̧, juättopä̧jä̧ta̧mä̧ juȩnȩtä̧ pa̧'a̧ topinü̧;

⁷ Ja̧'wa̧ta̧nü̧, Jesú Unä̧ juäokuäjä̧ta̧mä̧, churutä juättopäjä̧ta̧ttü̧'i̧nä̧, i̧mi̧ku̧nä̧ juä'opü rütäwa'a pi̧na̧'a̧.

⁸ Ja̧'wa̧nü̧ doächächiyäku, kka̧ra̧ u̧mü̧wä̧ya̧ pä'ijü, ä̧kuo̧mȩnä̧ wa'are idorära̧'a̧ ichi'äji päjimä̧, do'ächi'ü topü esetinü̧.

⁹ Ja̧'wa̧nü̧ ja̧'a̧nä̧, wȩyu̧kuä̧ wȩnȩnä̧, Jua̧u̧mä̧ wa'arettü ttoächa pä'ü rekuä rü̧ja̧'a̧, pä'ijomȩmä̧ ttu̧wo̧jui̧po̧ka̧'a̧ jä̧'i̧ja̧'a̧ ji̧na̧'a̧.

¹⁰ Jua̧u̧nü̧ o'ka'a, Jesú u̧wo̧juȩtä̧u̧mä̧ ttojusodera̧'a̧tä̧ ppa̧'a̧chi̧nä̧tü̧.

María Madarena-rü̧ Jesú i̧jȩkui̧nü̧ wȩnȩ

¹¹ Ja̧'wa̧nü̧ ja̧'a̧nä̧, María-mä̧ wa'are idorä u̧mi̧nä̧ ajuäu kki̧'i̧pi̧nä̧ju̧. Ja̧'wa̧nü̧ äjuäu kkä̧nü̧, jakuäjuku tojomȩnä̧,

¹² Á̧gȩrȩ ta̧ju̧ru̧ topinä̧ju̧ ttü̧'ka̧tä̧wä̧ti̧yu̧ te'ätürü, Jesú o'ko jäwä ttütäjomȩ ttü̧'ȩja̧'a̧; ya̧tȩmä̧ U jä̧ja̧'a̧ku̧nä̧ ja̧'wa̧ta̧nü̧ kka̧ra̧mä̧ ü̧jä̧pi̧yä̧ jä̧ja̧'a̧ku̧nä̧, jü̧nä̧.

¹³ Juätü jättepinä̧kua̧: —Isaju, ¿Tta̧'a̧nü̧ pä'ü kuajuäwa'ajä̧ttü̧? Pättäkua, pä'inä̧ju̧: —Chu̧ru̧wa̧rü̧ ȩmi̧pä̧jä̧'kotü, ttütäjomȩ'i̧nä̧ jerupü ajuäwäjusä.

¹⁴ Ja̧'wa̧nü̧ pä'ü kkä̧nü̧, kküjärächi'omȩnä̧ Jesú-ru juȩnȩtä̧ ü̧ja̧'a̧ toja'anä̧; jua̧u̧ pä'ümä̧ jerupinä̧ju̧.

¹⁵ Jesú-mä̧ jä'epü ä̧ju̧kui̧nä̧kua̧: —Isaju, ¿Tta̧'a̧nü̧ pä'ü kuajuäwa'ajä̧ttü̧? ¿Dírü kusa'ajä̧ttü̧? pä'ü jäepäkua, Juȩnȩtä̧ kuäwä tta̧wä̧rä̧kuä̧wä̧ i̧sa̧kü̧ pä'ü, pä'inä̧ju̧: —Chu̧ru̧wa̧, uku kuȩmi̧pä̧ji̧ttü̧mä̧, kutäjomȩ ji'äwittü, chȩmä̧ja̧rü̧.

¹⁶ Päjiyäku, Jesú-mä̧ päinä̧kua̧: —¡María! Päkua, kkärächi'ü, hebreo wȩnȩnä̧ pä'inä̧ju̧: —¡Raboni! pä'ümä̧ «Wo̧juȩkuä̧ i̧sa̧ pä'ü päwä ja̧'a̧.»

¹⁷ Jesú-mä̧ päinä̧kua̧: —¡Mȩkuä̧ttü̧!, ji̧nä̧ Chä'o ü̧ja̧'a̧mä̧ 'chä̧wi̧'o̧kü̧sä̧; ja̧'wa̧nü̧ ja̧'a̧nä̧ chawaruwä chi̧jä̧wa̧tü̧rü̧ pa̧'a̧nü̧ jikuäwajä̧: Ttümä̧ Chä'o Dio, ukutu'i̧nä̧ Kuä'otuku Dio ü̧ja̧'a̧ 'chä̧nü̧ kä'ekuächüsä.

¹⁸ Ja̧'wa̧nü̧ ja̧'a̧ttü̧ María Madarena-mä̧ u̧wo̧juȩtä̧u̧ pä'ijätürü 'chä̧wi̧'ü̧ ji'äwinä̧ju̧, jareü wȩnȩ, Tu̧ru̧wa̧rü̧ topäjäjusä pä'ü ja̧'wa̧ta̧nü̧ pa̧'a̧nü̧ ji'äwäji pä'ü.

U̧wo̧juȩtä̧'i̧jä̧ü̧rü̧ Jesú-mä̧ i̧jȩkui̧nü̧

¹⁹ Semana-ttü̧ ä̧kuo̧mȩnä̧ mo̧ro̧, ni̧pä̧cho̧mȩnä̧ u̧wo̧juȩtä̧u̧mä̧, judío-rü ye'eku äpate ppe'tädü ikuäwa'a ka̧ka̧kuä̧jä̧'kotü ttü̧'ȩja̧'a̧, Jesú-mä̧ do'ächi'ü, u̧wo̧juȩtä̧u̧ ttü̧'ȩjo̧mȩ kkä'ko kkä̧mä̧dü̧ te'äu päinä̧u̧: —¡Wȩnȩ juiyü jäwä ukunä̧ kka̧ pä'üsä!

²⁰ Pi̧yȩ pä'ü kä'ädü, u̧mü̧pi̧yä̧'i̧nä̧, i'esubä'i̧nä̧ i̧jȩkui̧nä̧u̧. Ja̧'wa̧nü̧ ja̧'a̧ ttu̧ru̧wa̧rü̧ topü eseäkuäwinä̧tü̧.

²¹ Ja̧'wa̧nü̧ ja̧'a̧, pä'äjita'anü̧ Jesú-mä̧ päinä̧u̧: —¡Wȩnȩ juiyü jäwä ukutunä̧ kka̧ pä'üsä! Chä'o ttürü weinüta'anü̧, ukuturu'i̧nä̧ ja̧'wa̧ta̧nü̧ we'üsä.

²² Ja̧'wa̧ta̧nü̧, a̧mi̧yuppa ppü'ü juätürü pä'inü̧: —Epíritu Sa̧tu̧rü̧ ȩmä̧tu̧kui̧, ja̧já̧.

²³ Suronä̧ jȩtto̧mȩnä̧, mikuä pä'ü jȩ'kuä̧tu̧ku̧ juiyüttü̧mä̧, ukuturu'i̧nä̧ mikuä jo̧ka̧'a̧ jä̧kua̧'a̧; ja̧'wa̧nü̧ ja̧'a̧nä̧ surojü jȩtto̧mȩnä̧ mikuä jȩpü̧rü̧mä̧, churutä'i̧nä̧, mikuä jȩä̧kuä̧wä̧kua̧'a̧.

Tomá esetokü ji̧nü̧ wȩnȩ

²⁴ Ja̧'wa̧nü̧ Jesú i̧jȩkua̧'a̧nä̧, doce-nü̧ wotü u̧wo̧juȩtä̧u̧ pä'ijätüttü, ya̧tȩ Tomá-mä̧, ja̧'a̧tä̧ i̧mi̧mä̧ ta̧ju̧winü̧ pättä'ijäkumä̧ toina̧'a̧.

²⁵ Ja̧'wa̧nü̧ ja̧'a̧ kkorotü u̧wo̧juȩtä̧u̧mä̧, jittäwinä̧ku̧: —Tu̧ru̧wa̧rü̧ topäjätüjä̧, pä'ü jittäwäku, Tomá-mä̧ pä'inü̧: —U̧mü̧nä̧ jutujui pȩtti̧no̧mȩ topü, chüdo'che rädädädü juiyüttümä̧ ja̧'wa̧ta̧nü̧ i'esubänä̧ chu̧mü̧ rädädü juiyüttümä̧, esetoküsä.

²⁶ Kko̧ro̧mü̧ttü̧nü̧ wäbodäkuä mo̧ro̧ o'ka'a, u̧wo̧juȩtä̧u̧mä̧ ka̧ka̧kuä̧jä̧'kotü isode jakuä ttü̧'ȩja̧'a̧ Tomá'i̧nä̧ pi̧nü̧; äpatemä̧ 'kiyünä̧ mü̧ȩkua̧'a̧ ja̧'a̧nä̧, Jesú-mä̧ do'ächi'ü, kkä'ko kkä̧mä̧dü̧, te'äu päinä̧u̧: —¡Wȩnȩ juiyü jäwä ukutunä̧ kka̧ pä'üsä!

²⁷ Pä'ü kä'ädü, Tomá-rü̧ pä'inü̧: —Kudo'che i'kächü, chu̧mü̧pi̧yä̧ topittü ja̧'wa̧ta̧nü̧ ku̧mü̧ chi'esubänä̧ rä'ädi; kuesetoka'amä̧ jȩ'kuä̧'chä̧ ¡Esetütä, eseti!

²⁸ Päku, Tomá-mä̧ ädätinü̧: —¡Ukumä̧ Chu̧ru̧wa̧jä̧, chü̧ä̧nä̧wa̧ Dio-jä̧!

²⁹ Päiyäku Jesú-mä̧ päinä̧ku̧: —¿Ttürü topütätä esetüjä̧, Tomá? ¡Tottoka'anä̧, esetäjätütä ja̧'a̧ rü̧ȩnä̧ eseäkuäwä po̧kui̧pä̧tü̧mä̧!

¿Tta̧'a̧nü̧ pä'ü i̧wȩyu̧ti̧nü̧jä̧ttü̧ pi̧yȩ wȩyu̧kuä̧ wȩnȩmä̧?

³⁰ Jesú-mä̧, u̧wo̧juȩtä̧u̧ ttä'ka jo̧mȩttü̧mä̧ kkoro jȩtto̧kü̧ jueimä̧ rü̧ȩnä̧ jȩi̧na̧'a̧nä̧, jua̧u̧mä̧ wȩyu̧kuo̧ka̧'a̧ pi̧yȩ wȩyu̧kuä̧ wȩnȩnä̧mä̧.

³¹ Ja̧'wa̧nü̧ ja̧'a̧nä̧, pi̧yȩmä̧ wȩyu̧kui̧'i̧na̧'a̧, Jesú-mä̧ Crito ja̧'a̧, Dio I̧tti̧ pä'ü esetü, jua̧u̧ i̧mi̧nä̧ kkä̧kuä̧wä̧ i'ko ttu̧ju̧nä̧ra̧ pä'ü.