San Juan 19 - Nuevo Testamento Uwotjüja

¹ Ja̧'wa̧nü̧ ja̧'a̧, Pilato-mä̧ Jesú-ru kuäkuättünä̧ we'inü̧.

² Ja̧'wa̧nü̧ jȩpü̧, su̧ro̧do̧u̧mä̧ unä̧, so̧u̧ttü̧ püttäwä juä'opü kku̧nu̧, wä̧mȩnä̧ ttü̧'ka̧ti̧nä̧ku̧ pü̧jä̧ta̧ tädünä̧ tu̧wä̧ta̧ttü̧.

³ Ja̧'wa̧nü̧ jȩpü̧mä̧ pättä'chinä̧ku̧: —¡Judío ttu̧ru̧wa̧ rey, rekuo ü̧jä̧kua̧! Pä'ä'chü, i'änä̧ ppeppetinä̧ku̧.

⁴ Pä'äjita'anü̧ Pilato-mä̧ rä'o'ü päinä̧u̧: —Topätukui, u̧mi̧ rä'epü chu̧ju̧ni̧yä̧u̧jä̧, ttü tochomȩnä̧ suronä̧ jȩä̧'i̧jü̧ chü̧'o̧kui̧'ü̧ juiyünä̧ ja̧'a̧ ku̧wo̧jui̧pä̧tu̧kua̧ pä'ü.

⁵ Ja̧'wa̧nü̧ ja̧'a̧, Jesú-mä̧ unä̧ so̧ü̧ttü̧ puttäwäkä wa̧'a̧ ja̧'wa̧ta̧nü̧ pü̧jä̧ta̧ tädünä̧ tu̧wä̧ta̧ 'ka̧tä̧wa̧'a̧ räo'a'a, Pilato-mä̧ pä'inü̧: —¡Ja̧já̧ pidesä!

⁶ Ja̧'wa̧nü̧ pä'a topü, sacerdote-tü̧ tturuwotü'i̧nä̧, Dio-rü ukuokuäkuäwode tta̧'a̧rä̧tü̧'i̧nä̧ wopinä̧tü̧: —¡Ü̧jo̧kä̧ jäinä̧ pȩ'o̧pü̧ kkü̧nä̧tu̧kui̧rü̧! ¡Ü̧jo̧kä̧ jäinä̧ pȩ'o̧pü̧ kkü̧nä̧tu̧kui̧rü̧!, pä'ü. Wottiyäku, Pilato-mä̧ päinä̧u̧: —Ukututä ü̧jo̧kä̧ jäinä̧ pȩ'o̧pü̧ kkü̧nä̧tu̧kui̧rü̧, ttümä̧ suronä̧ jȩä̧'i̧jü̧mä̧ chü̧'o̧kui̧'ü̧ juiyünä̧ wa̧to.

⁷ Judío tturuwotümä̧ ädätinä̧tü̧: —Ujutumä̧, weäwä wȩnȩ kku̧nä̧rä̧tü̧jä̧, jua̧u̧ pä'aku 'korujuoächa pä'ütä ja̧'a̧, Dio I̧tti̧ jü̧nä̧, a̧mü̧nä̧ päkuäwäja̧'a̧ttü̧.

⁸ Ja̧'wa̧nü̧ pätta'a ä̧ju̧ku̧, Pilato-mä̧ jua'a yabonü̧ ye'inü̧.

⁹ Ja̧'wa̧nü̧ ja̧'a̧ pä'äjita'anü̧, ruwode u̧mi̧ isaränä̧ 'chä̧wi̧'ü̧, Jesú-ru pä'inü̧: —¿Ukumä̧ tȩnȩ́ i̧sa̧jä̧ttü̧? Ja̧'wa̧nü̧ pä'anä̧, Jesú-mä̧ yoriso ädätokü pinü̧.

¹⁰ Ädätokoku Pilato-mä̧ pä'inü̧: ¿Ukú ttürü 'ko̧ru̧pa̧mä̧? ¿Ttümä̧ ü̧jo̧kä̧ jäinä̧ pȩtto̧pa̧ku̧ pä'ü wedaku pä'ü'i̧nä̧, rä'epü ttikuaku pä'ü wedaku pä'ü'i̧nä̧, churuwo chu̧ju̧nä̧ra̧'a̧mä̧ kuieruwa'a tä̧jí̧?

¹¹ Päiyäku, Jesú-mä̧ ädätinü̧: —Kuruwomä̧ jui'ajüjä̧ ttü chu̧wä̧mȩnä̧mä̧, Dio iyü juiyüttümä̧; ja̧'wa̧nü̧ ja̧'a̧ttü̧ ukuttu'i̧nä̧ abonä̧nü̧ surojü kku̧nä̧rü̧mä̧, ttürü, ukuru iyü ikuäjitä ja̧'a̧.

¹² Juorütä kkä̧mä̧dü̧, Pilato-mä̧ Jesú-ru rä'epü ikua pä'ü jȩa̧'a̧nä̧; judío-mä̧ wottinä̧ku̧: —¡Piderü rä'epü kuikuttümä̧, ru̧wa̧ emperador-mä̧ a̧wa̧ru̧wa̧mä̧kü̧jä̧! ¡Ya̧tȩ, ru̧wa̧ jü̧nä̧ amükuädüttümä̧; emperador a̧bo̧i̧ya̧ päi'ünä̧tä̧ pärowächü!, pä'ü

¹³ Pilato-mä̧ pi̧yȩ wotta'a ä̧ju̧ku̧, Jesú-ru u̧mi̧ku̧ rä'epü ttikunä̧ we'opo'ü; ruwo dȩä̧kä̧nä̧ pä̧mä̧di̧nü̧, i̧nä̧ttü̧ a̧'kua̧tü̧ adikuokomȩ, hebreo tti̧wȩnȩnä̧mä̧ Gabatá pä'ü mi̧kuomȩ.

¹⁴ Pacua kkä̧kua̧'a̧ ji̧yä̧u̧ ä'kanä̧, jo̧mȩnü̧ jȩpü̧ ttu̧ju̧nu̧ mo̧ro̧, kkä̧wa̧ jueü kkü̧rü̧ ji̧na̧'a̧. Juȩnȩ pä̧mä̧dü̧, Pilato-mä̧ judío-rü pä'inü̧: —¡Ja̧já̧ jua̧u̧sä̧ ku̧ru̧wa̧tu̧ku̧ rey-mä̧!

¹⁵ Pä̧i̧yä̧u̧, wopinä̧tü̧: —¡Rä'epächätukuirü! ¡rä'epächätukuirü! ¡Ü̧jo̧kä̧jäinä̧ pȩ'o̧pü̧ kku̧ni̧rü̧! pä'ü wottiyäku, Pilato-mä̧ päinä̧u̧: —¿Ku̧ru̧wa̧tu̧ku̧ rey-rümä̧, ü̧jo̧kä̧ jäinä̧ pȩ'o̧pü̧ chu̧ju̧na̧rü̧ päkuätukua'a tä̧jí̧? Päomȩnä̧, sacerdote-tü̧ tturuwotümä̧ ädätinä̧tü̧: —Tu̧ru̧wa̧ rey-mä̧ Césa-tä ja̧'a̧, kka̧ra̧rü̧mä̧ to'ätüjä̧.

¹⁶ Pä'ü wottiyäku, Pilato-mä̧, Jesú-ru iyipinä̧u̧, ü̧jo̧kä̧jäinä̧ pȩ'o̧pü̧ ttu̧ju̧na̧rü̧ pä'ü. Ja̧'wa̧nü̧ i̧yi̧pä̧u̧ Jesú-ru ȩmi̧pi̧nä̧tü̧.

Jesú-ru ü̧jo̧kä̧ jäinä̧ pȩ'o̧pü̧ kku̧ni̧nä̧tü̧

¹⁷ Ja̧'wa̧nü̧ ja̧'a̧, Jesú-mä̧ ü̧jo̧kä̧ jäi wä̧do̧wä̧nü̧ 'chi̧nü̧, Calavera pä'ü mikuomȩku̧; hebreo tti̧wȩnä̧mä̧ Gólgota pä'ü mikuomȩku̧.

¹⁸ Ja̧'wa̧nü̧ ja̧'a̧ Jesú-rumä̧ juȩnȩtä̧ pȩ'o̧pü̧ kku̧ni̧nä̧tü̧, ü̧jo̧kä̧ jäinä̧; ippeyänä̧'i̧nä̧ kkorotü ta̧ju̧ku̧, Jesú-mä̧ kkä'ko päte'ü jo̧mȩ ü̧jü̧nä̧.

¹⁹ Ja̧'wa̧nü̧ ja̧'a̧, Pilato-mä̧ ü̧jo̧kä̧ jäi wä̧mȩ wȩyu̧tu̧ ttütünä̧ we'inü̧: «Judío TTU̧RU̧WA̧ Rey-mä̧, Jesú Nazare I̧SA̧ JA̧'A̧», jü̧nä̧.

²⁰ Ja̧'wa̧nü̧ ja̧'a̧, judío-mä̧ rekuätü, jua̧u̧ wȩyu̧kua̧'a̧ topinä̧tü̧; Juȩnȩ Jesú-ru pȩ'o̧pü̧ ttu̧ju̧nä̧jä̧mȩmä̧, ütawiyä tü'kü ja̧'a̧ttü̧. Jua̧u̧mä̧ Wȩyu̧kui̧na̧'a̧, hebreo tti̧wȩnȩ'i̧nä̧, latín wȩnȩnä̧'i̧nä̧, griego wȩnȩnä̧'i̧nä̧, jü̧nä̧.

²¹ Jua̧u̧ i̧wȩyu̧tä̧ji̧yä̧u̧, judío tturuwotü sacerdote-tü̧mä̧, Pilato-rü pä'inä̧tü̧: —«Judío ttu̧ru̧wa̧ rey,» pä'ümä̧ Kui̧wȩyu̧tä̧; «Judío ttu̧ru̧wa̧ rey-sä pä'ä'ijü» pä'ü wȩyu̧ti̧.

²² Pättäku, Pilato-mä päinä̧u̧: —Täkü chi̧wȩyu̧tä̧ji̧mä̧ ja̧'wa̧nü̧tä̧ pi̧'a̧'a̧.

²³ Jesú-ru ü̧jo̧kä̧ jäinä̧ pȩ'o̧pü̧ kku̧nä̧jä̧'kotü, su̧ro̧do̧u̧mä̧ ü̧'ka̧tä̧wä̧ta̧ ȩmo̧po̧'ü̧ pa̧ja̧kuä̧nü̧ jo̧mȩnä̧ 'toräu iyäkuäwinä̧tü̧ yotukunä̧. Ja̧'wa̧ta̧nü̧ wä̧mȩnä̧ ü̧'ka̧tä̧wä̧'i̧jä̧ta̧'i̧nä̧ ȩmi̧nä̧tü̧, ji̧nä̧ ji̧yȩtȩnä̧tä̧ 'tü̧ä̧wä̧ta̧, rȩjȩbü päi'ünä̧.

²⁴ Ja̧'wa̧nü̧ jȩpü̧ su̧ro̧do̧u̧mä̧ pä'äwinä̧tü̧: —Sȩro̧pü̧mä̧ tiku juiyä̧ta̧kua̧, jȩpü̧ totätukua dirü pätekuächaja pä'ü. Ja̧'wa̧nü̧ jȩtto̧mȩnä̧, pa̧'a̧nü̧ wȩyu̧tu̧ rütäwä ji̧nü̧tä̧ 'kuäopina̧'a̧: «Chi̧ä̧rȩta̧mä̧, jitütä iyä'chäkuäwinä̧tü̧, ja̧'wa̧ta̧nü̧ wä̧mȩnä̧ chü̧'ka̧tä̧wä̧ta̧'i̧nä̧, dirü pätekuächaja pä'ü jȩpi̧nä̧tü̧.»

²⁵ Ü̧jo̧kä̧nü̧ jäi, Jesú-ru pȩ'o̧pü̧ kku̧nä̧wäi tü'künä̧nü̧ kka̧kui̧nä̧tü̧, ja̧ju̧ María'i̧nä̧, ja̧ju̧ kkijäwaju'i̧nä̧, Cleofás irekua María'i̧nä̧ ja̧'wa̧ta̧nü̧ María Madarena'i̧nä̧, jü̧nä̧.

²⁶ Ja̧'wa̧nü̧ ja̧'a̧, Jesú-mä̧ ja̧ju̧ru̧ topü ja̧'wa̧ta̧nü̧ u̧wo̧juȩtä̧u̧ttü̧ rü̧ȩnä̧ repeä'ijäkuru'i̧nä̧ topü pä'inü̧: —Isaju, kui̧tti̧mä̧ jua̧u̧ juȩnȩtä̧ kkü̧ ja̧'a̧.

²⁷ Pä'ü kkä̧nü̧ u̧wo̧juȩtä̧'i̧jä̧u̧rü̧, pä'inü̧: —Kua̧ju̧mä̧, juäjutä ja̧'a̧. Juorütä kkä̧mä̧dü̧ u̧mü̧wä̧ya̧ pä'ijümä̧, ja̧ju̧ juoepinä̧kua̧.

Jesú 'korujuoächinü̧ wȩnȩ

²⁸ Ja̧'wa̧nü̧ pä'ü kä'ädü, Jesú-mä̧ täkü o'kajuiyünä̧ Jä'o Dio weinü̧mä̧ jo̧mȩnü̧ päia'a wo̧juä̧u̧, wȩyu̧kuä̧ wȩnȩ päü'a̧kuä̧ 'kuäopa pä'ü pä'inü̧: —Chawa a̧di̧ri̧jä̧ku̧sä̧.

²⁹ Juȩnȩtä̧, kki̧na̧'a̧ 'kä̧nä̧ri̧yu̧nä̧ vino isoya a̧'toya su̧'pȩnü̧ a̧kuä̧yu̧. Ja̧'wa̧nü̧ ja̧'a̧, i̧sä̧ppä̧nä̧ vino isoya putädo'ü, i̧so̧'kȩnä̧ nü̧'kopo'äjä'kotü, ä jo̧mȩ bettepinä̧ku̧.

³⁰ Bettepäku, vino isoya a̧'toya au kä'ädü pä'inü̧: —O'kajuiyünä̧tä̧ jo̧mȩnü̧ päia'a. Pä'ü kä'ädü, U ja̧rȩyu̧nu̧ pä'i'ü, a̧'kua̧ru̧wa̧rü̧ iyü 'korupä'i'inü̧.

Jesú i'esubänä̧ dakuodänä̧ tattinü̧ wȩnȩ

³¹ Ja̧'wa̧nü̧ 'kuäopa'anä̧, Pacua pä'käri ä'kanä̧ mo̧ro̧ ji̧yä̧u̧, kkoro mo̧ro̧mä̧ sawaru mo̧ro̧ jä̧kua̧'a̧ ja̧'a̧, ü̧jo̧kä̧ jü̧ oinä̧, ttü̧ja̧ ttü̧rȩjü̧ pä'ü, Judío-mä̧ Pilato-rü jä'epinä̧tü̧ ttüjawiyä 'te'chü ttikunä̧ wea pä'ü, ja̧'wa̧nü̧ jȩpü̧ juorü ȩmü̧ ttikuatü pä'ü.

³² Ja̧'wa̧nü̧ ja̧'a̧ttü̧, su̧ro̧do̧u̧mä̧ ä̧kuo̧mȩnä̧ i̧sa̧rü̧'i̧nä̧, juȩnȩ ppeyänä̧ rü̧rü̧'i̧nä̧ ttüjawiyä 'te'chü ikuinä̧tü̧.

³³ Ja̧'wa̧nü̧ ja̧'a̧nä̧ Jesú-ru 'tettäda pä'ü tti̧'chi̧'o̧mȩnä̧, täkü 'korupäi'äja'atä ji̧na̧'a̧ ja̧'wa̧nü̧ ji̧yä̧u̧ 'te'ädü ttikuokoku pinü̧.

³⁴ Ja̧'wa̧nü̧ ja̧'a̧nä̧, su̧ro̧do̧u̧ttü̧ ya̧tȩ, i'esubänä̧ dakuodänä̧ tawomȩnä̧, ukuojamä̧ ajiyakutä werächi'ina̧'a̧.

³⁵ Pi̧yȩ topinü̧mä̧, ji'äu, jua̧u̧ jiäumä̧ isopäi'ünä̧tä̧ ja̧'a̧; jua̧u̧mä̧ isopäi'ünä̧ ji̧yä̧ku̧ jiäu, ukutu'i̧nä̧ kuesetätukua pä'ü.

³⁶ Isopäi'ünä̧ pi̧yȩmä̧ 'kuäopina̧'a̧, wȩyu̧kuä̧ wȩnȩ pa̧'a̧nü̧ päü'a̧kuä̧: «Iwe'kamä̧ 'tettädokä̧kua̧,» jü̧nä̧.

³⁷ Ja̧'wa̧ta̧nü̧ kkoromȩ'i̧nä̧ wȩyu̧kuä̧ wȩnȩmä̧ päina̧'a̧: «To̧ttä̧rä̧kuo̧tü̧ tattinä̧ku̧ru̧.»

Jesú-ru ttu'turinü̧ wȩnȩ

³⁸ Pi̧yȩ 'kuäopäji o'ka'a, Arimatea ütawiyä i̧sa̧, José pä'ü mi̧kua̧, Jesú u̧wo̧juȩtä̧u̧ i̧sa̧ ja̧'a̧, judío-rü ye'eku, yä̧wȩi̧nä̧ Jesú o'ko jäwä rä'epü ikua pä'ü Pilato-rü jä'epü 'chi̧nü̧. Ja̧'wa̧nü̧ ja̧'a̧, José-mä̧, Jesú o'ko jäwä ȩmi̧pi̧nü̧.

³⁹ Ja̧'wa̧ta̧nü̧ ya'utenä̧, yodó Jesú-ru ukuoku 'chi̧nü̧, Nicodemo'i̧nä̧ 30 kirunü̧ jo̧mȩnä̧ a̧mȩu̧, mirra'i̧nä̧, áloes'i̧nä̧ 100 libras jo̧mȩnä̧ i'kächipinü̧.

⁴⁰ Ja̧'wa̧nü̧ ja̧'a̧ttü̧, José'i̧nä̧, Nicodemo-ku̧ Jesú o'ko jäwä juä'opümä̧, pü̧jä̧ta̧nä̧ a̧mȩu̧ tu'epü jȩpi̧nä̧tü̧, judío jȩttä̧'i̧jü̧'a̧kuä̧ wa'are ttikuomȩnä̧.

⁴¹ Ja̧'wa̧nü̧ ja̧'a̧ Jesú-ru, ü̧jo̧kä̧ jäinä̧ pȩ'o̧pü̧ ttu̧ju̧ni̧no̧mȩmä̧, kuäwä kka̧kui̧no̧mȩ, juȩnȩtä̧ wa'are idorä'i̧nä̧ kki̧na̧'a̧, ya̧tȩrü̧'i̧nä̧ rütäwokoju.

⁴² Ja̧'wa̧nü̧ ja̧'a̧ttü̧, Jesú o'ko jäwämä̧ juȩnȩtä̧ rütinä̧tü̧, jua'amä̧ tü'kü jo̧mȩttü̧ ja̧'wa̧ta̧nü̧ sawaru mo̧ro̧'i̧nä̧, täkü tü'kü ji̧yä̧u̧.