San Juan 17 - Nuevo Testamento Uwotjüja

Jesú-mä̧ u̧wo̧juȩtä̧u̧rü Dio-rü ukuokuinü̧

¹ Pi̧yȩ wȩnȩ pä'ü kä'ädü, Jesú-mä̧ mo̧ro̧jä̧ra̧'a̧ku̧ topü pä'inü̧: Chä'o, Kui̧tti̧ ukuo jäwä kui̧jȩpü̧ mo̧ro̧ rȩbȩä̧kuä̧wa̧'a̧, pärokua'aku'i̧nä̧ kuruwo jäwä i̧jȩpä̧kua̧'a̧nü̧ jȩpi̧.

² Isopäi'ünä̧ uku kui̧tti̧rü̧mä̧, pi̧jä̧ ttü̧ja̧ ttu̧wä̧mȩnä̧ jü̧nä̧ ujuru iyinü̧jä̧, o'katoi'ünä̧ uku kuiyinä̧u̧ru̧ kkä̧kuä̧wä̧ i'ko chiya pä'ü.

³ Ja̧'wa̧ta̧nü̧ pi̧yȩ ja̧'a̧ kkä̧kuä̧wä̧ i'komä̧: Isopäi'ünä̧tä̧ wa̧, uku ya̧tȩtä̧ Dio-rü ttu̧wo̧jui̧po̧mȩnä̧ ja̧'wa̧ta̧nü̧ Jesucrito-rü wekuinä̧ku̧ru̧'i̧nä̧ ttu̧wo̧jui̧po̧mȩnä̧.

⁴ Ttümä̧, pi̧jä̧ttü̧mä̧ kukuo jäwä i̧jȩpi̧nü̧sä̧; Täkü kä'ädäjisä chadita pä'ü wekuinü̧mä̧.

⁵ Ja̧'wa̧nü̧ ja̧'a̧ttü̧, Chä'o jitämä̧, kuippeyänä̧ kukuo jäwä iyittü, pi̧jä̧ kkä̧kua̧'a̧ ä'koji kukuo jäwä chu̧ju̧nä̧ri̧nü̧ta̧'a̧nü̧.

⁶ Pi̧jä̧ttü̧, ttürü pojopü kuiyinä̧u̧ru̧mä̧, uku kutü'kü ttu̧wo̧jui̧pü̧nä̧ jȩpi̧nü̧sä̧. Uku kuȩmi̧nä̧u̧ ja̧'a̧ttü̧, ttürü'i̧nä̧ iyinü̧jä̧ ja̧'wa̧nü̧ ja̧'a̧ttü̧ kui̧wȩnȩ wekumä̧ esetinä̧tü̧.

⁷ Ja̧'wa̧nü̧ ja̧'a̧, jitämä̧ wo̧juä̧wä̧tü̧, o'kajuiyünä̧ ttürü kuiyinü̧mä̧, ukuttütä icha'a pä'ü.

⁸ Ja̧'wa̧nü̧ ja̧'a̧ttü̧ kui̧wȩnȩ, ttürü kuiyinü̧mä̧ chi̧yä̧u̧ ȩmi̧nä̧tü̧; ja̧'wa̧nü̧ ja̧'a̧ wo̧jui̧'i̧nä̧tü̧ ukuttü chichina̧'a̧'i̧nä̧ ja̧'wa̧ta̧nü̧ uku ttürü wekuina̧'a̧'i̧nä̧, jü̧nä̧.

⁹ Juätü jäwätä jä'epüsä; pi̧jä̧ ttü̧ja̧ jäwämä̧ jä'epoküsä; ttürü kui̧yi̧nä̧u̧ jäwätä jä'epüsä, ukú kuȩmi̧nä̧u̧ ja̧'a̧ttü̧.

¹⁰ O'kajuiyünä̧ ttü chiäremä̧, ukutä kuiäre ja̧'a̧; ja̧'wa̧nü̧ ja̧'a̧ttü̧ juätünä̧, chukuo jäwämä̧ i̧jȩkuä̧cha̧'a̧.

¹¹ Täkü, ttümä̧ pi̧jä̧nä̧mä̧ kko̧kü̧sä̧; pitütä pi̧jä̧nä̧ ttü̧ja̧kui̧'a̧'a̧nä̧, ttümä̧ ukutäku ichüsä. Chä'o mo̧ro̧jä̧ ru̧wa̧, ttürü kuiyinä̧u̧ru̧mä̧, kui̧mi̧nä̧ tta̧'ä̧ri̧tü̧, juätü'i̧nä̧ ji̧nä̧ ya̧tȩ ttäkua'anü̧, ttü ukuku jä̧'i̧jü̧ta̧'a̧nü̧.

¹² Pi̧jä̧nä̧ juätütäku chü̧jä̧i̧mä̧ ukú kui̧mi̧nä̧ tta̧dä̧rä̧'i̧jä̧u̧; ttürü kuiyinä̧u̧ru̧mä̧ tta̧'ä̧rä̧'i̧jü̧sä̧ ya̧tȩ'i̧nä̧ toe'ächü juiyünä̧tä̧ ja̧'wa̧nü̧ ja̧'a̧nä̧ to'e'ächinü̧ ä̧tȩkuä̧nä̧ toe'ächa pä'ü winütä̧, wȩyu̧kuä̧ wȩnȩnä̧ pä'ijü jo̧mȩnü̧ päi'a pä'ütä.

¹³ Ja̧'wa̧nü̧ ja̧'a̧nä̧, jitämä̧ pä'äjita'anü̧ uku ku̧ja̧'a̧ ppa̧'ä̧chü̧sä̧; ja̧'wa̧nü̧ ja̧'a̧ttü̧ pi̧yȩmä̧ pä'üsä, ji̧nä̧ pi̧jä̧nä̧ chu̧jä̧i̧tä̧, juätü'i̧nä̧ ttü jäwä eseäkuäwä jo̧mȩnü̧ ttu̧ju̧nä̧ra̧ pä'ü.

¹⁴ Ttümä̧ kui̧wȩnȩ chiyinä̧u̧; ja̧'wa̧nü̧ ja̧'a̧ pi̧jä̧ ttü̧ja̧mä̧ ttü̧jü̧'ko̧ko̧u̧ pinä̧tü̧, pi̧jä̧ ttü̧ja̧ ttoka'attü, ttü'i̧nä̧ pi̧jä̧ ttü̧ja̧sa̧ chü juiyüta'anü̧.

¹⁵ Pi̧jä̧ttü̧ ȩmü̧ kuikuatü pä'ümä̧, jä'epoküsä, surojüttü tta̧kuä̧ri̧ya̧ttü̧ pä'ü jä'epüsä.

¹⁶ Juätümä̧ pi̧jä̧ ttü̧ja̧mä̧kü̧, ttü'i̧nä̧ pi̧jä̧ ttü̧ja̧sa̧ choka'attü.

¹⁷ Jueü wȩnȩ kui̧wȩnȩ pä'aku surojü juittächächünä̧ jȩpi̧tü̧; kui̧wȩnȩmä̧ jueü wȩnȩ ja̧'a̧ttü̧.

¹⁸ Ttürü ukú pi̧jä̧ra̧'a̧ wekuinüta̧'a̧nü̧, ttü'i̧nä̧ juätürü pi̧jä̧nä̧ we'ipüsä.

¹⁹ Ja̧'wa̧ta̧nü̧ pitü jäwänä̧, ttümä̧ cha̧mü̧nä̧ pa̧ja̧tü̧ usurä ȩmä̧u̧ iyäkuäusä ja̧'wa̧ta̧nü̧ jueü wȩnȩ pä'aku pitü'i̧nä̧ ttiyäkuäwa pä'üsä.

²⁰ Ja̧'wa̧nü̧ ja̧'a̧nä̧, suro pitü ttütü'kütämä̧ jä'epoküsä, pitü jittäwomȩnä̧ ä̧ju̧ku̧ ttürü ttesetäkuotürü'i̧nä̧ jä'epüsä.

²¹ Jua'amä̧ o'katoi'ünä̧ ji̧nä̧ ya̧tȩ ttäkua'anü̧; Chä'o uku'i̧nä̧, ttünä̧ jä̧'i̧jü̧'ta̧'a̧nü̧; ja̧'wa̧ta̧nü̧ ttü'i̧nä̧, ukuku chä'ijüta'anü̧, juätü'i̧nä̧ ji̧nä̧ya̧tȩtä̧ ttünä̧, ujutunä̧; jua'amä̧ ttürü wekuina̧'a̧, pi̧jä̧ ttü̧ja̧ ttesetäkua'anü̧.

²² Ttürü chukuo jäwä kuiyinü̧mä̧, ttü'i̧nä̧ chiyinä̧u̧, ji̧nä̧ ya̧tȩ tta pä'ü, ujutu jä̧'i̧jü̧ta̧'a̧nü̧, ji̧nä̧ ya̧tȩ ttäkua'anü̧.

²³ Ttü'i̧nä̧ juätünä̧ chu̧ju̧nä̧ ja̧'wa̧ta̧nü̧ uku'i̧nä̧ ttünä̧ ku̧ju̧ta̧'a̧nü̧, jua'amä̧ ji̧nä̧ ji̧yȩtȩnä̧ jo̧mȩnü̧ ttäkua'anü̧, pi̧jä̧ ttü̧ja̧ ttürü wekuina̧'a̧ ttu̧wo̧jui̧pü̧nä̧ ja̧'wa̧ta̧nü̧ ttürü eseu repekuä'ijüta'anü̧, juätürü'i̧nä̧ eseu repekua'a pi̧jä̧ ttü̧ja̧ ttu̧wo̧juä̧kua̧'a̧nü̧.

²⁴ Chä'o juätü ttürü kui̧yi̧nä̧u̧mä̧, ttü chü̧jo̧mȩ ttü̧ja̧kua̧ pä'üsä, ttürü kuiyinü̧ chukuo jäwä tottäkua'anü̧; Isopäi'ünä̧ ttürümä̧ pi̧jä̧ adikui'äkua'a ä'kojitä päi'ünä̧ eseu repe'inü̧jä̧.

²⁵ Chä'o, adiwomȩnä̧ jȩä̧kuä̧wä̧ i̧sa̧jä̧, pi̧jä̧ ttü̧ja̧mä̧ ukurumä̧ ttu̧wo̧juo̧ko̧ku̧jä̧ ja̧'wa̧nü̧ ja̧'a̧nä̧ ttümä̧ chu̧wo̧juä̧ku̧jä̧ ja̧'wa̧ta̧nü̧ pitü'i̧nä̧ wo̧jui̧'i̧nä̧tü̧, ukú ttürü wekuina̧'a̧mä̧.

²⁶ Ukú kui̧mi̧ ttu̧wo̧juö̧nä̧ chiyinä̧u̧, jua'a yabonü̧'i̧nä̧ chi̧yä̧kuä̧u̧, ttürü kuiyinü̧ eseu repeäkuäwä juätünä̧ kkä̧kua̧'a̧nü̧, ttü'i̧nä̧ juätünä̧ chu̧ju̧nä̧.