San Juan 14 - Nuevo Testamento Uwotjüja

Jä'o Dio-rümä̧ Jesú-nä̧tä̧ rȩbȩä̧kuä̧wa̧'a̧

¹ Kua̧mi̧ iso'kitukunä̧mä̧ kua̧'kua̧ tta̧kuȩkuä̧tu̧kuä̧. Dio-rü esetümä̧ ja̧'wa̧ta̧nü̧ ttürü'i̧nä̧ esetätukui.

² Chä'o ojusodenä̧mä̧, kkä̧kuä̧wä̧ oduwiyämä̧ rü̧ȩnä̧ kka̧'a̧; ja̧'wa̧nü̧ jü̧ juiyüttümä̧ jidäwo̧ko̧u̧ pa̧ja̧tü̧jä̧. Ja̧'wa̧nü̧ ja̧'a̧ttü̧ ku̧jä̧tu̧kuä̧kuo̧mȩ aditü kku̧nu̧ 'chü̧sä̧;

³ Ja̧'wa̧nü̧ ku̧jä̧tu̧kuä̧kuo̧mȩ aditü kku̧nu̧ i̧u̧ i̧wi̧pü̧'ka̧, pä'äjita'anü̧, ttütä ukuturu ȩmü̧ chi̧chä̧kua̧sä̧, ukutu'i̧nä̧ ttü chü̧jo̧mȩ ku̧ja̧kuä̧tu̧kuä̧kua̧'a̧nü̧.

⁴ Ukutumä̧ täkü, chi̧'cho̧mȩ'i̧nä̧ ja̧'wa̧ta̧nü̧ 'chä̧kuä̧wä̧mä̧'i̧nä̧ wo̧juä̧tü̧jä̧.

⁵ Päomȩnä̧, Tomá-mä̧ pä'inü̧: —Chu̧ru̧wa̧, kui̧'cho̧mȩmä̧ jerupätüjä̧ ¿Toku tu̧wo̧juä̧kua̧'a̧jä̧ttü̧ jua'a mä̧nä̧mä̧?

⁶ Päku, Jesú-mä̧ ädätinä̧ku̧: —Ttütäsä mä̧nä̧mä̧, ttütäsä isopäi'ünä̧mä̧ ja̧'wa̧ta̧nü̧ ttütäsä tta̧'kua̧rü̧mä̧. Chä'o ü̧ja̧'a̧mä̧, yoriso ya̧tȩ'i̧nä̧ ttü toünä̧mä̧ rȩbȩä̧kuä̧wo̧ka̧'a̧, ttünä̧tä̧tä̧ rȩbȩä̧kuä̧wa̧'a̧.

⁷ Ttürü ku̧wo̧juä̧tu̧kuo̧mȩnä̧mä̧, Chä'orü'i̧nä̧ wo̧juä̧tü̧jä̧; porü kkä̧mä̧dü̧, täkü jitämä̧ ku̧wo̧juä̧tu̧kuä̧ku̧ ja̧'wa̧ta̧nü̧ topü'i̧nä̧ to'kuätukuäku.

⁸ Päomȩnä̧, Felipe-mä̧ pä'inü̧: —Chu̧ru̧wa̧, kuä'orü i̧jȩpi̧ttü̧, kui̧jȩpü̧ttü̧mä̧, jua'a yabonü̧mä̧ jä̧tȩpä̧ro̧ko̧ku̧jä̧.

⁹ Päku, Jesú-mä̧ ädätinä̧ku̧: —Felipe, ukutuku rekuo mo̧ro̧ chü̧jä̧'i̧ja̧'a̧nä̧ ¿Ji̧nä̧ kuieruwätukuäkusä? Ttürü topä'ijümä̧, Chä'orü'i̧nä̧ topä'ijü; ¿tta̧'a̧nü̧ pä'ü, Kuä'orü i̧jȩpi̧tü̧ päkuätukua'ajä̧ttü̧?

¹⁰ ¿Kuesetoka'a, Chä'o ttünä̧ ü̧ja̧'a̧mä̧ ja̧'wa̧ta̧nü̧ Ttü'i̧nä̧ Chä'oku chü̧ja̧'a̧mä̧? Ttü chukuokumä̧, ttütä cha̧mü̧nä̧ pa̧ja̧tü̧mä̧ ukuokuoküsä. Jua̧u̧ ttünä̧ kkä̧nü̧tä̧ o'kajuiyünä̧ jȩpü̧.

¹¹ Esetittü, ttümä̧ Chä'oku kkü̧sä̧ ja̧'wa̧ta̧nü̧ Chä'o'i̧nä̧ ttünä̧ kkü̧; ja̧'wa̧nü̧ jü̧ juiyüttü'i̧nä̧, jȩchü̧ttü̧ topü eseti.

¹² Isopäi'ünä̧ pädäu̧jä̧: Ttürü esetümä̧, ttü jȩchü̧mä̧ jȩä̧kua̧; juȩnȩ abonä̧nü̧ rü̧ jäwä'i̧nä̧ jȩä̧kua̧, Chä'o ü̧jo̧mȩ chi̧'cha̧'a̧ttü̧.

¹³ Ja̧'wa̧nü̧ ja̧'a̧ttü̧ o'kajuiyünä̧, ttü chi̧mi̧nä̧, Chä'orü jäkuepätukumä̧, jȩchä̧kua̧sä̧. Jua'amä̧ Chä'o ukuo jäwä, I̧tti̧nä̧ i̧jȩpa̧ pä'ü.

¹⁴ O'kajuiyünä̧tä̧, ttü chi̧mi̧nä̧ jäkuepätukumä̧, jȩchä̧kua̧sä̧.

Jesú-mä̧, Epíritu Sa̧tu̧rü̧ weäkua'a ji'äwinü̧

¹⁵ Isopäi'ünä̧ ttürü eseu repekuätukuttümä̧, wedümä̧ kukuotäkuotüjä̧.

¹⁶ Chä'orü jädepäkua̧sä̧, kka̧ra̧ ppädäkuäwä i̧sa̧rü̧ iyätukuaku, 'kuäopünä̧ ukutuku ü̧jä̧kua̧rü̧;

¹⁷ isopäi'ünä̧ i̧sa̧ Epíritu-ru, Dio-rü esetokotümä̧ ttȩmü̧ juiyünä̧ wa̧rü̧. Topü'i̧nä̧ tottokoku, jerupü'i̧nä̧ ttieruwäku. Ja̧'wa̧nü̧ ja̧'a̧nä̧ ukutumä̧ ku̧wo̧juä̧tu̧kuä̧ku̧, ukututäku ü̧ja̧'a̧ttü̧.

¹⁸ Reyotü kuätukunä̧mä̧ chu̧ju̧ni'o̧ko̧u̧ kuäkuotüjä̧; pä'äjita'anü̧ ukututäku ppa̧dä̧chä̧kua̧sä̧.

¹⁹ A̧'u̧ku̧nä̧, mo̧ro̧ o'ka'a, täkü pi̧jä̧ ttü̧ja̧mä̧ tottokoku chä̧kua̧sä̧ ja̧'wa̧nü̧ ja̧'a̧nä̧ ukutumä̧ to'kuätukuäkua̧sä̧, jua'amä̧ cha̧'kua̧ra̧'a̧ttü̧ ja̧'wa̧ta̧nü̧ ukutu'i̧nä̧ kua̧'kua̧rä̧kuo̧tü̧jä̧.

²⁰ Ji̧yȩnü̧ mo̧ro̧ ukutumä̧ ku̧wo̧jui̧pä̧kuo̧tü̧jä̧, ttü Chä'onä̧ chü̧ja̧'a̧mä̧, ja̧'wa̧ta̧nü̧ ukutu ttünä̧ ku̧jä̧tu̧kua̧'a̧mä̧ ja̧'wa̧ta̧nü̧ ttü'i̧nä̧ ukutunä̧ chü̧ja̧'a̧mä̧.

²¹ Ttü wedü wȩnȩ kku̧nä̧rü̧, ukuotümä̧, jua̧u̧ ja̧'a̧ ttürü eseu repe'ümä̧. Ja̧'wa̧nü̧ ttürü eseu repe'ürümä̧, Chä'o'i̧nä̧ eseu rȩpȩä̧kua̧; ja̧'wa̧ta̧nü̧ ttü'i̧nä̧ eseu repe'ü, jua̧u̧ru̧ chi̧jȩkuä̧kua̧sä̧.

²² Päiyäku Juda-mä̧ (Icariote-mäkü̧) päinä̧ku̧: —Chu̧ru̧wa̧ ¿Tta̧'a̧nü̧ pä'ü ujuturumä̧ kui̧jȩkua̧'a̧nä̧, Dio-rü esetokotürümä̧ kuijȩkuo̧ka̧'a̧ jä̧kua̧'a̧ttü̧?

²³ Jesú ädätinä̧ku̧: —Ttürü eseu repe'ümä̧, ttü chi̧wȩnȩ ukuotä̧kua̧; ja̧'wa̧nü̧ jo̧mȩnä̧ Chä'o'i̧nä̧ eseu rȩpȩä̧kua̧ ja̧'wa̧nü̧ ja̧'a̧ttü̧ jua̧u̧nä̧ ichü tü̧ja̧kuä̧kuo̧tü̧jä̧.

²⁴ Ttürü eseu repe'okümä̧, ttü chi̧wȩnȩ ukuotokü; ttü chukuokua'a kuä̧ju̧kuä̧'i̧jä̧tu̧ku̧mä̧, ttü chi̧wȩnȩmä̧kü̧, ttürü we'inü̧ Chä'o i̧wȩnȩ ja̧'a̧.

²⁵ Pi̧yȩ ji̧dä̧wä̧u̧jä̧, ji̧nä̧ ukututäku chu̧jä̧i̧tä̧.

²⁶ Ja̧'wa̧nü̧ ja̧'a̧nä̧, ppädäkuäwä i̧sa̧, Epíritu Sa̧tu̧, ttü chi̧mi̧nä̧, Chä'o weäkutä jä̧kua̧'a̧, o'kajuiyünä̧ u̧wo̧juȩtä̧kua̧mä̧ ja̧'wa̧ta̧nü̧ o'kajuiyünä̧ chukuokuinü̧ ku̧ni̧chi'ätuku juiyünä̧ jȩä̧kua̧mä̧.

²⁷ Wȩnȩ juiyünä̧ kkä̧kuä̧wä̧ kku̧ni̧pü̧ chi̧yä̧u̧jä̧; Dio-rü esetokotü ttiyü'anü̧mä̧ chi̧yo̧ko̧u̧jä̧. Kua̧mi̧ iso'kitukunä̧mä̧ yekuekuätukuä.

²⁸ Täkü ä̧ju̧kuä̧jä̧tü̧jä̧ pa̧'a̧nü̧ pädümä̧: 'Chi̧'i̧pü̧'ka̧'i̧nä̧ pä'äjita'anü̧ ukututäku ppa̧dä̧chä̧kua̧sä̧ päda'amä̧. Isopäi'ünä̧ ttürü eseu repekuätukuttümä̧, rü̧ȩnä̧ esewajatüjä̧, Chä'o ü̧ja̧'a̧ 'chü̧sä̧ päda'a kuä̧ju̧kuä̧tu̧kua̧'a̧ttü̧, jua'amä̧ Chä'omä̧ ttüttü'i̧nä̧ abonä̧nü̧ wa̧ ja̧'a̧ttü̧.

²⁹ Täkü jidäwä̧u̧jä̧ 'kuäopäkua'a ä'kanä̧, 'kuäopomȩnä̧ kuesetätukuäkua'anü̧.

³⁰ Täkü ukutukumä̧, kkoro rü̧ȩnä̧mä̧ ukuokuoküsä, jua'amä̧ pi̧jä̧nä̧ we'ä'ijü icha'attü, Jua̧u̧mä̧ ttükumä̧ yoriso jui̧'a̧.

³¹ Ja̧'wa̧nü̧ ja̧'a̧nä̧, pi̧jä̧ ttü̧ja̧ Chä'orü eseu repeda'a ttu̧wo̧jua̧ pä'ü ja̧'wa̧ta̧nü̧ jua̧u̧ weinü̧tä̧ jȩcha̧'a̧ttü̧. Ä̧rä̧mi̧'ä̧tu̧kui̧, täkü porümä̧ ti̧'chä̧tu̧kua̧.