San Juan 13 - Nuevo Testamento Uwotjüja

Jesú-mä̧ u̧wo̧juȩtä̧u̧rü ttü̧jä̧pi̧yä̧ tükinü̧

¹ Pacua pä'käri ä'kanä̧ ja̧'a̧, Jesú-mä̧ pi̧jä̧nä̧ttü̧mä̧ täkü rä'opü Chä'oku ji̧nä̧ yo̧mȩtȩ pädi'ä̧kuȩ mo̧ro̧ rȩbȩä̧kuä̧wä̧ku̧sä̧ pä'ü wo̧juä̧u̧. Pi̧jä̧nä̧ kka̧kuä̧tü̧ u̧mü̧wä̧yotürü 'kuäopünä̧tä̧ eseu repeä'ija'amä̧, rüjibü päi'ünä̧ eseu repeinä̧u̧.

² Ttu̧kuȩ ttukuomȩttü̧, äwettämä̧, täkü Juda Icariote, Simón i̧tti̧ a̧mi̧so'kinä̧, Jesú-ru iyü ikua pä'ü jȩpü̧ ü̧jü̧nä̧ ja̧'a̧ ji̧na̧'a̧.

³ Jesú-mä̧ u̧mü̧nä̧, Jä'o Dio o'kajuiyünä̧ iyina̧'a̧'i̧nä̧ ja̧'wa̧ta̧nü̧ Dio-ttü ichina̧'a̧'i̧nä̧ wo̧juä̧u̧ kkä̧nü̧ pä'äjita'anü̧ jua'atä ppa̧wä̧cha̧'a̧'i̧nä̧ wo̧juä̧u̧,

⁴ ttu̧kuȩ ttukuomȩttü̧ ä̧rä̧mi̧'ü̧, wä̧mȩnä̧ ü̧'ka̧tä̧wä̧ta̧ kko̧'ä̧dä̧kuä̧wo̧po̧'ü̧, pa̧yu̧'chȩnä̧ äkänä̧ ti̧'ä̧dä̧kuä̧wo̧po̧'ä̧ji̧'ka̧.

⁵ Juȩnȩ o'komȩnä̧ uri'ta̧nä̧ ajiya to'äji̧'ka̧, u̧wo̧juȩtä̧u̧ ttü̧jä̧pi̧yä̧ tükü kkä̧nü̧, äkänä̧ ti̧ä̧dä̧kuä̧wä̧jä'chȩnä̧ 'ka̧'i̧nü̧.

⁶ Ja̧'wa̧nü̧ ja̧'a̧, jitä Peduru ukú, päku, Peduru-mä̧ pä'inü̧: —Chu̧ru̧wa̧, ¿Ukú kutuka'a tä̧jí̧, ttü chi̧jä̧pi̧yä̧mä̧?

⁷ Päiyäku, Jesú-mä̧ päinä̧ku̧: —Ttü, jitä jȩchü̧mä̧ ku̧wo̧jui̧'po̧ka̧'a̧nä̧, jua̧u̧nü̧ o'ka'atä ku̧wo̧jui̧pä̧kua̧jä̧.

⁸ Peduru pä'inü̧: —Yorisotä, chü̧jä̧pi̧yä̧ kutukattü pä'ümä̧, ukurumä̧ we'äwokü chä̧kua̧sä̧, Päku, Jesú-mä̧, ädätinü̧: —Ukuru chütükü juiyüttümä̧, ttüttümä̧ i̧mi̧ku̧ kuä̧kua̧jä̧.

⁹ Päopo'äku, Simón Peduru-mä̧, pä'inü̧: —Chu̧ru̧wa̧, chi̧jä̧pi̧yä̧tä̧mä̧kü̧, jua̧u̧nu̧mä̧ chu̧mü̧'i̧nä̧, chu'i̧nä̧ tükittü.

¹⁰ Päiyäku, Jesú-mä̧ ädätinü̧: —Täkü, tükäkuäwomȩmä̧, rekuä rü̧jo̧ka̧'a̧ ttütüka pä'ümä̧, kkara'amä̧ jo̧mȩnü̧ o'kajuiyünä̧ tea'attü̧. Ja̧'wa̧nü̧ ja̧'a̧ttü̧ ukutumä̧ tükäwotüjä̧, jua'akumä̧ o'katoi'ünä̧mä̧ jo̧ka̧'a̧nä̧.

¹¹ Iyü ikuäkua̧rü̧ u̧wo̧jua̧'a̧ttü̧, pä'inü̧: O'katoi'ünä̧mä̧ tükümä̧ ikuäwokotüjä̧.

¹² Ja̧'wa̧nü̧ ja̧'a̧ttü̧, tti̧jä̧pi̧yä̧ tükü kä'ädäji̧'ka̧, Jesú-mä̧ wä̧mȩnä̧ ü̧'ka̧tä̧wä̧ta̧ 'ka̧tä̧wo̧'ü̧, pä'äjita'anü̧ mesa-nä̧ pä̧mä̧dü̧, pä'inü̧: —¿Ukuturu jȩchä̧ji̧mä̧ wo̧jui̧'ä̧tü̧jä̧?

¹³ Ukutumä̧, ttürümä̧, pä'ä'ijä̧tü̧jä̧, «Chu̧ru̧wa̧,» «Wo̧juȩkuä̧ i̧sa̧,» jü̧nä̧; jua'amä̧ adiu pä'ätüjä̧, iweye jua̧u̧tä̧ cha'attü.

¹⁴ Ttü, isopäi'ünä̧ wo̧juȩkuä̧ i̧sa̧'i̧nä̧ cha'anä̧, ku̧ru̧wa̧tu̧'i̧nä̧ cha'anä̧ ku̧jä̧pi̧yä̧tu̧ku̧ chutükä̧jä̧u̧jä̧ ja̧'wa̧ta̧nü̧ ukutu'i̧nä̧ ku̧jä̧pi̧yä̧tu̧ku̧ kka̧ra̧ kka̧ra̧nü̧ tükäkuäwü ku̧jä̧tu̧kua̧jä̧.

¹⁵ Isopäi'ünä̧ jȩchä̧ji̧yä̧ujä̧, ttü jȩchä̧ji̧mä̧ ukutu'i̧nä̧ jȩ'kuä̧tu̧kua̧ pä'ü.

¹⁶ Isopäi'ünä̧tä̧ pädäu̧jä̧: Ttu̧mü̧wä̧ya̧mä̧, u̧ru̧wa̧ttü̧'i̧nä̧ u̧wä̧mȩnä̧mä̧ wokü ja̧'wa̧ta̧nü̧ wȩ'ä̧wa̧mä̧, we'äji u̧wä̧mȩnä̧mä̧ wokü.

¹⁷ Pi̧yȩ wȩnȩ wo̧jui̧'ü̧, jȩ'kuä̧tu̧ku̧ttü̧mä̧, rü̧ȩnä̧ eseäkuäwä ku̧'o̧kui̧'ä̧kuo̧tü̧jä̧.

¹⁸ Ukutu o'katoi'ünä̧ kutü'kütukumä̧ pädoka'anä̧; pojopü chȩmi̧nä̧u̧ru̧mä̧ wo̧jua̧sä̧. Ja̧'wa̧nü̧ ja̧'a̧nä̧ wȩyu̧kuä̧ wȩnȩ päümä̧ jo̧mȩnü̧ 'kuäopa pä'ü ja̧'a̧: Ttüku u̧kuȩ kumä̧, chaboi̧ya̧ jü̧nä̧ pä'i'äji.

¹⁹ Pi̧yȩ pädü 'kuäopäkua'a ä'kanä̧ ji'äusä, jua̧u̧ 'kuäopomȩnä̧, «Ttütäsä» pädümä̧ kuesetätukuäkua'anü̧.

²⁰ Isopäi'ünä̧ pädäu̧jä̧: Ttü wedäkuru do'ädümä̧, Ttürü do'ädü; ja̧'wa̧ta̧nü̧ Ttürü do'ädümä̧, Ttürü we'inü̧rü̧ do'ädü.

Jesú-mä̧ ji'äwinü̧ Juda iyü i̧kuä̧kua̧sä̧ pä'ü

²¹ Pi̧yȩ pä'ü kä'ädü, Jesú-mä̧ rü̧ȩnä̧ a̧'kua̧nä̧ a̧'u̧ru̧jä̧chi̧'ä̧ku̧, o'kajuiyünä̧ wäjuönä̧tä̧ pä'inü̧: —Isopäi'ünä̧tä̧ pädäu̧jä̧: ukututtü ya̧tȩ ja̧'a̧ ttürü iyü i̧kuä̧kua̧mä̧.

²² Ja̧'wa̧nü̧ pä̧i̧yä̧u̧, u̧wo̧juȩtä̧u̧mä̧ topäkuäwinä̧tü̧, dirü pä'ajó pä'ü.

²³ Ja̧'wa̧nü̧ ja̧'a̧, u̧wo̧juȩtä̧u̧ttü̧ ya̧tȩ Jesú rü̧ȩnä̧ repeä'ijäku, ippeyä jo̧mȩ kuä'ipäji̧'ka̧ pi̧nü̧,

²⁴ Ja̧'wa̧nü̧ ü̧'a̧'a̧, Simón Peduru-mä̧, tiderü päaja pä'ü jä'epü ä̧ju̧kui̧ya̧rü̧ pä'ü u̧mü̧nä̧tä̧ jȩi̧nä̧ku̧.

²⁵ Ja̧'wa̧nü̧ jȩi̧yä̧ku̧, Jesú a̧mü̧ka tü'kükunä̧nü̧ pä'i'ü, päinä̧ku̧: —Chu̧ru̧wa̧, ¿Jua̧u̧mä̧ díjä̧ttü̧?

²⁶ Päku, Jesú ädätinü̧: —Jua̧u̧mä̧, chu trigo i̧ri̧si̧ 'ti̧'ü̧ chiyäku ja̧'a̧. Pä'ü kä'ädü, 'ti̧'o̧po̧'ü̧ Juda Icariote, Simón i̧tti̧rü̧ iyinü̧.

²⁷ Juä̧si̧ kuä̧nü̧ kädüta'anü̧, yotäku Juda Icariote-rü Satanás-mä̧, a̧mi̧so'kinä̧ do'ächi'inü̧. —Ja̧'wa̧nü̧ ji̧yä̧ku̧ Jesú-mä̧ päinä̧ku̧: Jȩ'kua̧ päkuäjimä̧, jitätä jȩpi̧.

²⁸ Ja̧'wa̧nü̧ pä'anä̧, mesa-nä̧ kuä̧nü̧ pȩjä̧tü̧mä̧, ya̧tȩ'i̧nä̧ tta̧'a̧nü̧ pä'ü pä'ajó pä'ü jerupinä̧tü̧.

²⁹ Ja̧'wa̧nü̧ ja̧'a̧nä̧ kkorotümä̧, Juda-mä̧ pärätä ȩkä̧yü 'chu̧ä̧ra̧'a̧ ja̧'a̧, pä'käri jäwä ȩma̧ pä'ü päkukü̧ ja̧'wa̧nü̧ jü̧ juiyüttü'i̧nä̧, usurä isotürü ppäda pä'ü päkukü̧ pä'ütä amükuädinä̧tü̧.

³⁰ Ja̧'wa̧nü̧ ja̧'a̧ Juda-mä̧, trigo i̧ri̧si̧ kui'ipütä rä'opächinü̧. Jua̧u̧nu̧mä̧, täkü yodó ji̧na̧'a̧.

Jareünä̧ weäwä wȩnȩ

³¹ Ja̧'wa̧nü̧ ja̧'a̧, Juda-mä̧ räopächäji o'ka'a, Jesú-mä̧ pä'inü̧: —Jitämä̧, Ubo I̧tti̧ ukuo jäwä i̧jȩpü̧ kku̧na̧'a̧ ja̧'wa̧ta̧nü̧ Dio ukuo jäwä'i̧nä̧ jua̧u̧nä̧tä̧ i̧jȩkuä̧cha̧'a̧.

³² Ja̧'wa̧ta̧nü̧ Dio ukuo jäwä, jua̧u̧nä̧ i̧jȩpü̧ttü̧mä̧ ja̧'wa̧ta̧nü̧ Dio'i̧nä̧, jua̧u̧ i̧tti̧ ukuo jäwä i̧jȩpä̧kua̧; jua'amä̧ jitätä ja̧'a̧ku̧.

³³ Chi̧tti̧mü̧, ukutukumä̧ a̧'u̧kua̧'a̧tä̧ chü̧jä̧kua̧sä̧. Ttürümä̧ kusätukua'anä̧, judío-rü pädinü̧ta̧'a̧nü̧ pädäu̧jä̧: Ttü chi̧'cha̧'a̧mä̧ ichokotü kuäkuotüjä̧.

³⁴ Ji̧yȩtȩ jareünä̧ weäwä wȩnȩ we'üsä, ukuturu: Yotukunä̧ eseu repe'äkuäwätukui; ttü ukuturu eseu repedä'ijüta̧'a̧nü̧ ja̧'wa̧ta̧nü̧ ukutu'i̧nä̧ eseu repe'äkuäwätukui.

³⁵ Isopäi'ünä̧ ja̧'wa̧nü̧ yotukunä̧ eseu repekuäwätukua'a topü, o'katoi'ünä̧ ttu̧wo̧juä̧kuo̧tü̧, jua̧u̧tä̧ u̧wo̧juȩtä̧u̧ pä'ümä̧.

Jesú-mä̧, Peduru ä̧ppü̧tä̧rä̧kua̧'a̧ ji'äwinü̧

³⁶ Simón Peduru-mä̧, Jesú-ru pä'inü̧: —Chu̧ru̧wa̧ ¿To kui̧'cha̧'a̧jä̧ttü̧? —Päku, Jesú-mä̧ ädätinä̧ku̧: Jitätämä̧, chi̧'cha̧'a̧mä̧ ichoküjä̧; ja̧'wa̧nü̧ ja̧'a̧nä̧, o'komȩnä̧ kui̧chä̧kua̧jä̧.

³⁷ Päku, Peduru-mä̧ pä'inü̧: —Chu̧ru̧wa̧ ¿Tta̧'a̧nü̧ pä'ü, jitätämä̧ ukukumä̧ chichü juiyünä̧ ja̧'a̧jä̧ttü̧? ¡Uku jäwänä̧, cha̧'kua̧rü̧mä̧ chi̧yä̧kua̧sä̧!

³⁸ Jesú-mä̧ ädätinä̧ku̧: —¿Isopäi'ünä̧, kua̧'kua̧rü̧mä̧ ttü jäwänä̧ kuiyäwä̧kua̧jä̧? Isopäi'ünä̧tä̧ pädäkujä̧: Äkärä woäkua'a ä'kanä̧, wäbodäkuä jo̧mȩnä̧ ttürü kuä̧ppü̧tä̧rü̧ o'ka'a jä̧kua̧'a̧.