San Juan 11 - Nuevo Testamento Uwotjüja

Rázaru 'korupäi'inü̧ wȩnȩ

¹ Ya̧tȩ Betania ütawiyä ttü̧ja̧sa̧ na̧'ä̧chi̧nü̧, María kkubüa Marta-ku ttidepiyu i̧sa̧, Rázaru pä'ü mi̧kua̧, juäjutä kki̧jä̧wa̧.

² Paju María, Rázaru ubüamä̧, juäjutä ji̧na̧'a̧ Tu̧ru̧wa̧ Jesucrito-rü ü̧jä̧pü̧nä̧ a̧mȩwoya tu'epü kkuwo'chenä̧ 'ka̧'i̧nä̧jü̧ pinä̧ju̧mä̧.

³ Ja̧'wa̧nü̧ ja̧'a̧ttü̧ kkijäwajuku, Jesú-ru pa̧'a̧nü̧ pä'äjätukuirü pä'ü jittäwäjiyatü pä'ü we'inä̧tü̧: —Chu̧ru̧wa̧, kua̧wa̧ru̧wa̧ repekuä'ijäkumä̧ na̧'ä̧chü̧, pä'ü.

⁴ Ja̧'wa̧nü̧ jittäwäku, Jesú-mä̧ päinä̧u̧: —Jua̧u̧ na̧wä̧chü̧mä̧ 'korujuoächa pä'ümä̧, na̧'ä̧cho̧kü̧; jua̧u̧nä̧mä̧ pärokuä Dio ujuru ttesewarü pä'ü ja̧'a̧ ja̧'wa̧ta̧nü̧ ji̧yȩnä̧tä̧ Dio I̧tti̧rü̧ ttesewa pä'ü.

⁵ Jesú-mä̧ Marta-rü'i̧nä̧, kkijäwaju María-rü'i̧nä̧ ja̧'wa̧ta̧nü̧ Rázaru-rü'i̧nä̧ rü̧ȩnä̧ repe'inü̧,

⁶ Ja̧'wa̧nü̧ ja̧'a̧nä̧, Rázaru-mä̧ na̧'ä̧chü̧do pätta'a ä̧ju̧kua̧'a̧nä̧, Jesú-mä̧, juȩnȩtä̧ todere mo̧ro̧ jo̧mȩnä̧ kki̧'i̧'o̧po̧'i̧nü̧.

⁷ Jua̧u̧nü̧ o'ka'a Jesú-mä̧ u̧wo̧juȩtä̧u̧rü pä'inü̧: Pä'äjita'anü̧ Judea-ra̧'a̧ ti̧'chä̧tu̧kua̧.

⁸ Pä̧u̧ u̧wo̧juȩtä̧u̧mä̧, pättinä̧ku̧: —Wo̧juȩkuä̧ i̧sa̧, ni̧po̧ ji̧nü̧mä̧ judío-mä̧, i̧nä̧ o'kinä̧ ikuäu kuä'ü ttikua pättäja'anä̧ ¿Pä'äjita'anü̧ kui̧'cha̧ päkua'a tä̧jí̧?

⁹ Jesú-mä̧ päinä̧u̧: —¿Mo̧ro̧mä̧, ttü̧jä̧pü̧ttü̧ todäre hora jo̧mȩnä̧ kko̧ka̧'a̧ tä̧jí̧? ja̧'wa̧nü̧ ja̧'a̧ttü̧ ya̧tȩ mo̧ro̧ kue'ächümä̧ ppe'okuächü ma̧'o̧kü̧, kkä̧wa̧ kkȩdȩpa̧'a̧ to̧ä̧ra̧'a̧ttü̧.

¹⁰ Ja̧'wa̧nü̧ ja̧'a̧nä̧, yodó kue'ächümä̧, ppe'okuächü ma̧'ü̧, to̧ä̧rü̧ tȩya̧u̧ juiya'attü.

¹¹ Pä'ü kä'ädü, yabonü̧ pä'inü̧: Ta̧wa̧ru̧wa̧ Rázaru ä'a'a topü 'chü̧sä̧, chü'orädarü pä'ü.

¹² Päomȩnä̧, u̧wo̧juȩtä̧u̧mä̧ pättinä̧ku̧: —Chu̧ru̧wa̧, isopäi'ünä̧ ä'ütä ä'üttümä̧ ü̧'i̧pä̧kua̧.

¹³ Jesú-mä̧, Rázaru 'korujuoächäja'a pä'anä̧, u̧wo̧juȩtä̧u̧mä̧ isopäi'ünä̧ ä'a'a pä'ü̧kü̧, pä'ütä amükuädinä̧tü̧.

¹⁴ Ja̧'wa̧nü̧ tta̧mü̧kuädiyäku Jesú-mä̧ wäjunä̧ ji'äu iku päinä̧u̧: —Rázaru-mä̧ 'korujuo'ächäji pä'üsä.

¹⁵ Ja̧'wa̧nü̧ päi'omȩ tü̧ja̧kuo̧ka̧'a̧ jä̧ja̧'a̧ttü̧ eseusä, ukuturumä̧ adiwa'a topü kuesetätukuäkua'anü̧. Täwä, totarü ti̧'cha̧.

¹⁶ Ja̧'wa̧nü̧ päiyäku, Tomá, ta̧ju̧winü̧ pä'ü ottinä̧ku̧mä̧ awaruwä, Jesú u̧wo̧juȩtä̧u̧rü pä'inü̧: —Ujutu'i̧nä̧, chutäku 'korujuotächa ti̧'chä̧tu̧kua̧.

Jesú-mä̧, tta̧'kua̧rü̧ ttoädäkuäwä i̧sa̧ ja̧'a̧

¹⁷ Jesú i̧'chi̧'o̧mȩnä̧mä̧, täkü, pa̧ja̧kuä̧nü̧ mo̧ro̧ ji̧na̧'a̧ Rázaru-rü wa'are rejunä̧ ttütäja'attümä̧.

¹⁸ Betania ütawiyämä̧ kki̧na̧'a̧, Jerusarȩ́-ttü̧mä̧ wäbodäkuä kilómetros jo̧mȩtä̧.

¹⁹ Ja̧'wa̧nü̧ ja̧'a̧, rekuätü judío-mä̧, Marta-rü'i̧nä̧, kkijäwaju María-rü'i̧nä̧, tti̧jä̧wa̧ Rázaru 'korujuoächäja'a ttajäkuäwiyä̧u̧ do'ächü tti̧'chä̧ja̧'a̧ ji̧na̧'a̧.

²⁰ Ja̧'wa̧nü̧ Marta-mä̧, Jesú ichüdo pätta'a ä̧ju̧kui̧pü̧ topo'ü 'chi̧nä̧ju̧, María-tä isodenä̧ kkü̧ji̧pa̧'a̧nä̧.

²¹ 'Chä̧wi̧'ü̧ Marta-mä̧, Jesú-ru pä'inä̧ju̧: —Chu̧ru̧wa̧, ukú pȩnȩ́ ku̧jä̧ji̧ttü̧mä̧, chi̧jä̧wa̧mä̧ 'korujuo'ächokü pajü.

²² Ja̧'wa̧nü̧ ja̧'a̧nä̧, wo̧jua̧ju̧sä̧ jitä'i̧nä̧ o'kajuiyünä̧ Dio-rü jäkuepümä̧ iyäkua̧jä̧ pä'ü.

²³ Päjäku, Jesú-mä̧ päinä̧kua̧: —Ku̧jä̧wa̧mä̧ tto̧ä̧chä̧kua̧.

²⁴ Päkuä, Marta-mä̧ pä'inä̧ju̧: —A̧, wo̧jua̧ju̧sä̧, yodoji mo̧ro̧, 'koru juo'ächinä̧tü̧ ttottächomȩnä̧, tto'ächä̧kua̧ pä'ümä̧.

²⁵ Päjiyäku, Jesú-mä̧ päinä̧kua̧: —Ttütäsä tta̧'kua̧rü̧ ttoädäkuäwä i̧sa̧mä̧, ttütäsä tta̧'kua̧rü̧mä̧. Ttürü esetümä̧ 'korujuoächaja pä'ü'i̧nä̧, pä'äjita'anü̧ ü̧jä̧kua̧.

²⁶ Ja̧'wa̧nü̧ ja̧'a̧ttü̧ o'katoi'ünä̧ a̧'kua̧rä̧tü̧, ttürü esetätümä̧ yoriso 'korujuo'ächokotü ttäkuotü. ¿Pa̧'a̧nü̧ pädümä̧ esetäjujä̧?

²⁷ Päomȩnä̧, kkädätinä̧ku̧: —A̧, chu̧ru̧wa̧; ukurumä̧ Crito-jä̧, Dio I̧tti̧, pi̧jä̧ra̧'a̧ i̧chä̧kua̧ pättinä̧ku̧ pä'ü esetäjusä.

Jesú-mä̧, Rázaru-rü ttütino̧mȩ topü ajuäwinü̧

²⁸ Pä'ü kä'ädi'ipütä, Marta-mä̧ kuijäwaju María-rü yä̧wȩi̧nä̧ o'opo'ü 'chä̧jä̧'kaju pä'inä̧ju̧: —Wo̧juȩkuä̧ i̧sa̧mä̧, pȩnȩtä̧ ichi'äji̧'ka̧ kkä̧nü̧, woäkuajä̧.

²⁹ Ä̧ju̧kuo̧po̧'ü̧ María-mä̧, rä'opächü yotäku Jesú-ru topo'ü 'chi̧nä̧ju̧.

³⁰ Jesú-mä̧ ji̧nä̧ ütawiyänä̧mä̧ doächi'oka'a, Marta ku̧'o̧kui̧'ä̧jo̧mȩtä̧ kki̧nü̧.

³¹ Ja̧'wa̧nü̧ ja̧'a̧, María jurunä̧ räjopächiyä̧u̧, juodenä̧ ttajuäkuäwiyä̧u̧ do'ächü ichäjä'kotü kka̧kuä̧tü̧ judío-mä̧, rui'inä̧tü̧ wa'are rejura̧'a̧ ajuäu 'cho̧ko̧ju̧ pä'ü.

³² Ja̧'wa̧nü̧ ja̧'a̧ María-mä̧, Jesú ü̧jo̧mȩ 'chä̧wi̧'ü̧ kkiwe'kiyunä̧, ü̧jä̧pü̧ jo̧mȩ pä̧mä̧dü̧ päjinä̧ku̧: —Chu̧ru̧wa̧, ukú pȩnȩ́ kkü̧jäji̧ttü̧mä̧, chi̧jä̧wa̧mä̧ 'korujuo'ächokü pajü.

³³ Ja̧'wa̧nü̧ ja̧'a̧ Jesú-mä̧, María'i̧nä̧ ja̧'wa̧ta̧nü̧ judío juäjutäku ichäjätü'i̧nä̧ ttajuäwa'a toomȩnä̧, a̧'kua̧nä̧ rü̧ȩnä̧ a̧'u̧rü̧jä̧chi̧'ä̧ku̧,

³⁴ Jä'epü ä̧ju̧kui̧nä̧u̧: —¿Tȩnȩ́ kutäjätukuärüttü̧? pä̧u̧, ttädätinä̧ku̧: —Chu̧ru̧wa̧, topächi.

³⁵ Pättäjäku Jesú-mä̧, topü ajuäwinü̧.

³⁶ Ja̧'wa̧nü̧ ajuäwiyä̧u̧ judío-mä̧ pä'inä̧tü̧. —¡Topätukui, rü̧ȩnä̧ repeä'ijäku ja̧'a̧!

³⁷ Ja̧'wa̧nü̧ ja̧'a̧ yotukunä̧ pä'inä̧tü̧: —¿Pide ä̧to̧ka̧rü̧'i̧nä̧ aditü ikuinü̧mä̧, Rázaru-rü'i̧nä̧ 'korujuoächü juiyünä̧ jȩa̧ pä'ümä̧ juiyina̧'a̧ tä̧jí̧?

Rázaru ttoächinü̧ wȩnȩ

³⁸ Jesú-mä̧ pä'äjita'anü̧ rü̧ȩnä̧ jakuänä̧, a̧'kua̧ tta̧'ȩku̧nü̧ wa'are rejuku ichinü̧. Juäjunä̧mä̧ i̧nä̧bi mü̧ȩkui̧na̧'a̧.

³⁹ Jesú-mä̧ pä'inü̧: —I̧nä̧bi pporädü ikuätukui. Päomȩnä̧, 'korujuo'ächäji ubüa o'kaju Marta-mä̧ päjinä̧ku̧: —Chu̧ru̧wa̧, täkü wawa'a, 'korujuoächäja'attümä̧ pa̧ja̧kuä̧nü̧ mo̧ro̧ ja̧'a̧.

⁴⁰ Jesú päinäkua̧: —Täkü jidäwäkuajä̧, kuesetüttümä̧, Dio ü̧rü̧ä̧ to'kuäkuajujä̧, pä'ü.

⁴¹ Ja̧'wa̧nü̧ ja̧'a̧, wa'are ttütäjäju ä'ka i̧nä̧bi pporädü ikuinä̧tü̧. Ja̧'wa̧nü̧ ja̧'a̧ Jesú-mä̧ mo̧ro̧jä̧ra̧'a̧ku̧ topü pä'inü̧: —Chä'o, ukuru eseusä, ttürü kuä̧ju̧kuä̧ja̧'a̧ttü̧.

⁴² Jua'akumä̧ 'kuäopünä̧tä̧ kuä̧ju̧kuä̧ku̧ cha'anä̧, pitü chippeyänä̧ ttü̧ja̧kui̧yä̧ku̧ pä'äjisä, weinä̧ku̧ ja̧'a̧ tä̧jí̧ pä'ü ttu̧wo̧juä̧kua̧'a̧nü̧.

⁴³ Pi̧yȩ pä'ü kä'ädü, wopi'inü̧: —¡Rázaru, juorü rä'opächi!

⁴⁴ Ja̧'wa̧nü̧ woi'omȩnä̧, 'korujuo'ächinü̧ päjimä̧, u̧mü̧pi̧yä̧'i̧nä̧, ü̧jä̧pi̧yä̧'i̧nä̧, i'ä'i̧nä̧ i̧sä̧ta̧ juäwa'atä räo'a'a, Jesú-mä̧ päinä̧u̧: —i̧'cha̧, ejä'chü ikuätukuirü.

Jesú-ru kuä'ü ttikua pä'ü ukuoku kku̧ni̧nä̧tü̧

⁴⁵ Ja̧'wa̧nü̧ ja̧'a̧, María-rü kkajuäwa'a topü ichäjätü judío-mä̧ rekuätü Jesú-ru esetinä̧tü̧, jua̧u̧ jȩü̧ topü.

⁴⁶ Ja̧'wa̧nü̧ ja̧'a̧nä̧ kkorotümä̧, Jesú jȩä̧ji̧ fariseo wotürü ji'äu 'chi̧nä̧tü̧.

⁴⁷ Ja̧'wa̧nü̧ ja̧'a̧mä̧, fariseo wotü'i̧nä̧, sacerdote tturuwotü'i̧nä̧, ji̧nä̧so ukuo isotürü ä̧tȩpo̧'ü̧, ka̧ka̧ku̧ pȩjä̧mü̧ pä'inä̧tü̧: —¿Däjetä jȩtä̧ku̧ttü̧? Jua̧u̧mä̧ jȩtto̧kü̧ juei rü̧ȩnä̧ jȩa̧'a̧mä̧.

⁴⁸ Ja̧'a̧tä̧ totüttümä̧, o'katoi'ünä̧tä̧ jua̧u̧ru̧ ttesetomȩnä̧; Roma ttü̧ja̧mä̧, tidepiyu'i̧nä̧, Dio-rü tukuokuä'ijode'i̧nä̧ si'epü ttikuäkuä̧u̧jä̧.

⁴⁹ Ja̧'wa̧nü̧ pättomȩnä̧, juätüttü ya̧tȩ Caifá pä'ü mi̧kua̧, jua̧u̧ año-nä̧ sacerdote ttu̧ru̧wa̧ päi'ünä̧ wa̧mä̧, päinä̧u̧: —Ukutumä̧, yoriso jerupätüjä̧,

⁵⁰ ja̧'wa̧ta̧nü̧ wo̧jui̧'o̧ko̧tü̧jä̧, isopäi'ünä̧ ttü̧ja̧sa̧ ya̧tȩtä̧ toe'ächa pä'ü rekuä rü̧ja̧'a̧, rekuätü tti̧mi̧nä̧mä̧ pä'ümä̧ ja̧'wa̧nü̧ jü̧ juiyüttümä̧ o'katoi'ünä̧tä̧ tote'ächäkuotüjä̧.

⁵¹ Ja̧'wa̧nü̧ Caifá pä'amä̧, chutä a̧mü̧nä̧ amükuädümä̧ pä'okü pinü̧; pärokuänä̧ jua̧u̧ año-nä̧ sacerdote ttu̧ru̧wa̧ ja̧'a̧ttü̧, Jesú-mä̧ judío-rü rettü 'korujuoächa pä'ü rekuä rü̧ja̧'a̧ pä'ü pä'inü̧.

⁵² Suro juätü judío-rü ja̧'a̧tȩ'ü̧tä̧mä̧kü̧, kko̧ro̧jä̧nä̧ kka̧kuä̧tü̧ Dio i̧tti̧mü̧ judío-rümä̧ ü̧ka̧ka̧ta̧ pä'ü ja̧'a̧, pä'ü pä'inü̧.

⁵³ Ja̧'wa̧nü̧ ja̧'a̧ttü̧, jua̧u̧nu̧tä̧ mo̧ro̧, Jesú-ru kuä'ü ttikua pä'ü amükuädü kku̧ni̧nä̧tü̧ ukuo isotümä̧.

⁵⁴ Ja̧'wa̧nü̧ ja̧'a̧ttü̧, Jesú-mä̧ täkü judío-tü̧ ttü̧'kä̧tȩnä̧mä̧ wäjuönä̧mä̧ kue'ächokü pinü̧, ja̧'wa̧nü̧ jä̧ku̧ judea rȩjȩttü̧ rä'opächinü̧, tü'künä̧nü̧, Efraín pä'ü mikuomȩku̧; jua'atä kki̧nü̧ u̧wo̧juȩtä̧u̧ku.

⁵⁵ Ja̧'wa̧nü̧ ja̧'a̧ judío-tü̧ jȩttä̧'i̧jü̧ pä'käri, pacua-mä̧ täkü tü'kü ji̧na̧'a̧. Ja̧'wa̧nü̧ ji̧yä̧u̧ rekuätü Jerusarȩ́-ra̧'a̧ 'chi̧nä̧tü̧, jua̧u̧ Pacua ä'kanä̧ surojü tükäu ttikua pä'ü.

⁵⁶ Ja̧'wa̧nü̧ ja̧'a̧, Dio-rü ukuokuäkuäwodettü Jesú-ru u̧sä̧rü̧ pä'inä̧tü̧: —¿Toku päkuätukuättü̧? ¿Pi̧yȩ pä'kärira̧'a̧mä̧dí̧ ichokü jä̧kua̧?

⁵⁷ Ja̧'wa̧nü̧ ja̧'a̧, fariseo wotümä̧, sacerdote tturuwotü'i̧nä̧, Jesú-ru tottüttümä̧, jittäwa pä'ü we'ü ttu̧ju̧nä̧ja̧'a̧ ji̧na̧'a̧, 'chuttädarü pä'ü.