San Juan 10 - Nuevo Testamento Uwotjüja

Oweja-tü̧ku̧, ttu̧ru̧wa̧ku̧ wȩnȩtü̧ ji'äwinü̧

¹ Ja̧'wa̧ta̧nü̧ isopäi'ünä̧ pädäu̧jä̧, pä'inü̧ Jesú: Oweja-tü̧ tto̧ka̧ku̧ doächomȩnä̧, äpatenä̧ do'ächoka'a, päte'ünä̧ do'ächümä̧, su̧ro̧pa̧tä̧, nä̧u̧kuä̧rä̧kuä̧wä̧ i̧sa̧tä̧ wa̧ ja̧'a̧.

² Ja̧'wa̧nü̧ ja̧'a̧nä̧, äpatenä̧ do'ächümä̧ oweja-tü̧ ttu̧ru̧wa̧ ja̧'a̧.

³ Äpate tta̧wä̧rä̧kuä̧wä̧ i̧sa̧mä̧, jua̧u̧ru̧tä̧ ba'epü; bawepäku do'ächi'ü, ya̧ku̧nä̧ tti̧mi̧pi̧yä̧ pünä̧ wo̧ä̧u̧, i̧wȩnȩ ttu̧wo̧jua̧'a̧ttü̧ ttä̧ju̧kua̧'a̧, rä'epü kue'ädü i̧'chä̧u̧.

⁴ Ja̧'wa̧nü̧ räepäja'amä̧, o'katoi'ünä̧ ttä'kanä̧ 'chü̧; oweja-tü̧mä̧ i̧wȩnȩ ttu̧wo̧jua̧'a̧ttü̧ chutä o'ka'anä̧ 'chä̧tü̧.

⁵ Ja̧'wa̧nü̧ ja̧'a̧nä̧, ttieruwäku o'ka'anä̧mä̧ 'cho̧ko̧tü̧; pärokua'aku, dü'ekuächütä dü'ekuächätü, tturuwotü pokotü tti̧wȩnȩ ttieruwa'attü̧.

⁶ Jesú-mä̧ pi̧yȩnä̧ wȩnȩtü̧ jiäwa'anä̧, jiäumä̧ ttu̧wo̧jui̧pü̧juiyünä̧ ji̧nä̧u̧:

Jesú-tä ja̧'a̧ ji̧nä̧so oweja-tü̧ ttu̧ru̧wa̧mä̧

⁷ Jesú-mä̧ pä'äjita'anü̧ päinä̧u̧: Isopäi'ünä̧ pädäu̧jä̧: Ttütä ja̧'a̧, äpate oweja-tü̧ dodettatemä̧.

⁸ Isopäi'ünä̧ ttü chä'kanä̧ ichinä̧tü̧mä̧, nä̧u̧kuä̧rä̧kuä̧wä̧ isotü ji̧na̧'a̧ ja̧'wa̧nü̧ ja̧'a̧ttü̧ oweja-tü̧mä̧ ttä̧ju̧kuo̧ko̧u̧ pinä̧tü̧.

⁹ Ttütä ja̧'a̧, Dio weü äpatemä̧; Ttünä̧ do'ächümä̧ surojüttü ü̧ji̧pä̧kua̧. Doächomȩnä̧'i̧nä̧, räopomȩnä̧'i̧nä̧, u̧kuȩmä̧ ü̧'o̧kui̧'ä̧kua̧.

¹⁰ Nä̧u̧kuä̧rä̧kuä̧wä̧ i̧sa̧mä̧: nä̧u̧ku̧tä̧, kuä'äu ikutä, si'epü ikutä ichü; ja̧'wa̧nü̧ ja̧'a̧nä̧ ttümä̧ a̧'kua̧rä̧kuä̧wä̧, rü̧ȩnä̧ ttu̧ju̧nä̧ra̧ pä'ü ichinü̧sä̧.

¹¹ Ttütäsä ji̧nä̧so oweja-tü̧ ttu̧ru̧wa̧mä̧. Ji̧nä̧so, oweja-tü̧ ttu̧ru̧wa̧mä̧, juätü jäwänä̧ a̧'kua̧rü̧ iyäu.

¹² Ja̧'wa̧nü̧ jo̧ka̧'a̧, mikuänä̧ aditü oweja-tü̧ ttu̧ru̧wa̧mä̧; chutä'i̧nä̧ ä̧ji̧mü̧ jo̧ka̧'a̧ttü̧, Robo ichi'omȩnä̧ tü'ipächü, i̧kui̧pä̧u̧ru̧ pperetü iku Rowomä̧.

¹³ Ja̧'wa̧nü̧ ja̧'a̧ttü̧ mikuänä̧ aditümä̧, tü'ipächü; pärätätä repe'ü, oweja-tü̧rü̧mä̧ repeoka'attü̧.

¹⁴ Ttütäsä ji̧nä̧so adiwänä̧ oweja-tü̧ ttu̧ru̧wa̧mä̧; chä̧ji̧mü̧ oweja-tü̧rü̧mä̧ wo̧jua̧sä̧, pärokua'aku ttürü'i̧nä̧ wo̧juä̧tü̧,

¹⁵ Ttürü'i̧nä̧ Chä'o u̧wo̧juö̧ta̧'a̧nü̧, pärokua'aku Churutä'i̧nä̧ wo̧jua̧sä̧; ja̧'wa̧nü̧ ja̧'a̧ttü̧, cha̧'kua̧rü̧mä̧ chä̧ji̧mü̧ oweja-tü̧rü̧ iyüsä.

¹⁶ Ja̧'wa̧ta̧nü̧, kkorotü oweja-tü̧ po̧ka̧nä̧ kka̧kuo̧ko̧tü̧rü̧'i̧nä̧ kku̧nä̧rü̧sä̧; juätürü'i̧nä̧ chi̧'chä̧chä̧kua̧sä̧, chi̧wȩnȩ ttä̧ju̧kua̧'a̧ttü̧; ja̧'wa̧nü̧ jo̧mȩnä̧ oweja-tü̧mä̧, ji̧nä̧ yo̧mȩtȩ ttu̧ru̧wa̧ku̧ ttü̧ja̧kuä̧kuo̧tü̧.

¹⁷ Ja̧'wa̧nü̧ ja̧'a̧ttü̧ Chä'omä̧ repeäkusä, cha̧'kua̧rü̧ chiyäwa'attü, pä'äji jä̧ji̧ta̧'a̧nü̧ chȩma̧ pä'ü.

¹⁸ Ya̧tȩ'i̧nä̧ cha̧'kua̧rü̧ 'cho'ipümä̧ toa'a, ttütätä chu̧ju̧nä̧wa̧'a̧ttü̧. Chujuru kku̧nä̧rü̧sä̧ chiya pä'ü'i̧nä̧ ja̧'wa̧ta̧nü̧ ppa̧'a̧dü̧ chȩma̧ pä'ü'i̧nä̧, jü̧nä̧. Pi̧yȩ jȩcha̧ pä'ü weinä̧ku̧sä̧ chä'omä̧.

¹⁹ Pa̧'a̧nü̧ päomȩnä̧, judío-mä̧ pä'äjita'anü̧ pä'ä'chäkuäwinä̧tü̧.

²⁰ Juätüttü rekuätü, pä'inä̧tü̧: —¿Tta̧'a̧nü̧ pä'ü kuä̧ju̧kuä̧tu̧kuä̧ku̧ttü̧, Roco juo'ächü, epíritu su̧ro̧pa̧rü̧ kku̧nä̧rü̧rü̧mä̧?

²¹ Pätta'anä̧ kkorotümä̧, pä'inä̧tü̧: —Pi̧yȩ ukuokumä̧ epíritu su̧ro̧pa̧ jäwämä̧kü̧. ¿Jua̧u̧nu̧mä̧, epíritu su̧ro̧pa̧mä̧ ä̧to̧kä̧tü̧rü̧'i̧nä̧ aditü iku tä̧jí̧?

Judío-mä̧ Jesú-ru ya'okuinä̧tü̧

²² Jerusarȩ́ ütawiyättü, Dio-rü ukuokuäkuäwode jäwä pä'käri Dio-rü eseu jȩtto̧mȩnä̧, a̧'ȩnä̧ ji̧na̧'a̧.

²³ Jesú-mä̧ juodettü Saromón pä'ü mikuate äpatenä̧ kue'ächinü̧.

²⁴ Ja̧'wa̧nü̧ ja̧'a̧ judío-mä̧ ka̧ka̧kui̧pü̧ pättinä̧ku̧: —¿Ti̧yȩnü̧bü päi'ünä̧ kuäppü̧tä̧rä̧kuä̧u̧jä̧ttü̧? Isopäi'ünä̧, Crito kuttümä̧, ya'uteku wäjuönä̧ ji'äwitü.

²⁵ Jesú-mä̧ ädätinä̧u̧: —Jidäwä'ijä̧u̧jä̧, jidäwa'anä̧ kuesetätukuokoku pä'ijüsä. Chä'o i̧mi̧nä̧ jȩchä̧'i̧jü̧mä̧, ji̧yȩtä̧tä̧ i̧jȩpa̧'a̧ ttü chütü'kümä̧.

²⁶ Ja̧'wa̧nü̧ ja̧'a̧nä̧, ukutumä̧ kuesetätukuokokusä, ttü chä̧ji̧mü̧ oweja-tü̧ kuätukuoka'attü̧.

²⁷ Ttü chä̧ji̧mü̧ oweja-tü̧mä̧, chi̧wȩnȩ ä̧ju̧ku̧mä̧ wo̧juä̧tü̧, pärokua'aku ttü'i̧nä̧ chu̧wo̧juä̧u̧ ja̧'a̧ttü̧ cho'ka'anä̧ ichätü.

²⁸ Juätürümä̧ kkä̧kuä̧wä̧ i'ko iyüsä; ja̧'wa̧nü̧ ja̧'a̧ttü̧ yorisotä to'e'ächokotü ttäkuotü ja̧'wa̧ta̧nü̧ juätürümä̧ ya̧tȩ'i̧nä̧, ttü chu̧mü̧ttü̧ 'cho'ipokotü ttäkuotü.

²⁹ Juätürü, ttürü iyinü̧ Chä'omä̧ o'katoi'ünä̧tä̧ ttu̧wä̧mȩnä̧ wa̧, Jua̧u̧ Chä'o u̧mü̧ttü̧ 'cho'ipätümä̧ ya̧tȩ'i̧nä̧ toa'a.

³⁰ Chä'oku, ttükumä̧ ji̧nä̧ ji̧yȩtȩ wotüjä̧.

³¹ Päomȩnä̧, judío-mä̧ pä'äjita'anü̧ i̧nä̧ o'ki ȩmo̧po̧'i̧nä̧tü̧ ikuäu ttikuarü pä'ü.

³² Jȩtti̧pi̧yä̧ku̧ Jesú-mä̧ päinä̧u̧: —Chä'o ujurunä̧mä̧ rü̧ȩnä̧ adiwä juei jȩpä̧'i̧jü̧sä̧; ¿Jua̧u̧ jä̧'i̧jü̧ttü̧mä̧, ti̧yȩ suronä̧ jȩchä̧'i̧ja̧'a̧, ttürü ikuäu kuä'ü kuikuätukua päkuätukua'ajä̧ttü̧?

³³ Judío-mä̧ ttädätinä̧ku̧: —Adiwä juei jȩ'kuä̧'i̧jü̧nä̧mä̧, i̧nä̧ o'kinä̧ ikuäu kuä'ü tikuakumä̧ pätokokujä̧; Dio-rü suronä̧ pä̧kuomȩttü̧ jȩtä̧ku̧jä̧: ukumä̧ ttü̧ja̧sa̧ kua'anä̧, kua̧mü̧nä̧ pa̧ja̧tü̧ Dio 'kua̧rü̧nä̧ päkuäwomȩttü̧.

³⁴ Pättäku, Jesú-mä̧ ädätinä̧u̧: —¿Ukuturu weäwä wȩnȩnä̧mä̧, päoka'a: «Ukutumä̧ ttü̧ä̧nä̧wo̧tü̧jä̧ pädäjä̧u̧jä̧»?

³⁵ Dio i̧wȩnȩ rȩbȩwi̧nä̧u̧ru̧, ttü̧ä̧nä̧wa̧tü̧jä̧ päinü̧ttü̧mä̧ (wȩyu̧kuä̧ wȩnȩmä̧ jueünä̧ pä'akutä ja̧'a̧).

³⁶ Isopäi'ünä̧ Dio pätetü weinä̧ku̧ru̧mä̧, Dio-rü suronä̧ pä'ü pä'ätüjä̧, Dio i̧tti̧sä̧ pädomȩttü̧.

³⁷ Chä'o aditäwä chaditü juiyüttümä̧, kuesetätukuättü.

³⁸ Ja̧'wa̧nü̧ ja̧'a̧nä̧, ttürü kuesetätuku juiyüttü'i̧nä̧, jua̧u̧ jȩchü̧ttü̧tä̧ topü esetätukui; Chä'o ttünä̧ ü̧jü̧'i̧nä̧, pärokua'aku Chä'onä̧ Ttü chü̧jü̧'i̧nä̧, jü̧mä̧.

³⁹ Päomȩnä̧, pä'äjita'anü̧ 'chuttädarü pä'ü jȩtti̧pa'anä̧, ttu̧mü̧ttü̧ tiro'kui'ü Jesú-mä̧ tüipächini̧yä̧u̧.

⁴⁰ Tü'ipächäji̧'ka̧, pä'äjita'anü̧ Jesú-mä̧ Jordán aje ji̧jä̧ku̧nä̧ kki̧nü̧. Ju̧a̧ bautizo jȩpü̧ ü̧ji̧no̧mȩ.

⁴¹ Jua'atä ü̧ja̧'a̧, ttü̧ja̧ rekuätü topü 'chä̧tü̧mä̧ pä'inä̧tü̧: —Isopäi'ünä̧ Ju̧a̧-mä̧ jȩtto̧kü̧ ja̧jü̧ jueimä̧ jȩpo̧kü̧ pinü̧ ja̧'wa̧nü̧ ja̧'a̧nä̧ pide ütü'kü jiäwinü̧mä̧, o'kajuiyünä̧ isopäi'ünä̧tä̧ ja̧'a̧.

⁴² Ja̧'wa̧nü̧ ja̧'a̧ttü̧, juorümä̧ rekuätü Jesú-ru esetinä̧tü̧.